لكل المستجدين و المستجدات توضيح بخصوص نظام البلاك بورد & النظام الافتراضي في الفتره الحالية من بداية الدراسة + ملاحظات مهمة

[o_lg_ll]

بسم الله الرحمن الرحيم

السلام عليكم ورحمة الله وبركاتة

كلنا عرفنا طريقة تحميل المحاضرات وحل المناقشات وحل الواجبات من النظامين

البلاك بورد & الافتراضي

والجدد الى لسه مابعد يعرف الطريقة يدخل على الرابط التألي

لكل مستجد / مستجدة : شرح لكل مايهمكم من طريقة الدراسة عن بعد الى حل الواجبات و تحميل المحاضرات + مشاهدتها و حل المناقشات و طريقة المذاكرة للأختبارات النهائية

انتبهو لمن تدخلون على الموضوع ركزو في المشاركة رقم 1 و 2 و 9

اوك بكذا الكل عرف الطريقة

الان في بداية الدراسة راح يفتح نظام البلاك بورد وبعد فترة قليلة راح يفتح النظام الافتراضي

- لمن يفتحون النظامين راح تشوفون جميع المحاضرات الـــ 14 جاهزة للتحميل وبعدة صيغ
- وراح تشوفون جميع الواجبات الـــ 3 لكل المواد
- وراح تشوفون جميع المناقشات الــ 14 جاهزه للحل والنقاش

مثل ماقلت سابقأ راح تشوفون هذي الأشياء كلها جاهزه في البلاك بورد حاليأ وبعد فترة قليلة في الافتراضي راح يفتحونه وراح تشوفون نفس الشي

لمن تشوفون كل هالأشياء يا متحمسياً يا دوافير يا مجتهدين يالي دفعتو فلوس ومتحمسين وتبون تنكبون على وجيهكم في الدراسة وتحللون فلوسكم

اقولكم وقفو STOP لحد يعمل شي ولا أحد يحمل شي ولا يحل واجبات ونقاشات

لأنه ماراح يحسب لكم درجات .... لية ؟؟

لنا النظام في بدايتة ولسه متبرمج , وبعد فترة قليله يمكن أيام قليلة ( يوم يومين 3 أيام ويمكن أسبوع ) راح يعيدون النظام من جديد وراح يحذفون كل هذي الأشياء المحاضرات كلها والواجبات كلها والنقاشات كلها

لمن يحذفون كل هذي الأشياء راح يبتدون معنا وحده وحده حبة حبة

- كل أسبوع ماحضرة
- كل أسبوع نقأش
- كل شهر واجب
- كل شهر محاضرة مبأشرة الى هي 3 محاضرات

لمن تشوفون النظام بداء معنا من الصفر ونزل المحاضرة الاولى , والمناقشة الاولى
خلاص بكذا ابتدو تحميل المحاضرة الاولى لكل مادة وحل المناقشة الاولى لكل مادة

و هكذا الطريقة في كل أسبوع

=============================================

نجي الأن للمتصفحات الى راح نستخدمها + الملاحظات على هذي المتصفحات

بالنسبة للبلاك بورد حاليأ لمن تفتحونه بمتصفح أكسبلور Explorer راح تشوفون الكلام متخربط

مثل الصورة التالية

انتو في هذي الحالة تستخدمون متصفح أخر

قوقل كروم Google Chrome

وهذا رابط التحميل للمتصفح

لغة انجليزي
http://dl.google.com/chrome/win/840FF68994F69886/31.0.1626.1_chrome_installer.exe

لغة عربية
https://www.google.com/intl/ar/chrome/browser/

لمن تدخلون على صفحة التحميل اضغطو تنزيل بعدين قبول وتثبيت بكذا راح يتثبت معكم قوقل كروم عربي

====================

فاير فوكس Firefox

رابط التحميل للمتصفح

لغة عربية
http://download.cdn.mozilla.net/pub/mozilla.org/firefox/releases/23.0.1/win32/ar/Firefox%20Setup%2023.0.1.exe

لغة انجليزية
http://fs41.filehippo.com/2315/53d989abffa843eb9951cd49674db1b1/Firefox%20Setup%2023.0.1.exe

====================

اوبرا Opera

رابط التحميل للمتصفح

لغة عربية
http://www.opera.com/ar/

لغة انجليزية
http://fs41.filehippo.com/2315/450974fd6ba34372bca65bade29c842e/Opera_16.0.1196.73_Setup.exe

وهذا صورة لنظام البلاك بورد الان بمتصفح قوقول كروم

=============================================

اختارو اي متصفح ترتاحون له

طيب بكذا حلينا مشكلة الكلام المتداخل والمتخربط والصور المتداخله في بعض في البلاك بورد بمتصفح أكسبلور Explorer

