أستشاره بخصوص المواد

[البندري m]

صباح الخيرات عليكم كلكم
بدخل في موضوعي علي طول

:22:من عرفت نتيجتي وانا متحطمه حيييييييل معدلي طلع 2,7 :12:
مع اني كارفه نفسي وحاله كويس وطالعه مبسوطه بس ليش كذ مدري
المهم ابي استشيركم كم ماده اخذ ابي شي احاول ارفع فيه هالمعدل

طموح شايب وهتان وغموض وكل الي يقرا موضوعي يشور علي انتظركم
بليييييييييييييز احس الوقت راح علي :18::18:

[أبـو جنا]

خذيهم كلهم

تدرون وش اللي اخطائنا فيه التضليل والمسح هو اللي جايب العيد فينا

لان الكمبيوتر من يشوف مسح وتضليل آخر يلغي الاجابه ويعتبرها غلط

وهذا اللي دهورنا هذا رايي

لاني لسُت راضياً على درجاتي ناجح بالحفه وحامل ماده

وراسلنهم ولاراح يفيدونا بشئ وبالاخير تدرين وش يبي يكون ردهم هذه الدرجة اللتي تستحقها

هذا نظام الجامعات

الشكو لله

[البندري m]

شكله كذ
يعطيييييييييييك الف الف عافيه :16:

[ابو وليد 2020]

اذا لم تحملي مواد من مستوى اول نزلي خمس اوست من مستوى ثاني وان شاء تعوضين في الترم هذا

[* أبو ريوف *]

صباحك نور وسرور
رأي شخصي الافضل لك انك تنزلي من الخطه خمس او ست مواد لرفع معدلك
واذا كان وضعك مو طيب مع الانقليزي اجليه حتى تتمكني من رفع المعدل
الله يرفع قدرك بالتوفيق :16:

[a7mad89]

مواد المستوى الثاني هي كالتالي:
مبادئ محاسبة2
اقتصاد كلي
تقنية معلومات1
اعتقد ان هالمواد اساسيه ولابد منها بالجدول ( كل ماده 3 ساعات )
الانجليزي
العقيده الاسلاميه
الصحه واللياقه
الاخلاق واداب المهنه
هالمواد خفيفه وحلوه ..انصحك تاخذي منها مادتين على الأقل ( كل ماده ساعتين )

هذا رأيي ....
فالك التوفيق والتفوّق بإذن الله:16:

[روح حرّة]

يسعد صباااحك
نفس الحاله ذااكرت وتفااجأت بالنتيجه زفــت :24: ..يلا الحمدلله ع كل حال

رأيي انك تسجلي ع خطة الجامعه افضل لك ..

موفقه :16:

[نسر القمم]

لا تضيقين صدرك وان شاء الله الامور تتحسن كثير
هذا اول ترم ,, قدامك سبعه اترام تدفرين فيها مزبوط

انا اتفق مع ابو جنا في تدهور الكثير بسبب التضليل
وان شاء الله العوض الترم الجاي

وجهدك يا اختي ان شاء الله ما يضيع عليك ,, ان ما شفتيه
بشهادتك ان شاء الله تشوفيه كعلم ترتقين فيه بدنياك واخرتك

بالنسبة للمواد انا ارى انك ما تضغطين على نفسك
اكتبي المواد الي تشوفينهم صعبه

[هتان 2]

معليه ياختي لاتضايقين صدرك او التررم لازم كذا اشوي درجات تكوون نازله بس بأذن الله مع التخطيط وعارفه كيف يكوون نظام الجامعه وكذا ترفعين المعدل الى مالا تتصورينه بأذن الله وحرصي على انك تفهمي اكثر من ماتحفظي وبنسبه للتضليل في ورقة الاجابه لاتمسحي كثير بالورقه الاجابه لان يمكن هذا الي نزل درجاتنا قليلااا والله يوفقنا يارب في باقي السمسترات باقي لنا مشووار طوويل والعبره بنهايات ياختي ربي يوفقك ويوفقنا يارب :2::16:

[عِصآميهة]

آناا آشوف مآتضغطين نفسكك 5 أو 6 موآد كفآيه


وآلله يوفقكك "

[هولمز]

نقطة ومن أول السطر ....

