المشاركة الأصلية كتبت بواسطة hanodh

جرب تقول موموزون ماهوب لي اصلا

يا شعر تبقى في نظرهم كحيلان
وبنظرتي تسوى عيال الحمايل
حنّا اثنين اخوان واكثر من اخوان
لو ما تجمعنا عروق وسلايل
لو نختلف بأسماء وعروق واوطان
يبقى التشابه بيننا بالخصايل
وانا ليا منّي بغيت أكسب انسان
اسعى له بكل السبل والوسايل
أعرف كيف أرد الاحسان باحسان
كيف أحصد بذور الفضايل .. فضايل
عايش زمن عاصرت به كل الازمان
ما أعيل بس أكسر ثلاثين عايل
أكسب عدو واحرق به قلوب عدوان
أشعل فتيله بس أطفي فتايل
وان خفت ضعف .. أخاف من ضعف الايمان
وان عفت حمل .. أعاف حمل الجمايل
ما أظما على الساحل ولو مت غرقان
لو مركبي تابوت والموج هايل
تغرق شهيد أرحم من تموت عطشان
طيحة شموخ ولا وقوف امتمايل
ودّك ليا من جيت في كل ميدان
لو ما انت الاول .. بالصفوف الاوايل
خلّك ليا عوّدت خسران .. خسران
ينقال عنّك عاملٍ لك عمايل
لا صرت تحلم احلم تكون سلطان
وان جيت تقنع .. اقنع بحلم زايل
الوقت غربه وآخر الدرب عنوان
والعمر رحله والتجارب رحايل
وأنا كثر مالي من الناس خلاّن
اللي صفوا لي بالشدايد قلايل
شايف حسد .. ؟! قل شايف أشكال والوان
قابلت ظلم ؟ إلاّ لقيت الهوايل
إن عشّش بصدري من الغبن شيطان
وتسدّدت دوني جميع الوسايل
با القى من عيال الحمايل " كحيلان "
اللي يكفّي عن عيال الحمايل
مرّات ربّك يرزقك خوّة انسان
واحد ويسوى في عيونك قبايل

الشاعر ،، حامد زيد