طبعاً ايأم الدراسة راح تصادفكم مشاكل مع متصفح أكسبلور Explorer ويمكن اي متصفح اخر مو شرط بس اكسبلور راعي مشأكل وجربو متصفحات ثانية وتضبط معكم

ولاتنسون حل المناقشات بطريقة نسخ وسحب ولصق ماراح تفيد مع متصفح أكسبلور Explorer انا جربتها على قوقول كروم ومشت معي مثل الموزه

مثل ما انتو شايفين الاكسبلور Explorer راعي مشاكل بس في نأس ترتاح له او متعوده عليه مثلي انا وتبي تحط في الجهاز متصفح اخر فقط للجامعة والكل يشوف المتصفح الى يرتاح له

( البلاك بورد الان بمتصفح أكسبلور متداخل ومتخربط الكلام والصور كذلك متداخله بعد فترة يصلحونه )

=============================================

هنا راح اشرح لكم النظام الأفتراضي بالصور

1 - هذا صورة الأفتراضي الواجهة الرئيسية وراح تشوفون فيه اسماء موادكم الى نازله لكم في كل سمستر وتحت كل مادة أسم الدكتور

اوك شفنا الواجهة الرئيسية للأفتراضي واسماء المواد وكل مادة تحتها اسم الدكتور بتاعها هع

====================

2 - الان نضغط على اسم المادة مثل الصورة التألية

====================

3 - راح تطلع لنا على الجنب اليمين راوبط هذي المادة من المحاضرات المسجلة والمباشرة والواجبات والحوار ( المناقشات ) مثل الصورة التأليه

====================

4 - الان طريقة الدخول على المناقشات ( الحوار )

ندخل على المناقشة لكل مادة مثل الصورة التألية

بعدها نختار موضوع النقاش الاول وراح يطلع معنا سؤال النقاش مثل الصورة التالية

مثل ما أنتو شايفين مكتوب تحت السؤال رقم المشاركة لاتوجد اي مشاركة لك

هذا لمن تجاوب على سؤال النقاش راح يصير مكان لاتوجد اي مشاركة لك راح تشوف جواب النقاش الى انت وضعته

بعدها ننزل تحت وراح نشوف هنا في الصورة التالية المربع الى نكتب فيه جواب النقاش

وبس مثل ما شرحت لكم سابقأ في موضوع اخر اسحبو جواب النقاش وحطوه في هذا المربع وانتهينا

وهذا صورة للواجبات

ماحصلت صورة لحل الواجبات من الداخل بس كذا كافي واتوقع الكل فهم

( صور الأفتراضي كلها ماهي من عندي انا سارقها من قوقل الصور وطلعت للأخت طمــ داعيه ــوح الله يجزائها خير على الصور ريحتني كثير )

=============================================

الملاحظات

بالنسبة للي يسألون اي صيغة نحمل فيها المحاضرات ؟؟

لمن تدخلون على تحميل المحاضرة مثلأ المحاضرة الاولى وغيرها من المحاضرات

راح تشوفون صيغ التحميل مثل الصورة التالية

مثل ما انتو شايفين

مشاهدة المحاضرة / لمن تضغطون عليها راح تشتغل معكم وتشوفون خشت الدكتور البشوشه وهو يشرح وتابعو معه في الشرح

المحاضرة بالشرائح نسخة جوال / حجمها صغير وراح تتحمل معكم بسرعه ( راح تشوفون شرح الدكتور عن طريق البروجكت بس مو واضحه كثير )

تحميل المحاضرة المسجلة / هذي حجمها كبير من 50MB ومافوق وصيغتها Avi او MP4 وصافيه هذي للناس الى تبي تحمل المحاضرة على الجهاز صافيه عشان تشوف شنو يكتب استأذ المادة عن طريق البروجكت ( السبورة الذكية )

تنزيل المحاضرة بالصوت فقط / طبعأ حجمها صغير وراح تتحمل معكم بسرعة و الصيغة هذي للناس الرايقة ههههههههههه المفهيه الدوافير مشاء الله الى بس يبي يسمع ويفهم الى تمسك خط طويل سواء سيارة او طيارة ويجلس يستمع MP3 للمحاضرة ويجلس يتصيد للدكتور يمكن يقول ملاحظه او شي معين خاصه في المحاضرات المباشرة يتصيد على الدكتور يمكن يلغي شي ينبه على شي يطلب شي الدكتور الخ الخ

هذا كل الصيغ شرحتها لكم بالتفصيل الممل ( يعني لحد يجيني يسأل كيف ماكيف لا يقوم التمشع والتسطر )
للي يسألون كيف اي صيغة نحمل وراح تحسب لنا الدرجه ؟؟

اي صيغة اي صيغة حملها وراح تحسب لك الدرجه سواء مشاهدة المحاضرة بس او تحميل اي صيغة راح تحسب لك الدرجة

