[ جميع التخصصات ] : مهم جداً لطالبات التحضيري :)

[flfl]

// السلام عليكم ورحمة الله و بركاته \\

صباح السعادة و الرضا

أهلاً فيكم أخواتي طالبات التحضيري

و أتمنى لكم حياة جامعية موفقة كلها سعادة :)

عندي كم نصيحة حبيت أقدمها لكم ,

نبداء بسم الله :

أولاً : دراستك و سلوكيك

1. حددي هدف واضح لك مثلاً ( وش تخصصك , تبغين تكملين دراسات عليا أو عَـ طول تتوظفين )

2- أجتهدي قد ما تقدرين في التحضيري (يعني نسبتك لا تقل عن 4,5 أربعة ونص) علشان ترتحين بعدين لأن المعدل تراكمي فأهم شي الأساس .

3. بحكم أن المجتمع الجامعي كبير و كثير عدد الطالبات , ف بتواجهين كل الشخصيات لا تتوقعن أن خلاص بنات جامعة كلهم عاقلين و ما أدري إيش في حركات بزران و حركات مراهقات وفي كل شي ورغم كذا أكيد بتواجهين ناس ذوق تستحق الأحترام.

4- أنتبهي تعاملين الناس على أشكالهم (إذا أنعدم الخُلق فلا قيمة للجمال ).

5- خليك صاحبة مبداء وقيم لا يهزك شي . ولا تغيرين قيمك ومبادءك علشان ترضين الناس ( رضى الناس غاية لا تدرك )

6- دكتوراتك احترميهم , ولو أخطأ أحد بحقك لا تحاولين تجادلينها قدام الطالبات كلميها بمكتبها أفضل لأن لو لا قدر الله حطتك دكتورة فبالها بيضيع مستقبلك .

__________________________________________________ ______

ثانياً : مظهرك وصحتك :

طبعاً لكل وحدة ذوقها الخاص في اللبس بس في شغلات بسيطة لازم تنتبهون لها :

بخصوص اللبس :

أفضل شي تنورة قطن مريحة و النعال فلات أو سبورت الله يكرمكم لأن المسافات اللي بتمشونها طوييلة يعني من البوابة حق الطالبات إلى القسام إلى الكفتيريا طوييييييلة مرررررة و لا تفكرين تلبسين كعب ، و أفضل شي تلبسين تيشيرت أو قمصان رسمية أو سبورت لأن وقت الدوام طويل فالشيفون وذي الخرابيط أبد ما تصلح بحكم أن الوحدة ممكن تعرق و أنتوا بكرامة ، وترى الجامعة داخل في الكلاسات برد مره

بخصوص Makeup :

أنصحك لا تكثرين أهم شي حطي واقي شمس لأن في مسافات كثير بتمرينها تحت الشمس مثلاً بين القسم و الكفتيريا ولو حطيتي كريم أساس وذي الخرابيط بشرتك بتنعدم , و إذا أنتي من النوع اللي مره تحب الميك أب خليه مره ناعم يناسم الصباح و الدوام و الروج ألوانه وردي فاتح و أفضل ما تستخدميه لأن مع مرور الأيام وخصوصاً إذا كنتي من النوع اللي ما تهتم بشفايفها بيصير لونها غامق و بتفقد رونقها فأستخدمي المرطب أفضل

بخصوص العطر :

أفضل شي يكون من النوع البارد يعكس على نفسيتك أحساس الصباح و أنتبهي من العطورات الحارة مثل العودات الثقيلة مره ما تنفع .

بخصوص الأكل :

أهتمي كثير بأكلك قبل كل شيء إذا أكلتي كويس رح ينعكس هذا على نفسيتك و دراستك و صحتك أهم شي أفطري في البيت فطور محترم مش إي كلام لأن راح تستهلكين طاقة كبييرة في يومك الدراسي و أكل الجامعة و أنا أختس عليه ملاحظات

و إذا كنتي من النوع اللي ما يمديها الصباح تفطر في البيت جيبي فطورك معاك طبعاً أكلك الشخصي لا تفكرين تجيبن لصحباتك لأنه ممنوع << إي ممنوع لاتنصدمين .

هذا اللي بخاطري حبيت أفيدكم .

أتمنى أني كلامي كان مختصر وواضح

الله يوفقكم لكل خير

[asoo.b]

جزاك الله خير

[badrya]

مشكوره مره استفدت يعطيك العافيه
طيب فيه بنات يلبسون نظارات شمسيه ولا لا:d

[دلول33]

مشكورة حبيبتي ما قصرتي ...
طيب بيكون لطالبات السنه التحضيرية يوم اوف بالأسبوع ولا لا !؟ :/

[b.saleh]

مشكوووره يعطيك العافيه
طيب بخصوص وقت الدوام من متى إلى متى ؟؟

[flfl]

العفو حبيباتي

- النظارة الشمسية إي يلبسون .

_ يوم الأوف على حسب أذا بيعطونكم جدول جاهز أحتمال فيه أوف و أحتمال لا إما إذا الجدول أنتي تسوينه أنتي حطي الأف اليوم اللي تبغين .

- وقت الدوام بشكل عام من 8 إلى 2 ونص طبعا الساعة 8 تبداء المحاضرات المحاضرة الوحدة ساعة و أربعين دقيقة - و بخصوص الخروج البوبة تفتح الساعة 12 بعد كذا أطلعي عادي لكن قبل الساعة 12 لازم تاخذين أذن من الأمن سالفة وحوسة .

[سارةةة]

مشكورة على النصائح الحلوة يعطيكي العافية

[flfl]

الله يعافيك ~

[Hessa.96]

مشكوره مرا حبيبتي ربي يسعدك افدتينا كثير

[flfl]

العفو :)