|
يا إدارة المنتدى أنصفونا من غسان نايفة
بسم الله الرحمن الرحيم
تفاجأت بأن جميع ما أكتبه عن الدكتور غسان نايفة يحذف ؟؟؟؟ وأنا أسألكم بالله وش تبون نسوي في رجل أعطانا ثلاث ملخصات وقال الاختبار يبي يجي منهن لا ولزيادة التضليل يقولك ((( أحذفوا قطعت آلينا "" هاض ماراح تجيكم في الاختبار "" ))) والله وتالله وبالله وأيم الله أني جايب مدرسين أنجليزي ( واحد الحصة بخمسين والثاني الحصة بمية ) على شان الملخص الي أعطانا إياه واخرته يمسكن الهوى ويضرب فينا عرض الحائط ومن زين الطبع جواله مقفل والا والله يانا ناويه بمكالمه بتبرد الكبد إن شاء الله أسألكم بالله يا أدارة المنتدى وش تبون بعد هذا كله نسوي تبون نسبح بحمد غسان ونقدس له !!!!!!!!!!!!!! والله يادعوتين في ظهر الغيب وفي السحر وفي أخر ساعة من الجمعة ماراح تخطيه إن شاء الله هذي سهامي ياغسان راح أرسلها عليك والله يتولى أمرك أجل تسفيه الرجال والضحك على دقونهم يبي يمر كذا لا والله هو إن جاء إليا لن يلاقي فرجا **** قسم مني ووعد لا نجوت إن نجا . يا إدارة المنتدى جزاكم الله خير النصفه النصفه تكفون لا تظلمونا زود على هالظلم أقسم بالله لو الدكتور غسان ساكت كان ماقلنا شيء لكن يعطينا ملخص ويقول أدعوا لأختي بالرحمة وبعدين ينزل استدراك ويقول لا تذاكرون قطعة آلينا حسبي الله عليه حساب عسير ولا حول ولا قوة إلا بالله |
رد: يا إدارة المنتدى أنصفونا من غسان نايفة
الواحد صار يخاف حتى من الرد :000:
|
رد: يا إدارة المنتدى أنصفونا من غسان نايفة
اخوي سبق و انظلمنا مثلكم بالترم الماضي صارت نفس السالفه مع دكتور جزاء في اختبار النحو 1 جاب لنا اسئلة ما احد قدر يحلها
وصارت مواضيع نفس اللي صارت مع دكتور غسان و كلها تم حذفها مو بس لانها تطاول على احد الدكاترة لان حتى الاعضاء بينهم و بين بعض صار فيه تبادل بكلام ماله داعي حنا هنا اخوان و لا نبي احد يشيل على الثاني اذا من اولها صار فيه هواش و زعل بينكم شلون بتكملون بعدين بيختفي التعاون بينكم لان مافي احد ينسى انه فلان / ة سبق و تطاول عليه بالكلام و هذا الموضوع واضح و صريح جداً تفضلوا ادخلوا عليه http://www.ckfu.org/vb/t185937.html#post3628542 و للمعلوميه ترا اختبارنا مستوى ثالث انجليزي لمادة القراءات و المطالعات اللي يدرسها د. غسان صار معنا نفس الشي جاب لنا قطع ما ندري من وين ماهي بالمنهج كله اذا تبون ادارة الجامعة تشوف موضوعاتكم عن د. غسان فيه منتدى النقاش هناك ممكن د. النجار و غيره يطلعون على هالموضوع و ان شاء الله بيلقون لكم حل و بتعدون المادة و ما احد راح يحملها عسى ربي يوفقكم و يسهل عليكم كل صعب |
رد: يا إدارة المنتدى أنصفونا من غسان نايفة
