ملتقى طلاب وطالبات جامعة الملك فيصل,جامعة الدمام - السنة التحضيرية تقرير السنه التحضيريه " بنات "

تقرير مبسط عن السنه التحضيريه

طبعا بعد الاخ ا.طوارئ نزل موضوع عن السنه التحضريه وطريقه الدراسه بقسم البنين ، حبيت انزل تقرير مختصر عن طبيعه الدراسه وتعامل الدكاتره بقسم البنات ..

* طبعا احنا البنات اهم شي عندنا تعامل الدكتوره اهم من الماده نفسها ، وهذا الشي ماراح تفقدونه لانهم مره كويسين بالتعامل والشرح والتفاهم مع البنات ، واذا احتجتي لهم تقدرين تتواصلين معاهم بدون تذمر.. وهذا اكثر شي كان يريحني

* اللبس : سكراب اخضر ، ولاب كوت ابيض
لكن هاذي السنه بيحددونه مع بدايه الدراسه ،
واكثر البنات كانو يلبسون ازرق واخضر
طبعا الكليه تسلم لكل طالبه لاب كوت وسكراب والي يبي يفصل يفصل.. واللاب كوت مهم بمحاضرات العملي

* مكتبه التصوير : في مكتبه بالكليه خاصه بالتصوير وتجهيز ملخصات الدكاتره

* جوالات الكاميرا : ممنوعه ، اذا شافته الامن ياخذون سمستر واحد واذا كاسرتها عادي

* الخروج من الكليه : قبل 12 لازم ولي امرك او سواقكم الخاص ، حتى لو خلصتي محاضراتك :18:
واللاب توب لازم يكون عندك تصريح من الكليه

وبالنسبه للمواد ، بتكلم عنها بشكل مختصر وعن تجربتي الشخصيه *

السمستر (١):

Computer :
اسهل ماده بسنه ١
تتكلم عن الميكروسوفت اوفيس بشكل عام ، اشياء طبعا معروفه ، الدكتوره تشرح بالبدايه وبعدين تطبقين ، ماده ماتحتاج المذاكره اذا فهمتي بنفس وقت المحاضره ، وقسم الحفظ يعتمد ع فهمك للعملي

English :
فيه من قرامر الثانوي شوي ، لكن ممتع وبصراحه كل الي يدرسون انجليزي بقسم البنات مره كويسين ، والي حاسه انها مو مره فيه لاتخاف لان راح يمشون معاكم خطوه بخطوه بس يبيله متابعه، وبتكون عدد ساعاته كثيره

Biostatistics :
ماده الاحصاء ، سهله مثل الرياضيات ، كلها ارقام وحسابات ، ماده خفيفه مافيها زحمه تعتمد ع تعاريف ومسائل

Islamic :
الاسلاميك السنه الي راحت غير عن الي قبلها ، واخوي أ.طوارئ تكلم عنه بموضوعه

السمستر( ٢):
Biology :
ماده سهله وممتعه خصوصا للي يحبون التمريض لاني احسها مهمه للتمريض ، ماده يبيلها حفظ وفهم ومتابعه ، لانها دسمه بالمعلومات غير عن المواد الثانيه ،
Biology lab
يكون من نفس موضوع محاضره النظري ، لكن يركز ع الصور واجزاء الصوره ، وترسمين ، وبالبدايه يكون عن الميكروسكوب وكيفيه استخدامه وهذا اكثر شي بتتعاملون معاه بالمعمل..

Chemistry
ماده مرره حلوه وخفيفه ، تعتمد ع الفهم اكثر من الحفظ ، بالبدايه بيكون التركيز ع الرموز حقت الثانوي وبعدها ع الكمياء العضويه ، العناصر والجزئات ووزن المعادلات واشياء سهله ماخذينها بالثانوي ، طبعا هاذي الماده الي تدرسها مشرفه قسم التحضري وهاذي الانسانه مرره طيبه ومتفاهمه مع التحضيري بشكل كبير ، لكن تحب الانسانه الي تبين لها اهتمامها بالماده .. وفي نهايه كل محاضره في اسايمنت يكون اختاري ١٠ فقرات ، يكون من المحاضره نفسها ، وله درجات باخر السمستر ، وتجيب منه بالاختبارات.. لانه مختصر المحاضره..

Chamistry lab
بالبدايه بتكون الدراسه عن ادوات المعمل ، وبعدها تجارب مره سهله والي درس مطور بتكون ماره عليه ، بالبدايه الدكتوره بتشرح التجربه وبعدين التطبيق وبعدين الحسابات اذا في ، واللاب له ساعتين بالاسبوع..

Physics
طبعا ماده تحتاج التركيز ، يبيلها تفهمين بنفس وقت المحاضره ولا يضيع الواحد ، وفيها اكثر شي تعاريف
واهم شي حفظ القوانين والتدريب
Physics lab :
طبعا لازم دفتر الرسم البياني لكل تجربه ، اذكر انها كانت عن ارخميدس واوم الي حق تركيب البطاريه ،
هذا اللاب من اهم اللابات كان بالنسبه لي لان هو اصعب واحد ، ولازم يكون الواحد موجود فيه

English for Nursing
ماده خفيفه وسهله وفي مصطلحات طبيه وكل مايخص المستشفى من ادوات واجهزه......

Medical terminology

ماده تتكلم عن المصطلحات الطبيه باللغه اللاتينيه ، يبيلها حفظ ، كلها جداول
بعطيكم مثال للفهم /
Bi باللاتيني
Tow معناها

صعبه بالبدايه ، لكن حلوه اذا تعودتي عليها وذاكرتي كل محاضره بوقتها ، بتسهل بالنهايه وهي الماده الي راح نحتاجها طول الدراسه

Arabic

العربي : بالسمسترين بتاخذونها ، سهل بيكون عن اشياء مرت عليكم من قبل مثل / ان واخواتها وكان واخواتها والمسرح والمقال وهاذي الاشياء

بالنهايه اتمنى الكل يستفيد من موضوعي وتجربتي ويكون فايده للمستجدات بالكليه ، ومافي شي صعب اذا في دراسه ومتابعه للمحاضرات ، والسنه التحضريه السمستر الاول خفيف بالدراسه
والي حاب المجال الصحي بيواجه كل الصعوبات الي بتواجهه..

اشكر اخوي : انسان انا
الي شجعني انزل موضوعي

ربي يوفقكم جميعا .. :1::16: