[ مواد مشتركة ] : هم التطبيق والخوف والكوابيس

[قمر دنه]

السلام عليكم

انا حاولت اني ما اكتب الموضوع ولا افكر فيه لان ما ابي احبط نفسي ولا احبط اللي مثلي
لكن خلاص ما اقدر ما اقدر اصبر.
انا انسانه قدر الله علي واخترت التربيه الخاصه واعاقه عقليه
ادري القسم حلوو وكل شي حلوو فيه لكن مايناسب شخصيتي يمكن

المهم الترم هذا تطبيقي
وانا انسانه لا املك من مقومات المعلمه او التدريس شي
يعني لا اسلوب ولا افكار ولا شي ولاشي
لدرجة اني فكرت اعتذر هالترم او اغير تخصصي لكن كله واحد ماراح يتغير شي
المهم فيه احد مثلي :(
شايله هم ماتتخيلونه حتى نومي صاير كوابيس ما اعرف. ما اعرف ما اعرف
ولا ادري وشلون اتصرف

شايله هم المدرسه والمديره والمعلمه والطالبات وخايفه ما اعرف احضر دروس ما اعرف اجهز وسائل.
يمكن اعرف لكن خايفه. ههههههه. لاتضحكون. وقولو الحمد الله الذي عافاكم مما ابتلاني.

قسم بالله ماامزح ما اعرف انا من النوع الخجوول. واستحي ويحمر وجهي وتجيني نفضه اذا جلست اتكلم قدام ناس كثار واعرفهم


كيف عاد بجلس اششرررح قدام طالبات ومشرفه وووو. :(
تكفون اذا عندكم تجارب او مريتو بالحاله هذي. اكتبووها لاتبخلوون علي والله راح تفيدوني كثيييير.


ماتجرحونيش بالكلام ربنا يخليكوا مش ناقصه احباط.

[هـمـس التميمي]

اذكري الله

فيه بنات زيك .. والحمدلله عدوها ع خير
واستمتعوا بهالتجربه

هانت باقي التطبيق بس للتخرج ان شاء الله

لا تخلين الشيطان يقص عليك .. ويخرب مستقبلك

رب اشرح لي صدري ويسر لي امري

سوي بحث بقوقل ع التطبيق الميداني راح تلقين

[Shog]

وعليكم السلام و رحمة الله

أولا : وقبل كل شيء توكلي على الله فمن توكل على الله فهو (حسبه) ودائما رددي اللهم لا سهل إلا ماجعلته سهلا . . .
واللهم اشرح لي صدري ويسرلي امري وأحلل عقدة من لساني يفقهوا قولي

ثانيا : لاتقولي انا خايفة وما أقدر لااا . دائما رددي أنا أقدر وراح أنجح بإذن الله حتى يرسخ هذا الشي في عقلك الباطن

ثالثا : في دورات في النت عن تطوير الذات وعن ثقة المتدرب في نفسه مررره حلوه فادتني كثير
حاولي هاليومين تقرأي فيها كثير وتدوني النقاط المهمة منها حتى ماتنسيها

واخيرا أسأل الله العظيم أن يوفقنا ويعيننا وان شاء الله قريب نبارك للجميع بالتخرج بامتيااازز

[Eri]

اشدعوة حبيبتي كل هالخوف
انا نفسج لما قرب هالسمستر صرت كل خايفة من التطبيق وافكر
كيف بشرح وكيف بتعامل مع البنات والمعلمات لاني نفسج استحي ولا اعرف اتصرف
بس بعدين فجأة حسيت بحماس
حتى لو كنت مااعرف اشرح ومااعرف اتصرف ...طبيعي
لان اول مرة نمارس المهنة>>حلوة هالكلمة خخخخخخخخ
اكيد المعمات بيعلموننا ومو من اول مرة بنحضر ونشرح
بنتعلم كيف نحضر وكيف نشرح واشوي اشوي بنعرف كلشي

فـ أنتي خليك ريلاكس وفكري بتفكير ايجابي
وفكري انها بتكون تجربة حلوة لج

[أحمد القاضي]

خلي في بالك انك رايحة للتطبيق عشان تتعلمي وتستفيدي واهم شي الجدية والحماس

مافيه كامل غير وجه الله حتى المعلم المتمرس في التعليم لاعوام طويلة قد يقصر بعض الحصص

