حلـوة ولا يحتــاج زايــد حــلاوه
يكفيك من معنى الحلا ربع مافيك
زين العرب عادي وزينك نقـاوه
سبحان رب يوم خلقك مســـويــك
أعطاك من زين الحظر والبداوه
تهتي بزينك والبـها صار مطـغـيك
غصنك ليا هب الهوا به طـراوه
والرجل تقصر عنك والنفس تبغيك
انـتي بعـيد عنك معنى القـسـاوه
يافــتـنة كـل الغـنج في تـثـــــنـيـــك
لولا اني أخشى تحسبيها عداوه
لافرح بحبسك عن عــيون تراعيك
أنا بـلا شـوفــك حـيــاتـي شـقاوه
والقى الفرح من كلمة بين أشافيك

والله اني مفارق شعر الغزل
بس من شفتك وأنا ببحره غريق
كامل الأوصاف والحسن اكتمل
كملك ربي وخصك بالخليق
من كحل عينك عيوني تكتحل
وان تناظر بي يجي بعيني بريق
القمر وان شاهدك غاب وأفل
يستحي في محجر عيونك يويق
صورك ربي سبحانه وجل
تاج زين الكون بك وحدك يليق
القصايد كلها لك والجمل
تستحق الشعر دامك تستذيق
ياصلك شعري وأنا مابعد أصل
كل ما أقدم دروبك لي تضيق
ارتويت الشعر فيني للثمل
وصرت أهوجس في قصيدي وأستريق
ليتني يازين في عمر الجهل
وليت ربي ماجعلني لك عشيق
قبل أعرفك كنت مو هاوي غزل
ومن عرفتك شب في قلبي حريق