[إحساس سلطان]

السلام عليكم ورحمة الله وبركاته

بدخل بالموضوع والمقدمات مو بيننا

في البداية بتكلم عن عدة نقاط أتمنى الكل يقراها

أولا":

اتمنى منكم اغلاق جميع مواضيع الأفكار وأي واحد عنده فكرة يخليها براسه ( الحين يطلع لي واحد يقول شدخلك )

لأنكم شفتو اللي صاير مافي ولا فكرة إنطرحت ومشت صح
معناة إننا بهالمنتدى صعب تمشي فكرتك لأننا أساسا" أرض غير خصبة لتنمية الأفكار
ومع الأفكار بدت المشاكل والهواش والإعتذارات

لدرجة صارت مواضيع المنتدى كلها مطاقق والله لما افتح اللاب وأدخل المنتدى صار أول شي يخطر ببالي عسى خير هالمرة ومايكون فيه أكشن صاير بين اثنين جدد

لكن الوضع تطور كانت المشكله محصورة بين شخصين لكن الحين وصلت المشاكل بين الجماعات وناس تعزز لناس وناس تنفخ روس ناس وصارت جماعات هذا صديقنا وهذا ضدنا

وانقلب القسم ساحة معركه عشان كذا أنا رأيي ( عشان محد يقول شدخلك ) أقول رأيي

أننا نلغي كل الخطط والأفكار الخرافية لأنها مانفعتنا بشي

بل صار نفعها شي واحد وهو إن الموضوع ينقلب دردشة

ثانيا"

أتمنى عدم الرد على أي موضوع فيه إحتقان أو يدور حول مشكله بين شخصين أو جماعات حتى لايكبر حجمه ولو إني أعتقد أن البعض لما يفتح موضوع مثل كذا الغرض منه توسيع الشق وصاحب الموضوع يتابع تزايد القراء وتزايد عدد صفحات الردود لأن هذا همه

ثالثا"

يازملائي وزميلاتي الحوار شي حلو وجميل لكن مع الأسف أغلبنا لايملك أسلوب الحوار ويكون الموضوع بداية حوار ويشتد الحوار ويصل لنقطة أنت مع أو ضد

إذا كنت مع فتكون مقبول بيننا

وإذا كنت ضد فتكون مجلود مننا

وياويلك تبدي رأيك وكان ضد فكرتنا انتبه ترا بتصير موطن الكره وموطن الفتن وموطن المشاكل وبيجيك الطق من كل جهه وناس تدعم ناس بهالشي

ويجيك واحد يرد برد خاص لك طبعا يكون من جماعة مع لكن يجلدك بالرد لين تنبطح وبعدها يجي واحد غيرة يسوي إقتباس لكل هالجلد ويحط له أيقونتين وحده ابتسامة والثانيه تصفيق

وهذا حالنا من جرف لدحديرة

رابعا"

شوفو مواضيع المنتدى

المواضيع حقت المهاوش تلقونها 10 صفحات ( ياحبكم لها )

ومواضيع الاستفسار أو سؤال عن معلومه أو عن طريقة السداد أو أو .. أو موضوع يكون خاص بدراستنا تلقون فيه ردين او ثلاث

لأن الكل صار يدخل مايبي يساعد كما يزعمون والا كان ردو على اللي يستفسرون

أنا سويت متابعه للأعضاء المتواجدين صارلي يومين اسوي هالإحصائيه القى الكل متواجد بالمواضيع حقت المشاكل وقليل جدا" متواجدين بمواضيع الاستفسار وتقديم المساعده لهم

للدرجة المواضيع الهامه تمر بسرعه على الصفحه الاولى حتى تذهب مهب الريح بالصفحة الثانيه والسبب كثرة المواضيع اللي بلا طعمه موضوع نقاش ثم هوشه ثم تمل الناس منه ويورح صاحب الهوشه يفتح موضوع جديد يثير الهوشه من جديد وعلى هالحال

خامسا"

أتمنى محد يتضايق من اللي قلته كله وأرجو لحد يرد علي بردود تثير المشاكل

وأنا كتبت الموضوع لا أطلب أحد مؤيد أو غير مؤيد أنا أريد فقط أن نعود مثل ماكنا بالترم اللي راح

يد وحدة وقلب واحد نتقبل الرأي بكل هدوء وصاحب الرأي يتقبل النقد أو الرأي الآخر برضو بكل هدوء

لأن بصراحه الوضع صار ماينحمل حتى حنا فلتت أعصابنا وكثير من الاعضاء كانو بقمة الهدوء والاتزان وفقدو هالشي بسبب أنه مايقول شي إلا وينطون بحلقه

وصار الواحد مايتجرأ يقول رأي عشان مايزيدون عدد الحاقدين

عينو من الله خير وهدو أعصابكم وإنسو كل اللي صار وكونو يد وحده ورتبو أنفسكم بأنفسكم

لاتنتظرون أبو فهد وإلا الأخ أحمد أو الأخت بنت الإسلام أو الجوري أو غيرهم من مشرفين ومراقبين يفرضون عليكم هالشي طبعا" مو قصور فيهم ولكن كبرياءا" لنا

نحن أحدثنا الفوضى والاخوان والمشرفين إحتارو فينا لدرجة صارت الهوشات توصلهم وتحوشهم بعد(الحين يطلع واحد يقول يتلزق بالمشرفين)

عشان كذا خلونا نتكاتف ونرتب امورنا ونطبق الشي اللي من صالح الكل

واللي من صالح الكل ويرتبنا هي الطريقة اللي طرحها أخوي أحمد معه فيها لانها طريقة تنهي كل الخلافات والهوشات وغيرها.. اللتي احدثتها لنا التقسيمات والاتباع لمجموعة معينه

هذا قسم مستوى ثاني خلاص يختص بمواد المستوى الثاني فقط واللي معه مواد من مستويات أخرى يجدها في مستوياتها ولكن هذا لايعني بأنه ممنوع تتكلم عن موادك هنا بين زملائك لا عادي بس الطريقة الهدف منها ابطال التحيز والحزازيات وتقلل من التضارب بالآراء

اتمنى كلامي واضح ولو إني عارف فيه كثير ماراح يعجبهم كلامي وراح يمشون عكسه لأني أشوف انه هذا اللي صاير وصرنا نتسابق من أول واحد أو واحده يمشي عكس التيار مع صاحب الموضوع

لكن أنا موضوعي للعقلاء وليس للجهلاء

وأنتم بما أنكم زملائي وزميلاتي فأكيد كلكم عقلاء

لكم إحترامي زملائي