 |
|
||||||
| ملتقى المواضيع العامة منتدى المواضيع العامة والنقاش الهادف |
 |
|
|
أدوات الموضوع |
|
#1
2012- 2- 11
|
||||
|
||||
|
بعد عِشرة سنين ... لا زلت سر خطير في حياة زوجي؟
السلام عليكم ورحمة الله وبركاته المشهد الاول يرن جرس الجوال يرد زوجي ... حلالي ... نصفي الاخر يا هلا والله كيفك يا بعدي تمام كيفكم طيبين فديتك .. ما انحرم منك بغيت كذا كذا كذا ابشري .. كيف العيال .. هاه درسوا .. وش قاعدين تسوون ؟ امورهم تمام مافيه مشاكل ..؟ ... تعشيتوا ... ناقصكم شي؟ فجأه .. يصادف احد اخوياه ... تنقلب النغمه .. ومعها موجةالتعامل .. خلاص خلاص .. انا الحين مشغول ... اذا خلصت شغلي كلمتَك وشفت وش تبي يالله .. اكلمَك بعدين .. سلام ياااااااااااااااه ... اكتشفت اني سر في حياة زوجي للحين محد يعرف انه يكلمني في الجوال؟ ..................................... المشهد الثاني طالعين نشتري مقاضي البيت .. متعودين نمسك كفوف بعض وما اثر فينا عدد السنين الحمد لله دخلنا السوبر ماركت ولا تزال ايدينا متشابكه مشينا بين الرفوف .. هو يدف العربه .. وانا متمسكه بذراعه كالمعتاد هو يذكرني بالأغراض ... طبعا ... مو هو اللي يعبي البيت بالخير كل شهر ؟ ويعرف متى اخر مره اشترى الشغله الفلانيه ؟ ما انحرم منك يابو عيالي.. فجأه وبدون سابق انذار يخرج لنا مديره في الدوام و بغمضة عين تتبخر كل الاجواء العائليه وينقلب الجو غيم وعواصف يفك يدي ويدف العربه قدام وتحمر عيونه ويقول طيري لآخر رف لايشوفني المدير معك لوهله .. أحسست اني متزوجه مسيار ؟ ......................... المشهد الثالث يوصل من الدوام تعبان اشوفه زي الجندي المحارب في جبهة القتال يتعب ليجيب لقمة العيش الكريمه .. استقبله بحنان غامر و نفسي اشيل تعبه عنه هيأت له كل شي ليرتاح ... يشكرني ويمدح في تعبي وحرصي عليه ما انحرم منك يا ام احمد انا من دونك اضيع اشعر بالرضا والحمدلله.. في نهاية الاسبوع ينادي اهله.. واتفاجأ فيه يذكر بعض المواقف التافهه اللي تحصل في كل بيت اتفاجأ فيه يناديني بإسمي حاف اتفاجأ فيه نبرته جافيه في الكلام اتفاجأ فيه من اول ما يدخلون لحد مايطلعون ؟ اشفيك يابو احمد متضايق مني ؟ لا.. بس وش تبينهم يقولون . اني لين خيخه معاك؟ خلهم يعرفون اني رجال !!! صار عمره خمسين وللأن يثبت لأهله انه رجل؟ يا حسايف ... زوجي يخبي حقيقة تعامله معاي .. الموضوع حتى بعد25 سنه زواج لا يزال سر!!!!!!!!! ................................. المشهد الرابع كنا في السياره متوجهين لمطعم .. تغيير للجو السياره تضج بأصوات العيال والسوالف والضحك والبسط والوناسه فجأه يرن الجوال زوجي : هشششششششششششششششششششششششش ولا صوت .. بنات قسم بالله لأتوطى في بطن اللي تتكلم .. وانتي لا يسمع حسك الرجال الو .. هلااااااااااااااااااااا بو فلان اخبارك عساك طيب .. سم .... لا والله ما عندي احد .. طالع اقضي مشوار !!!!!!!!!!!!!!!!!!!!!!!!!!!!!!!!!!!!!!!!!! بعد انتهاء المكالمه .. ايوه .. وش كنا نقول ... مع ابتسامه صفراء طيب يابو عيالي وش فيه لو سمع اصواتنا ؟ لا عيب .. وش تبينه يقول ؟ الى الان لا احد يعرف ان زوجي يقضي معي انا وبناته وقتاعائليا خاصا بنا؟؟؟؟؟؟؟؟؟؟؟؟ ................................ المشهد الخامس رجل رزقه الله بسبع بنات ومع ذلك ينادونه ابو عبدالرحمن !!!!!!!!! و زوجته ام عبير !!!!!!!! وامام الناس لا يفتأ يشتكي من هم البنات .. و كأن الولد لايحمل هموم؟ لا تزال حقيقة بر بناتي و روعتهم طي الكتمان !!! .................................... المشهد السادس كل مره نطلع نتقضى من أي مول تجاري لازم يكون بينا وبين زوجي مسافة عشرين متر !!! عيب يشوفونا معاه للآن ..لا زلت ادعو الله ان اذوق اليوم اللي يمشي زوجي بجنبي؟ ................................ المشهد السابع طالعين الكورنيش نتمشى اخترنا مكان راااااااااااااااااائع رفض ابو العيال ننزل الا بشرط يا اما نلف نفسنا بالرواق .. ( الساتر ) ونتفرج في السماء و نشم البحر بس او نروح مكان مافيه احد .. علشان لا سمح الله لا سمح الله لاسمح الله يمكن احد يمر يعرفه و يشوفنا معاه للآن .. تماشينا تحدث في ظروف امنيه مشدده ! ....................... و تطول قائمة المشاهد .. وابطالها للأسف .. منهم الطبيب .. المدرس.. المدير ... الضابط .. التاجر ... وموظفين حاملين جميع انواع الشهادات !! تساؤلي هنا : الى متى والزوجه والإبنه تبقيان في الظل وكأنهم عار او منكر يجب اخفاؤه ؟ في عصر وصل فيه التنوير ما وصل .. و تكاد تختفي الاميه !وللآن لا تزال هذه النظره قائمه ؟ لا اتحدث عن القيام بالواجبات وووووو سؤالي كما اسلفت : لمتى ما اقدر اكلم زوجي والا امشي بجنبه براحتنا قدام الناس؟ سؤالي للعضوات ودكم الوضع يتغير ؟ وللأعضاء لو تحط نفسك مكان زوجتك ... بيعجبك الوضع ؟ لا احد يقول غيره .. هذي وسوسه ... ماكان رسولنا الكريم صلى الله عليه وسلم ولا صحابته رضوان الله عليهم يسوونها ! ما سبق .. يحكي شيئا من واقعي ومن واقع الكثيرات .. سمعتها منهم بنفسي يعني .. مما رأيت وسمعت و عاصرت و مش منقول ...  التعديل الأخير تم بواسطة ~Mrs.ENGLI$H~ ; 2012- 2- 11 الساعة 04:48 PM 
|
|
2012- 2- 11
|
#2 |
|
أكـاديـمـي مـشـارك
|
رد: بعد عِشرة سنين ... لا زلت سر خطير في حياة زوجي؟
يعطيك الف عافيه ياقلبي كلام ميه ميه
.gif "(204)") يلا ياحلوين يالرجال يا اولياء الامور ردو وين شجاعتكم .gif "(107)")
|
|
|
|
2012- 2- 11
|
#3 |
|
مُستشارة إدارية
|
رد: بعد عِشرة سنين ... لا زلت سر خطير في حياة زوجي؟
هي عآدآت وتقآليد تحكمنـآ لـآ أكثر !
وب الفعل كثير تحصل وأشوفهـآ ل الـآسف ~Mrs.ENGLI$H~ طرح رآئع وفّقْتِيِ  |
|
|
|
2012- 2- 11
|
#4 |
|
أكـاديـمـي مـشـارك
|
رد: بعد عِشرة سنين ... لا زلت سر خطير في حياة زوجي؟
 ياكثر ماتحصل عندنا  بس الحمدالله خفت عن زمااانوالسبب توضيح الامور لهم وتهدئت روعهم انه ماعلينا شر وحنا محتشمات وهم معنا .gif "(269)") وانه زي ماهم عندهم زوجه وعيال غيره عنده زوجه وعيال يعني مافيه شيء جديد ولا غريب ولاعيب وانه الواجب يفتخر لما يمشيء مع زوجته وهو الذي اختارها والواجب الكل يعرف انه عندة حياة عائليه مثل غيره اختي ابدعتي في طرحك
|
|
|
|
2012- 2- 11
|
#5 |
|
أكـاديـمـي مـشـارك
|
رد: بعد عِشرة سنين ... لا زلت سر خطير في حياة زوجي؟
شكرر جزيلا للطرح الرائع ..
