هل تقبلين الزوج براتب 1500؟؟؟موضوع لنقاش !!!

[همي اشيل همك]

المشاركة الأصلية كتبت بواسطة وردة تحت الثلج

هلا (همي أشيل همك) ماحب احد يتمسخر على كلامي... وكل واحد ووجهة نظره في الحياة
صحيح 2000 ريال ماتكفي واني معاك في هذة النقطة بس اذا الزوجة تتشتغل ليش ماتساعد زوجها
والله اعرف بنت ماخدة واحد غني ومخلص ماستر... مصبحها بطراق وومسيها بطراق يعاملها زي الجارية
وناس على قد حالهم عايشين وعين الله عليهم... واذا على الزواج على قولتك ترى كل من تبي تتزوج وتنستر.. بس في راي اني مو مهم الستر قدام الراحة النفسية والامان ...

هلا بك اختي ومليون هلااا..وليش اتمسخر ع كلامك بالعكس النقاش مفتوح والاختلاف بالرأي لايفسد للود قضيه..
وانا احترم وجهة نظرك.. لكن فيه ناس ماخذين اغنياء ومرتااحين ,, وانا ماخص راحتهم من خلال الماده لا ابدا .. وع قولتك ناس ماخذين اغنياء وماتهنوا.. لكن الماده عامل مكمل للسعاده وحياة زوجيه هنيئه ..والزواج قسمه ونصيب ..
اجمل تحيه اختي ..

[قلب الاسد]

همي اشيل همك .. موضوع رائع جدا .. اشكرك عليه ..

قبل ماقول رأيي .. عندي لكم قصة أخوي الكبير .

تخرج من الجامعه السنه اللي فاتت وعلى عمر يناهز 28 .. بعد الجامعه حاول يتوظف وقدم بكل مكان وجاب واسطات وسوا المستحيل عشان يتوظف ولو براتب بسيط ولو يكون مكانه بعيد مو مشكله .. ولقى وظيفه زينه .. راتبها 3500 ريال .. ومتأكل عيش .. وقال اخوي ابقدم بعثه وحاول فيها وجاب واسطات ولانفع وماتيسرت اموره .. ويوم قرر اخوي انه يتزوج .. وراح يخطب وبعد اسبوعين ملك عليها .. وسبحان الله .. جاه طلب في مكتب العمل في الرياض بمكتب غازي القصيبي وبراتب 6000 ريال كأول راتب .. وسبحان الله بنفس الوقت انقبل هو وزوجته ببعثه ببريطانبا يكمل ماجستير إدارة اعمال .. وتزوج وسبحان الله تيسرت اموره .. وتوظف وجلس اسبوعين واخذ اجازه دراسيه وفعلا وافقوا عليها .. يعني الحين يمشي راتبه وينزل بحسابه وهو ببريطانيا مع راتب البعثه له ولزوجته .. فعلا الله يسر اموره لما تزوج

رأيي الشخصي .. وكما قال الرسول صلى الله عليه وسلم اعقلها وتوكل .. قصدي لا ارضى لإختي ان تتزوج من شخص راتبه 1500 او 2000 ريال .. لان هذا يعد فقر مادي .. والعياذ بالله من الفقر .. ولكن ارضى لإختي بالزواج من شخص ماديته جيده وقبلها اخلاقه جيده .. وان تكون هي راضيه عنه .. والسعاده لاتتحقق بالمال .. وقد جا في كتاب الله ان المال فتنه .. فلا تقارنوا المال بالسعاده .. فالمال هو من مكملات الحياه .. والسعاده هي الغايه المنشوده .

كما في نظرية مارسلوا النفسيه :) <<<< سوداني مافيه من كتب هههههههههههه

اللي يبيني اشرحها بالتفصيل ابشروا بس هي باختصار توضح التدرج الهرمي للاساسيات في الحياه الى المكملات ..


ان شاء الله قدرت اوصل وجهة نظري بأكثر دقة .. واسف على الإطاله .

دمتم بود :) ,,

[همي اشيل همك]

هلا بك اخوي ... لا اختلف معك ان الزواج باب فاتح للرزق والله يرزق الجميع ...
وكلامك جميل وصحيح كل الصحه .. بما انك جبت طاري مارسلوا نجيبه .. باختصر عليك


نجد ان تسلسل الهرم بدأ بالحاجات المهمة وكلما ارتفع كلما قلت اهمية تلك الحاجة ..
حيث جعل قاعدة الهرم -كما ترون- الحاجات الفسيولوجية- ويندرج تحتها الطعام والشراب- وهذي كيف يحصل عليها الشخص اذا ماكان عنده دخل مادي جيد - اذا كان فيه هالقاعدة ضعف -الدخل المادي ضعيف- راح يكون فيه نوع من عدم الاستقرار النفسي لذلك الشخص ليس فقط عليه وحده وانما افراد اسرته أجمع ...

