|
تحذير مهم بخصوص مشروع التخرج
بسم الله الرحمن الرحيم
أنا كتبت مشروع التخرج بنفسي لكن كتبته بالعربي وترجمته بإستخدام البرامج وارسلته كفرست درفت لدكتور ووافق عليه لكن طلب تعديلات كثير بخصوص الستركشر والقرامر قبل ارسله كفاينل درفت المهم راح علي الوقت وقلت أشوف أحد يعدلي المشروع ويصلح الاخطاء اللي فيه ومافيه خوف ان يكون فيه سرقة او نسخ دام عارف نفسي اني أنا اللي كاتبه . وبحثت في النت وفي موقع حراج حصلت واحد وتواصلت معه على اساس يعدلي الاخطاء بالبحث وطلب اني احوله الفلوس قبل يشتغل عليه وقلت ماراح احول شي لين تخلص شغل وتوريني جزء من تعديلك وبعدها ابشر وطلب اني ارسل البحث يشوفه وبعد ارسلته قام يقول حول الفلوس واشتغل عليه وقلتله انت نصاب ومشكور ماعاد ابغى منك شي ورجع يرسل انه بيتواصل مع الدكتور علاء بما انه شايف اسمه بالبحث وانه بيقوله ان البحث هو مسوية واني ماعطيته فلوسه :Looking_anim: الزبده إني قلت مو انت اللي تهددني وسوي اللي تقدر تسويه وقفلت بوجهه وماعلي منه ولو صار شي يأثر على درجتي بالمشروع بأعرف كيف اجيبه واجيب راس اللي بيصدقه لكن شوفوا لأي درجة وصل النصب والإحتيال بهالأجانب ..! شيء غريب والله وعلى فكرة هو مصري وآخر رقمة 4560 زين والرقم اللي يتواصل فيه على الواتس آخره 7455 فحبيت أحذركم من هالاشكال فقط والله يوفق الجميع . |
رد: تحذير مهم بخصوص مشروع التخرج
جزاك الله خير
|
رد: تحذير مهم بخصوص مشروع التخرج
لا حول ولا قوة الا باللهما عاد في خوف من ربنا ابدا
الحمدلله انك خلصت من هالموضوع |
رد: تحذير مهم بخصوص مشروع التخرج
الله يجزاك خير أخوي
ربي يوفقكم وييسر عليكم المشروع |
رد: تحذير مهم بخصوص مشروع التخرج
حسبنا الله ونعم الوكيل ..الله يوفقك يا أخوي وييسر أمورك .
|
رد: تحذير مهم بخصوص مشروع التخرج
لو منك انا ارجع اهدده
اااه لو انه عندي كان اخطفه بعدين اشرح له نقاط الأختلاف بيني وبينه بشكل حضاري |
رد: تحذير مهم بخصوص مشروع التخرج
هههههههههه والله انك صادق بس تعجبني مادامك بتشرح نقاط الاختلاف بشكل حضاري ههههههه
الاشكال ذي ما تنفع معها الحضاره .. |
رد: تحذير مهم بخصوص مشروع التخرج
ويجزاكم خير جميعآ يارب
وأخوي فهد انا نسبة إني أتضرر من كلامه أوتهديده قليلة وماله داعي أنفعل من كلام واحد نصاب لان حتى لو وصل للدكتور وتواصل معه مايقدر الدكتور يصدقه او يتخذ اي إجراء بناء على كلام أو شي ماله علاقة بالجامعة وقوانينها وخلينا نفرض ان الدكتور رسبني في المادة بسبب كلامه << هذا الشي مو في صالح الدكتور نفسه لما اجي اشتكيه وبالنسبه للنصاب ذاك الوقت بيطلعونه البحث الجنائي في نص يوم واذا طلع منها وماثبت عليه شي ذاك الوقت اكون عارف معلوماته واقدر أطلق هولك الأخضر القابع في أعماقي عليه لكن الحين موفاضيله والله وهو على باله إني عاطل ومادرى في ايش انا اشتغل الخبل . |
رد: تحذير مهم بخصوص مشروع التخرج
(اقدر أطلق هولك الأخضر القابع في أعماقي عليه ) :hahahahahah::hahahahahah::hahahahahah: الله كفاك شره الحمد لله.. المهم يكون باقي يمديك تلحق تكمل البحث في الوقت المناسب؟ الله يوفقكم ولا يضيع تعبكم دايم أدخل مواضيع مشروع التخرج أستفيد من خبراتكم :106: |
رد: تحذير مهم بخصوص مشروع التخرج
يارب يسهل عليكمم ..
