طلب مشورتكم , وتوجيهكم
 

السلام عليكم

أود الإستشاره ممن يملك التجربة و حسن الرأي

باقي لي مقررات الترم الثامن ( الخمس مقررات + بحث التخرج)
مضاف لها ثلاث مقررات من الفترة السابقه وهي:
- النحو والصرف
- الترجمة الإبداعية
- طرق البحث وتصميم الأبحاث

أي أن مجموع المقررات سيكون 8 + مشروع البحث
طبعا حسب الجدول (بركات الضغط) سيكون هناك أختبار لمقررين كل يوم لثلاثة أيام.

كانت خطتي السابقه تقسيم هذه المقررات على ترمين.

الآن بناء على أنه ربما من الأفضل لي أخلص هالترم, وكذلك ودي "أحمسها", فأبغى أضيفها كلها هالترم.

لكن لما اشوف الجدول وكثرة المقررات أصاب بالإحباط,
وأخشى أني أسجلها وفالأخير أتعثر في مقرر والا ثنين وأضطر أضيف ترم
ثم كأنك يأبو زيد ما غزيت!



رائكم..
ومشورتكم
وتوجيهكم..

رد: طلب مشورتكم , وتوجيهكم
 

المحاولة تكفيك لا تخاف انا نزلت ٩ مواد كان الاختبار في نفس اليوم الساعه والحمد نجحت وتخرجت المغامره مطلوبه والله يوفقك ان شاء الله

تم الإرسال من SM-A605F باستخدام Tapatalk

رد: طلب مشورتكم , وتوجيهكم
 

مبروك
وبيض الله وجهك


ويا جعلك دوم تغامر
وتجتاز بنجاح كل المخاطر.

رد: طلب مشورتكم , وتوجيهكم
 

يسعدك ربي

تم الإرسال من SM-A605F باستخدام Tapatalk

رد: طلب مشورتكم , وتوجيهكم
 

اهلًا رمش

وعليكم السلام .. ممكن يكون ردي مفصل وممل لكن ان شاء الله يكون مفيد

انا شايفة انه رغم ضغوط الجدول الا انه كثير نجحوا بخلاف آلاترام السابقة !

الامر الاخر ادب اطفال ( اول خمس محاضرات محتاجة ثلاث ايّام ) والباقي اموره ماشيه

الأدب الامريكي اول ثمان محاضرات تبي لها تركيز وباقي المحاضرات تافهه جدا جدا قراءة تكفي

الترجمة التتابعية والترجمة الإبداعية عندي طالبة زيك أخذتهم كلهم بترم واحد ونجحت فيهم فتوكل ع الله الترجمة التتابعية سهله لانها حرفية
بعكس الإبداعية ترجمة اقرب للابداع

النحو والصرف قواعد تفهم قاعدة تضبط امورك وتعدي بسلام يبي له خمس ايّام مراجعة

طرق البحث سهل ي رمش عناوين ورؤوس اقلام وافكار فرعية تحفظها وتجي نفسها حفظ وفهم

مشروع التخرج مدري اذا انت بتسويه لنفسك ولا احد بيسويه لك او يساعدك فيه

علم اللغة النفسي قراءة بتركيز وفهم يبي له خمس ايّام
تقنية المعلومات حليو وممتع فهم + حفظ = نتيجة جميلة

الخلاصة كل شيء يعتمد على توفيق الله ثم جهدك واجتهادك ودراستك
هل راح تبدا من بداية الترم وتقرا بتركيز وتعطي كل مادة حقها راح يجي للاختبار و70 بالمئه غطيت كل شيء وأضمن لك النجاح

موفق يارب ..

رد: طلب مشورتكم , وتوجيهكم
 

هلاااا
ومرحبااا

مداخلتك هي عباره عن : خارطة طريق.



1000 شكر على كل حرف كتب
والذي خلفه روح محبه للخير.

رد: طلب مشورتكم , وتوجيهكم
 

عليكم السلام ورحمة الله وبركاته

في البداية -من وجهة نظري- فيه اسئلة بينك وبين نفسك انت اللي تقدر تجاوب عليها ، وعلى ضوءها ( أياً كانت الظروف ) تقرر ترم تاسع او لا

_ يهمني الوقت بحيث لا يمكن الانتظار اكثر من ترم ؟
الاجابة نعم.. إذاً غامر واضغط نفسك بالمذاكرة بدري مع حبتين إجتهاد
_ يهمني معدلي (اكثر من الوقت) وعندي هدف ما ينزل عنه ؟
الاجابة نعم.. إذاً ترم تاسع اسلم خيار
.
.

