وش حل اللي في الرياض 10

[خاالد نجد]

كيفكم انشاء الله تمام يا جماعة الخير الاختبار بكرة خلااااااص مااابقى شيء ولاااادري وين الاختبار فية المشكلة حاطيني في الرياض 10 بس ولاعنوان ولا اي شيء وش الحل ...قسم بالله الواحد عايش في نفسية ............

[kfucadet]

نفس الوضع معي .... لا حس ولا خبر عن الرياض 10

[أكون او لا أكون]

وانا معاكم 10 والاختبار بكره على كثر الملايين الي تجيهم مو قادرين ينظمون بدري ويحددون

المفترض كل واحد يحطونه في الحي الي هو ساكن فيه . يدخلون ميزانية دوله كل ترم

[خاالد نجد]

وانا معاكم 10 والاختبار بكره على كثر الملايين الي تجيهم مو قادرين ينظمون بدري ويحددون

المفترض كل واحد يحطونه في الحي الي هو ساكن فيه . يدخلون ميزانية دوله كل ترم


وربي شيء يقهررر يعني لازم كل ترم كذااا والله انا ملاحظ ان الطالب اللي بالجنووب يحطونة بالشمال واللي في الغرب يحطوونة في الشرق يااااااااااااااااااه

[خاالد نجد]

نفس الوضع معي .... لا حس ولا خبر عن الرياض 10



على قولة مالك الا الصبر وش ودااااك له

[فهد2011]

اللي قمة القهر ويخليك تجر شعر راسك ، انا جنبي قاعة نيارة اللي تروح لها مشي واخرتها موديني الى شارع بلال بن رباح اصلا المنطقة هذي مادري وينها فيه، المفروض اللي في الرياض يخيرونهم وين يبون يختبرون

[kfucadet]

اذا أمكن يا شباب ممكن أحد يحط لنا ارقام اتصال بأحد المسئولين

[مخربها]

اقول ذاكر انت ويااة وخل مركز الاختبار


يمقن الجامعة تبي تختبركم براس طعس ويمقن لا


انا مافتحت الا الان وش السوااة وانا بمركز 10

[علي السحيمي]

يااخوان نبي ارقام المسؤلين


ماهي معقوووووله الاختبار بكره


ولانعرف وين نختبر

[مخربها]

عادي يا شباب

اذا زحمة عند الشباب يحولون اقرب مركز بنات ونختبر معهم:71::71::71::71::71::71:


دعابة دعابة

[m0barak]

السلام عليكم

اتصلت على هالرقمين ولا حياة لمن تنادي .

035895664
035802278

رقم الدكتور . عبدالله النجار اسدحوووه هنا .

[m0barak]

الله يسهل الامووووووور يارب

هالترم ضياااااااااااااااااع يالربع

وش السوات
:Cry111:

[خاالد نجد]

تدري ياحلو انت وياااه وش اللي قهرررني ااامس رايح للبقااالة والله متحمس مرررة شاااري دفتر ابو ستين وقلم مااااخذة من الدواااام ..... وفي النهاية كذا والله تحطمت خلااااص والله بروح اللعب كووورة كنت مزحلق اخوياي عشان اختبار بس شكلنا في دحديرة :Cry111:

[أوفى الخلق]

والله رفعت ظغط
حسبي الله عليهم :(177):

[بدر المطيري]

مركز 10 لازلنا في انتظار اين يكون المكان يمكن يكون في الثمامه وبعد في مخيم الله يعين

[بو الياس]

أبــــشركم كـــلمت الجامعة ....!!

تدرون وش قالوا ...

قالوا أحنا مجمعين الحلويين الي بالرياض بمركز رقم 10

وماراح نعلن عن الموقع قبل الاختبار الا بساعة .....

علشان البنات مايحولون عندهم وتصير خرابة ..

