ملتقى طلاب وطالبات جامعة الملك فيصل,جامعة الدمام

كيف تتعامل مع الجامعة والدكتور ( نصيحة لكل المستويات )

السلام عليكم

بعد تجاوز المستوى الأول الحمدلله أكيد الواحد مر بتجارب وكلن له تجربته الخاصه فيه , حبيت بالموضوع هذا اكتب لكم بعض الملاحظات وبعض النصايح الخاصة بالتعامل مع الجامعة والدكاترة واللي أحس انها كانت سبب في مرونة أو عدم مرونة الدكتور من خلال وضعه للأسئلة للإختبارات النهائية واذا فاتني شي اتمنى من الأخوة الطلاب اضافة ماهو مفيد بالموضوع

1- المحاضرات المباشرة : لاحظت من أول محاضرة مباشرة بعد تقريبا شهر من الدراسة أن بعض الطلاب الله يصلحهم يسألون الدكتور عن المحذوف ( طيب أنت أدرس بالأول بعدين يصير خير ) يعني تخيلو واحد يجيك ضيف وانت تقول له متى بتمشي يالطيب ؟؟ الموضوع هذا أكيد بيعطي ردة فعل للدكتور حتى وان كان ناوي يحذف ولكن بما انه جا بالأسلوب هذا صدقوني بيعاند وبيحس انك جاي تلعب مو تدرس أو تبي تنجح وخلاص وبحكم أنك ماأهتميت فيه وبمادته وحتى وان أخذها بصدر رحب وضحك لك فتأكد أنه ماراح ينساها وبيقول لك مافيه حذف وبيتفنن بالأسئلة
2- الأسئلة المتكررة : البعض يتميلح ويكرر نفس السؤال اللي قاله زميله مدري يعني مايثق الا لما هو اللي يسأل والا وش السالفه حاولت اعرف السبب بس للحين مو عارف
3- الواجبات : لاتتذمرون منها وكلنا بنحلها هنا وبنتعاون وكلها واجبين لكل مادة ولا تتصادمون مع الدكاترة لأنها ماتسوى
4- منتدى الحوار : ماادري وش فايدته بس سايروهم يعني مو كثير بعد ماتشوف محاضرة تقط تعليقك عليها بمتندى الحوار وتشحن رصيدك بالدرجات
5- المحاضرات المباشرة : إن ماقدرت تحضرها بتحملها وتنحسب لك يعني عندك الى الان 30 درجه في جيبك
6- القرارات من الجامعة : الجامعة كل شوي بتطلع بقرار وكل شوي بتغير نظام وكل شوي الدكتور بيقول لك نظام فردة الفعل المباشرة صدقوني ماراح تقدّم ولا تأخر واتمنى تتفقون على كلمة وحده عشان صوتكم يصير مسموع وإذا كان فيه استنكار لدكتور معين او غيره اتمنى انه مايمس شخص الدكتور لسببين الأول انه الأخلاق تمنعنا من التجاوزات والسبب الثاني الدكتور بياخذ موقف مضاد
7- اتمنى تخصيص من يكون همزة الوصل بيننا وبين المسؤولين لإيصال صوت الطلاب وخصوصا القريبين من موقع الجامعة بالأحساء لأن التواصل عن طريق النت يدخل فيه التشكيك وعدم الثقه وعدم الرد من المسؤولين لعدة اسباب
8- بطىء البلاك بورد : البلاك بورد حق الجامعة احيانا احس أنه هندل بس ماعليه يمشي حاله ومع الوقت بيتحسّن على حسب وعود المسؤولين
9- الملخصات : إذا انت مذاكر كل المقرر وحافظه وفاهمة وش تبي فيها ؟ ولاحظت بعضهم يقول مسوي ملخص ( صغّر المحتوى وحطه بملف وورد وصارت الصفحات أقل ) يعني لخّص الورق بدل مايلخّص المواضيع

واخيرا لاتنسون الواجبات الدينية كالصلاة والدعاء ورضا الوالدين وفعل الخير ومحبة الناس وإخلاص النية لله

وإذا أحد حب يضيف شي من تجاربه ليفيد اخوانه الطلاب الجدد والقدامى لا يبخل علينا

وأتمنى للجميع التوفيق

أخوكم / شـــرق