و على فكرة اخوي ماهي موضوعاتك بس اللي تم حذفها كل الموضوعات الي عن د. غسان تم حذفها
|
رد: يا إدارة المنتدى أنصفونا من غسان نايفة
وش بلاكم شبآب بنآت
الرجآل مآهو بملزوم يعطيم ملخصآت او اي شي يسهل عليكم بآمكانه يقول ثلاث كلمات مثل ماقالوها كمن دكتور الله يسامحهم " شاهد المحاضرة والملزمه وارجع للكتاب" يعني هذا الي تبغونه ؟؟ الدكتور متساعد معنا الى اقصى حد وش تبغون اكثر من كذا ؟ لكن زي ماقال الدكتور كتور اذا اكرمت الكريمـ ................ وكان صادق بهالشي وهذا الكلام للعموم مو لصاحب الموضوع ولا تاخذ الموضوع شخصي يعني دمتم |
رد: يا إدارة المنتدى أنصفونا من غسان نايفة
اقتباس:
أختي الله يجزاك الجنة حاولي تفهمين علي بارك الله فيك أنا مو على سهل الأسئلة والا صعبها خليه يحط الي يبي بكيفه لكن لا يعطيني ملخص ويقول ذاكره وادع لأختي بالرحمة وبعدين ينزل بالبلاك بورد يقول أحذفوا قطعة الينا ماراح تجي ثم نفاجاء بأن الملخص كله ماجاء منه شيء فهمتي هالحين بارك الله فيك أن المسألة ماهي صعب الأسئلة والا سهلها الأمر فيه إستغفال للطلاب وظلم عجيب |
رد: يا إدارة المنتدى أنصفونا من غسان نايفة
اقتباس:
لكن يعطيني ملخص ويقول ذاكر هالملخص وأخرها مايجي شي من الملخص هذا الي يخلي الواحد يقهر أي كريم وأي لئيم بارك الله فيك اللئيم هو الي يخدع العالم بالمكر والحيلة وأحقاد في نفسه مايعلم بها الا الله ياخي أختبرنا العقيدة وقلنا للدكتور العقيل جزاك الله خير يادكتور مع أنه قال شاهدوا المحاضرات لكن رجل جاك في وجهك وقال ذاكر تنجح ماهو يجي ويقول ذاكر هالملخص وبعدين يجيب أسئلة من راسه |
رد: يا إدارة المنتدى أنصفونا من غسان نايفة
بإذن الواحد الأحد الفرد الصمد بننجح
الله ما يضيع اجرنا واجرك Forget :oao: |
رد: يا إدارة المنتدى أنصفونا من غسان نايفة
ادري و ادري انكم مقهورين و صدقني سواها فينا قالنا بتجيكم القطع اللي احلها معكم بالمحاضرات فقط
و اتفاجأنا بأن القطع خارجيه وحده عن التطعيس و الثانيه عن الاعشاب وهم ولا قد مروا علينا خير شر |
رد: يا إدارة المنتدى أنصفونا من غسان نايفة
الى الان فيه ناس مو فاهمه حنا ليه معصبين من الدكتور غسان
يحسبون ان عشان القطع خارجيه ترى والله نعرف ان من حق الدكتور انه يحط اللي يبي ومتوقعين هذا الشي من لمى دخلنا هالجامعه بسسسسسسس الاعتراض انه اوهمنا بقطع غييير وقالنا ذاكرو منها راح تجيكم وحذف بعدين قطعة الينا على اساس يسهلها لنا يعني اعتراضنا على كذببببه وغدره لنا لو قال بجيب قطع ولو حتى ما اتكلم كان عادي بس يتحايل علينا بطريقة بزراان ماتليق فيه كدكتور وما تلقين فينا كطلاب |
رد: يا إدارة المنتدى أنصفونا من غسان نايفة