أبشروا بالخير ... أنتم وضعكم بالسليم

راحت علينا .. مالت علينا

[فهـد]

راحت علينا .. مالت علينا

:hahahahahah:بهذه صدقت
ومازلنا بالإنتظااااااااااااااااااااااااااااااااااااااااااا اااااااااااااااااااااااااار لمركز 10 :71:

[KSAjamal]

الظاهر مافيه اساسا مركز 10
وتورطو فينا

[أوفى الخلق]

كتبو مركز 10 - الرياض - وحطو رقم جوال : 0555900985

:017:

[KSAjamal]

بدت تجي البشاير

[بو الياس]

مخرج 15 من عند مسجد الراجحي ونت متجة شرق

رابع أشارة .. شارع شبة الجزيرة ادخل يمين ... تلقى المدرسة على يسارك

خذ اليو تيرن وارجع للمدرسة .. ماودكم اوصلكم بعد :mh35:

[KSAjamal]

مخرج 15 من عند مسجد الراجحي ونت متجة شرق

رابع أشارة .. شارع شبة الجزيرة ادخل يمين ... تلقى المدرسة على يسارك

خذ اليو تيرن وارجع للمدرسة .. ماودكم اوصلكم بعد :mh35:

الله يعافيك
بس وشلون عرفت
الجوال مايرد علي

[أوفى الخلق]

ابو الياس من قالك ؟
انت دقيت ولا وش السالفه :000:

[ابوفيصـل]

مخرج 15 من عند مسجد الراجحي ونت متجة شرق

رابع أشارة .. شارع شبة الجزيرة ادخل يمين ... تلقى المدرسة على يسارك

خذ اليو تيرن وارجع للمدرسة .. ماودكم اوصلكم بعد :mh35:
اما لو طلع وصفك صدق اكون اكبر محظوظ لان المدرسه قريبه
بس اشك لان مدرسه صغيره

[أوفى الخلق]

^
يارجال عادي اهم شي قريبه :biggrin:

بس نبي نتاكد ويرد علينا ابوالياس

[ابوفيصـل]

كل مادق علي الرقم الموجود القاه مشغول

[أوفى الخلق]

مثلك قاعد ادق عليه احصله مشغول

يالليل حرق الاعصاب

[بو الياس]

هلا بالشباب الي يغششني بالاختبار بعلمة

انا كلمت المشرف وقالي الوصف

معا العلم اني بابعد مكان عن الموقع مالت عليهم

[بو الياس]

اما لو طلع وصفك صدق اكون اكبر محظوظ لان المدرسه قريبه
بس اشك لان مدرسه صغيره

ياحظك مبروك ... :mh001:

مالت علي انا ..:hhheeeart4:

[أوفى الخلق]

بيض الله وجهك على العموم
ماقصرت


اللي يعرف اسم المدرسة يعلمنا :(107):

[بو الياس]

بيض الله وجهك على العموم
ماقصرت


اللي يعرف اسم المدرسة يعلمنا :(107):


قالي اسم المدرسة ونسيت ...!!

اقول اخوي صديقي .. عندك اختبار مادة التحليل الاحصائي والادارة المالية 2

اذا عندك ابي رقمك

[ابوفيصـل]

عطوني 15 دقيقه ابروح اشوف اي مدرسه فيهن لان فيه اكثر من مدرسه هناك
بس ان شا الله معلقين لوحه

[KSAjamal]

عطوني 15 دقيقه ابروح اشوف اي مدرسه فيهن لان فيه اكثر من مدرسه هناك
بس ان شا الله معلقين لوحه

الله يقويك

[بو الياس]

عطوني 15 دقيقه ابروح اشوف اي مدرسه فيهن لان فيه اكثر من مدرسه هناك
بس ان شا الله معلقين لوحه


ماشاء الله ياحظك

[ناوي السوكبا]

أستغفر الله

الى الان ما ندري وين نختبر بكرة !!!!!!

[أوفى الخلق]

قالي اسم المدرسة ونسيت ...!!

اقول اخوي صديقي .. عندك اختبار مادة التحليل الاحصائي والادارة المالية 2

اذا عندك ابي رقمك

والله مانزلتها للحين :(107):

ابوفيصل الله يقويك :(204):

[abu loulwah]

الله يعينكم بس ما راح تصيرون مثلنا مركز ٩
المركز ٧ بجنب البيت ٥٠٠متر فقط واجدعون بمركز ٩ على بعد٥٠ كيلومتر + الزحمه + الريحه الطيبه << دمعت عيونه يحول يبي يصيح
ما اقول الا الله يوفقنا واياكم

[ابوفيصـل]

للاسف لم اجد اي شي يدل علي المدرسه
لان علي الوصف فيه 3 مدارس
ابتدائيه التنعيم
وثانويه ابن عقيل
ومجمع مدارس بنات من الروضه حتى الثانوي

وكلهن اخذت جوله عليهن
شكلهم حتى الان ماقرروا اي مدرسه يختارون هناك
لانى قريت حتى اعلانات مدرسين الخصوصين قلت امكن الجامعة ماعنده فلوس تنزل لووحه كبيره