|
|
|
|
2012- 2- 11
|
#6 | |||
|
أكـاديـمـي فـضـي
|
رد: بعد عِشرة سنين ... لا زلت سر خطير في حياة زوجي؟
و عليكم السلام ورحمة الله وبركاته ... راح ابدأ من اخر شي قلتيه .. اقتباس:
لا .. اللي ودي ان وضع البنات وتفكيرهم يتغير ..!! أسلوبك في الكتابة ما شاء الله سلس بس لاحظي معاي التعابير اللي استخدمتيها .. اقتباس:
لاحظتي الاسلوب في تهويل الموضوع شلون ؟ السالفة ابسط من كذا .. ليه يا معشر النساء نكبر السوالف ونضخمها ونعطيها اكبر من حجمها ليه نجيب القلق والنكد ؟  >>دورت فيس يبي ينتحر بس ماحصلت لي باك ان شاء الله راح احلل بعض المشاهد اللي ذكرتيها .. بس قبل ابغى منك تجاوبيني ع هالسؤال اقتباس:
ملاحظه : محدثتك متزوجه من خمس سنوات عشان ماتستغربين اسلوبي  |
|||
|
|
|
2012- 2- 11
|
#7 |
|
متميزة بقسم التعليم عن بعد - اللغة الانجليزية
|
رد: بعد عِشرة سنين ... لا زلت سر خطير في حياة زوجي؟
 لي عوده ... بس اخلص المحاضره |
|
|
|
2012- 2- 11
|
#8 | |
|
أكـاديـمـي فـضـي
|
رد: بعد عِشرة سنين ... لا زلت سر خطير في حياة زوجي؟
... معناها ع ماترجعين راح اعلق ع كم شغله بس اول شي حابة اقول لك -انا ماادعي اني خبيرة ولا اتصنع دور فوزية الدريع يا عيوني -ماادعي المثالية ومااتظاهر اني عايشة حياة شهرزادية ومافيها منغصات - انا مااهاجم النساء ولا اتكلم بلسان الرجال هي مجرد قراءة مختلفة للقصص اللي ذكرتيها .. اتفقنا .. .في كل هالامثلة االمتفق عليه ان هالرجال ادمي وطيب وشحليله جريمته انه تعامله رسمي مع حرمته قدام الاوادم ... هل هالشيء يستحق مني اني اقول اكتشفت اني سر خطير والا اقول واحسايف اللي تشوفه المراة انه جفاء اووو جفاف يمكن يكون عند الرجل نوع من الخصوصية وشوية حياء مع رشة مراعاة للذوق العام .. في المشهد الاول ... بالله وش تبيه يقول لها قدام خويه . يعني لازم يتغزل فيها قدامه .. وش الاضافة الخطيرة اللي راح تزين تاريخ علاقتهم المجيد لما يكلمها ويدلعها قدام خويه .. كل مافي الامر ان هالشي يعد من الخصوصيات ومش من الذوق .. ولما انهى المكالمة بسرعه معناها انه محترم خصوصية الكلام بينهم اوو يمكن في سالفة مهمة عنده مع خويه المشهد الثاني تبع السوبر ماركت . انا مدري ليه قال لها روحي بعيد . بس اذا كان قصده يبي يسلم ع المدير فمعاه حق .. وشو له تترز قدام الرجال ؟ بعدين السوبر ماركت رايحين يشترون ويطلعون خليكم عمليين المشهد مدري كم تبع بيت اهله بالله وش المفروض يقول لها قدام هالعجيز (امه وابوه) يعني تشوفها حلوة منه يدلعها مثلا قدامهم .. ولما يناديها باسمها عادي احلا يبي يصغرعمرها مثلا اما المشهد الرابع كان بيجلطني طبيعي ومنطقي وذوقيا لما يرن الجوال الكل يسكت حتى لو انه جوال السواق راجيف اقتباس:
بعدين وش هالسؤال وش فيها ؟؟ لان صوتك عورة يا روح ابو عيالك ..!!  بعدين لام يقول للمتصل انني اقضي وقتا لطيفا شاعريا مع عائلتي وذريتي  يعني انا اشوف انه تصرفات جدا عادية وطبيعية .. وبلاش سوالف واحسايف واااه منك يازوجي شوية موسيقى ونقلب فاتن حمامة ورشدي اباظة  الزبـــــــــــــــــــــدة : الحياة أبسط من كذا ولام نحترم خصوصية هالعلاقة .. و المكان والافراد اللي نتعامل معهم و من غير الانصاف بحق اي رجل اني انكر حسن معاملته لي عشانه بس يكلمني برسمية قدام الاوادم ولا تدققون كثير وتحللون كل موقف من الطرف الاخر .. واذا جا في بالي شي بجي اقوله
|
|
|
التعديل الأخير تم بواسطة مارياا ; 2012- 2- 11 الساعة 07:58 PM |
||
|
|
|
2012- 2- 11
|
#9 | ||||
|
متميزة بقسم التعليم عن بعد - اللغة الانجليزية
|
رد: بعد عِشرة سنين ... لا زلت سر خطير في حياة زوجي؟
اقتباس:
بس ما ودي نكلم الشباب ونقول وين شجاعتكم المسأله مو ( احجرهم بزاويه ) بس خلال الاسبوعين اللي فاتوا تكثفت هالشغله حولي ومعاي وانا اللي كنت فاكرتها اندثرت فكتبت الموضوع القميل ده اقتباس:
مررورك عطر متصفحي ... انتِ الاروع  اقتباس:
ههههههههههههههههه اعجبتني تهدئة روعهم ... قِددددددددددا وانا عندي كمان خفففت بس خلال اسبوعين رجعت الحاله وبكثافه عندي و عند اللي حولي اقتباس:
العفو يا عزيزتي
|
||||
|
|
|
2012- 2- 11
|
#10 | |
|
متميزة بقسم التعليم عن بعد - اللغة الانجليزية
|
رد: بعد عِشرة سنين ... لا زلت سر خطير في حياة زوجي؟
اقتباس:
جدا اسعدني الحوار معك وللحديث بقيه
|
|
|
التعديل الأخير تم بواسطة ~Mrs.ENGLI$H~ ; 2012- 2- 11 الساعة 08:31 PM |
||
|
|
|
| مواقع النشر (المفضلة) |
| الكلمات الدلالية (Tags) |
| بعد, حياة, خطير, شآت, زوجي؟, سنين, عِشرة |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
