استفسار عن دوامي ياليت احد يفيدني

[عنب اخضر]

السلام عليكم
انا اداريه بمدرسه حكوميه واخذت ورقه موافقه من المديره وختمتها من الوزاره
المهم من يوم بدت اختباراتي والمديره تصورلي الملفات الي بالعاده ادخل بيناتهن والمعلومات بالكمبيوتر
يعني ترسلهن لي تبيني ادخلهن بالكمبيوتر وانا بفتره اختباراتي
وطول الفتره هذي مارديت عليها ولاقلت شي ترسل كل يوم وانا ساكته
هل اذا رجعت للدوام من حقها تلزمني اني اخلص الشغل هذا المتراكم والا اذا كنت بفتره اجازه ماني مسئوله عنهن ومن حقي ارفض
لان المفروض تلزم احد غيري يخلص الشغل بفتره غيابي لانه مايحتمل التاخير
وش رايكم شوروا علي وش اسوي
والحق معي والا علي
رجاء الي يعرف وفاهم يرد
لان مدري وش اسوي ضيقت صدري
وشكرا جزيلا

[~ شمآلي ~]

وعليكم السلام ..

اسحبي على ابو ابوها بعد ..

المفروض ماتتصل اذا انتي اخذتي اجازة رسمية حتى بالايام اللي ماعندك اختبار ..
اما اذا الاجازة في نفس يوم الاختبار هذا شي ثاني ..

هو المفروض توكل احد ثاني يخلص شغلك بس يمكن مافي احد يمسك مكانك يتقنه زي ماتسوينه انتي ! هنا ممكن تواجهين بعد رجوعك بعمل متراكم لازم تخلصينه ..

انا بشركه خاصه خليت وراي شغلات المفروض مخلصها بس اجلتها لبعد الاختبارات
فما بالك انتم يالحكومي ..

من حقها تعطيك الشغل المتراكم تخلصينه لانه بالنهاية شغلك حتى لو مؤجل او متراكم ..

ردي عليها عادي واذا طلبت عمل قولي مافي احد يخلصه ؟ لانك باجازة رسميه والمفروض فيه بديل
او تنتظر لين ترجعين

بالتوفيق

[l8iak]

مثل ماقال أخوي شمالي ( اذا أنتي قدمتي على أجازة أختبارات وتمت الموافقة ) وأخذتي ورقة الإجازة .. ماتستطيع المديرة أن تطلب منك أي عمل خلال الإجازة ... أنا موظف حكومي قدمت جدول الإختبارات للعمل .. وتمت الموافقه ومنحت أجازة من أول يوم أختبار حتى أخر يوم اختبار .. والحمد الله
أتمنى لك التوفيق ..

[بكيزة]

من رأيي عشان نفسيتك انت تكون مرتاحه وكلي حد من خواتك تسوي لك شغلك دامه عن طريق الكمبيوتر
والأمور سهالات سويها كمعروف ...

[عنب اخضر]

الناس ماينفع بها المعروف كانها على المعروف جربت ولانفع
شكلي ابسحب عليها لو تصير مشاكل
بعد الاختبارات كلها اسبوعين ونعطل

بس يالموظفين اذا رجعتم بعد الاختبارت تخلصون شغلكم المتراكم والا لا

[حسين بن سالم]

نعم نخلص الشغل المتراكم اذا كان يخصني او اذا لم يوجد من يتقنه غيري

الافضل لك الاتصال بها واخبارها بانك باختبارات وان توكل غيرك بالمهام حتى لا تتراكم
وانتي واسلوبك ... لانه لا احد يعرف كيفية تعاملكم انتي والمديره والعمل
الافضل الاتصال بها ... فهذا رزقك ولا تضري نفسك بسبب اشياء صغيره

والله يوفقك لما يحبه ويرضاه

[na9er_77]

السلام عليكم

انا مدير شؤون موظفين حكومي المفروض قبل ماتوافق على اجازتك توفر بديل لك قبل ماتبداء الاجازة وتخلص الشغل وقت إجازتك بس اذا محصل لك بديل ملزومه ترجعين وتخلصين اشغالك بس على راحتك متلزمك بوقت معين وحاولي تردين عليها افضل من السكوت .

[ام ليونه07]

والله يالحبيبة انا زيك بس معلمة ابتدائي بمدرسة حكومية بس والله ما أجزت الا لما خلصت منهجي وسلمت أسئلة مراجعة للمديرة وأسئلة اختبار الفترة الثالثة

كمان جانا التعميم الي يلزمنا بالدوام في الايام الي مافيها اختبار
في ايام حطيتها اضطراري وايام اروح أوقع وارجع

[عنب اخضر]

ماجانا تعميم عن الدوام بفتره الاختبارات
متى جاكم ؟؟

[~ شمآلي ~]

بالنسبة لسؤالك نخلص شغلنا المتراكم ؟
أكيد نخلصه مانتركه .. عني انا شخصياً ماحب احد يسوي شغلي لو كان شي دقيق ويحتاج جرد مثلا ..

من ناحيتي ما أفضل انك تسحبين عليها اشوف تردين وانك بإجازة ..
اتوقع السحبه بتسبب توتر بينكم اكثر من انك تردين عليها وتقولين اجازة

[طالب نشط]

بخصوص التعليمات بأم الاختبارات صدر تعميم قبل سنتين من ديوان الخدمة المدنية يفيد ان الموظف او الموظفة الذي يودي الاختبارات في نفس المدينة التي يعمل فيها يعطى اجازة اختبار عن اليوم الذي فيه اختبارة اما اليوم الذي ما عنده اختبار فلابد ان يداوم او يحسب عليه غياب اما الموظف الذي يختبر خارج مدينة عملة فيعطى اجازة اختبارات عن كامل مدة الاختبارات بما فيها الايام التي ليس فيها اختبار وهذا انا متأكد منه 100% المهم الادارات ما صدقت بهذا التعميم والبعض عض عليه تحت انيابة وما صدق وهذا راجع لادارة الموظف هل متعاونة ام لا بس في حال جاء مسائلة بطبقون النظام بالمختصر المفيد الموظف الان مايقدر يعابط والمثل يقول اذا لك عند ::::::::: قوله ياسيدي ارجوا ان اكون افدتك واي استفسار انا حاضر

[راهي الرائدية]

وعليكم السلام
الله يوفقج
عموماً مثل هالمواضيع ترجع لتعامل مدريتج وياج
هل تستاهل إنج تخلصين لها الشغل
أو ما تستاهل تسوين لها شئ
.
.
وإذا رجعتي أو عندج وقت فاضي سوي اللي تقدرين عليه
وريحي رأسج من الزحمة اللي بعد الإجازة
والله يوفقج يارب