تكفون ......!!!

[barq]

السلام عليكم ورحمة الله وبركاته

ياشباب انا الحين في السنة الثالثة ثانوي وخلاص ماباقي الا القليل واتخرج ان شاء الله

بس حبيت اني استفسر عن اشياء مهمه

اولا :ياليت تفيدوني كم النسبة المطلوبة ؟
ثانيا: كم نسبة المقدارت الملطوبة .؟
ثالثا:هل اختبار التحصيلي مطلوب عند التقديم .؟
اذا كان مطلوب ابغى المسبة الملطلوبة او احتمالات

نخش بالموضوع وبسرعة

انا عندي اخوي من كلية الجبيل الصناعية وتخرج وتوظف والحمدللله

وهذا الكلام من سنتين

فاقلتله انا شخص احب الفيزياء وش التخصص اللي يناسب هالمادة ..؟

قالي الكهـــرباء العامة

وقالي انه صعب ومدري كيف المهم انه حطمني ونصحني اني اخش الميكانيكا

ولي اخوو ثاني بكندآ ويدرس هندسة ميكانيكا وانا صراحة مابي ادخل نفس تخصصه << الولد عنده عنصريــة هههه

فاليت تجاوبوآ ع الاسئلة اللي بطرحها؟

1/ السنة التحضيرية كم المعدل اللي يأهلك الى تخصص الكهرباء العامه..؟
2/هل التخصص صعب برايك ..؟
3/اذا كان صعب برايك وش الطرق اللي تخلي التخصص بسيط .؟
4/ايش الكتب اللي استفيد منها وانا بالثانوية وتخليني ع اتم الاستعاداد في دخول التخصص واعتبرهـ سهل نوعا ما..؟
5/الفيزياء يعتمد ع الرياضيات في المعدلانت بس هل حل المعادلة له قانون فيزيائي ام مستقبل يعني ماله دخل بالفيزياء مطلقا ولو في مثال ياليت ..؟
6/انا سمعت ان الكيمياء لهآ بالتخصص الكهرباء ؟ ياليت لو مثال او توضيح ايش بالضبط استفيد من الكيمياء..؟

ملاحظة:

طبعا انقليزي موجود وراح اقويه بالاجازة الصيفية باذن الله
والفيزياء مادة تعبر عندي سهله ..<< ياليت الكل يركز

ارجو من الجميع الاجابة ويفضل من تخرج قريب او يدرس في تخصص الكهرباء العامة


ومعليش بنتعبكم بس حط نفسك مكاني

[العشق السرمدي]

حياك الله أخوي والله يوفقك
نعم الاختبار التحصيلي مطلوب في الكلية بالاضافة الى اختبار القدرات وشهادة الثانوية .
طبعا الاختبار التحصيلي عليه النسبة الاكبر في القبول

الاختبار التحصيلي 40%
اختبار القدرات 30%
الثانوية العامة30%

وتكون نسبة القبول العامة 75%

للمثال لو جبت في الثانوية 90% .. تضرب هذي النسبة اللي جبتها في 0.30 <<< يطلع لك ناتج

ولو جبت في القدرات 80 ... تضرب هذي النسبة في 0.30 <<<< يطلع لك نتيجة

ولو جبت في التحصيلي 80 .... تضرب هذي النسبة في 0.40 <<< يطلع لك نتيجة

بالاخير تجمع هذي الثلاث نتايج واذا طلع المجموع 75 وفوق فأنت مقبول باذن الله .



أما بالنسبة لمادة الفيزياء اذا تشوف نفسك تحب هذه المادة فتخصص الهندسة الميكانيكية والكهربائية الافضل لك بالتأكيد .

لا يوجد معدل محدد لدخولك في التخصص ... مثلا لو كلية الهندسة الكهربائية تريد هذا الترم 400 طالب والمقدمين على التخصص 700 طالب فمن المؤكد انها بتختار افضل 400 طالب حصل على معدل في التحضيرية . ( ترى سهالات اخوي حتى لو ما حصلت على التخصص من اول مره يمديك تغير الترم الثاني ولا تخاف ما بيضيع عليك كثير لان مواد الترم الاول في التخصص متقاربة جدا وسيتم معادلتها لك لو نقلت لتخصص ثاني ).

صدقني مافيه شي صعب بالدراسة اذا اجتهدت وذاكرت وتوكلت على الله في كل صغيرة وكبيرة وتذكر انك اذا دخلت هذا التخصص بأن هذا التخصص من افضل التخصصات وفرص توظيفها عالية جدا بعد الله سواء في سابك او ارامكو او اي شركة قطاع خاص حتى الاتصالات المهندس الكهربائي له مكان متاح .

طبعا الفيزياء هي المادة اللي اذا فهمتها في الثانوي بتسهل عليك لو دخلت تخصص مثل الكهربائية
بس لا تخاف ياخوي والله بيبدوا معاك من الصفر سواء في تعلم اللغة او تعلم التخصص .
نصيحتي لك الانشغال كل الانشغال الفترة القادمة بتطوير لغتك الانجليزية صحيح انك بتتعلم الانجليزي من البداية في التحضيرية بس بتلاحظ نفسك تتطور بشكل اكبر لو تدربت من الحين .

سؤال خمسه ما اعرف وش قصدك بس ان شاء الله يفيدوك .

نعم تخصص الهندسة الكهربائية يوجد به كورس واحد في الكيمياء وهو ( general chemistry ) الكيمياء العامة
وهو كورس بسيط جدا مثل اللي تعلمته في الثانوي واسهل بعد بس اللهم بالانجليزي

بس هذا الكورس الكيميائي الوحيد في تخصص الهندسة الكهربائية وايضا في الميكانيكية

بالتوفيق لك أخي بس اعذرني لاني جاوبت الاسئلة العامة اللي يعرفها كل واحد سواء في هذا التخصص ام لا .

[barq]

الله يعطيك العافية والصحة وان شاء الله تشوف السعادة بدنيتكـ،

خلاص بإذن الله بخش تخصص الكهرباء

وياليت اللي عنده الزيادة يفيد ولكمـ الشكر

[@الطموح@]

ولا يهون اخوي العشق السرمدي ماشاء الله ماقصر ماترك شي نقوله كل شي قاله بالتفصيل
وبالتوفيق لكم

[كالوو]

طيب اخواني انا نسبتي في الثانوي 75 القدرات 71 وانشالله اختبر تحصيلي وانشالله بجيب درجة زينة بس تهقون انقبل والله اني خايف

[mαяlЪσřσ]

الدنيا ارزاق وانشالله نشوفك ...بالتوفيق