تدرون ليش الدكتور عقد الاسئلة بنوك ونقود

[سليمان النزهه]

السلام عليكم
الله يوفق الجميع يارب
السبب الرئيسي مداخلات الطلاب خاصة المحاضرة المباشرة الثانية
حاول الدكتور مايرد عليه الاخ مصر تجيب من اسئلة العام تجيب من الاسئلة اللي طرحتها لنا بالمباشرة
يعني مادري وش يفكر ياخوي ليتك سكت الترم اللي فات الاسئلة من المحاضرات المباشرة
هذا رأي صراحه
لاتوجهات الجامعه ولايحزنون
مستوى سابع اكثرها كرر الاسئلة
ماضيعنا الا الاسئلة اللي خلت الدكاتره ينتبهون

[احمد بن بندر]

حسبي الله على اللي كان السبب

نزل المعدل في هالترم ����

[أوتار الخيال]

أصلاً ما ادري ليه بعض الطلاب يسأل الدكتور هذا السؤال
^
مدري وش يحس فيه اللي يسأل هالسؤال يعني لو بيجيب بيقولك بجيب
^
بعض الطلاب هداه الله مايعرف حتى يسأل ووصل لمستوى خامس وهو يسأل نفس السؤال

[أجـــود]

كثار اللي يخربون عليهم

مساكين يكسرون خاطري


واضح الدكتور كانت اختباراته ماقاربه

هالمره استقبلنا برسمه ومساله الجدول ههههههه

[محمد الغيداني]

المفروض من البداية تنبة للطلاب عن ذلك ماحد يسئل مثل هذه المواضيع

[محمد6565]

طيب احنا وش ذنبنا هذولا وربي مو فارقه معاهم ��

[نوره المتفائله]

قــــــــــــــدر الله وماشاء فعل وكلوا أموركم لله ..الحمدلله أختبار دنيا مو أخــــــــــرة والقــــــــــادم أجمل :14:

[qlb_sahy]

اتفق معاك اخوي .. وانا اشوف انه بالمحاضرات القادمه المباشره ننسى هالسؤالين اللي هي تجيب من اسئلة الاعوام او من المباشره ..

[ASMA@555]

ههههههه والله مو بس الدكتور

حتا احنا اعضاء الورشه ماسلمنا من هالاسئله
كل طالب طالبه يجون هل تواريخ معانا هل يكرر الاسئله

[treze117]

ههههههههههه خلص الترم بخيره وشره


بس تذكرت وحنا بمستوى اول بعض الطلاب يسال الدكتور نعتمد على اي ملخص :tongue::tongue:

[hawe]

ما شاء الله عليكم

متابعين المحاضرات المباشرة اول بأول
ومن أول الترم ورش ومستلزمات


يعني المفروض ما تتشكون وتأخذون كلكم a+


ليش كل هالشكاوي من الأسئلة طيب


المادة يحتاجلها فهم قبل الحفظ


الحمد لله من اول ترم بالجامعة ما اطبع مذركتي إلا قبل الاختبار بيومين
افهم المادة قبل الحفظ وادخل الملتقى كوزاات وورش


والحمد لله معدلي فوق الـ 4


وفقني الله وإياكم بكل خير


ابو سلطان

[عزيّـز]

قال الله تعالى في سورة المائدة : ( يَا أَيُّهَا الَّذِينَ آمَنُوا لَا تَسْأَلُوا عَنْ أَشْيَاءَ إِنْ تُبْدَ لَكُمْ تَسُؤْكُمْ )فيه ناس تسأل وهي عارفه ان سؤالها موب في محلة !
وفيه ناس تسأل وكأنه يحس بنقص وهو ساكت !
وناس تسأل لمجرد سؤال خطر في باله ( يعني اني منتبه ومشارك يا دكتور ) !
الهدف من المحاضرات المباشرة ان تسال في صلب الموضوع ..
يعني عندك مسأله ما فهمتها !!! اسأل عن كيفية حلها بطريقة اخرى اذا تبي تسوي ذكي
او ارجع لنفس طريقة الحل اسأل عنه


بعض الناس همج في سؤاله واقتراحه وتفكيره ونقاشه !
خلك طبيعي واستفسر عن شي معقول
يمكن هذا الي ترك أثر للدكتور انه يخفف بعض الأشياء ويصعب بعض الأشياء على اساس تكون متوافقه مع عقليات الجميع
مع الأسف ما توقع الدكتور ان بعض العقليات تحتاج ترحيل من المرحلة الجامعية الى المرحلة المتوسطة لأعادة تأهيلة ويعطى دورة على حسابة 6 شهور قبل يدخل الجامعة في تعلم الخطابة .. ويرسبونه ويعيدها 6 شهور ثانية على حسابه يمكن يطلع بنتيجة

[الرويال]

اعتقد الموضوع اكبر من كذا , فيه تدخلات من عمادة التعليم عن بعد بخصوص الاسئلة بشكل عام والدليل ان الكل يشتكي هالترم ليس على مستوانا فحسب ... ربما يكون بعض الاسباب احصرها في قلة قبول الطلبة اجبارياً من السنة الماضية حيث لن يكون هنالك الى جامعة السعودية الالكترونية بعد كم سنة تدرس الانتساب,كذلك ربما يكون الطرح الإعلامي بخصوص الانتساب ومساواته مع الإنتظام حيث ان الكثير يركز على ان اسئلة الانتساب جداً سهلة مقارنة بالإنتظام , كذلك المعدلات المرتفعة الكثيرة للخريجين !

تبقى لنا القليل وان شاء الله نتخرج , ايضاَ اصبحت المواد تحتاج اكثر تركيز حيث انها مواد تخصص وليست عامة كما فب المستويات الأولى ....

انا على قناعة ان المذاكرة في وقت الأختبارات ولى وانتهى امره , اصبحنا بحاجة لتفريغ انفسنا قليلاً خلال الترم بأكمله وهذا ما سأفعله ان شاء الله ..

[شاهيندا]

اخ بس لو جربو كيف دراسه الانتساب
كنت ادخل الاختبار وعلى الورقه 100 علامة ولازم اكون مذاكرة كتاب ب200 صفحة ويزيد وبالاخر ورقه الاختبار فيها سؤال واحد فقط


لا دكتور ولا اي احد يساعد

احمدو ربكم انتو في نعمة

[Abeer.H]

الواحد يا يسأل سؤال زي العالم او لا يسأل وش هالغباء اللي في بعض الناس !!!!

[Mohammed.m]

هذه النوعيه من العقليات المفروض تشهر فيه

يفكر انا دافع فلوسي يجيب الاسئله اللي ابغاها

صدقني اغلب الدكاتره متعاونين مع الطلبه

لكن يجيك واحد غثيث يخرب على المجموعه

خاصة الطلبه اللي مرابطين او اللي دواهم يمنعهم من المذاكر

الله لا يكثر هالنوعيات المتخلفه

[NAMEG]

الاسئلة مرصوده قبل المحاضرات المباشره

[حسن الأسمري]

انا سبق وقلت أن المشكلة في الطلاب وليس في الجامعة والأساتذة والكل زعل مني ولكن هذه الحقيقة

[badriya**]

انا سبق وقلت أن المشكلة في الطلاب وليس في الجامعة والأساتذة والكل زعل مني ولكن هذه الحقيقة



اتفق معاك صراحه اكثر الطلاب فاهمين الدراسة غلط الواحد يبذل جهده و الباقي على الله لسا مانسيت اللي صار ف اختبار الاقتصاد الكلي من كثر ماقالو الطلاب مايعرف يسوي اسئلة و دايما يكرر كرهنا ف ام المادة يعني ابغى افهم ايش تستفيد اذا سالت الدكتور عن الاسئلة ع اساس بيقولك مثلا ماتستفيد الا انك تخرب على نفسك و علينا حتى الناس ماتعتبر دراستنا ولا شئ تقول اسئلتكم مكررة و الدكاترة ينجحوكم لانكم انتساب اتوقع محد يبغى يدرس كل ذي السنوات و ف الاخر مايلاقي اعتبار لتعبه و مجهوده.. و اسفه لاني طولت عليكم :060:

[حمود الدعجاني]

والله انك صادق بعض الشباب الله يهديهم يجي فيهم غباء زايد ، يعني يبي الدكتور يقول ايه ذاكر اختبار العام ولا تتابع المحتوى .:(305):

[Ayad m]

فيه ناس مدري ويش تحس انا لو احد يسألني هالسوال اجيب لكم من منهج الاقتصاد الكلي في الهند .

[حمود الدعجاني]

فيه ناس مدري ويش تحس انا لو احد يسألني هالسوال اجيب لكم من منهج الاقتصاد الكلي في الهند .

:lllolll: ههههههههههههههههههه

[منتسب سابك]

أصلاً ما ادري ليه بعض الطلاب يسأل الدكتور هذا السؤال
^
مدري وش يحس فيه اللي يسأل هالسؤال يعني لو بيجيب بيقولك بجيب
^
بعض الطلاب هداه الله مايعرف حتى يسأل ووصل لمستوى خامس وهو يسأل نفس السؤال

هذا الكلام الطلاب هم السبب الاساسي للدكاتره بتغير الاسئلة

[م.التميمي]

الترم الجاي حطو تنبيه موضوع خاص ويكون تحذير لهلاشكال اللي خربت علينا حسبي الله وحبذا لو يتثبت الموضوع ويكون عنوانه "تحذير خاص لــ الملاقيف الي يسألون الدكتور عن النماذج السابقة"

[badriya**]

الترم الجاي حطو تنبيه موضوع خاص ويكون تحذير لهلاشكال اللي خربت علينا حسبي الله وحبذا لو يتثبت الموضوع ويكون عنوانه "تحذير خاص لــ الملاقيف الي يسألون الدكتور عن النماذج السابقة"

هههههههههههههههه شكلو يبغالهم كذا

[خالد بن سعود]

انا مادخلت محاضره مباشره الا اول ترم ودخلت فتره بسيطه وطلعت . حسيت اني في شات تعب قلبي ومن بعدها انزلها مسجله وانتهى الموضوع.

فيه مبدأ يقولون لك اذا حاولت تطلع بدري من دوامك وشافك مديرك اعمل نفسك ماشفته علشان تعطيه مجال اذا كان طيب مايسويلك شي لكن اذا التفت عليه وبينت انك شايفه بتخليه لازم يعاقبك ويتخذ فيك اجراء علشان يحفظ هيبته وبالمثل الدكتور اذا صرت كل شوي تسأله عن الاسئله القديمه وهالسؤال راح يجينا في الاختبار انت تجبره انه مايجيبها ويحفظ هيبته ومايعتبر متواطئ معاك لأن فيه مسؤولين راح يسمعون المحاظرات ويحاسبونه