[ فلذات أكبادنا ] : مشكلتي مع اخوي !! ارجو مسااعدتي

[نهى القحطاني]

السلام عليكم ورحمة الله وبركاته

ما ادري هذا القسم المناسب او لا اتمنى اذا مو القسم المناسب مايتم حذف الموضوع وينقل للقسم المناسب



اكتب المشكله وكل امل بان يجد لي اي شخص الحل


حنا عائله مكونه من بنات وولد واحد وهو اصغر فرد بالعائله

عمره 10 او 9 سنوات

مشكلته عنيد جداً وعصبي جداً

احيانا احسه مش طبييعي !! وافكر ممسوس او يبيله طبيب نفسي


يحب يحااااارش يجي يحارشك يسوي اي شي بدون سبب لو كنت قاعد مسالم لحالك

يصرخ على امي وابوي ويقول كلام بذيء

يضرب الجميع


صحيح مانسكت له ونضربه لكن مهما كان ضربه قوي ويصارخ


واذا تضارب مع احد تقوم القيامه والله كل البيت يتنكد من الصراخ والضرب والهواش

صراخه مو طبييعي وضربه مو طبيعي

يكرره المدرسه بس يروح غصبا عنه ومايحل واجباته الا بالغصب ومو كلها

مستواه نازل بالمدرسه مع العلم انه ذكي !!


يطفشنا يطفشششنا والله اقول احسه بلوى مو ولد !!

بتعذب معه بطفولته ومراهقته


حاولت معه بكل الاساليب انا واهلي

من مكافات وهدايا والله يوميا ونونسه وطلباته اوامر لكن كذا اذا جاه حراش سواء يضرب او يعاند ما ادري ايش يصير له !!
ويوميا هالشي

ما ادري هل مايدور في بالي انه محسود او ممسوس او يبيله طبيب نفسي

امي وابوي اذا زعلوا عليه يوم نص يوم يومين بالكثير ويرضون لانه صغيرهم واصغر ولد !!






حلول النت المنتشره ماتفيد امنعيه من كذا او من كذا


هذا مايفيد معه شي والله مايهمه شي سواء بتحرمه من شي او لا

وعلى صغر سنه متوفر له الايباد والجوال ووو !!!


والله بمجرد ما تنحل المشكله من شخص منكم


لادعيله طول عمري واسمه مايفارق دعائي كانه انا


مستمرين على التعب معه فوق سنتين


علما بانه خارج البيت مو كذا وفرق بالاسلوب مع الاشخاص لكن معنا فرق

ما اقدر اوصل المعاناه وبتشوفونها شي بسيط لكن لو عشتوا تتمنون تطلعون من البيت


ممكن تشوفون الاسلوب بالكلام مو اسلوب رسمي ويليق بموضوع

بس اعتذر


طولت اعتذر ..

تعببببببت والله تعبببببت

[مُلهمــــة]

السلام عليكم ورحمة الله

هذا أثار التدليل الزائد من الأهل وبحكم ان ولد الوحيد وطريقة التعامل معه من قبل الام والأب هي سبب تشكيل شخصيته بهذا الشكل

أنا ما اقدر أفيدك أكثر لانه ما عندي خبره ولكن عندي لك أسماء مستشارين تربويين مختصين

والله يعينكم تربية الذكور صعبه جداً

[مـ ع ـاند جروحه]

-

انتبهوا لا ينفس زيادة

دخلوه نادي الحي لا تحسسوه انه بزر

خلوه يطلع مع ناس ثقات يفرغ طاقته برا البيت

لا تلبون له طلباته الا بعد ما تشرطون عليه شيء يسويه

اذا ما فاد وظل يعاند امنعوه من شيء يحبه بصرامه ولا تحنو عليه

اذا ما فاد اصفقيه كف على عينه .. امزح امزح بس تحمست شوي

..

[نهى القحطاني]

السلام عليكم ورحمة الله

هذا أثار التدليل الزائد من الأهل وبحكم ان ولد الوحيد وطريقة التعامل معه من قبل الام والأب هي سبب تشكيل شخصيته بهذا الشكل

أنا ما اقدر أفيدك أكثر لانه ما عندي خبره ولكن عندي لك أسماء مستشارين تربويين مختصين

والله يعينكم تربية الذكور صعبه جداً

صااادقه هذا من اثار التدليل

لكن انا الحين ابي اعرف حل المشكله هذي ..

الاستشااريين التربويين ايش دورهم ؟ والله يعطيك العافيه عطيني اسماء اللي عندك ..

صدقيني صعبه بس مو بصعوبة تربيه هالولد

[l a v e n d e r]

الدلال + حاس بالوحده يحتاج ولد معاه ..

الوالد كبير بالسن ولا .. ؟؟

بمعنى الولد يحتاج حد يخاوية يحسسة بكيانه ..

خل ينشغل مع الوالد بمشاوير وطلعات يحسس انه كبير وشوي شوي رح ينحرج ويعرف انه ما عاد يليق فيه التصرفات الصبيانيه ..

خلي الوالد يتكلم معاه ويعرف وش مضايقة ..

جلسة رجال لرجال لوحدهم بدون تدخل من أي احد منكم
<< كذا يحس انه مهم وانه عندة من يحكي له اسرارة ..

يارب قدرت اوضح الي اقصدة ..

أهم شي حاولوا تحتونه قبل المراهقة لان كارثة بعدين ..


ربي يجعله من البارين بوالدية وأهله ..

* الدعاء مخ العبادة ..

