[ طوارئ ] : مهم لمن أراد تنوير ومعرفة " قسم طب الطوارئ "

[أبها]

بسم الله الرحمن الرحيم

السلام عليكم ورحمة الله وبركاته.

قسم طب الطوارئ في كلية الغد الدوليه للعلوم الصحية ، قسم جميل وعملي أكثر من بقية الأقسام الأخرى في الصحه ، و يمتاز هذا القسم بتوفر وظائفه بعد التخرج وتعدد الأماكن الوظيفة لهذا القسم .

من ناحيتي انا شخصيا دخلت هالقسم لثلاثه أشياء رئيسيه :
أولا وقبل كل شي فيه أجر كبير عند رب العالمين لمساعدتك المصابين وعلاجهم .

ثانيا : لأنه قسم مستحدث ووفرة الوظائف فيه بشكل كبير جدا في المملكه وندرة دارسين هذا المجال والحاصلين على شهادة طب الطوارئ . حيث أنه بالأمكان ان تعمل في القطاع الحكومي كالمستشفيات وهيئة الهلال الأحمر السعودي وكذلك في القطاع الخاص كالمستشفيات الخاصه والشركات كأرامكو وغيرها من الشركات الكبرى اللتي تتنافس للحصول على خريجين مثل هذه الأقسام المهمه . وقد كانت هناك دراسة أشارت نتائجها ان لو كان بالأستطاعه تعليم جميع البشر مبادئ الإسعافات لا تم تطبيقها حيث أنها الوظيفه او المهاره الأكثر فالعالم إحتياجا بسبب كثرة الحوادث المروريه والحوادث الطبيعيه .

ثالثا : الرواتب العاليه التي يحصل عليها أخصائيون الطوارئ والفنيين لكثرة البدلات وخصوصا موظفين الهلال الأحمر . بحيث ان الفني يبدأ اول مربوط له بكامل البدلات في الهلال الاحمر ما يقارب 10000 الاف ريال وما فوق . وأخصائي الإسعاف يبدأ من 13000 ألف فأعلى . وهذا شي يدفعك ان تعيش الحياه الكريمه التي تستحقها انت ومن تعيلهم .

اتمنى اني نورتكم بالمستقبل الوظيفي لهذا القسم وأسباب دراستي لطب الطوارئ .

بالنسبه للدراسه بهذا القسم الجميل ، فهي تتمحور بين دراسه نظريه وعمليه . تبدأ النظريه من المستوى الأول والثاني والتي يطلق عليها السنة التحضيريه اللتي تتيح لك بعد انتهاء المستوى الثاني التخصص في أي من تخصصات هذي الكليه . سواء طب الطوارئ او التمريض وغيرها من الاقسام الموجوده بالكليه .

طب الطوارئ فيه 8 مستويات تعليميه . تبدأ التخصص بهذا القسم من المستوى الثالث حيث يعطونك كم كبير من المعلومات الأساسيه للقسم ، اللي راح تعتمد عليها طول دراستك في هذا القسم وراح تتكرر عليك في جميع المستويات القادمه وهذا شي " أنصحك كدارس انك تفهمه وتأسس نفسك زين عشان تسهل عليك المعلومات القادمه لأن كل شي بتدرسه يعتمد على معلوماتك اللي درستها وحفظوك أياها في المستويات الأولى " وغالبا راح تكون المصطلحات الطبيه اللي لازم تحفظها زي اسمك باللغه الاتينيه . ومع مرور الوقت ودراستك الجيده الأول بأول راح تصير بلبل بالمصطلحات . انا في بدايتي أهملت هالشي وكنت كثير غياب بالمستويات الاوليه بسبب ظروفي الخاصه . لكن الحمد لله ربي لطف وتلاحقت على نفسي وحاولت ارجع اللي فاتني لكن بعد ما واجهة صعوبات كثيره .

المهم بتجيك فتره من الفترات تلقى نفسك اندمجت مع هالقسم وتلاحظ انك تعلقت فيه . لأنه وبصراحه قسم جدا جميل وممتع لأن العملي فيه يغلب على المعلومات النظريه . المهم كل اللي بتطبقه تراك درسته عشان كذا انا اقولك ركز بالدراسه وحاول تحصل على اكبر كم من المعلومات اللي راح تفيدك بحياتك العمليه وراح تطبقها فالمحاضرات العملي او في مواد الهلال الأحمر .

