ملتقى طلاب وطالبات جامعة الملك فيصل,جامعة الدمام

الف الف ونعم بدكاترتنا ابناء الوطن ووالله انها كلمة حق اقابل ربي بها انهم افضل من غير ابناء البلد وياليت يجي اليوم اللي اشوف دكاترتنا كلهم منا وفينا خاصة ان البلد مليانة
الدكتور الشعيبي لم اتعامل معه لكن سمعته طيبة
الدكتور النجار تعاملت معه تدريسه لك عليه يمكن لأن مادته قلق لكن الحق ان اخلاقه عالية واسعدني بمكالمة منه يتابع فيها شكوى تقدمت بها وكان لمتابعته واهتمامه اثر كبير على نفسي.
الدكتور الملحم درست عندة محاسبة التكاليف وبصراحة شرحه كان ممتاز وباين عليه حرصة الشديد على ان الطالب يفهم ولا انسى لما ارسلت له ايميل رد ورحب وطلب مني اتواصل معه.
الدكتور المطر درست عنده مادة مستوى ثاني صحة وللياقة وبصراحة ماودك الا تسمع محاضراته اخر روقان واجمل شرح وانسان موزون بمعنى الكلمة لاكلمة زايدة ولا كلمة ناقصة ماشاء الله عليه.
الدكتور الدوغان درست عنده مادة موارد بشرية وبصراحة باين عليه متعلم صح وثقافته واسعه وصوته مريح جدا ويشجع على سماع المحاضرة من بدايتها الى نهايتها.
الدكتور الرشيدي درست عنده اساليب كمية وشرحه كان معقول لكن الطلاب اشوفهم مبسوطين منه ويمدحون شرحه واهم شيء انه عاجبهم وانا بذلك اضم صوتي معهم.
دكتور التسويق الحماد الله يهديه شرحه من جنبها وكل امثلته عن البعارين والجح وياكل المحاضرات وخدعني بصراحة توقعت اسئلته تجي بمستوى شرحه لكن سواها فينا وتعنتر علينا بالامتحان لكن مع هذا كله اقول في الاخير انفك منك ولو كان اعوج وان شاء الله ينتبه للطلاب القادمين ويكون نايس معهم .
دكتور القانون مستوى اول على الزهراني الله يذكره بالخير كان صادق معنا واسئلته كانت كويسه للي مهتم ومذاكر.
كذلك دكتور الثقافة الاسلامية نسيت اسمه بصراحة مستوى ثاني الله يذكره بالخير ويخليه لعياله اسئلته كانت جدا منطقيه وشرحه كان جيد.
عموما ياسلام على دكاترتنا ابناء الوطن والله اني احبهم واحترمهم مهما زعلت من نظام الجامعة فمشكلتنا مع الانظمة وليست مع الاشخاص وانا بصرحة يزداد فخري لما يكون دكتور المادة اللي ادرسها من بلدي مما يبعث احترام اكثر للجامعة وللمادة.

بارك الله فيهم جميعا ولا يهون الاستاذ احمد الشعيبي اللي مرت ايام قطع نفسه لأجل نجاح نظام الانتساب في الجامعة وكان يرد على تلفونه الى مابعد العشاء واثناء عطلة نهاية الاسبوع وكان قول وفعل لما نتصل عليه ينفذ وعوده ويحل مشاكلنا.

ودمتم:106: