جميع التخصصات طالبه انتساب باي سنه؟؟تفضلي معي واقري [الأرشيف] - ملتقى طلاب وطالبات جامعة الملك فيصل,جامعة الدمام

مشاهدة النسخة كاملة : جميع التخصصات طالبه انتساب باي سنه؟؟تفضلي معي واقري

زين الكون

2011- 7- 23, 12:23 PM

السلام عليكم حبايب قلبي ربي يوفقكم كلكم

انا اخترت اكتب الموضوع في منتداكم لان تبارك الرحمن فيه تفاعل وفيه تجاوب اكثر من منتدانا

حبيت نتكلم عن موضوع شوي مستقبلي

ولانسئ الظن برب العالمين

لكن نعتبره زي الفضفضه ونتكلم عن مخاوفنا احنا طالبات الانتساب ونتكلم عن كل شي مرينا فيه وصرناا ((( انتساب))

يعني نتكلم من الى مذاكرتنا تعبناا حلمنا في وظايفنا وش نبي نكون وش كنا نتمنى

يعني من الى

من باب الفضفضه

راح ابدااا بنفسي

انا دخلت الكليه 2006 وكنت قسم انجليزي طبعااا غرامي هالقسم انتظام طبعاا

وكان معدل تخرجي بالثانوي الحمدلله كويس لدرجه مانزل في التراكمي هو نفسه

طول عمري ينشهد لي بحبي حق هالماده لدرجه لو كان يوم اختبار شهري ايام المتوسط مااذاكرها اصلن

لان بابا طول عمره يكلمنا انا وخواتي انجلش لان هو دارس هناك وكلنا خواتي خذينا اللهجه وحب الماده منه

يجوني عيال الحاره بالمتوسط وعيال خوالي ادرسهم يعني سهالات القسم

وصار اللي صار وتعبت وماقدرت اقدم اختباراتي وحولت قسم رياض اطفال

الترم الاول كنت من العشر الاوائل ورجع لي التعب مره ثانيه الين انطردت من الكليه

بعدهااا

حاله نفسيه مايدري فيها الارب العالمين وسبق ذكرتهااا هنااا وقلت كل شي تعرضت له

قعدت سنه في البيت

توظفت بروضه

بعدها دخلت هندسه وتقنيه شبكات لان الدراسه فيه اغلبها انجلش والقسم جديد للبنات

والحمدلله تخرجت

وحاليا ادرس بنعيريه سنه رابعه انتساب دراسات

طبعاا اكثر شي يحزني كوني انتساب

هو

اني انتساب

علماا بان معدلي قوي كان بيدهم يقبلوني انتظام بس الحمدلله شي احسن من ولاشى

توجعني المعامله اللي احصلها من دكاترنا بعضهم مو كلهم لاجو يبخسون في درجاتنا

ويوجعني ظلمهم لنا بالدرجات كان حرام علينا ناخذ ممتاز علما بان حنا مايقل مستوانا عن الانتظام هذا ان ماكنا احسن منهم في الاهتمام ولاااحقر من شانهم

ويحزني كل مادخلت وشفت قرار الخدمه المدنيه انهم مستثنين من التوظيف اي خريج انتساب الا لغه انجليزيه

طيب وش الفرق بينا وبين الانتظام

المكافاه؟؟

احنا نختبر من 100 ونبذل مجهود ونتعب ونسهر ونلخص محاضراتنا ونتعب حالنا حالهم

واهتمامنا بنجاحنا وربي زيهم بالضبط

ياناس صديقتي انتساب معدلها 44(4 تبارك الرحمن لاحول ولاقوه الا بالله وربي انها اشطر من الانتظام

لكن محقرينااا كثير في هالناحيه ليه؟؟؟

صحيح الاولويه للانتظام بالتوظيف لكن وين العدل؟؟

انا زيها حالي حالها خريجه جامعيه

انا شخصيا اعتبر طالبات الانتساب مكافحات جديرات بالثقه رغم الظروف اللي نمر فيهاا ماتحطم عزمتنا نبي شهاده نبي سلاح

الكثيررر يقول هو الناس محصلين وظايف اصلا عشان الانتساب يحصلون

وانا والله من عرفت نفسي ودخلت ادرس اني ادعي ربي يسهل رزقي لاتخرجت

وادري الالحاح بالدعاء وش فضله

دايم اقول ابي افرح قلب امي ابي اسوي لها اي شي لاتوظفت

مو ان حالتنا الماديه متدهوره لا والله بالعكس

بس ابي اسعد امي ابي اسوي اي شي يفرحهااا

ودايم هاذي كلمتي ابي اهدي لامي خاتم من راتبي ابي اشتري لها عطر جلابيه اي شي

ولاسمعت كلام الناس اعترف اتضايق

بس ربي كريم

وقال ادعوني استجب لكم

انا عن نفسي هذا مخاوفي وانتوو وش رايكم

تحمسووو معي وشاركوني

حبيت اشاركم قصيدتي كتبتهاا اول ماتعبت من كليتي سابقا وانا نشرتهااا في جريده اليوم

وانتشرت بصوره كبيره الحمدلله وسويت امسيتن عليهااا يارب تعجبكم

خلاص كل شي بحياتي راح وش اللي بقى
مابه شي يسليني غير اقسى ذكرياتي
انعدم الصدق ومات الامل ومهنا وفى
الكل يترك ويجرح ويزيد من اهاتي
محدن سأل او على عتبه داري لفى
ماغير صديقي مدمعي واصعب كتاباتي
الكليه وراحت مابعدها شي اقوى لاحشى
ماغيراناظر ملازمي واتذكر امتحاناتي
اتذكرامالي واهدافي طموحي لحد السما
وانصدم بالواقع اللي يجرح معاناتي
منتي جامعيه وذا الحلم منك اختفى
راح عني حلمي والوجع يزيد مأساتي
وجدي على السهر والمحاتاه وشي بقلبي خفى
وقت النتايج يارسوب او نجاح وش علامه امتيازاتي
اااه يامستقبلي صرت هم وبكبدي ركا؟؟
وين اجيبك يامستقبلي هاذي تساؤلاتي
وين اجيبك او هو حلم وخلاص غدى,,؟؟
صارت الجامعه بعيني سابع مستحيلاتي
اسكب دموعي وحزني بليلي سرى
لاقلت ابجي الكليه رفضو اشوف خوياتي
ماغير دراستي جرح بجوفي سطى
حبيت قسم الانجليزي لانه من هواياتي
لازلت اذكرهن لاجاوبت خطا
يظلمون بالعلامه وينقصون من درجاتي
لاشكيتهم قالو ذي ورقتك على وضح النقى
ولاقلت ابشوفها قالوا ماهي في ملفاتي
تربيه لابالله الا ظلم فيكم احتوى
من ساسكم لرجيلكم قتلتو اجمل اهتماماتي
لعنبو ظلمكم محدن عليكم قوى
الكل فيكم ينقص الحضور اللي بساعاتي
لاتاخرت ثواني قالت من على الباب ورى
لافتحته قلت ابدخل قالت ابشرح لباقي البناتي
وش قومكم علي جعل عينكم العمى
اوله رسوب وتاليه حرمان وحولت يمكن اهون اللي بياتي
قلت عسى القسم الجديد يهون مامضى ؟؟
عساه يدفن اللي راح من جرح انهزاماتي
انصدمت باربع بعدها وش اللي جرى؟
ختم على الشهاده حطم كل معنوياتي
بعدها عشت اناوهمي كلنا سوى
ماغير نوم وتليفزيون ماخذن اوقاتي
لادقيت على ربعي قالوامتحانا ماندري وش حوى
وامووووت من ذا الكلمه ويحيا هم قد ماتي
ليه ذكرتيني الحزن اللي بجوفي ربى
لاذكرتيني الدراسه تزيد انتهاداتي
كانت الشهاده سراج وحولي حمى
وذالحين ماعندي شي اثبته لانتصاراتي
ماغير شهاده ثانويه وبسمي انا
وش تسوي للوظايف مثلها شهاداتي
صرخ صوت في نفسي ليه ولمى؟
العالم والدنيا كلها تنكر اجتهاداتي
قلبي من رفضكم لي ينزف دما
ماتوقف لابالله يزيد انجراحاتي
ماكنت ابي شي في دنيتي سوى
اسمي مرفوع بعلمي وذي اسمى اعتزازاتي
اصبري يا.نورا..عسى لجرحك اليوم دوى
عسى الله يعوضك بالاخره باعلى مقاماتي

طموحه وافتخر

2011- 7- 23, 03:47 PM

صحيح اني داخله عرض :tongue:

بس الصراحه كسرتي خاطري والواحد اذا تعب والله ان راح يلقى مجهود تعبه بعدين

ترى مو بس انتوا الانتساب تنظلمون احنا الانتظام نتعب وتفاجأين بدرجه ماتوقعتيها

والله ان مره رحت لرئيسة القسم استسفر عن شغله ورمت الورقه بوجهي:bawling:

بس نقول نصبر وربي بيعوضنا :119:

وقصيدتك راااااااااااااااااائعه بل اكثر من رائعه :(204):

انتي اصبري وربي بيعطيك على قد نيتك

امل

2011- 7- 23, 10:51 PM

روووووووعه ذكرتيني بدفعة ثالث ثانوي يا لبيه :Cry111:وحشوني الله يجمعني فيهم قولو اميييييين
والله يوفقك يا الغالية واكثري من سورة البقرة

um_amanah

2011- 7- 24, 04:42 AM

:Cry111::sdfgdsf::Cry111:ما عليكي منهم يمكن المدارس الخاصة الجمعيات الخيرية ياخذوكي رزقك على الكريم مو عليهم

فيونكه..

2011- 7- 24, 07:43 AM

انا لي اخت انتساب والله تتعب المسكينه عشان تصير انتظام او يعطونها بعض الحقوق

بس الله يعين انا دخلت ارفع الموضوع

اب

زين الكون

2011- 7- 25, 07:06 AM

فديتكم مشكورين وربي يوفقكم اشكر تفاعلكم معي ومشكورين على رفع الموضوع

انا حبيت بس نسولف ونسمع تجاربناا ونتكلم عن مخاوفنااا وكل شي يخص االانتساب

حبيبتي اللي قالت عن اختهااا كانت تبي تحول الحين التحويل يصير من سنه 2 يعني اول ماتنجحين من اولى

جبتي معدل 3 ونص او فوق 2 وماعندك محمول راح يحولونك لان صديقاتي كذااا

انا رحت سنه 3 اول مانجحت من 2 وقالوو خلاص تغيرر النظام وفوق كل شي ربي ماقسم علمااا بان معدلي تبارك الرحمن قووووووي

فيونكه

طموحه

امل

um_amanah

ربي يوفقكم ويسخر لكم ردكم يعني لي كثيرررر واشكر اعجابكم بقصيدتي

الإحساس المرهف

2011- 7- 26, 07:45 AM

تدرين وش الفرق بين الانتظام والانتساب من وجهة نظرهم ان طالبة الانتظام تداوم يوميا والانتساب مكبره المخده:71::71:

زين الكون

2011- 7- 26, 11:49 AM

ادري دايم يقولون انتي انتساب ليه ماستجهدتي من بدري

علما باني انا وصديقاتي والله نراجع الشهري معكم وبنذاكر زيكم

مانقل اي شان عنهم

واعرف بنات والله انتساب ومعدلاتهم تبارك الرحمن ماقدر اقول عنها اي شي

واعرف بنات انتظام ياشرون من بنات الانتساب ويقولون بالوجه لناا انتو الانتساب تهتمون اكثر منا وتروحون للدكتوره او نكلم الدكتور نفسه

انا اشوف شخصيااا ماهو من الحق ولا الانصاف ان حنا نتعامل كذااا ليه يعني لمجرد المسمى انتساب

فيه منا الام

وفيه موظفه

وفيه التعبانه والمريضه والي ماتقدر تمشي

وفيه منا اللى اهلها خايفين من الطريق لمجرد اخوانها ماتوو مبقى الا بنت والام تخاف عليهااا والله القصه سمعتهااا

انقبلت في نعيريه وامها خايفه عليها من الطريق لان 3 من اخوانها ماتوو هناك صارت الام متخرعه

سجلت البنت انتساب وهي التراكمي حقها 99 في الثانوي

بس عشان امهااا ماتخاف وهي ميته قلبها متقطع تبي الانتظام

اعتقد ظروفنا كلنا مامنعتنا نكافح ونبي شهاده وكلنا املنا بالله كبيرررر ان حنااا نتخرج

اليوم مره تكدرت وضاق خلقي اختبرت مناهج شهري من 30 ولاخليت كوووويس لاني ماخذه صيفي

بس الحمدلله على ماراد الله

lalo0o588

2011- 7- 26, 12:47 PM

الانتســـاب مريح لكن البعض مايحبهه الصراحـــهه انا افضل الانتظام

كنت انتساب وسحبت ملفي وانتظرت هالسنه وقدمت من جديـــد وانقبلت الحمد لله

وبعدين عســـى ـآآ ان تكرهوا شي وخير لكـم عـادي عزيـــــــــــزتي :smile: والله يوفقكك

ويوفق الجميـــــــــــع:106::106::love080:

جوانه

2011- 7- 26, 01:04 PM

زين الكلام.....صدقيني إنسانه بنفس مستوى تفكيرك ماشاء الله راح توصل للي تبي بعدين سوى انتظام او انتساب رزقك الي الله كاتبه لك راح تأخذينه ي قلبي.......شوفي هالقصه وصدقيني راح ترتاحي لاني انا مو مقتنعه بقسمي نهائياااااااااا وتخرجت هالسنه وزاد التحطيييييييييم اكثر واكثر رغم تعبت كثييييير بالدراسه ومعدلي تمام الحمدلله بس كل مازعلت وتذكرت هالقصه ارتحت.......الله يوفقك ويوفق الجميع

هذه القصة في زمن نبي الله سليمان(عليه السلام) حيث من لمعروف لديناأن النبي سليمان ( عليه السلام) لدية القدرة على محادثة بقية الكائنات الحية

وهذه إحدى قصص النمل مع النبي سليمان عليه السلام .

ذكروا أن سليمان كان جالساً على شاطيء بحر , فبصر بنملة تحمل حبة قمح

تذهب بها نحو البحر , فجعل سليمان ينظر إليها حتى بلغت الماء فإذا بضفدعة

قد أخرجت رأسها من الماء ففتحت فاها , فدخلت النملة وغاصت الضفدعة في البحر ساعة طويلة وسليمان يتفكر في ذلك متعجباً. ثم أنها خرجت من الماء

وفتحت فاها فخرجت النملة ولم يكن معها الحبة. فدعاها سليمان عليه السلام

وسألها وشأنها وأين كانت ؟ فقالت : يا نبي الله إن في قعر البحر الذي تراه

صخرة مجوفة وفي جوفها دودة عمياء وقد خلقها الله تعالى هنالك , فلا تقدرأن تخرج منها لطلب معاشها , وقد وكلني الله برزقها فأنا أحمل رزقها وسخرالله تعالى هذه الضفدعة لتحملني فلا يضرني الماء , وتضع فاها على ثقب الصخرة وأدخلها , ثم إذا أوصلت رزقها إليها وخرجت من ثقب الصخرة فتخرجني من البحر.
فقال سليمان عليه السلام : وهل سمعت لها من تسبيحة ؟
قالت نعم ,

إنها تقول: (يا من لا تنساني في جوف هذه الصخرة تحت هذه اللجة، برزقك، لا تنس عبادك المؤمنين برحتمك.

و في القصة تصديق لقول الله سبحانه وإن من شيء إلا يسبح بحمده ولكن لا تفقهون تسبيحهم.
إن الله هو الرزاق ذو القوة المتين . إن من لا ينسى دودة عمياء في جوف صخرة صمّاء، تحت مياه ظلماء، كيف ينسى الإنسان؟

فعلى الإنسان أن لا يتكاسل عن طلب رزقه أو يتذمر من تأخر وصوله فالله الذي خلق الانسان
أدرى بما هو أصلح لحاله وكفيل بأن يرزقه من عنده سبحانه..

