ملتقى طلاب وطالبات جامعة الملك فيصل,جامعة الدمام

ان ضاق صدري واحتوى الهم بالي
واستفحلن المعضلات الشديده
وترادفن المشكلات الثقالي
ارخي عنان الشعر واطلق قصيده
الياتضايقت انحنى وارتخالي
واعتق رقاب المفردات السنيده
فيهن افش الغل لامن طرالي
هموم منها القرم يفقد عضيده
اما يغير الهم من غير والي
اوجت شياطين اتراقص مريده
سبّة غرام وخل جاب العنالي
غرام صالي بالحنايا وقيده
هنوف يرخص لجلها كل غالي
تاج الجمال وسيّدة سيد سيده
ظبيٍ يقود الريم قود التعالي
قايد وكن الريم حوله عبيده
اقول بصطاده لجالي مجالي
وان جيت اصيده سلهم وصرت صيده
الرمش من طوله يجي له ظلالي
والعين تحت الظل ماسه فريده
وليا تبسم صحت يا ويل حالي
يبرق ثغرها برق حالي يبيده
وعقلي غدا وارتفعت اسهم هبالي
وانخفضت اسهم كل جمله مفيده
فيها شموخ النايفات العوالي
وفيها من النمرود حاجه وحيده
الحاجه اشوى ما تقطّع وصالي
وجه الشبه ما بينهم هي عنيده
اليا رضت خلت لي المر حالي
وافنت هموم القلب وانعاد عيده
ويطربني احكاها ويسمو خيالي
فوق النجوم بصحبت اعذب نشيده
وان زعلت حاس الزعل ما صفالي
وظاق الوجود بعز لحظه سعيده
كني في بحر وهاج موجه اقبالي
والما غمرني والشواطي بعيده
الله كريم وياعسى يطيب فالي
واجري مكان الدم حب بوريده

للشاعر/ بــدر