الامور سهالات باذن الله

[@ابو نايف@]

افا كل هذ هم

انتي راح تطبقين سبوعين يعني مايمدي تحفظين المعلمات الا وهي منتهيه

وبعدين تراهم متعاونين يعني لو ماتبي تشرحين اتوقع ماراح يعقدونك لوضع والله بسط

اهم شي خلي عندك عزيمه ورادة انك تتجاوزين الخوف هذا

[خلف الشمري]

يعني حنا الي فآهمين

كلنا نفسك ويمكن آكثر

انتي مازلتي بمرحلة التعليم مافيها شي لو جيتيهم ماتعرفين شي وهم يعلمونك وشوي شوي تتعودين ويصير الامر عآدي

خلك مثلي انا ناوي اول يوم اجيهم مكشر وشآيل معي هوز آحمر :(

[meematoo]

والخجل تتنوع أسبابه من شخص لاخر بتعدد الظروف وتنوعها .. فقد يكون العامل الجسمانى او الحالة الجسدية التى عليها سبباً من أسباب خجله , مثل الناحفة الزائدة او البدانة المفرطة او الطول الفارع المبالغ فيه , او القصر المتناهى , وكذلك الحال عند الشعور بعاهة جسمانية بارزة او تشوه فى جمال الوجه .. كلها أسباب يمكن ان تجعل الانسان خجولا من داخل اعماقه , ومع ذلك نجد اشخاصا يتمتعون بالصحة الجسدية وتمام العافية والجمال المبهر إلا ان الخجل يعتريهم لسبب اخر قد يكون فرط حساسيتهم لتصرفات الناس وسوء الفهم ..........


لو قلت لك ماذا يفعل بك الخجل فستتركه فوراً وتبحث عن الاساليب الصحيحة للتعامل مع الناس وكسب الاصدقاء .. فى كل موقف انسانى سلبى تتعرض له و أنت فى حالة خجل وسلبية تخضع لتفجيرات نفسية داخلية مفاجئة وعنيفة , ومتعاقبة , يضطرب معها جهاز الاوعية الدموية , وحركات الداخلية , وتعجز نفسيتك تحت وطأة هذا الاضطراب عن التكيف والاسترسال مع الاشخاص الذين تتعامل معهم .....


حاول ان تبتسم وترسم الابتسامة على وجهك وثق بنفسك وبقدرتك على قهر الخجل على الشخص الذى بجوارك , افتح معه اى موضوع , تساءل عن اى شى .. عن الوقت .. عن مكان تعرفه .. واجعل حوارك يتسم بالود والحب , ستجد الموضوع فى غاية السهولة والبساطة .... المهم ان تبدا وتبدأ فوراً .........



تغلب على إحساسك بالخوف من الفشل فهو الذى يجعلك تتوقع وتفضل ألا تكون موجوداً بين أفراد المجتمع !! تتصور انك محور اهتمام العالم وأن الناس يراقبون حركاتك وسكناتك , ولاتخش من عدم تقدير الناس لك ولاتنشد الاستحسان من الاخرين .....



العزيمة هى سلاحك لمواجهة الخجل ولكن هذه العزيمة الوطيدة الراسخة المستمرة والمسيطرة التى يجب ان تمتلكها للسيطرة على خجلك ولا تستمد مرتكزها إلا من كراهية شديدة ونفور عارم من كل ما يبعث على الخجل او ينجم عنه على أن يتبعها ولع جامح ورغبة فى الاستمتاع بكل ما يؤدى الى الثقة بالنفس مثل الشجاعة والجراءة وحب الناس والتعاون معهم , وهى الصفات التى يجب ان تزرعها داخل نفسك .


ملاحظة مهمة جدا جدا جدا ..... هذا الموضوع منقول من كتاب ل يوسف الاقصرى ..... اسم الكتاب عيوب الشخصية الجزء الخامس .... كيف تتخلص من عيوب شخصيتك ؟



اتمنى يفيدك

[سلمان اللحيدان]

الموضوع بسيط أول يوم خليك كذا على طوووول

وثاني يوم كذا

وثالث يوم

ورابع يوم

وخامس يوم

وعلى هالحال الى آخر يوم