الى راح يسأل ويقول كيف أضمن درجتي في تحميل المحاضرة او كيف اعرف اذا حملت انها انحسبت لي الدرجة ؟؟

هذا السؤال من حقنا كلنا و صحيح اذا حملنا المحاضرة كيف نعرف انها انحسبت الدرجة

الجواب ماراح نعرف سواء الطلاب الجدد او القديمين لنا لحد الأن الجامعة مانزلت برنامج يحسب لك درجة المشاركة حقت تحميل المحاضرة والمناقشة كذلك

يعني امرنا لله نحمل محاضرات ونجاوب على المناقشات وهم وذمتهم

( حل الواجبات في الافتراضي لمن تحل الواجب راح تطلع لك درجة الواجب )

- يعني تحميل او مشاهدة المحاضرات الــ 14 لكل مادة
- حل المناقشات الــ 14 كلها لكل مادة
- تحمل او مشاهدة الماحضرات الــ 3 لكل مادة

هذول الــ 3 أشياء ماراح نشوف درجتهم ( الا اذا الجامعة برمجة نظام يبين لنا الدرجة في هذول الـثلاثة )

فقط الى راح نشوف درجتنا فيهم الى هم الواجبات

الى يحمل محاضرة في جهازه وماتشتغل عنده يحمل البرنامج التألي وراح تشتغل معه

http://fs40.filehippo.com/7043/9ed0ea87d41a4506b9d51f8ea541411c/K-Lite_Codec_Pack_1005_Full.exe

ملاحظه مهمه ( المحاضرة المباشرة )

بالنسبة للمحاضرة المباشرة الدكتور راح يطلع لكم فيس تو فيس واي احد عنده سؤال او استفسأر او يبي يغث الدكتور ويجنن فيه ويطلع روحه يقدر يسأل ويستفسر عن اي شي والدكتور راح يجاوب ان شاء الله بدون جلطات هههههههه

في تطبيق للجوال

لمن تفتحون البلاك بورد راح تشوفون رابط تحميل تطبيق للجوال سواء ايفون او اي جوال اخر
هذا برنامج تطبيق تحمله في جوالك وتقدر تدخل منه على البلاك بورد

وهذا صورته

وهذا رابط البرنامج في تويتر

https://twitter.com/Bb_Mobile

=============================================

ملاحظات اخرى

بالنسبة للطلاب الجدد ركزو معي في هذي النقطة

اذا جأت الاختبارات النهائية كذا قبلها بــ أسبوع تدخلون على رابط الخدمات الطلابية

على الرابط التألي

http://del.kfu.edu.sa/entisab_app/index.asp

بعدها تروحون لهذي

الايقونة

اذا دخلتو عليها راح تشوفون اسماء المواد الدراسيه كلها

بالشكل التألي

أبحثو على المادة الى راح تختبرونها لسمستركم و ادخلو عليها وحملو الاسألة , يمكن 3 صفحات لكل مادة او صفحتين
هذي اسألة ينزلها دكتور المادة وتكون مراجعه وشبيهة لي أسئلة الاختبارات النهائية

احنا السمستر الأول جات من هذي الاسألة .

سامحوني على اعادة وذكر هذه النقطة مره اخرى
لأني رجعت و ذكرت هذي النقطه في هذا الموضوع لأني حسيت انه محد انتبه لها في الموضوع القديم

( هي موجوده في الموضوع القديم مشاركة رقم 9)

=============================================

شوفو أهم حاجه تأبعو اخبار الجامعة في الخطط الدراسية ,,, الجامعة تنزل جدول فيه خطة موسمية كاملة شاملة والكامل وجهه سبحانة فيها تواريخ بداية ونهاية

- مثلأ متى يبتدى التسديد ومتى ينتهى
- متى تقدر تنسحب وانت مسدد ويرجع لك المبلغ كامل والكامل وجهة
- متى تبتدى معادلة المواد ومتى تنتهي لهذا الفصل
- متى تقدر تقدم الاعذار حقت الغياب ومتى تنتهى
- الخ الخ

وهذا صورة لخطة هذي السنة

1434/1435 للفصل الدراسي الأول

في كل سمستر الجامعة تنزل خطة دراسية وتاريخ كل حاجه بكذا انت تفهم شنو لك و شنو عليك

هذا رابط تحميل التقويم الزمني لهذه السنه

صيغة PDF

http://del.kfu.edu.sa/entisab_app/calender/1434-1435-1.PDF

وكل فصل دراسي ( سمستر ) تدخل على هذا الرابط وتطبع لك الخطه الدراسيه الجديده لكل سمستر

http://www.kfu.edu.sa/ar/deans/e-lea.../calender.aspx

عشان لاتسألون انا مدريت ان اليوم اخر تسديد او فأتني التسديد او ما ادري او متى اخر يوم ارفع الغياب الخ الخ