[P e a c e]

الله يعينك أختي

الأطفال بطبيعتهم يحبون لفت الأنظار بغض النظر عن الوسيلة صحيحة أو لا

يعني لما يتلفظ على أحد أكبر منه إيش اللي راح يصير, الكل راح يطالع فيه ويصارخ عليه واللي يمسكه والكل ينفعل وراح يصير هو مركز الإثارة كلها وفي نظره "نجم الحفل"

بالمقابل لو مثلا أمه قالت له يسوي شي وسمع الكلام وسواه, إيش اللي يصير, بس أمه اللي راح تتكلم, وراح تقوله "شطور" وخلاص انتهينا ولا أحد درى عنه, هذي ما يحبها الطفل

الحل إنكم تركزو عليه أكثر بالاهتمام والحب, وما تطالبوه بالمثالية, وتتغافلو عن أخطاءه الصغيرة, وتشجعو صفاته الإيجابية أكثر, وتتعاملو معاه على أنه طفل حتى لو بدى لكم أن تفكيره ناضج لأن الأطفال أذكياء وممكن يخدعوكم بهذا الشي

وحاولو تستخدمو معاه أسلوب الثواب والعقاب لكن أهم شي ما يكون العقاب بدافع التشفّي, ولا يكون العقاب بعد الغلطة بفترة طويلة لأن الطفل ينسى بسرعة وراح يرسخ في مخه الظلم وليس العقاب
ولما يتشوفي العقاب ما فاد معاه غيري إلى عقاب ثاني, إلى أن توصلي لعقاب مؤثر في سلوكه

ومهما كان العقاب, المفروض ما يكون ضرب ولا إيذاء جسدي ولا استخدام القوة, إلا تكون ضربة توبيخية ليس الغرض منها الإيلام, لأن "الضرب حيلة الضغيف" ومرفوض تربويا وآثاره سلبية كلما زادت قوته

ومهم تكوني هادئة وواثقة من نفسك في التعامل معاه حتى لو كنتي من داخل راح تنفجري, الطفل لما يشوف اللي قدامه محبط يحس بالإنجاز وتتعزز فيه الصفة السيئة اللي كانت السبب, ويحترم الإنسان الهادئ الواثق من نفسه.

ربي يسعدكم ويبعد عنكم المشاكل

[مُلهمــــة]

المشاركة الأصلية كتبت بواسطة نهى القحطاني

صااادقه هذا من اثار التدليل

لكن انا الحين ابي اعرف حل المشكله هذي ..

الاستشااريين التربويين ايش دورهم ؟ والله يعطيك العافيه عطيني اسماء اللي عندك ..

صدقيني صعبه بس مو بصعوبة تربيه هالولد

الافضل المستشاريين يعنى في دول اوربا وامريكا يكون الاسرة لها مستشار مثل الطبيب ولكن احنا ما عندنا هذي الثقافة
من 10 سنوات تبدأ المرحلة الحرجة للطفل سوا بنت او ولد

عندكـ

د. ابراهيم الخليفي
د. ميسرة طاهر


وفيه غيرهم كثير

[Adel F]

طبيعي اللي حاصل مع الطفل .. لوجوده في بيئة ماتناسب تطلعاته ..
وعدم وجود أخ له سبب رئيسي في حالة العصبية والمزاجية اللي يعيشها .. مافيه أحد حاس بمعاناته .. وفهم مزاجه .. لأنو بطبيعة الحال حياة البنت تختلف عن حياة الولد بشكل كلي .. سواءاً بالأكل أو اللعب أو النوم .. الخ ..

لذلك ، المفترض التعامل معه بهدوء في جميع الأحوال .. الدلال الزائد أو القوة المفرطة ممكن تأثر عليه مستقبلاً بالسلب لاسمح الله .. ( سددوا وقاربوا ) .. لأنو صعب ترويضه تماماً .. فـ تعاملو مع الأحداث اللي تصدر منه حسب الفائدة المرجوة وليس حسب اعتقادكم أو مزاجكم أو مبادئكم ..
وجود صديق له أو قريب في نفس عمره ، يكون قريب منه راح يخفف من المزاجية والعصبية ..

طبعاً : أنصحكم باللجوء الى استشاري أطفال نفسي ..

[نهى القحطاني]

اشكر الجميع عالرد


وياجماعه اللي يقولون لازم ولد معه �� من وين اجيب ؟

والله معاملتنا له من احسن مايكون ومره يعني مستحيل نزعل عليه بدون سبب

لكن اقولكم احيانا تجيه حالات غضب وحراش بدون ادنى سبب !!!!!


قاعده مسالمه في امان الله فجاه تلقى احد يرمي عليك شي او يبخ عليك شي


وتسكت لين مايزودها ويبدا يضرب ويرتفع ضغطي واضربه


والله تعبت وتعبنا كلنا معه ��



والاستشاري النفسي والتربوي

كيف اقنع اهلي طيب يودونه !!!!! وكيف هو بيقتنع يروح

[Adel F]

مو ضروري تودونه .. مجرد تصفون حالته للاستشاري .. راح يعطيكم توصية ..
جربو هالخيار ..

وأقصد بالولد .. يعني ولد عمه ولد خاله ، أو عيال خواته ..

وفيه نقطة نسيتها .. شوضعه في المدرسة ؟ احتمال بيئة المدرسة لها دور ..
ممكن تكون المشكلة من زملاءه في المدرسة .. أسألو المدرسة عن سلوكه وقت الدوام ..
واحتمال يساعدونكم في تربيته ، ويختصرون عليكم الوقت والجهد .. اذا تعرفتم على حياته المدرسية وطلبتو من المرشد الطلابي يتابعه عن قرب ..