[هــبه]

بما أن الموضوع شوي قديم ولمن قريته شفت كثير من الأشياء مو موجودة السنة مع تغير الأنظمة بغيت أضيفهم واللي بشوف أي خطأ ينبهني عليه ^_^
طلاب السنة التحضيرية لعام 2013 ......ما أدري عن قسم الطلاب كيف بالضبط بس بكتب اللي عندنا في قسم الطالبات من بدينا السنة إلى الآن لمن خلصنا الربع الثالث
السنة التحضيرية مقسمة إلى 4 أرباع. كل ربع عبارة عن 10 أسابيع. وفي هالعشر أسابيع تتختلف المواد اللي تدرسها على حسب أنتي أو أنت في أي تخصص.
مثلاُ تخصص إدارة أعمال وحاسب في الربع الأول درسنا فقط English لكن التخصصات الصحية درسوه مع IT 1 لكن بشكل عام الأرباع مقسمة بحيث.....
الربع الأول=Yellow book
الربع الثاني=Blue book
الربع الثالث=Green book
الربع الرابع=Purple book
بعد ما تختبرون اختبار مستوى English راح يقسمون الطلاب على حسب مستوياتهم.إذا كانت درجاتك نص ونص يدخلونك Yellow .درجاتك مرتفعة أشوي تدخل Blue. طبعاً أنت ما تشوف الدرجات النهائية بس راح تشوف جدولك وشنو الكتاب اللي راح تدرسه.
المدرسات طبعاً حلوين بشكل عام لو أن عليهم طلعات بعض الأحيان بس أنتي سولفي معاهم ويتضبط الوضع.طبعاً اللي صار السنة هذي أن الحاسب وإدارة أعمال مو إجباري يدرسون كتاب ال Purple لكن التخصصات الصحية مجبرين عليها وفي قسم الأولاد التخصصات الصحية مع كلية الهندسة.
نظام دراسة الأنجليزي .....كل يوم 4 ساعات لازم تحضرين. طبعاً لأن احنا كان زحمة في المبنى فتكون المحاضرات ساعتين وبريك ساعتين وبعدين ترجعين ساعتين ثانيين. وبين الساعتين في بريك عشر دقايق.حاولوا ما تتاخرون بما أن المدرسات أجانب فعرفوا أن الوقت عندهم دقيق. دقيقة تعتبرين متأخرة وخمس دقايق أنتي غايبة. حتى لو كان في اختبار وحضرتيه واختبرتي تبقين أنتي مسجلة غياب.طبعاً على تجربتي...أنا حاولت أني أحضر المحاضرات على وقتها بس مرة أو مرتين أجي متأخرة بس ما حسبوهم علي.طبعاً المشاركة في الكلاس له دور كبير في استيعابك للموضوع .كل أسبوع وحدة(Unit) جديدة.وكل نهاية أسبوع أربع ساعات اختبار بينهم بس بريك عشر دقايق بين كل اختبار والثاني.
الأختبار الأول عبارة عن listening تجي المدرسة (طبعاً مرة تجيكم مدرستكم ومرة تجيكم مدرسة غير....الأختبار النصفي والنهائي مضمونة أنها مدرسة غير) طيب لمن تجي المدرسة تقرأ ورقة وأنتوا تستمعون وتحلون على ورقة نفس اللي موجودة في اختبار القدرات. وورقة الA4 اللي عندكم راح تكون بس خيارات الإجابات موجودة وأنتي لازم تسمعين السؤال مع المرفقات وغيرها. أحياناً تكون قطعة وتجاوبين ب صح وخطأ أو أسئلة عن معلومات كانت في القصة. وسؤال يجيك تسمعين معني كلمة وتختارين أي كلمة هي تقصد (طبعاً أنتوا بتكونون مذاكرين ورقةتاخذونها من يوم السبت بالكلمات ومعانيهم) وفي سؤال بحيث أنها تقرأ جملة وكملي الفراغ بالكلمة المناسبة والكلمة راح تكون من ضمن الخيارات.
طيب اختبار الساعة الثانية في خلال 50 دقيقة لازم تحلين 80 سؤال.في الغالب تجي قطعتين أو ثلاث كل وحدة عليها أسئلتها وتخلف الاسئلة مرة صح وخطأ مرة عن المضمون. و كلمات ومعانيهم سؤال غير. جمل وكملي الفراغ بكلمة مناسبة أنتي درستيها في الوحدة.عادة آخر سؤال تجيك قطعة أو قطعتين مع فراغات تكملينهم بكلمات درستيهم.