[KSAjamal]

ابو فيصل هي ابن عقيل على كلام المشرف

لكن قلي هي الاشارة الي بعد مقبرة النسيم ؟؟؟

[ابوفيصـل]

بعد مقبره النسيم تجيك اشاره يمين شارع شبه الجزيره

بس اذا كانت ابن عقيل تمشى مع شارع شبه الجزيره حتى تشوف محطة علي يسارك
تروح تدوير من نهايه الشارع وترجع تلف من عند المحطه يمين هي حدود 200 متر من المحطه
ولا عنده مواقف وشارع الي هي عليه حق هجوله الشباب

[KSAjamal]

الله يعافيك ماقصرت ....
الله يستر

[ناوي السوكبا]

أبو فيصل

شكلك عارف المكان زين :tongue: وقريب منك

انا جاي من مخرج 8

ومتجه الى مخرج 9 وبعدي 10 و 11 و 12 و 13 و 14

وصلت مخرج 15 وش السوات ؟؟؟؟

[KSAjamal]

مخرج 15 رح منه يسار
بتجيك اشارة اولى ( مطعم الرومانسية ) قدام
اشارة ثانية ( اسواق الهرم ) قدام
اشارة ثالثة ( مقبرة النسيم ) قدام

الاشارة الرابعة رح يمين وكمل وصف ابو فيصل

[اخو البدر]

انا بعد بالرياض 10 وتوقع انو ماراح يختبروننا لانهم ضامنين اننا مانحتاج اختبار << اي هين


طيب سؤال اذا مو اليوم محددين المكان متى بيحددون بكره الظهر يعني :017:

[ناوي السوكبا]

مخرج 15 رح منه يسار
بتجيك اشارة اولى ( مطعم الرومانسية ) قدام
اشارة ثانية ( اسواق الهرم ) قدام
اشارة ثالثة ( مقبرة النسيم ) قدام

الاشارة الرابعة رح يمين وكمل وصف ابو فيصل

أوك صعدت على المخرج أروح يسار

وعديت كل الاشارات الثلاث نتبع وصف أبو فيصل

الى الان هو مو عارف المدرسة :biggrin:

[هتال]

بيكون طريقي من مخرج 8

بعدي 9 و 10 و 11 و 12 و 13 و 14

بعدها بوصل مخرج 15 وش أسوي ؟؟؟؟


خذ مخرج 15 يبي يجيك اسواق المجد وقبلها العثيم مول على يمينك
لازم تلف بعد اسواق المجد يمين وتبي تبقى على يمينك ثم تسوي يو تيرن مع اول مديور قبل الاشاره قبل اليو تيرن فيه محطة بنزين على يمينك
امشي على طول وجهك شرق بعدها وداخل النفق (تلقى لوحه طريق سعد بن عبدالرحمن) لا تتجه للدائري
بعد ما يخلص النفق اطلع يمين وامسك طريق الخدمه تبي تلقى المطاعم في كل مكان

(انتبه فيه ساهر ثابته بعد النفق مباشره):33_asmilies-com:


وبعد ما تمسك الخدمه امشي واتعدى 3-5 اشارات الى ما يجيك مقبرة النسيم على يسارك بعدها بشوي يجيك على اليمين شارع شبه الجزيره ثم كمل على باقي الوصف:lllolll:

[KSAjamal]

صحيح على كلامه يجي شارع يمين اسمه شبه الجزيرة تمشي بالشارع لين تحصل محطة بنزين يسارك تروح لها وتدخل بعدها يمين وتحصل المدرسة

[B A N D R]

بجد قمة القهر مركزين جنب بيتي

وناطليني شرق الرياض

لاحول ولاقوة إلا بالله

[KSAjamal]

مبروووك تحدد المركز رسميا من الجامعة وهو نفس وصف ابو فيصل الله يعافيه

مخرج 15 باتجاه الشرق الى شارع شبه الجزيرة خذ يمين باتجاه الجنوب وهناك محطة نفط على اليسار مع آخر الشارع ومن الاشارة خذ يوتيرن وارجع لمحطة نفط خذ يمين من محطة نفط تصبح المدرسة على يسارك ثانوية بن عقيل

[ابوفيصـل]

هذه صوره من قوقل للموقع

[أوفى الخلق]

الله لايوريكم مدرسة زفت :mad:
توي جيت منها
تجيب الهم
الله يصبرنا 6 مرات نجيها