كتابي الاخضر الجديدة: قصة كفاح مادة التقنية 1 + مايستفاد + ابيات ربابة ههههه للعظة والعبرة

[ღ الليدي ساره ღ]

السلام عليكم
شخباركم ومبروك نجاحي ( يارب يارب ان شاء الله ) ونجاحكم في مادة التقنية مقدما

وبهذه المناسبة احب اقول كلمة شكر وعرفان للدكتور احمد الشريف :(( بيض الله وجهك ياذيبان واشهد انك من حلاحيل الرجال اللي يفكون الدخيل )) محاليل ايه وبتاع ايه تراها مدحه ذي يادكتور

بالنسبة لي انجاز يسجل في التاريخ ان اعدي هذه المادة ليس بسبب صعوبتها ياسادة ياكرام ولكن بسبب ترتراااام >> بتشوفونها كثير بالقصة هع هع اليكم القصة

يالله ياشاطرين كل واحد يسحب مخدته وينبطح قدامي وابي اقص عليكم (( هيه انت ابو سروال اصفر لاتمعط شوشة اخوك )) خلاص مارح اقص

هذا سلمكم الله بعد ماطلعت من اختبار الانجليزي يوم الاحد وصلت للبيت متأخرة ورتبت وجيت اسوي العشا والا المفاجأة رقم 1 :ترارارم

الساعة 11 وشوي طفت اسطوانة الغاز والمحلات مسكرة

وقلبنا العشا شوي بالحوش لين الساعة 1 (( ضاعت علي المذاكرة ليلتها كلها ))

قلت الحمدلله على قضاء الله وقدره اعوضها بكرة

صحيت يوم الاثنين متأخرة قبل الظهر واولع اللمبة والا المفاجأة رقم 2 ترارارام

ايه ايه قولوا الكهرباء طافي واغراضي كوووول ابيها في اللاب توب مااملك لو ورقة ملموسة

وطبعا اللاب توب من امس مافيه شحن طافية بطاريته والجوال على وشك يطفي وزوجي بالدوام

قلت يالله هذا واحد من السلاتيح حولنا بيركب خط وقعدوا يحفرون مثل الشهر اللي فات وبيرجع بعد ساعتين


لكن المفاجأة رقم 3 ترارارام هههههههه عرفتوا الايقونة ؟ صح شاطرين هذي هي

استريحوا مارح تقدرون تخمنون لان الطامة كبيرة خخ والمفاجأة

عرفنا العصر الكهرباء مفصولة فصل تام ومحد يدري وش السبب حتى اذن المغرب

وكانت المفاجاة رقم 4 ترارام ايه نفس الايقونة ماتغيرت انهم غلطوا بين شقتنا وشقة جارنا المفهي ابو طاقية صفرا العلة حسبي الله عليه ماسدد

وتم الفصل وماراح يرجع الا بعد 3 ايام عقب التسديد وعقب ماراجع الشركة لان له 7 شهور ماسدد الرخمة يحسب ان شركة الكهرباء فكر مافي شوف انا

يعني اللي فهمناه من الشركة مارح ترجع الكهرباء اليوم والليلة لو تلحسون السماء انت وياه

اضطريت تحت قسوة هذه الظروف والقصف العشوائي لذاكرة القراءة فقط هههههه شدخل ذي في ذي لابو اللي علمك التعبير هههههههه

اضطريت انزح الى مخيمات اللاجئين واروح عند صقيقتي عندها سنتر بيوتي تجميل ومساج على اساس اذاكر عندها

وخوش مذاكرة كل شوي داخلين مجموعه من الفاهيات تنفيضض بشرة خخ قص سشوار صبغ >> وانا اكحكح انكتم نفسي ولجة وضحك وصراخ وطق طاخ العلوك

وكل مادخلوا زباين لو سمحتي انتي صاحبة المشغل نبي كذا وكذا >> صاحبة المشغل بالبيجامة لابوكم لابو نظركم

الاكيد رجعت البيت على ال 11 بالليل وانا شبه انهيار عصبي مافتحت الا اول محاضرة وكنت الخص ولا فهمت شي ولاركزت

المهم على الساعة 12 يتصل جارنا الله ياخذ نص وجهه ويشرح لشركة الكهرباء ويجون ويشغلون علينا الكهربا والا خلاص مافيني شدة من القهر والتعب والازعاج بالصالون افتح شي