أختبار الساعة الثالثة اللي هو عبارة عن قواعد و الطريقة تختلف من مستوى إلى مستوى.نصف الاختبار عبارة عن أسئلة عن القواعد والنصف الثاني تكتبين قطعة. طبعاً في الYellow بداية يطلبون 75 كلمة. بس حاولوا أنكم تتدربون على الكتابة أكثر لأن في المستوى الثالث يطلبون 250 كلمة ويمكن يرفعون.و الموضوع اللي تكتبون راح يكون حول الموضوع اللي كانت الوحدة تتكلم عنه. في الYellow كانوا يعلمونا وش بنكتب عنه بالضبط وكانوا يعطونا إياه كواجب تكتبينه وتصححه لك وتجين يوم الأربعاء تكتبينه نفسه. بس حاولي ما تعتمدين على هالشيء لأنك بتتعبين بعدين. احنا نزلت درجات كثيرة في المستوى الثاني لأنهم في الأسابيع الأخيرة قالوا خلاص الموضوع ما راح تعرفونه إلا وقت الاختبار وكنا خايفين منه. بس بعدين تأقلمنا مع الوضع وصارت المذاكرة أخف. بدال ما تذاكرين قطعة كاملة وتحفظينها ما عليك إلا تذاكرين الكلمات والقواعد وتاخذين فكرة عامة من الوحدة بحيث أنها تساعدك في كتابة أفكار وقت الاختبار.
الأختبار الأخير اللي كان أصعب شيء بالنسبة لي بس ألحين حبيته اللي هو الSpeaking
بالضبط نفس writing بس أنك توقفين قدام البنات و تتكلمين عن الموضوع اللي انطلب منك تبحثين عنه أو تكتبين عنه. طبعاً بصير موضوع غير اللي كتبتي عنه في اختبار القواعد.في المستوى الأول راح يكون من 30ثانية إلى دقيقة تتكلمين فيه والمدرسة راح تقيمك على كل شيء. على الموضوع وعلى القواعد وعلى استخدامك للكلمات الموجودة بالكتاب حتى كيف وقفتك وكلامك تتقيمين عليه. يعني تمسكين ملابسك ولا شعرك من التوتر تنقصين عليه.مع الوقت راح تتعودون على الوضع.
نسيت أقول الدرجات.....الأختبار الأول من 50 والثاني من 80 (يعني كل سؤال عليه درجة) والثالث من 50 والرابع من 30 ( الحصول على 30 صعبة بس إذا خذتوا فوق ال20 حلوة)
طبعاً النظام وسط الأسبوع هو اختبار يوم السبت على قطعة أنتي تكونين مفروض قرأتيها لأنهم قالوا لكم من أربعاء الأسبوع اللي قبل وعليه 10 أسئلة من 20 درجة. والكلمات راح تغطونها من يوم السبت وراح تستوعبونها أكثر خلال الأسبوع. يوم الأحد ما في اختبار بس راح تاخذون القواعد مع حل بعض اسئلة الكتاب.والأثنين اختبار على القواعد اللي خذتوها20 سؤال و20 درجة. والثلاثاء اختبار على الكلمات10 كلمات 20 درجة (درجة على الاملاء ودرجة على اختيارك للمعنى الصحيح.)
أهم شيء ركزوا على الكلمات والقواعد ذاكروهم وحاولوا تحضرون المحاضرات كلها. طبعاً الأختبارات اللي خلال الأسبوع راح تكون في أول عشر دقايق من دوامك. وفي نظام بعد قاموا يطبقونه في الربع الثالث وما ندري إذا ممكن يبقون عليه إلى الدفع الجاية بحيث أنهم يعطونكم موضوع تكتبون عنه وحاولوا تركزون وتصححون الأخطاء لأن الدرجات محسوبة وهو من 10. طبعاً الموضوع اللي تكتبين عنه غير الموضوع اللي راح يجيك في اختبار GST(Grammar) or Speaking
هو لو نقول شنقول عن الأنظمة ما راح تستوعبونها إلا لمن تدخلونها وتجربون. وطبعاً مثل ما تكرمت الأخت بالموضوع اللي نقلته أغلبهم صحيحة ولسه الأنظمة ماشية نفسها في المواد وتقسيم الدرجات.
وعذراً لصاحبة الموضوع الأصلي بس أنا حبيت أضيف بعض الأشياء اللي تغيرت وكيف صارت بالضبط ^_^
في أشياء كثير في هذي السنة. تراها على صعوبتها إلا أنها حلوة وخصوصاً إذا جاتك مدرسة فلة وتسنع مزاجك من الصباح.
___إذا تذكرت شيء زيادة بكتبه لكم ____
وموفقين للجميع