خلي معدلك يدفعك لتحقيق معدل أعلى السمستر الجاي لا تفكرين واجد وأشتغلي كثير .. حبي المواد

وذاكري وكأنك تملكين المادة مو هي إلي تملكك ,, تقولي ذا يتفلسف أقولك معك حق الفلسفة مهمة

ولازم تكون لك فلسفتك الخاصة ..:27:

أما عدد المواد ما يفرق , الفرق أنتي تصنعينه

تقبلي مروري وبالتوفيق

:2:

[ummfai]

عن نفسي اخذت 6 مواد 16 ساعه كفايه مابي اضغط نفسي
نصيحه لا تاخذين الخطه كامله خذي 16 او 15 ساعه علشان ترفع معدلك
والله يوفقك

[خفيف الدم]

انا سجلت كل المواد بالخطة كا عدا الانجلش ( خايف منه ) :22:

بالتوفيق للجميع

[Ali-Ahmed]

ارضي بما كتبه الله

كلنا كذا طلعنا مبسوطين وانصدمنا من النتيجه

والظاهر من التظليل والمسح تنلغي الإجابة

عموماً المستوى الأول راح بخيره وشره

كل شي كان جديد علينا والصورة ماهي واضحه

اقتراحي بأن تتبعي خطة

تكثيف المُقررات في المستوى الذي يبدأ بداية السنة

والمستوى الذي بعده تقليل المُقررات للمُعدل

وحسب ظروفك بإمكانك التحديد

بالتوفيق
;
;
;

[طموح شايب]

رأيي

انك تاخذي المحاسبة2 والاقتصاد الكلي

لان فيها معلومات كثير مشابهة للمستوى الأول

وخذي الصحة و العقيدة و الأخلاق الاسلامية

لأنها سهلة وممكن تجيبين فيها درجات حلوة ترفع المعدل

وكذا يكون عندك 12 ساعة


واذا انتي كويسة في الانجليزي خذيه واذا " لا " أجليه

[ema-0]

اختي انا محتاسه بالجدول مثلك وابي ارفع معدلي

قررت اخذ 6 مواد الي هي عقيده - انقلش - محاسبه 1 طبعا هالماده حاملتها -صحه ولياقه -اقتصاد كلي -تقنيه معلومات
كلها 16 ساعه
اشوف انسب شي لك 6 مواد

* بس قريت بالمنتدى الي معدلهم اقل من 3 مسموح لهم 15 ساعه مدري اذا صح اولا بس موقع الجامعه مو جايبين طاري للمعدل ولما صلحت جدولي مشت اموري تمام *

وبالتوفيق للجميع :16:

[بااااربي]

اناا مثل معدلك واخذت الخطه كااااامله وناويه اشد حيلي هالتررم دام ماوراي شئ:29: المشكله مو بقله المواد ترفعين معدلك المشكله بطريقه المذاكرررره بالنسبه لي الفصل الاول حييل حيل اهملت لاكن بشد حيلي والله يوفقنا:21:

[mo7ammo]

نصيحه خذي بالكثير 15 ساعة
وإذا انتي مو شاطره في الانجليزي احذفيه من هذا المستوى وخليك على باقي الخطه

هذا اللي انا راح اسويه ان شاء الله :17:

[بااااربي]

وبعدين اعرف بنت كاان معدلهاا 2,3 لمده ثلاث سنواات على هلمعدل ويومنها وصلت لرابع والله صار معدلها اربعه ماشاء الله:29:

[جنان]

أما عدد المواد ما يفرق , الفرق أنتي تصنعينه

برافوا هولمز

والفرق انتي بيدك تصنعيه توكلي على الله وتتسهل لك

[MR H]

السلام عليكم ورحمة الله وبركاته

1- انتبهي انه التيرم ذا قصير ، شهرين ونصف
2- انتي تبغي معدل مرتفع لكي تعوضي اللي راح وما اظن 7 مواد اللي هي خطة الجامعة اللي منها 4 مواد فهم و3 مواد حفظ غير 14 محاضرة لكل مادة و14 مشاركة لكل مادة و 3 واجبات لكل مادة مع ها الوقت القصير راح يسمح لكي بتوفير الوقت الكافي للفهم والحفظ معا ، طبعا ذا غير ظروفك الشخصية ... هل انتي ربة منزل ام متفرغة
4- نصيحة المعدل المرتفع ما ييجي من اخذ مواد وارجع احملها معي التيرم القادم او اني اجيب فيها d او حتى +c

استخيري وشوفي ظروفك ولا تنسي انه التيرم قصير

بالتوفيق

[دنيا الغموض]

ليه هالتحطيم يابعدي ليه فديت روحتسس

كل العالم المستوى الاول تكون معدلاتهم والاغلب نازله

يعني لاتضايقين حالتس
وعوضي بالسمسترات الجايه

حنا كنا ماندبرها ولا نعرف الطريقه ولا شيء

لكن الحين كل شيء توضح لنا

وانا راح انزل موضوع ان شاء الله مرتب
وفيه كل المواد ان شاء الله

لكن حاليا جالسه ارفع ملفات لمستوى أول ادارة اعمال

وبس اخلص منها اجي هنا واضبط كل شيء ان شاء الله


انتي شدي حيلتس

شوفيني انا صدق تحطمت وازود منتس بعد

لكن هذا مويعني نهاية الدنيا

قدامتس 7 مستويات مو 1

عوضي فيها يابعدي

الله يوفقتس دنيا وآخره

[عسكري كلي طموح]

