[ شعر ] : اذكري لي شي واحد يستحق اقعد عشانه !

[V.I.P.]

المشاركة الأصلية كتبت بواسطة فــ@ــــد الشريــــف

ضاقت وساع القوافي والوعد متن السفينه
للطريق اللي دعاني بعد امان الله وامانه

لا تناديني.. وصوني قلبك الله لا يهينه
لا يراهن في رجوعي لاجل ما يخسر رهانه

ليه ما ارحل عن غرامك بعد ما ذقت الغبينه
اذكري لي شي واحد يستحق اقعد عشانه

قلب ما حن لوصالي.. ماني بحاجة حنينه
واشهد انه ما يعزر بالرفيع.. الا هوانه

الهوي الغدار.. حد الله ما بيني وبينه
والرجل لا خير فيه ان ما حفظ قدره وصانه

واحد مثلي اليا من حدته عوجا سنينه
ما شكي لاقرب بن ادم لو هو اغلي من اخوانه

يوم قلبي ما عصاك وما قدرتي تذبحينه
ليه خنتي فيه وانتي معه من نفس الديانه

كان ذبحي بيدك ارحم لي من اللي تفعلينه
ان طلبتك تذبحيني.. ما ذبحتيني لعانه

كل جرح من جروحي تذكرينه.. تنكرينه
كان مالك في نزيفه يد خانت بالامانه

ينزف الخافق تواضع لين لطختي جبينه
والا انا ما كنت ابيها تاصل لحد الاهانه

قلت من باب الميانه.. صاحبك وتعذبينه
لعنبوك ارخي معاي شوي ما صارت ميانه

طعت عقلك يوم قيل ان العقل بالبنت زينه
لكن الشرهه علي ان كنت احسب انك تكانه

من بعد ما كنت انتي في حشاي اغلي سجينه
بوعدك باطلق سراحك واتهمني بالادانه

وين رايح؟؟ لاي درب ما يرجع للمدينه
ليه رايح؟؟ لان قلبك ما ترك قلبي و شانه

كيف ابنسي؟؟ ربي اللي ملهم القلب السكنيه
مثل ما عانه بقربك لا نوي فرقاك عانه

كان قاسي يجرح اطراف السكاكين السنينه
ما يطيح.. وبنت مثلك حبها هزت كيانه

والا انا خابر خفوقي ما يمد الا الثمينه
وان بغي يغيظ الثريا قعد القمرا وزانه

مزعل لاجلك هنوف رجت قلوب رزينه
وان تهادت بالطريق الجرهدي تزهر جنانه

جادل.. كن الجمال اقبالها كتف ايدينه
والقمر لا شاورت له ينزح وتقعد مكانه

كانت اول من تحكم في فروع الياسمينه
وان تعدتهن ثنتهن خيزرانه.. خيزرانه

بعتها لاجلك وصارت لاصغر اطرافك رهينه
والا هي لفتة هدبها تغمرك ثقل و رزانه

والخفوق اللي تغذي من معزة والدينه
مشكلته انه تعلق في زمن ما هو زمانه

كل ما زادت جراحه واكتشف غلطة ضنينه
صدقيه ان قال ما به شخص يستاهل حنانه

يوم نادي: يا فلانه. ما رضيتي تسمعينه
لين صوت: يا فلانه، يا فلانه، يا فلانه

كنت اشوفك زعفرانه تقرض الورد وتدينه
يمكن اني ما قطفتك بس اشوفك زعفرانه

كنت اهاب البعد عنك واطلبك لا تذكرينه
كان خوفي من الفراق وخطوة الفرقا جبانه

ما اقتنعت ان الخيانه للرجل تلوي يمينه
لين ما ربي بعثك وذقت من طعم الخيانه

اسمحي لي ما بقي فيني مكان تطعنينه
واقبلي من جوف قلبي كل عطفه وامتنانه

والله الله في عذابك بتركك عينك بعينه
دلليه.. ولا يرده عن شقاك الا لسانه

والا انا قررت اسافر وامتطي ظهر السفينه
لانه ما به شي واحد يستحق اقعد عشانه

حامد زيد

القصيده كلها كلااآام كبيييييير وقوي وفي الصمييييم
كبير ي حااامد والكبير الله


ياهلا وغلا بفهد
والحمدالله ع السلامه وربي يتمم عليك .. الصحه والعافيه
وان شاءالله تكون اخر الغيبات ..

نقل راقي مثل تواجدكك

....شكرا لك

[(فـ@ـد)]

الله يسعدكم ويسلمكم جميع

اهلا بحضوركم الجميل واحتشادكم الحميم على متن هذه السفينة الصغيرة


سلمتم لأخيكم

[﹎ нαįαя ♪]

-

واحد مثلي اليا من حدته عوجا سنينه
ما شكي لاقرب بن ادم لو هو اغلي من اخوانه

انتقـــــــاء رائع خـيي فهد , يعطيك العافيــــة








.

[عضو محذوف]

‎وين رايح؟؟ لاي درب ما يرجع للمدينه
‎ليه رايح؟؟ لان قلبك ما ترك قلبي و شانه

‎كيف ابنسي؟؟ ربي اللي ملهم القلب السكنيه
‎مثل ما عانه بقربك لا نوي فرقاك عانه




الله يافهد القصيده جدا جميله ....
تسلم ع الطرح مبدع ...

[ابوغادة]

تسلم اناملك ع النقل رائع دائماً ياكبتن.

[عبقور]

بوعدك باطلق سراحك واتهمني بالادانه

.
من اجمل القصائد لقلبي
اقراها وتمر بمخيلتي ذكرياتها .
دائماً مبدع باختيارك

[أسير نجد]

الهوي الغدار.. حد الله ما بيني وبينه
والرجل لا خير فيه ان ما حفظ قدره وصانه

واحد مثلي اليا من حدته عوجا سنينه
ما شكي لاقرب بن ادم لو هو اغلي من اخوانه



الله الله شو هالجمال والابداع يافهد

سلمت يداااك يالغالي

[غيآهيب]

ذوووق

[нαмαѕαт αℓqυℓσσp]

عميق فعلآ
إختيآر رآقي كـ رقيك
لآعدمنآك

[دانه السعوديه]

في قمة الروعة وفي قمة الذوق 🍂🍃🍂