جمانه طفلتي.. قصيده*

[عبير الوادي]

جنون الليل خيم في سوادة *** وماتت دمعي في وسط عيني

قلوبٍ وسطها جهل وبلادة *** تقاليد تقطع في وتيني

بديت أنساك يا لون السعادة *** ظروفٍ فاصلة بينك وبيني

بكيت ودمعتي بالعين عادة *** سببها واحدٍ من والديني

وحزني ماخذٍ كل الريادة *** وهمي لو نسيته ما نسيني

كبرت ولا كبرت إلا قرادة ***وكن الجرح واضح في جبيني

عمر خمسة عشر ما به زيادة *** ولكن ضعفها حزنٍ يجيني

تفرعن والدي ظلم وجلاده *** تقاليدٍ ما هي من شرع ديني

وزوجني لواحد من عناده *** سنينٍ واجده بينه وبيني

بياض الراس زايد عن سواده *** على ضره عنيدة ما تببيني

حملت وجبت مولود بسعاده *** فرحت وقلت هاتي يا سنيني

يتيمه فرحتي هم ونكاده *** ولكن بعدها يخطف جنيني

اخذ مني صغيري في مهادة *** عطاه لـ ضرتي قدام عيني

سكت وقلت يهنى في مرادة *** بكيت وقلت وش تقدر يديني

وجبت الثاني بـ تالي رماده *** وخفت ان راح يذبحني حنيني

و شاله والده غصب بـ عتاده *** وانا همّي بعدهم يكتسيني

حملت بـ من ملت قلبي رغادة *** وقلت الموت لاراحت يجيني

خطفها ماعرف معنى العبادة *** وسلّمها لها و اقفى اللعينِ

بكيت وقلت وش ترجي حصاده *** وتمتم مقفيٍ في كلمتينِ

اخذتك مصنع أنجاب و وِلادة *** ولكن ماحسبتك تفهميني

وسالت دمعتي فوق الوسادة ***بكيت ومابكيت الا سنيني

انا ام اطفال بـ اوراق وشهادة *** ولكن الامومة ماتجيني

لو اسمع من جمانة قول داده *** حكايتها ترد الروح فيني

جمانة طفلتي مابي زيادة *** طلبتك ياجمانة تسمعيني

انا امك يا منى القلب ومرادة *** وطيفك مارحل من وسط عيني

ومايملك خفوقي من ركادة *** تحوّل للجنون بـ لحظتينِ

متى حظي يبي يسرد جوادة *** تعبت و لاحدٍ ماخذ يديني

جمانة طفلتي مابي زيادة *** طلبتك ياجمانة تسمعيني

طلبتك يا جمانة تسمعيني*


حرقو قلبها:bawling:
حسبي الله بس:mad::bawling::bawling:

[-- yasmeen --]

جمممميلة جدا

اجزم بان كل بيت يولم اكثر من اللي قبله


يعطيك العافية عبورة


مبدعه

[-PEARL-]

-



الله ياخذ العادات والتقاليد اللي الدين بريء منها


وياخذ الناسس المريضه !


حسبي الله عليهم ..




قصيده فيها من الحزن م الله به عليم :icon9:








يعطيك العافيه عبير :106:

[عبير الوادي]

قصه حقيقيه صارت في السعوديه .. بنت عمرها ١٥ سنه زوجوها اهلها من واحد كبير في السن مره ومتزوج وحده يحبها بس ماتجيب عيال قال بتزوج وحده ثانيه بس ابغاها تجيب عيال وناخذهم انا وياك قالت زوجته اوك .. وتزوج هالبنت الي عمرها ١٥ سنه وكان مايجيها ابد بس حاطها بشقه صغيره مره وجابت ولدها الاول وهي في غرفة الولاده ياخذ الولد ويوديه لحرمته الاولى حتى مايخلي امه تشوفه المهم مرت السنين وهي ولاعمرها شافته وجابت الثاني ونفس الحركه سواها .. كانت متعذبه مره تاركها بالشقه لا يطل عليها ولاشي وحارمها من عيالها مايدرون انها امهم يحسبون الحرمه الاولى امهم لانهم اول مايفتحون عيونهم مايشوفون غير زوجةابوهم وحتى اسمائهم زوجة ابوهم اللي تسميهم كانت البنت الي عمرها ١٥ سنه تحلم من صغرها باولاد وحاطه لهم اسماء وامنيات وتمنت تجيها بنت وتسميها جمانه لانها كانت مره تحب هالاسم .. واخر شي حملت ببنت ولما ولدتها خلاها معاها شهر كان مشغول وماأخذ البنت بدري مثل اخوانها من غرفة العمليات الام تعلقت في البنت لانها خلاها عندها شهر وسمتها هي من نفسها جمانه مثل ماتمنت بعدين جا واخذها .. انقهرت واﻻم بكيت على بنتها كانت تتمنى بس يترك لهاهالبنت لانها تعلقت فيها وهالبنت مالها الا امها الاولاد بيكبرون ويرجعون لها غصب واخرتهم مع ابوهم بس البنت مالها الا امها انقهرت الام كثثير كثير وبكيت على البنت أكثرر من أخوانها وبعدها كتبت قصيده طلعت كل القهر وكل اللي بقلبها فيها وراحت تبي تزور الحرم عشان تدعي ربها لبنتها واخوانها يعيشون حياه سعيدة ولا ينسون أمهم. وهي راجعه من الطريق صارلها حادث وماتت .. ولما فتشوا البيت بعد موتها عشان يشيلوا الملابس لقيو القصيده المكتوبه وانتشرت

هذي قصتها





https://www.youtube.com/watch?v=LjQP4ZTupTo






ضايق صدري عليها من أمس:icon9:

[ليثاوي الرياض]

شكرا على التنبيه عبد الجمعه ابقرها باذن الله

[Dr ʀeнαв]

تم نقل الموضوع من قسم قصائِدكم و خواطركم [ خاص ] (http://www.ckfu.org/forumdisplay.php?f=344).
<br>
الرد آلي للعلم

[-PEARL-]

ياحياة الششقى ):

الله يرحمها .. وحسبي الله على كل واحد مايخاف ربه ):

[Dr ʀeнαв]

_

مآقدرت اكملَهآ , دمعي ذرَف وانا بنصها :icon9:اليمَه بشكل فضيَع
تفرعن أهل ,ظلم زوَج , قهر أم , تيتم ابريآء
قصيده جمعت كل مظاهر الحزَن في ابياتهآ
والشيله غصبن عنك تأثر بك

اختيار بطل غلاتي
سلمتِ:rose:

[المتلالئه]

اليييييييمه جدا

الله يعطيك العافيه أختي عبير

[k.shamray]

كلها حزينه وتقطع القلب
وإيش العالم هذه إيش القسوة والظالم
عمرها 15 سنة
وصغيرة وأم عيالك تسوي فيها كذآ
الله الله يرحمها ويسكنها الجنة


عبير
حروفك رآقيه
وشكراً ع الدعوه

[أسير نجد]

قصيدة فيها من الحزن والالم الشي الكثير

الله يرحمها ويسكنها فسيح جناته

وحسبي الله ونعم الوكيل على كل انسان ظالم

[همسة الصمت]

تسلمين على النقل واذكر سمعة قصتها وقصيدتها العام بجد فيه ناس للان ماتخاف الله واتمنى يصحون من غفلتهم بذات اليتيم ولها رب كريم ارحم منهم