والف راسي واعض المخدة واطفي رامات مخي واقطع شبكة لان مع الكل وانخمد

قمت الظهر بديت اذاكر شوي وادعي وابكي واصلي تروايح بدل العصر يارب انجح لو على الحفة

واتصل على السواق الجديد قلت 5 ونص تكون محضر عند باب العمارة قال عولم مدام

يوم صارت 5 وربع ادق عليه قال بالطريق بس كأني ضيعت العمارة هههه قلت لا يمزح والله لاالعن ابو من خلف سلالة اهلك كان عقب كل هالمآسي بعد بيصير لي فيلم قبل الجامعة

وكانت المفاجاة رقم كم هههههه نسيت ذكروني ايه رقم 5 وبرضو

ايه صح عليكم ضيع العمارة بكبرها وقعد يلف ويدور لين طقت الساعة 6 العشاء وانا اركض لاقرب محطة واوصف له الغبي وعجز يفتهم

الاكيد اثناء الدموع والبكاء والسب والشتم بالمحطة ولا لقيت تاكسي تخيلوا الوضع خلاص يأست الا شوي راح علي الاختبار وحملت المادة بسبب اخطاء الغير وخطأي اني اهملتها اول

بالصدفة الا قي سيارة فان تبع قصر الافراح طالعة مشوار عندهم عرس واقف سواقها سوري يعبي بانزين بالمحطة

واجيه اركض بغيت الصق بالصدام حق السيارة وانا اصيح ولي على آآآمتي دخيل حريماتك ياسبع
الك والا للديب ؟ قال تخسين والله اللي ماركبتك ومسكتنا الهيئة وسفروني لابوك لابو اختباراتك خخخخخ

اكذب قال يخسى الديب اطلعي احنا اهل الشام الشرفاء ويشلع بي يم الجامعه ملك الطاره وانا طايرة ومع كل لفة اصدم في بالباب الايمن والايسر وراء
ومع الحماس بغيت اقطع ورقة واكتب بها يسقط بشار ابو اذان الاهبل الطويل واطلعها مع الدريشة بس اني كنت مشغولة امسح دموعي

وادخل اركض للقاعة وتتطاير المعلومات هنا وهناك والحق على وانا بآخر رمق ويغمى علي عند الطاولة >> ترا هذي صاروخ عاد ههههههههه

ويوم شافوني لجنة الاختبار قالوا بعد عمري لاتخافين امي ولاتصيحين حتى لو جيتي متاخرة بندخلك ومعك وقت لاتضايقين فديتهم بغوا يخموني بس الوقت مايسمح

والحمد لله يوم مسكت ورقة الاختبار واقرى ادعية وابدا احل والا الوضع يطمن يعني ان شاء الله اجيب ال 30 درجة حق النجاح

وهذي كل الحكاية يالله الحين عاد يتقامزون وواحد يصفق الثاني بالمخدة حرب جماعية >> طفولة الشعب السعودي

مايستفاد من القصة بل هذه الرواية : مايلي :

1 - تعبنا واحنا نقول لاتؤجل عمل اليوم الى الغد لكن عمك اصمخ محد حولك بالنسبة لي الدوام الله ياخذه شفتين مااطلع الا الساعة 9 حسبي الله عليهم
لكن كان بامكاني ادرس الاوف يوم الجمعة >> لابو القطاع الخاص
2- الملازم الملازم وطباعة المحتوى اوصيكم ونفسي لاتعتمدون على االاب توب في كل شي
فرضا لاسمح الله انكسر والا خرب والا طفى الكهرب يوم الاختبار او ليلته بتاكلون هوى مثل بطلة الرواية >> مابقاش انااااااا

3- قبل كل شي خلوا ثقتكم بالله ولاتنسون الادعية والاستعانة بالله وحده والله ان الفضل في كل حياتنا لله وحده له المنة والحمد والشكر احسنوا التوكل عليه ولاتتذمرون

4- بالاصرار والتحدي وحب طلب العلم يصل الانسان لمبتغاه ولاتقف بوجهه الظروف الصعبة ولا التحديات ومن سلك طريقا يلتمس فيه علما سهل الله له طريقا الى الجنة

5- من لايشكر الناس لايشكر الله وبهذه المناسبة اشكر جميع الاخوة والاخوات في هذا المنتدى الذي لولا الله ثم لولاهم ماكنت نقزت من كرسيي الترم اللي فات وهالترم