للنتقل للقاعدة الثانية وهي لا تقل عن أهمية عن الأولى-حاجات الأمان- ويندرج تحتها المادية والمعنوية والصحية- لو يكون الانسان عايش في دوامة الديون-الي راتبه 1500- اكيد راح يكون عايش في قلق نفسي بعيد عن الشعور بالامان وبذلك حاجته للأمان لم يتم إشباعها ...

اتمنى شرحت الهرم بشكل واضح ومختصر ..
وارجع وقول الاختلاف بالرأي لايفسد للود قضيه ...

هلا بك قلب الاسد .................. اجمل تحيه ..

[قلب الاسد]

صحيح كلامك همي اشيل همك .. ولكن .. ذكرت انا ان الدخل الجيد ضروري طبعا .. ولكن المال ليس غايه ابدا .. بل هو يندرج تحت اخر جمله باعلى الهرم وهو اقلهم اهميه .. تقدير الذات ..

وللمعلوميه :) أرى ان هذا التدرج خاطئ قليلا .. ولكن جزيتي خيرا .

عند شرح كل قسم من النظريه ستلاحظين بان المال جزء ولكن ثانوي بحيث انه يمكن الحصول على الطعام والشراب بطرق غير المال .. والمأوى هو ايضا ليس يتحقق بالمال بل يتحقق بوجود مكان امن .. والمال جزء ثانوي فيه .. والمأوى عند تحسينه الى فله او قصر فهذا يعتبر تحقيق الذات .. انا لا اقول انه ليس مهما تحقيق الذات بل هو مهم لتحقيق السعاده .. ولكنه ليس من الظروريات

ودمتم بود :)

[قلب الاسد]

وهذا هو التدرج الهرمي لنظرية مارسلوا للإحتياجات الانسانية .. وهي كما ذكرت همي اشيل همك ولكن مع بعض التفصيل والدقه اكثر في التعبير .




دمتم بود :)

[مستغرب]

^ ^

منكم نستفيد .. وبصراحه اثريتوني بالتدرج الهرمي والمحاكي لطبيعة الحال إثرَ دراسات كثيره ..

كل الشكر يا [ همي اشيل همك ] و [ قلب الأسد ]

ويا علنا ما ننحرم تواجدكم

[همي اشيل همك]

المشاركة الأصلية كتبت بواسطة قلب الاسد

عند شرح كل قسم من النظريه ستلاحظين بان المال جزء ولكن ثانوي بحيث انه يمكن الحصول على الطعام والشراب بطرق غير المال .. والمأوى هو ايضا ليس يتحقق بالمال بل يتحقق بوجود مكان امن .. والمال جزء ثانوي فيه ..
ودمتم بود :)

هلا بك اخوي انا سبق وذكرت ان المال مكمل للسعاده بمعنى انها جزء ثانوي غير اساسي ...
بمعنى انه مو شرط يكون هالمال كثير ولكن المهم وجوده ولو بشكل بسيييط.. فهو ثانوي ..
<< راح اوضح اكثر الطعام والشراب من الحاجات الاوليه للانسان ... لابد من اشباع تلك الحاجات من اجل البقاء.. فلو لم يتوفر المال فاكيد راح يكون هناك خلل وضعف في اشباع هذه الحاجات...
<< تقول انت انه يمكن الحصول على الطعام والشراب بطرق غير المال !!! طيب ممكن توضح لي مثلا لو انا شاب متزوج وعندي عائله واهل ابي اصرف عليهم وماعندي مال (مالقيت وظيفه)!! من وين بجيب هالحاجات !! باخذ من ابوي !! ولا اسجل في الضمان الاجتماعي !! ولا اطلب من الناس !!؟؟
................ اجمل تحيه اخوي..