نبدأ بالمواد :
عندك الترجمة الابداعية والصرف هي اللي في جدولك مسببة ازمة ، كلها في نفس الفترة ( تعارض )
وبما اني اخذتها هالترم واذا قررت تختبرها هالترم فباعطيك انطباع ونصيحة عنها

الابداعية عند حليمة : باختصار المقرر ينقسم لجزأين نظري وعملي ، بخصوص النظري حتى ولو انه دسم لكن ريّح بالك مو صعب واضح ومفهوم.. الصعوبة بان حليمة في (بعض) اسئلته كانت دقيقة والاجابة من السرد اللي بالمحاضرة + الخيارات متشابه تشككك + احيانا يلعب باملاء الكلمة
لكن حط ببالك انه أبداً في (الجانب النظري) ما خرج من الملزمة ( يعني نصية في المحتوى ما جاب بالفهم وهالشي يحسب له )

الجانب العملي اللي هي الترجمة كلها على بعضها ما تتعدى 8 اسئلة في الاختبار مو شي يخوف
على حسب اطلاعي على اسئلته السابقة كان يكرر الامثلة ويعطيك 3 او 4 امثلة جديدة وبعد في اختبارنا نفس الشي ، فما عندك خوف أبد من الجانب العملي ، ويكون في علمك حتى لو جاب امثلة من برا ترى ما عليها خوف لانها اسئلة قليلة + لما بتقرا الملزمة (بتفهم) وبتقدر تخمن الجواب لانه على سبيل المثال في الترجمة (للشعر) من الانجليزي للعربي لازم يكون البيت له قافية يعني بتعرف من الاجابات انه ذا شعر وهو الاصح ، وقيس عليها اذا كانت الترجمة دينية لها اشتراطاتها او قصة قصيرة او ... الخ
لا تذاكر الا من ملزمة سلطانة والجزء العملي من قناة توت وتبويب اسئلة ملخصاتي

الصرف اختبرته الترم هذا سهل !
الشي المميز في الصرف بانه فهم.. يعني حتى لو ذاكرته من فترة بيبقى عالق في الذهن بمراجعة بسيطة تقدر تسترجعه عكس الحفظ اللي ينّسي بسرعة
عندك اربع محاضرات مراجعة.. يعني كمحتوى فعلي عندك 10 محاضرات بس .. ذاكره من قناة توت ..
كمذاكرة: ابدأ ذاكر المحاضرات كقراءة حتى توصل لمحاضرة المراجعة في المحاضرة الرابعة او الخامسة وهي زبدة المحاضرات اللي قبل.. فهمك لها ( وهي بسيطة جداً ) يعني فهمك للبربرة والسرد بالمحاضرات اللي قبل ، وسوي نفس الخطوات لباقي المحاضرات .. يعني الاهم في كل شي هو قسم المراجعة اللي بالمحتوى فهمك له هو تقريبا كل شي + عندك التعاريف احفظها بطريقة المفتاح او افهمها او بالطريقة اللي تمشي معاك
+ اسئلة الاختبارات اللي قبل مهمة جدا جدا جدا كرر في اختبارنا اكثر من ثلاث ارباع الامتحان .. بالنسبة للامثلة اللي خرج فيها من برا المحتوى كانت على نفس الوزن سهلة واساسا فهمك هو الاساس ولو جاب من زحل : )

وبما انه الاختبارين عندك في نفس الفترة إبدأ اختبارك بالاسهل وهو الصرف ، وحاول تنسق مع المشرف اذا كان متعاون يدخلك بدري شوي ويعطيك ورقة الاجوبة تظللها بدري

بالنسبة لمقرر طرق البحث بصراحة الدكتور ما قصر اسئلته كانت واضحة لكن يبيلها مذاكرة لانها تعاريف وعندك المحاضرة 14 مراجعة وهي عبارة عن اسئلة تقدر تستشف اسلوبه في طريقة الاسئلة + كرر منها كثير في امتحاننا

بالنسبة لمواد ثامن اكيد اني ما اخذتها لكن كانطباع من اللي سبقونا التركيز يكون على - تحليل الخطاب يبي له فهم + اللغة وتقنية المعلومات يُقال انه صعب

مشروع التخرج نزله هالمستوى : اذا كان مشرفك الدكتور الفريدان او ثامر الحربي فتمسك فيه لانه باذن الله +a مؤكدة
واذا بتاخذ ترم تاسع وما جاء احد الدكتورين اللي فوق في ثامن.. احذفه وعلى امل يكون حظك كويس ويصادف يكون احدهم في تاسع

فالنا وفالك التوقيق والنجاح .

رد: طلب مشورتكم , وتوجيهكم
 

بعد ما كتبت هالرد الطويل اللي فوق توي انتبه انه تعارضك مع التتابعية :icon120:

ازمة الاختبارات لا زالت مؤثرة :/

حاول تسوي نفسك ما انتبهت :lllolll:

رد: طلب مشورتكم , وتوجيهكم
 

أيه، ما أنتبهت..!

ولكن اللي مستحيل ما أنتبه له أو أغفل عنه هو طيبتك، وجمال عبارتك
و "الهاي لايت" الفكري الظاهر في مداخلتك، اللي يخلينا نستنير، ونعرف إلى أين نسير..

طبت ، وطاب لك زمانك

رد: طلب مشورتكم , وتوجيهكم
 

ابدأ بسم الله وانتهي بالحمدالله وكن مع الله يكن معك

المغامره مطلوبه وموفق واوصييك تراجع الماده كذا مره عشان ترسخ فبالك والله يفرحك بشهادة التخرج

ماقصرو الاخوان وبيض الله وجههم