يمكن تستغربون وشلون مواد الهلال الأحمر او المستشفى . فيه 4 مواد تأخذها على اربع مستويات يعني كل مستوى تاخذ جزء من هالماده . وتبدأ تأخذ هالماده من المستوى الخامس وهي ماده ما تدرس في الكليه لكن ؛ تدرس فالهلال الاحمر بحيث ان الكليه تتعاقد مع مراكز الهلال الاحمر بالمستوى الخامس والسادس وتصير تداوم هناك بالليل ومره بالأسبوع . لمدة مستويين دراسيين . تقدر تطلع مع الاسعاف اذا كانت فيه حاله ، واذا رجعت تكتب ريبورت عن الحاله اللي طلعت لها مع الاسعاف " على حسب دكتور مادتك " اما انا ما قد طلعت في حاله لأن الوقت ما أسعفني بسبب كثرة الدفعه حقتي وترتيبي فالطلعه مع الحالات كان من الاسماء الأخيره . المهم المستوى السابع والثامن تأخذ الماده في المستشفى وتحديدا قسم الطوارئ . الزبده المستشفى فله لأن الحالات كثير والاطباء قليل عشان كذا بتتعلم اكثر . بس انتبه تجيب العيد ^_^ .

طب الطوارئ وخصوصا بكلية الغد حاجه حلوه وممتعه . لأن طاقم التدريس الموجود بكليات الغد ماهم مستنشبين ومعقدين مثل الكليات الحكوميه . ويمشونك لكن انصحك لا تستغل هالثغره فيهم . بالعكس استفد قد ما تقدر وخذ اكبر كم من المعلومات سواء منهم او من الانترنت ، لأنك يا غالي بتتوظف في أنقاذ ارواح بشر قد يكون منهم احد من افراد عائلتك لا سمح الله . هذي نصيحتي لك .

وأخيرا بعد ما تعدي المستوى الثامن تنتهي الحياه الدراسيه ويبدأ التطبيق اللي نسميه سنة الامتياز واللي انا قاعد انتظرها تبدأ . إن شاء الله بشهر 11 الجاي .

الزبده والملخص للكلام ذا كله :

قلبك قوي ، وتبي تضمن وظيفتك ، وتبي راتب حلو ويعيشك برغد ، وتحب مساعدة الناس ، والأهم تدور للأجر ، وهل أنت انسان تحب العمل وعملي ؟

^ إذا كانت إجاباتك نعم أجل توكل على الله وأدخل وانت مرتاح البال وحياك بين اخوانك اللي ما راح يقصرون عليك ولا يبخلون عليك بأي شي راح يفيدك وأنا أولهم ♡

أسف على الإطاله ، وأتمنى صادق الود منكم . ودعائكم هو مطلبي

[أ.طوارئ]

موضوع أكثر من رائع ...

وننتظر تعليقك على الامتياز ...

وفقك الله لكل خير يارب

[][ MOHAMMED ][]

-

ماشاء الله عليك / حبيتٌ التخصص أكثَر ..

أسلوبك جميل وقريبْ مِن القَلب وطبعاً الأسئلة رآجعين لها /

بما إني للحَين مانمت وذبحني الأرق والتعععَب

:

بالتَوفيق آخويّ ‘‘*

-

[أبها]

شكرا ع تشجيعكم . واتمنى اني أفدت

[براق الصيف]

تخصص طب طوارئ تعتمد على تحمل نفسك
وخصوصاً قلبك
على المناظر الي بتشوفها
عندما تباشر حالات الحوادث
،،،،،،
وشكري وتقديري لصاحب الموضوع
لاعدمناك

[][ MOHAMMED ][]

:

باككٌ جآي بكذَا سُؤال وتحمّل إزعاجي ..

* سُؤال خاص إنت كنت معطي الدرآسة إهتمام ؟ وتقريباً معدلك مرتفع او نازل ؟

* الدراسة نسبياً لو أقُولك بشكل عام كم تعطيها من 100 من ناحية السهولة والصعوبة ؟

* وش كانت المادة الأصعععب بالنسبة لك من دخلت التخصص ؟

* بسألك عن مادة Anatomy آعتقد بالمستوى الثالث او الرابع هل هي صعبة ؟

<------ لأني متخوّف شُوي منها

* مواد الهلال الاحمر عن إيش بالضبط ؟ وكل الفروع لازم الدراسة بالهلال الاحمر ؟

* أخيراً وليس آخراً / نصيحَة لكل الراغبين بتخصص طب الطوارئ ؟

.

آزعععجَتك معَي بس تحمَل ربي يحفظك ويوفقك بالإمتياز وطُول العمُر

يالغغغآلي ** وعُقبال الوظيفة يابطططَل ,,

-

[أبها]

مسساء الخير ،،

كلامك سليم يأخ براق الصيف ، لكن مع العمل يصير عندك تبلد ويصير ريحة الدم إدمان بالنسبه لك .

بالنسبهه للشيخ محمد بسم الله :

* من ناحية إني معطي الدراسه أهتمام ، في أول المستويات لا نهائيا بمعنى الكلمه لدرجة اني كنت اسحب على الأختبارات وكانوا يدقون عليه عشان أحضر خخخخ مسوي فيه صاحب السسمو . فالله سبحانه لطف فيني لأنهم كانوا متساهلين ، وفي أخر 4 مستوياات شديت حيلي وتلاحقت على نفسي لأنهم بدوا يظغطون ويدققون شوي --》ومع كذا معدلي حلو انشاء الله .