كل شي واضح لكم الأن احنا مانجيب شي من عندنا ونجاوب على استفساركم من عندنا كل شي تحطه الجامعه وهذا الخطة عندكم والتواريخ عندكم

=============================================

اشترو طابعة صدقوني راح توفرون فلوس المكاتب

لنا مثل ماذكرت في الموضوع الى حطيت رابطة في بداية هذا الموضوع راح تنزل ملازم ( كتب ) من طلاب معنا هنا مجتهدين ورائعين وملازمهم حلوه للمذاكرة وراح تشوفون ملخصات واسألة اختبار نهائية الخ

الطابعات في مكتبة جرير او اكسترا او اي محل اخر أسعارهم حلوه وكل
واحد وفلوسه
في طابعه 150 ريال وفي 200 وفي 250 و 300 و الخ الخ من الأسعار

ونصيحتي لكم اشترو طابعة ليزر لاتشترون حبر

أعيد عليكم اشترو طابعة ليزر الليزر يدوم أكثر وماراح تشترون حبر ليز الا بعد فتره طويلة يمكن سنة وعلى حسب استخدام الشخص

===================

بالنسبة للى راح يدرسون عن طريق ايباد او ايفون او جوال اقوله راح تحسب لك الدرجة بس مو مضمونه وانت براحتك وهذي دراسه يعني خليها على لاب توب او دسكتوب ( كمبيوتر شخصي )

يأخي اذا انت عجاز مره وكسول حمل كل أسبوعين وحل واجبات ,, كل أسبوعين ,, او كل 3 أسابيع ,, او كل شهر

واذا انت مخربها مره يا راعي المزاج ومألك خلق دراسه خلاص لجا أخر الدراسه قبل الاختبارات النهائية كذا بأسبوع او أسبوعين خلاص حل كل الواجبات لكل المواد وحمل كل المحاضرات لكل المواد وحل كل النقاشات لكل المواد

وراح تنحسب لك الدرجه لاتخاف

في الاخير لاتنسون تدخلون على الرابط التألي فيه معلومات عن

النظام الأفتراضي ونظام البلاك بورد

لكل مستجد / مستجدة : شرح لكل مايهمكم من طريقة الدراسة عن بعد الى حل الواجبات و تحميل المحاضرات + مشاهدتها و حل المناقشات و طريقة المذاكرة للأختبارات النهائية

في النهاية أسال الله لي ولكم التوفيق في الدنيا والأخرة

لاتنسونا من الدعاء

[أسير بلآ قيود]

الله يوفقك

كفيت ووفيت

لا حرمك الله اجر ما كتبت

[Princess Noura]

الحين يعني الواجبات تكون مفتوحه طول السمستر؟؟؟؟ مالها وقت محدد.
وايش الفرق بين الافتراضي والبلاك بورد ؟؟ للحين مافهمت !!!! مو هما نفس بعض

شكررررا ع هالمعلومات بجد الله يوفقك ويسعدك

[tahany asiree]

الله يكتبلك الاجر ...ماقصرررت اخوي

[حلا الحربي]

اللحين وش نفتح البلاك والا الافتراضي
وكمان متى تبدا المحاضرات بكره

[Soma saad]

مشاء الله شرح وافي ممممشكور

[ywyw]

مشكوره

انا لحد الان الافتراضي مافيه شي

اما البلاك بورد فيه ثلاث محاضرات ولا حملت منها شي

[Abu_Fahad]

شرح مميز ومنسق

اتمنى تثبيته خصوصاً هذه الفتره المتزامنه مع ( فتح الأنظمة ) وحاجة الجميع له

حرم الله يديكـ عن النار

[o_lg_ll]

المشاركة الأصلية كتبت بواسطة أسير بلآ قيود

الله يوفقك

كفيت ووفيت

لا حرمك الله اجر ما كتبت

المشاركة الأصلية كتبت بواسطة tahany asiree

الله يكتبلك الاجر ...ماقصرررت اخوي

المشاركة الأصلية كتبت بواسطة soma saad

مشاء الله شرح وافي ممممشكور

المشاركة الأصلية كتبت بواسطة abu_fahad

شرح مميز ومنسق

اتمنى تثبيته خصوصاً هذه الفتره المتزامنه مع ( فتح الأنظمة ) وحاجة الجميع له

حرم الله يديكـ عن النار

يعطيكم العافيه جميعاً

اريغاتو

[ابو غلا و حلا]

الله يسعدك شرح رائع ... عن نفسي ماراح ابدأ التحميل الان

عندي سؤال بالنسبة للواجبات تنزل في منتديات الحوار ؟ ولا وين