ملتقى طلاب وطالبات جامعة الملك فيصل,جامعة الدمام

مرحبا بالغايب اللي غاب ووحشني غيابه
غيبته فتره طويله من زمن ماهو قصيّر

يوم جاني فز له قلبي ورحب ياهلابه
جاء على خبره... ومن خبره مكانه ماتغيّر

والله إن الدار داره وإن باب القلب بابه
ومسكنه قلبي وعيني بس يدخل ويتخيّر

أنورت كل الدروب المظلمه والشوق جابه
في قدومه كل دربٍ في طريقه صار نيّر

ياحبيبي لا يضايقك الخجل ... وأنس الكآبه
شاعرك باقي على خبرك دخيلك لا تحيّر

أرم همك فوق كتفي وأترك الليل وعتابه
وأرقد آمن داخلي وأدفيك يالريم المذيّر

ولا يكدر خاطرك شيءٍ جرى والله قضاء به
يصبر أبن آدم على أمر الله مدام أنه مسيّر

يقبله وأجره على ربه وصبره واحتسابه
لايضيع الأجر دام الآدمي ماهو مخيّر

وأنت خذني في سماك شوي ياموحش غيابه
وأنفض غبار السوالف عن زمن ماهو قصّير

شعر/ البنفسجي