[مرزوق]

السلام عليكم

بصراحة نقاش حلوو وراقي لكن ودي اظيف اظافة

نظريا 1500 ريال يمكن ما تعيش الأنسان عيشة كريمة لو فكرنا في الموضوع بنظرتنا احنا الخليجيين للحياة

بصراحة الخليجيين غالبيتهم مو عارفين لأنفسهم بكثير من امور الحياة وكل واحد فيهم مغرق نفسه بالديون والقروض البنكية الي ما لها داعي

مرة فكرنا نتلفت حولنا ونشوف العالم الي حولنا كيف عايشين

احنا بالخليج قبل الطفرة كنا عايشين ببساطة شديدة ولا نعرف شيء من مباهج الحياة

وشوي شوي بدأة تدخل علينا امور ما كنا نعرفها ولا عمرنا فكرنا فيها ويوم عن يوم تتزايد وتتضخم حتى وصلت مستوى محد يتخيله

الجوال مثلا كل واحد منا عنده جوال لكن هل كلنا نحتاجه فعلا؟ هل الفاتورة الي ندفعها كل شهر لها مبرر؟ هل الي يغير جوله كلما نزل اصدار جديد هل هذا عنده عقل؟ مدري في بالي كثير اسئلة بس كذا كفاية

اخوي يسافر كثير دول غربية ويعرف كثير اجانب اغنياء جدا ومدراء شركات كبيرة ما عندهم جوالات او ولا مرة في حياتهم امتلكوا جوال ولما يسألهم اخوي عن السبب يجاوبون ببساطة احنا ما نحتاجه

انا اعترف ان الجوال بالنسبة لي بذخ ولو بحاول الأستغناء عنه بقدر استغني وكثير منا بيثدر مثلي بس لو يفكر

طبعا في اشياء كثيرة نقدر نقيسها بالجوال ولو بتكلم ما بخلص

نرجع الأن للزواج من شخص راتبه 1500 رايال بس هل ممكنه او لا

مثل ما يقولون رأساء امريكا في حملاتهم الأنتخابية ما عرفوا الا كلمة yes we can

انا اذا راتبي بسيط ليش اتشرط في البنت الي بتزوجها ليش ما ابحث عن موظفة تساعدني على هموم الدنيا

كلنا مهما كان مستوى معيشتنا نرغب في تحسينها وتطويرها وهذا يدل على وعينا

كل شيء يقدر يستفيد منه في حياته لازم يستثمره واول شيء مصروفاته لازم يقلصها بالقدر المعقول ويشتغل وقت تضافي او وظيفة ثانية بعد الظهر او يشتغل لحسابه الخاص لو كان عنده حرفه شاطر فيها

السهرات مع الشباب كل ليله يبغا لها مصاريف وليلة وحده بالأسبوع كافية ... الثياب اذا اقدر اغسلهم بالبيت ما في داعي اغسلهم بالمغسلة .... الأكل من المطاعم مكلف وبعد مو مظمونه نظافته ليش ما نقلل منه للضرورات او ليالي المناسبات .... طبعا الأمثلة كثيرا

اهم شيء محد يفهمني اني ادعوا هذا الأنسان ان يحرم نفسه من متع الحياة وبس لا بالعكس الي ابغاه ان اي انسان يحاول يوجه مصادر دخله للأشياء الأكثر أهمية ثم بعد ان يوفرها يفكر في الأشياء الأقل اهمية

صحيح الحياة بتصير صعبة بالبداية لكن بالتأكيد اذا خططنا لها صح بتصير احسن بكثير من اصحاب الرواتب الكبيرة

انا مع كل بنت ترفض الزواج من ابو راتب 1500 اذا كان انسان فاشل وبلا طموح ولا يعرف كيف يدبر شؤونه ويحسن من وضعه

تحياتي لكم ومشكورين على الموضوع

[محمد القحطاني]

ونعم الراي اخوي مرزوق هذا المفروض الكل يمشي عليه لماذا نكابر ونضغكط على انفسنا بالقروض
الواحد يطلع سيارة كمثال ب 100 الف علشان شوفو معي سيارة بينما كان معه سيارة ب 30 او 40 الف وتمشيه وتودي ولافيها عيب
ليس تتسلف وتضغط نفسك
وبعدين الشباب طايحين بالسلف لاجل الزواج ليش وش فيها لو تاخرت بالزواج
الان انا لو مامعي دراهم من جهدي ماطلع مع الشباب صدقوني ابوي مايقصر بس لازم نعتمد على انفسنا

[فجر عمري]

حبيت اشارك بالموضوع وابدي مجرد راي يحمل الصواب او الخطاء
مبدء الزواج من اي شخص لايحددة الراتب او الماديات بل الشخص نفسه وقيمه واخلاقه
والمشكله مو في دخل ب1500 او ب15000 الف المهم ان نجد السعادة وتدبار الحياه والمعيشه مع هذا الشخص
لان بالتحدي والاصرار والتصرف بمزيد من العقلانيه والحكمه تصبح الحياه اكثر جمالا و واقعيه
فلكل يبحث عن رجل حقيقي وليس براتب قابل للزيادة والنقصان ..