أشوف شي إنتوا ماتشوفونه

[مكافحة الحشرات]

اووووووووووووف..وأخيراً..

اصبر اشوي خلني أخذ نفس...تعبت وأنا كتب كلمة (يسلمووووو) خمسين مره..

لو يعطوني إياها جزاء في المدرسة ..ما كتبتها..




السلام عليكم ورحمة الله وبركاته.. <<< تو الناس
أخوي أنيس النفوس..ولا عليك أمر..إذا مافيها كلافه..ياليت تفسر لنا هالحلم..

الحلم طازج طبعاً..حلمت فيه اليوم الساعه ( 3:15 )..لا..استغفر الله..الساعة ( 3:13 ) <<< أموت في الدقة أنا

شفت نفسي جالسه في الشارع مع أختي الكبيرة وما خذين راحتنا وقاعدين نسولف وأنا كنت ماسكة في يدي..ملقط و مرايا..

وفي الحلم كأني كنت ناوية أروح معها علشان نخطب حق ولدها..بس بعدين أنا غيرت رأيي..
وبعد ما غيرت رأيي يا أخوي أنيس..إختي صارت تطالعني وكانت تحاول تبحث في عيوني عن السبب من وراء تغيير رأيي..

وأنا حيييل تضايقت من نظراتها..وقلت لها : وش فيش تطالعيني كذا..؟؟ ليش ماتعلقين على كلامي ؟؟ <<< هههه غصب
طبعا يا أخوي أنيس أنا قلت هالكلام وأنا متضايقه ومعصبه..

قالت لي : إنتِ ليش غيرتي رايش ؟؟ أكيد إنتِ شفتي شي إحنا ما نشوفه..ويمكن تكونين شايفه إن هذي الخطوبه ما فيها خير ولا بركة.(تقصد إنها مو مباركة)

قلت لها: لا..بس أنا هذا مو أول احتفال ما أحضره (صرت أتكلم وكأني أتكلم عن مولد الإمام الرضا)
يعني أنا أغلب الإحتفالات ما أحضرها..إلا إذا مزاجي مروق..

طبعاً يا أخوي أنيس إنتهى المشهد الأول من الحلم..

وهذا المشهد الثاني /

الموقع / في نفس مكان المشهد الأول (يعني في نفس الشارع)

شفت نفسي مع بنت خالتي..وكانت قاعده تكلمني عن خطيبة ولدها وتقول : والله يا مكافحة الحشرات يابنت خالتي لبنية ما عليها كلام وخوش بنية بس ما أدري ليش أنا مو مرتاحه وأحس إن الموضوع ماراح يكتمل..

وطبعاً يا أخوي أنيس أنا في الحلم كان عندي شعور إن الخطوبة هذي ماراح تكتمل..يعني ماراح تتم..لكن ماقلت حق بنت خالتي علشان ماتحط هذا الشي في بالها..وينفصلون عن لبنية..وأكون أنا سبب في إني أقطع نصيبها..<<< حكيمة يامكافحة الحشرات حتى في الأحلام

فحاولت أواسيها وقلت لها : إي عادي ..يصير هذا الشعور..مثل إذا أحياناً يجي شاب مافي شي ناقصه بس ماتحسيين إن هذا (هو) نصيبش >>> قايله شي جديد مع وجهش..نفس الكلام إللي قالته الحرمه

وقلت لها : إنتِ اعتمدي على رب العالمين..وإللي الله كاتبه بيصير..وإذا هذي البنت من نصيبه لو يلف العالم..في النهاية بيرجع لها..وإذا مو نصيبة..لو يذبح نفسه..ممكن في أخر لحظه يتغير كل شي..

وطبعاً يا أخوي أنيس أنا بعد ما قلت هالكلام..سمعت بنت خالتي وهي تتكلم مع نفسها..أنا ما سمعتها ..أنا قرأت أفكارها..

كانت تقول : وش تقصد حروف ؟؟ يعني ممكن يموت ولدي مثلاً..

وطبعاً أنا قرأت أفكارها بس هي ماتدري إني أنا قرأت أفكارها..فحاولت أطمنها وقلت لها : يعني ممكن يصير شي في أخر لحظة وينتهي الموضوع من البنت مثلاً..

_________________________________انتهى

يمكن الحلم يكون : اضغاث أحلام بس أنا استغربت اشوي من كلمة أختي في المشهد الأول يوم تقول :
(أكيد إنتِ تشوفين شي إحنا ما نشوفه )

وفي المشهد الثاني يوم ( أقرأ أفكار بنت خالتي)

و قلت يمكن أنا بعدين بصير مثل أنيس النفوس أفسر أحلام..ويمكن أصير أحسن منه وأقرأ المستقبل بعد..أو يمكن الله مو راضي عني وبيعاقبني وبيخليني أقرأ أفكار الناس..علشان أستلم شهادة الجنون من مستشفى المجانين وأصير مجنونه رسمي..لأن إحنا بلسانهم ومو خالصين..نجي بعد ونقرأ أفكارهم..!!!

الله يستر

[أنيس النفوس]

و عليكم السلام و رحمة الله و بركاته ،،،،

اختي الفاضلة / مكافحة الحشرات

على هذا الطرح المميز و إن كان اضغاث احلام يسلم راسك خيره في غيره ،،،،


و تقبلي تحياتي و شكري على هذا الطرح المتآلق الذي رسم البسمة على شفاهنا

[مكافحة الحشرات]

الله يغربل ابليس..هالملعون امفشلنا وياك..

مشكور يا أخوي وماقصرت ويعطيك ألف عافية..

[أنيس النفوس]

شكراً لك و الله يلعن ابليس مع انه مسوي خير بهالحلم و هو ما يدري لأنه خلانا عن غير قصد (طبعاً) نضحك بتعليقك الطريف

شكراً لك و الله يقطع ابليسك