زين الكون

2011- 7- 31, 10:46 AM

وين البنات ماشوف فيه تفاعل معي

باقي كثير مواضيع ماتناقشنا فيهااا

المكافاه الموعوده

طموحناا

كل شي

وينكم

زين الكون

2011- 7- 31, 11:35 PM

اختبار الصيفي السبت ورحمتك يارب

زين الكون

2011- 7- 31, 11:51 PM

اعترف ياجوانه اني بكيت يوم قريت كلامك

واعترف خنقتني العبره لاني دايم اقول لنفسي ربي مو مضيع دعائ

.. أميـــ بطبعي ـــرهـ ..

2011- 8- 1, 12:45 AM

الله يوفقك يارب ويحقق كل امانيك يارب:love080:
ويسهل طريقك وطريق كل من معك:love080:
وتتخرجون اللي تبون يااااارب:love080:
والله قلبي معكم :love080:
وربي مايضيع حق احد خلي املك بالله كبير:love080:
ومايضيع حق وراه مطالب:love080:
ويارب تصيرون في اعلى المراتب:love080:
آآآآآآميييييييين:love080:

زين الكون

2011- 8- 5, 05:13 PM

الله كريم ياااميرررره الله كريم وقال ادعوني استجب لكم واحنا على ثقه تامه في هالايه

هي اللي تجبررررر خواطرناااا انا والف بنت غيري

زين الكون

2011- 8- 13, 04:10 AM

ابشركم نجحت بالصيفي ولله الحمد

زين الكون

2011- 8- 13, 05:53 PM

بنات الله يوفقكم

احد يوصل كلامنااا للدكتور عبدالله واكسبو اجر في بنات انتساب الكل يسال ترا ومو كلنا اشتركنا بالموقع الرسمي ولاكلناا عندنا ايميل جامعي

بنات الله يوفقكم كيف اعرف سي ار ان حق بنات الانتساب وشو الشعار او الرقم الخاص فيه؟؟

ربي يوفقها من حيث لاتعلم ويرزقها فرحه تدمع عينها منهااا اللي بتجاوبنااا

زين الكون

2011- 8- 19, 06:22 AM

مرحبا حبايب قلبي

حبيت انبههكم وطبعااا نقلا من الموقع الرسمي

رمز سي ارن حق بنات االانتساب دراسات 01
ورمز سي ارن حق انتساب عربي 02

leelaa

2011- 8- 19, 06:39 AM

,واذاالموادعاااااااااااااااااامه

زين الكون

2011- 8- 20, 03:00 AM

باقي ماعرفت وش قصدك ياليت توضحين مواد عامه لاي مستوى

.. أميـــ بطبعي ـــرهـ ..

2011- 8- 20, 03:05 AM

ابشركم نجحت بالصيفي ولله الحمد

مبروووووووووووكـ ياقلبي :106:
والله فرحت لكـ من كل :love080:
وعقال اعلى المرااااااااتب

زين الكون

2011- 8- 21, 04:45 AM

تسلمين يارب

يبقى هم التسجيل اللي باقي مافتح ولانبي نخربها على سنه رابعه

والله شوي وابكي

عيون النداوي

2011- 8- 21, 06:10 AM

سؤال وين أحصل ن1 ........ لأني مالقيتها .........

وأنا لعبت بالنظام قعدت احوس وسويت مثل المنتظمات وسجلت لي مواد ........

لكن مالقيتها في عربة التسوق ......... لكن في التخطيط الأكاديمي والجدول الأسبوعي لقيتها
..............

هل تسجيلي صحيح ولا خطأ ..........

وياليت أحد يسأل الدكتور عبدالله أو الأستاذة ميسون ؟؟؟؟؟؟؟؟؟

زين الكون

2011- 8- 21, 10:41 AM

كلنا فديتك كذااا وسعي صدرك