ابو رشيد استهد بالله و اسمعن .. انت جايب مدرسيين .. انا اخذ دوره بكبره و لو تشووف الملخصات عندي و الطباعه [ قسم ان تقول مطبعة المجره ] شف انا معك آكلهآ خابور ، و لكن اذا رجعنا للمنطق فاللوم علينا كلنا . لاننا نثق بالدكاتره و الاهم اننا ما نثق بأحد .. يعني امر مرور الكرام ع قطعة الينا .. < حتى لو قال محذوفه [ اخاف يمقلبنا فيها ] .. ----------------------------- و خلك مؤمن ان الامور زينه و بتتيسر .. و لا تلتفت للماضي ترا النحووو صعب و انا و الله شايلن همه بالحيل .. ذاكر يا بعد راسي و فالك المعدل الطيب ’’ ولو تبي نسج اي واحد بقصيدة هجاء ابشر :biggrin: < بس بالعاميه موفق للجنه يا بعدي ’’ |
رد: يا إدارة المنتدى أنصفونا من غسان نايفة
اقتباس:
هذي هي قعطت جهيزة قول كل خطيب صدقتي بارك الله فيك هذا هو محل العتب والغضب :017: |
رد: يا إدارة المنتدى أنصفونا من غسان نايفة
أخـوي لاتحرق قلبك زيـادة ذاكـر مـادة اليوم عشـان مـاتتحسر على مـادتين !! من جـد موب قادره أطلع الـ e من راسي بس أحـاول عشـان لا أجيب الكرسميس في النحـو وأزيد الطين بله !! الله يعوضك ويعوض الجميـع وفـالك النجـاح وبدرجـة موب على البـال يااااارب والجميع اللهم آمين |
رد: يا إدارة المنتدى أنصفونا من غسان نايفة
اقتباس:
حياك الله والنحو يبي الله يعين عليه إن شاء الله بالنسبة للقصيدة هي حلاته بالعامية عطني منها كم بيت وانا أرسلها على جوال الخابور ،،،، قصدي الدكتور :017: |
رد: يا إدارة المنتدى أنصفونا من غسان نايفة
صدقوني الكلام كله ماراح يفيد الان اللي صار صار اهم شي تركزون على اختبار اليوم
ترا النحو 1 يجيب الهم و الجلطه يا عليه اسئلة كانت كل امثلته خارجيه :000::bawling: يعني انا ذاكرته من قبل الاختبار بوقت و جبت وحده تشرح لي المادة و حالتي حاله و حمدت ربي اني عديتها قمت احل بالاختبار على كيفي الجواب اللي تطيح عيني عليه اول شي اختاره :000: |
رد: يا إدارة المنتدى أنصفونا من غسان نايفة
الي يقولون صار مثلنا مثل ما صار المستوى الي فات يسمح لي غلطان لان مواضيع جزاء المصاروة ما انحذفت مثل ما انحذفت مواضيع ولد نايفة وانا اتذكر زين كيف كانت الاهانات والشتائم على دكتور النحو المستوى الفايت فياليت تكونون منصفين مثل ما تفضل اخوي وتتركو المواضيع وتخلو الطلاب والطالبات يعبرو عن انفسهم وما له داعي التهديد بوقف حساب العضو لان هذا بيهز من مصداقية وثقة الطلاب والطالبات في المنتدى وبيكون فيه تحفظ في كل مشاركه او موضوع فنحن نطالب بالحرية في الرأي لا اقل ولا اكثر
|
رد: يا إدارة المنتدى أنصفونا من غسان نايفة
واحد وعشرين موضوع عن د.غسان ....وشكله هذا بيكمل 22 ...في المحذوفات ..
