ملتقى طلاب وطالبات جامعة الملك فيصل,جامعة الدمام

السلام عليكم ورحمة الله وبركاته

بدون مقدمات وبدون لف ودوران <<< الولد مستعجل

فكرنا سويا انا والعائلة الكريمة على سرقة بنك على طاري حرف السين ليه بعض الناس يدرعمون بدال السين صاد.. يعني يبي يقول نسرق يقول نصرق مثلا السياره يقول الصيارة مدري بس يمكن السبب انه لما يكون الواحد عنده الحجاب الحاجز أطول من أفاه خخخخخخخخخخخخخخ ولا الي اللثه عنده هلاميه ومتمدده لين تغطي على ضروسة او يمكن ضروسه الله يعافينا هي الي متمدده ومسيطره على لثته بس رايحه برى فمه يعني تقريبا مثل سعيدان في طاش ماطاش

مالكوش في الطويلة الوكاد انه بليلتن من ليالي الأنس مع الدشير اخواني اطرقنا التفكير بعيدا نحو هواجيس واحلام المشمش الي بنبطي عظام وبتمصمص مندوبنا الدود ماوصلناها

واتفقنا ان كل واحد يزبد لنا بأطلق أحلامه واتفقنا على حلم واحد لان خبركم عيال الفقر ماينعطون وجه بالواقع فمابالك بالحلم

جا اخوي ابوداحم وقال : اشتري لنا قصر كبيررررررررررر وكل واحد فيكم يكون له فيه قسم هو مع عياله ..يعني انا ماني طماع كلها 50 ولا 60 مليون وكفايه علي

جاابوالعز وقال : انا مابي غير عشرة آلاف مليون ريال سعودي ابي اوسع صدري من الظيم الي شفته عندكم << الولد مسجل ضد اهله موقف

اخوي الصغير ابوعابد قال : انا والله ابي جيب vx-r2010 مغيم وبركب عليه هدرز وبالون <<< ابو من عطاك فرصه يالبزر

نقزت انا قلت شوفوا ياعيال على قولة اخواننا في موزمبيق يافوق فوق ياتهت تهت

وش رايكم ياعيال

نسرق البنك الاهلي

طبعا اخواني بايعينها اغسل ايدك يردونك لو تقول لهم وش رايكم ننتحر قالوا قدام

المهم من بكره ووينك يابو ربع ناخذ الوجيه حقت المبزرة والقفازات يقالنا بنخطف البنك الدولي في بروكسل كلها البنك الاهلي ياحافظ

وماهي إلا سويعات حتى قمنا بالسطو على البنك الاهلي فرع الصناعات المسانده بالجبيل <<< لزوم التمويه

طبعن مافكرنا نحط خطه لان الكفاءة موجوده ولا يعني المنتخب الكوري فاز على ايطاليا بكأس العالم بخطه ؟؟

دخلنا من ابواب متفرقه خوفا من العين <<< العيال رايحين عرس

ولما دخلنا البنك وقعدنا شوي نقز المكان ونتأكد انه مافيه شرطه ولا شي لبسنا الاقنعه <<<< ابووووو الذكاء

ويجي اخوي ابوداحم حاط مسدس على جبهة واحد ويقول

علي الحرام ان ماهجدتوا وكل واحد فيكم عظ على شحمه اني لا احشركم

الموهيييم العيال انتشروا والصغير ابوعابد مسك البوابة الرئيسية يقاله بيحرسنا ومناك الوصخ رايح يلعب مع بزر لقاه في الشارع معه صور بوكيمون

ابوداحم راح للي يفتحون حسابات وحذف عليهم كيس زباله وقعد يشرب شاهي على ما يخلصون تعرفون ولد نعمه

انا رحت لوحدة التحكم الرئيسية ومعي لاب توبي ابي انقل حسابات شركة الاتصالات وخليتها باسمي <<<< والله لا اصير مليونير

ابوالعز رايح لحسابات العملاء يتناقش معهم يبي يطلع فيزا كارت<<< الولد ذا يفكر بالمستقبل

الموووووهيم شووووووووووووووووي الا جاي الي واقف عند الباب اخلصوا ابو من جمعكم ترى بيأذن وانتوا تسرقون مايجوز

من الشبعه بعد بغينا ننحاش بسيارة مدير الفرع بس النذل سيارته بي ام جديده ولا عرفنا نسوقها لعنبوها تقل طيارة انا علي حلف ان اشتري نفسها خمس واحرقهن على شان احرق قلب وكالتها ليه يسوون سيارته تعور القلب

وبس قسم يالسرقه ذي شي مهوووب صاحي يعني الي يفكر يقدم على هالخطوه لايرده الا اقرب فرع لبيتهم

س/ ماذا تستفيد من الموضوع ..؟

_ولاشي بس اني سهران و في خاطري اكتب موضوع

س/ الهدف من هذا الموضوع ..؟

_تفتك من الطفره
_نبي نودي عانية لولد خال ام جدتي يبي يتزوج .. وانا وش دخل امي هو يتزوج ويستانس وانا ادفع