من خبره سابقا في الجامعات والدراسه الاكاديميه اقول لك

اذا انتي متفرغه لا دوام ولا عيال يشغلونك

خذي 16 ساعه او 18 بس بشرط تركزين فيها كلها من اول شهر

ولو تتابعين المحاظرات لو قلنا 6 مواد وكل ماده ساعه يبغالك 6 ساعات في الاسبوع

يعني ساعه كل يوم ومعك يوم راحه هذا اولا

بالنسبه لحل الواجبات اعتقد تلقين الحل هنا سهل جدا

والمشاركه هذا شي راجع لك حتى لو تكتبين اي شي تنحسب لك المشاركه

المهم انك ماتخلين كل جهدك اخر الترم وقبل الاختبارات باسبوع او اسبوعين تكونين مشتته ومو عارفه من وين البدايه

ترى المتابعه الاسبوعيه توفر عليك نصف الجهد ايام الاختبارات

[شهرزاد الرياض]

بتلاقين تعارض كثير بالاراء
بس نصيحه شوفي انتي ظروفك واللي يناسبك بدراستك
اذا بتقدرين على 18 ساعه وعندك وقت يسمح ف هو افضل علشان رفع المعدل واتفق مع الاخوان
واذا ظرفك يعارض ضغطك بالمواد ف خذي اللي تقدرين عليه
وكلنا معدلاتنا نازله مع اني ماحسبت معدلي الي الان لاني ماابي اتحطم :42:

ربي يسهلك ويوفقك وجميع المسلمين

لك :16:

[هدوء صاخب]

الله يعوضكم خييير مما عنده


اخذي مادتين دسمه و٣ مواد بسيطه

عشان ما تضغطين ع حالك


ان شا الله التسهيل و التوفيق من الله :1::3:

[البندري m]

اذا لم تحملي مواد من مستوى اول نزلي خمس اوست من مستوى ثاني وان شاء تعوضين في الترم هذا

لا الحمدلله ماحملت معي شي الحمدلله
الله يجزاك خير :16:

[البندري m]

صباحك نور وسرور
رأي شخصي الافضل لك انك تنزلي من الخطه خمس او ست مواد لرفع معدلك
واذا كان وضعك مو طيب مع الانقليزي اجليه حتى تتمكني من رفع المعدل
الله يرفع قدرك بالتوفيق :16:

يعطيك العافيه اكيد باجل الانجليزي
مادبر فيه شي

[البندري m]

الله يعطيكم الف الف عافيه ماقصرتو علي ردكم
واللله يجزاكم الف خير علي كل شخص رد علي وشاركني
ربي ييسر اموركم يارب :27::16:

[ام ود]

الله يوفقك ويسهل امرك لاتضغطين علي نفسك

خذي نفس ماقالك طموح شايب:21: بالنسبه للجدول وذاكري اول باول وفالك a+:21:

ان شا الله:43:

[غـــريب الدار]

السلام عليكم ورحمة الله وبركاته

اول شي مبروك النجاح , والحمد لله على كل حال
هذا ترم وعدى على خير.

طبعا اغلبنا نجح على الحفة , وبعضهم حمل مادة او ثنتين

بالنسبة للمعدل 2,7 من 5
تستطيعين تسجيل 7 مواد , ولكن المبلغ راح يكون كثير عليك هذا اولا وثانيا انتي لازم هذا الترم ترفعين المعدل,

فمن رايي انا تسجلين 3 مواد اساسية وهي
مبادئ محاسبة 2



مبادئ الاقتصاد الكلي


تقنية المعلومات 1





هذي اساسية من الخطة الدراسية .. وكل مادة عليها 3 درجات
وبعدين سجلي مادتين خفيفة
مثل
صحة ولياقة


الاخلاق الاسلامية واداب المهنه





وبكذا يكون معاك 5 مواد هذا الترم تقدرين تشوفين فيها المعدل وترفعينة


انا حطيت جدول في موضوع لي في المنتدى عن المواد المسجلة مرتب وحلو , الخطة الدراسية. اختاري المادة اللي تعجبك ولا تضغطي نفسك في المواد وبالتالي في الاترام الجاية ما تقدرين تسجلين اكثر من مادة لان معدلك منخفظ.

ترا المستويات المرتفعة , مثل المستوى الخامس والسادس يسجلون 21 ساعة واكثر , يعني على حسب معدلهم.

حنا ترا لسا اول مستوى ,, :39:
:39:

بالتوفيق لك وللجميع بالنجاح

[amas]

أقترح تسجيل كل المواد التي حددتها الجامعة للمستوى الثاني وتغيير أسلوب المذاكرة والمتابعة اولاً بأول وعدم المذاكرة إذا جاءت الاختبارات لأن الانسان في هذي الحالة يبذل جهد كبير ولكن يكون التحصيل قليل بعكس إذا كانت المتابعة أولا بأول .
وفق الله الجميع

[البارقة]

خذي مواد تستطيعين بها رفع معدلك
بالتوفيق