والله من حقهم يحذوفها ..رح افتحها كلها وقلي وش الجديد ..كلها تجريح وغيبه .. اذا حتى مستوى ثالث سار لهم نفس الشي ..فهذا يجعلني اؤمن اكثر واتاكد ..بان في الامر شي دكتور غسان ما اردهـ.. انا مثلكم ماحليت ..ماني هنا محاميه عنه..لكن السالفه عنوانها ..ماهو الشي الذي لانعلمه ..ويحدث خلف الكواليس بالتوفيق لك .. ياترى هل سيبيت موضوعك هناا ..ام سيفضل السكن في فندق اخرر ,, |
رد: يا إدارة المنتدى أنصفونا من غسان نايفة
والله شيء عجيب .. الدكاتره بعضهم الله يعطيهم الصحه والعافيه يحسبوننا انتظام
او انهم مافكرو وش الضغط اللي يجينا مواد كثيره ومواد صعبه ومافي اي طريق للتواصل مع الدكاتره غير ارقام جوالاتهم والى الان ماعمري فكرت اتصل عليهم مدري حسيت انه مالها داعيه مع اني لو احتجتها والله لادق ولا علي منهم لو افجر الجوال عليهم لكن المشكله وين المششكله انهم الحين مساوينا بالانتظام الانتظام مايتعبون كثرنا ماعندهم بلاك بورد يطفشهم ماعندهم قوانين تعلهم مانعرف كم عدد مشاركاتنا الا قبل نهاية الاختبارات بيومين عندهم درجات نجاح وحنا نحمل مواد على درجه ودرجتين ناقصينها في شيء اسمه 5 درجات رحمه يزيدونا الله لايهينهم :bawling: هذا دكتور جزاء :bawling:حملت مادته نحو تطبيقي 1 المستوى الاول وعلى كم درجه اقل من 5 درجات و خايفه اخذها وارسب مره ثانيه تحطمت على انها جد جد صعبه واسئلته غريبه توقعت اني ماذاكرت زين لكن وربي كثير اعرفهم نفسي بس انهم نجحو عالحفه :icon9: ولا بعد بيدرسنا نحو تطبيقي 2 وبعد هذا مااخذته خايفه من هالدكتور وبصراحه ماودي ارسب واتعب نفسي :icon9: والدكتور الثاني غسان :icon9: المستوى الاول رسبت فيه وانا مصدومه كنت متوقعتها اخر ماده احملها مو عشان شطارتي فيها لا والله امحق شطاره بس يعني حسيت الماده سهله مو ذاك الصعوبه لكن الانجليزي مره يحتاج وقت كبير وخصوصا القطع تنفقع عيوني فيها :icon9: وقلت باخذ هالماده بهالمستوى عشان ماانسى ماتصدقون وشلون فرحت بالملخصات وسع صدري وخاطري وكل شيء فيني لدرجه اني ماشلت همها :icon9: والحمدالله ذاكرت بكل جهد لدرجة انه ماكان في وقت معي وصرت احفظ اجوبة الملزمه عشان يمديني اخلص والله اني احفظهم حفظ مو فهم فيه اشياء ماني فاهمتها واحفظها واختبر نفسي بورقه ثانيه :icon9: لما جاء الاختبار صرت احل بكل حماس يعني الحمدالله كان نوعا ما زين عالاقل حسيت اني حليت اشياء صح بس لما شفت القطع تحطمت مدري من وين جايه واتوقع انه على كل قطعه 10 اسئله ان ماخاب ظني يعني قولو 20 درجه :icon9: وحليت ومدري عن حلي مع انه الاجوبه بالقطعه بس لحد يقول سهله وماسهله وكل سالفتها انك تدورين الجواب منها عيوني راحت فيها نظري الظاهر بينقص زود من الدوائر ومن هالقطعه اللي مدري وش تقول شيء افهمه وشيء لا هو ماقصر ونزلنا القواعد والكلمات وفيها اخطاء بالاجوبه واخطاء واضحه بس وش نسوي حتى احترت ياربي بالاختبار لاجوني هالاسئله اللي اجوبتها خطا احلها مثل ماحلها لنا ولا على حلي الصحيح همي بس انجح والله انه امي شالت همي بهالماده خافت احملها مره ثانيه وحليت وتوكلت على الله وقعدت اراجع وماطلعت من القاعه الا قبل 5 دقايق من انتهاء الوقت لو علي كملت كل هالوقت بس ماودي بالزحمه برا :icon9: يارب يارب يارب يارب نجحنا يارب :icon9: ولا تنقهر كبودنا :icon9: والدكاتره ليتهم يحنون علينا ويسهلون علينا يكفي قعدتنا عالاب توب بديت اطفش من شيء اسمه لاب توب والسبب البلاك بورد وتحميل ملازم وغيرها :icon9: عذراً طوولت وخذيت راحتي بالرد .. انبسطت اني اقدر افضفض هنا :icon9: سامحوني :bawling: |
| All times are GMT +3. الوقت الآن حسب توقيت السعودية: 03:06 PM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd.
Content Relevant URLs by vBSEO 3.6.1 جامعة الملك
الفيصل,جامعة الدمام