* بالنسبه للدراسه كم أعطيها من 100 ؟؟ صراحهه ما أقدر أقيم لأن طاقم التدريس هو المهم لأن الدكتور هو اللي يسهل الصعب ، ويصعب السهل . لكن في فرع أبها كانت سهله جدا جدا . وبشكل عام من ناحية المناهج فهي مدسومه بالمعلومات لكن قسم بالله قمة المتعه بدراستها وتبقى زي ما قلت انو على حسب أسلوب دكاترة المواد اللي عندكم .

* الماده الأصعب تقريبا هي مادتين اللي هي الأنتومي ومادة أسمها فارماكولوجي ( خاصه بالصيدله ) ، وأنا بقولك ليش هالمادتين بالذات ؟؟! لأن دكاترة المادتين كانوا فاليابان والأخوان رجعوا السعوديه وباقي المخيخ عندهم مبرمج على النظام الياباني الصارم . فطبقوا النظام فينا وكانت اختباراتهم جدا صعبه وتعاملهم جدا قاسي علينا ، عشان كذا انا حملت المادتين معي .

* بالنسبهه لمادة الأنتومي فهي تجي جزئين ( anatomy1 and anatomy2 ) وكل جزء بمستوى وتبدا دراستها من المستوى الثالث . وهي سهله لكن فيها من المصطلحات الطبيه وأسماء الاعضاء والانسجه والعظام والعضلات مالله به عليم لدرجة ان بعض الأعضاء لها اسمين او امصطلحين لازم تحفظها . وتعتمد على الدكتور اللي بيعطيك الماده . انا ابشررك رغم اني اكره الحفظ لكن غيبت هالمصطلحات مثل اسمي .

* مواد الهلال الاحمر هي كتب تأخذها ومحتوياات الكتاب كلها تقريبا تكون قد درستها من قبل بس هذي عشان يثبتون لك المعلومه وتطبقها اذا كان فيه مجال للتطبيق وما فيه نظري الا شي بسيط كلها تطبيق وتشوف كيف الحياه العمليه اذا توظفت وتتعلم أشياء كثير بسبب أختلاطك مع المسعفين . ودايما يكونون متعاونين مع الطلاب الله يسسعدهم .

* نصيحتي للدارسين بهالقسم او اللي يفكر يدخل فيه ، ان يكون صادق مع نفسسه اولا تجاه دراسته والمقصود انه يشد حيله أول بأول لان طبيعة عمله بعدين كلها تقريبا تعتمد على معلوماته اللي درسها ومهاراته . مثال 》أن فيه شخص قدامك عنده تسمم ومغمى عليه بالارض ، وأهله قالوا لك ان الولد كان قبل يغمى عليه قاعد يرجع ويشعر ألم بمعدته وأعراض اخرى كلها تشير ان هذا الشخص عنده تسمم ، فأنت حسب معلوماتك اكتشفت ان سبب حالته هي تسمم عشان كذا تعرف التصرف او الإجراء المناسب اللي تتخذه تجاهه المريض . وتكون انشاء الله انقذت حياته .

والنصيحه الثانيه المهمه فيه مكتبه فالكليه فيه كمبيوترات وانترنت ، أي درس تاخذه وتحس انك ما فهمته زين او تحب توضح اشياء فيه أنصحك تروح للنت وتدخل اليوتيوب وتشاهد المقاطع التوضيحيه والعمليه للدرس ، لأن طب الطوارئ كله عملي في عملي يعني ما فيه مكتب تجلس عليه وتكتب اوراق او حتى تشتغل على كمبيوتر تخلص معاملات . الدعوه كله ممارسة عمل يدوي .

هذي تقريبا الأجابات وإنشاء الله اني جاوبت لو على شي بسيط من أسئلتكك .

تحياتي للجميع وفالخدمه دائما ♡

[RoyRoser]

بالنسبة للمادة الفارمكلوجي * Pharmacology *

اخصائي الرعاية الطبية الطارئة , مرخص له بانه يصرف ادوية للمريض صحيح ؟
+
الادوية الي تصرفها للمريض بحدود الكم دواء ؟

[أبها]

من ناحية الادويه اللي يصرفها مقدم الرعايه الصحيه الطارئه او الأخصائي للمريض كلها على بعضها ما تجي 7 أدويه تقريبا . ولازم يكون فاهم بالادويه وبالماده لأن فيها مراعاه لنوع المرض والجرعه واذا كان عنده حسساسيه من العلاج او لا . انا من ناحيتي ما اقدر اصرف للمريض اي علاج لاني ما فهمت الادويه زين . عششان كذا انصح تركز بهالماده اذا درستها .

[Rawabii96]

هل في فرق بين التمريض و طوارى ؟