6- كلمة حق اقولها ابراء لذمتي وهي الهدف الاول من كتابة هذا الموضوع هو انني اتقدم بكل الشكر والعرفان للدكتور احمد الشريف على ان جعل الاختبار بكل هذا الوضوح والسهولة
اسأل الله ان يسهل طريقه للجنة ويجزيه خير الجزاء بالرغم من ان حلي اقل من ثلث الاختبار تقريبا لكن ان شاء الله انجح

ختاما هذه ابيات للدكتور احمد الشريف وكنت اود ان اجرها على الربابة لكن خفت يفهمني غلط انها مسبة خخخخخخخخخ

اقول فيها :

بيض الله وجهك واشهد انك شريف .. !!
___________ رح يادكتور احمد جعل دربك خضر .. @
اشهد انك قدع من راس ضلع ن منيف .. !! >> افلقيني لو فهمها
___________لك من اعماق قلبي كل ود وشكر @
كنك ادرى بظرفي يوم حالي كسيف >> خفي علينا يالبؤساء
_________ يوم انا ادرس واكافح تحت ضو القمر @ !! >> خفي علينا يالدافورة يازرقاء اليمامة
يومك غيرك تفلسف يحسب انه خفيف
ـــــــــــــــــــــــــ مالقى الا دعاوي البادية والحضر .. @ حزر فزر منهم المغضوب عليهم
وانت وردة وشمعة منورة يالطيف
_____________ يافداك " المعاني والقطن " والشعر .. @ مااقصد احد
تسمح اهديك ابو نورة بصوت ن رهيف ! ؟
ــــــــــــــــــــ يوم سلطن يغني بــ وٍد : " كـــــلك نظــــر " !!!

ختاما جعلك تدوم وتحيا يادختور تراني في وجهك انا طالبتك اسئلة الخمبقة حقت الوورد اعفني منها قول تم يابعد حيي ههههههههههاي

[لاجّ’ـل عّ’ينك]

قسم بالله اوقف احترام للكلام الكبير



بس بصراحه الدكتور ماقصر


درب التوافيق ياساره دربك عسى ربي يسعدك بنجاحك

[ايفون وردي]

ههههههههههههههههههه
وش ذا يا سوير جاني احساااس مدري اضحك او اصيح >> تضامن مع مشاااعرك
يالله هالمره عدت على خير
انتبهي المرااات الجايه وطبقي النصااايح واشتري كرتووون شموووع خخخخخ والا اقولك غيروا شقتكم مدااام ذا جاااركم

بالتوقيق حبيبتي

[ξـبد»βrines«الرζـمن]

حسستيني كني اشوف مسلسل (سكتم بكتم)ولا (الأرض الطيبة)

الحمدالله على السلامة

[][درزن هبآل][]

هههههههههههههههههههههههههههههههههههههههههههههههههه هههههههههههههههههههههه ..

سآره : جعلللك تطمرين هالسمستر .. طمررره نآطحه

< مآزآلت تضحك ..

موفقه ..

[قرقر]

استرسال ودراما أكثر من رائعه

[أبومااااااااازن]

الله وفقك ياأخت سارة والله قاعد أضحك وأما أنا إن شاء الله درجة النجاح مضمونة

[امونه قمر]

~> خخخخخخخخخخخخخخخخخخخخخخخ فاطسه ضحك
الله يوفقنا و نعدي هالترم على خير



بس سالفة لاتاجل عمل اليوم للغد
اتعب وانا كل ترم اردده و اسحب عليها
ههههههههههههههههههههههه

[ღ الليدي ساره ღ]

لاجل عينك والله يوفقك وفالك النجاح ومشكور على الكلام الكبير تسلم
هههههه ايفون وردي واللاب توب اشحنه بالشمع خخخخ آآآه الله لايعيد هاليوم على كل غالي احس هاليومين كاااابوس
برنس عبدالرحمن الله يسلمك ههههه ونسيت لا اكمل الماساة رقم 6 ترارارام عادي اكمل هنيا ههههههه
يوم يعلق المنتدى ويسوون له ريفرش مدري ريستارت مدري ري نحس خخخ

[لاجّ’ـل عّ’ينك]

بسك ورانا اقتصاد كافي لحسة مخ