حسبنا الله .. |
رد: تحذير مهم بخصوص مشروع التخرج
على هالموضوع انا تواصلت مع كذا وحده تسويلي البحث المهم بغيت انحد ع وحده قالت ابي 1500 وبغيت اوافق والله يوم راسلت وحده ثانيه سوته ومدحت الدكتوره البحث وخذت مني بس 400 ؟؟؟
وربي انفجعت من فرق السعر .. الله يوفقنا جميع |
رد: تحذير مهم بخصوص مشروع التخرج
الله يوفقكم يارب
البحث سهل مررره بس يبقى لنا تركيب الجمل هنا المشكله |
رد: تحذير مهم بخصوص مشروع التخرج
الحمدلله نجحت وعديت المادة ب b+
ورغم إني تخرجت ولله الحمد لكن رفعت الموضوع للفائدة وأذكركم بالإنتباه لمعلوماتكم الشخصيه ومعلوماتكم الخاصه بالجامعه لاتقع في يد أحد هاؤلاء الخسيسين ويحاول يستغلها ضدك بأي طريقة ما وأتوقع هالشخص متابع الملتقى لأجل كذا كتبت الكلام هذا حتى يعرف لو تضرر أحد بسببه راح يروح فيها بإذن الله . والله يوفقكم ويحقق أحلامكم. |
رد: تحذير مهم بخصوص مشروع التخرج
هههههه ...بعدين لا تكتب معلوماتك او اسمك و لا اسم الدكتور و لا حتى اسم الجامعه بكبرها ....خله يصير ما عنده اي ممسك عليك ...علشان كذا مهم الواحد يحفظ معلوماته مهما كانت
|
رد: تحذير مهم بخصوص مشروع التخرج
اقتباس:
|
رد: تحذير مهم بخصوص مشروع التخرج
اقتباس:
الكلام المهم كان بالاتصال لكن ارقامه وايميله موجوده عندي وقت أحد يحتاجها لاسمح الله باعطيه واكون شاهد معه لكن الحمدلله ماجاني ضرر من هالنصاب وهذا افضل اسلوب الواحد ممكن يستخدمه مع شخص يحاول يبتزك بشيء ما التطنيش وعدم الاهتمام بكلامه واذا صار شي ذاك الوقت يكون عمل دليل ادانته بيده وأنا بأخذ حقي منه بالدنيا والآخره إن شاءالله لكن بما انه ماصار الا محاولة ابتزاز فاشله فيكفي تحذير الناس منهم وأسئل الله يكفينا شرهم ويهديهم . |
رد: تحذير مهم بخصوص مشروع التخرج
شكرا ع التذكير والله يكفينا شرهم
.. �� |
رد: تحذير مهم بخصوص مشروع التخرج
اول شي الي بيعتمد احد يعدل على بحثه لاينسى يشيل بياناته الشخصيه يعني اول صفحه شيلوها
الشي الثاني عندكم الاخ احمد الي معنا بالملتقى مايقصر ويعدل عالبحثث ككل افضل تعتمدونه لان من تجربتي انا وبعض الطالبات انه صادق ومخلص بشغله وبنفس اليوم يخلص لك شغلك وبالتوفيق |
| All times are GMT +3. الوقت الآن حسب توقيت السعودية: 07:11 PM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd.
Content Relevant URLs by vBSEO 3.6.1 جامعة الملك
الفيصل,جامعة الدمام