تخيل لو الحلقة 7 الرد رقم ( 228# )

[نسيم الصبا]

المشاركة الأصلية كتبت بواسطة عبدالله الشّلاحي

يقولون القدر مايستوي إلا على ثلاث وأكيد دامني متزوج ثانيه فأنا مؤمن بمبدأ التعدد

ياترجع الأولى لبيتها مكرمة معززة أو تتسنع الثانية .. والثالثة رآح أقضي معها شهر العسل وأكيد الزوجة الثالثة راح تشوف العبرة وتمشي صح .. ورآح أخلي الزوجة الرابعة ورقة ضغط عليهن جميع ..

وإذا مالي بدوشة الرآس هذي كلها .. والثانية ماتسنعت فتسريح بمعروف للثانية دآم الأولى قائمة بأعمال الزوجية بالشكل المطلوب ..

ردودك بشكل عام تعجبني،بس نجي لموضوع الزواج والتعدد وتنرفزني صراحة..
بغض النظر عن الخطأ في ردك السابق،،بس فكرتك وصلت
طيب اذا الزوجة الأولى قالت لك خلاص دام تزوجت ماأبيك،من باعنا بعناه لو كان غالي..
وخلت لك العيال وراحت لأهلها،وبعد كم شهر تزوجت ، والثانية ماتبي العيال وكل شوي تقول عيالك وعيالك،وبدال ماتصير مريحة البال صارت مزعجة البال بسبب العيال..
ايش موقفك في هالحالة ؟؟

[موج عآلي]

.
.

صـرآحه
حشـف وسـوء كيلْ .. من الزوجـه الأولى ..

عني آنـآ
وبيني وبينكمْ
جت من الله .~ > تفكير شيطاني ,ْ

بدال ما تتعدل هـي .. راحت تزعل ..
في نهاية الأمر هـي الخسـرآنه ,
الرجل موب خسـرآن شـيء ..
وانا مآ تزوجت علشان اكمل حياتي بمشاكل
تزوجت علشان القى راحتي

بعطيـهـآ مهله وبكلمْ امهآ وأبوهـآ ,~
وبقولهم ما تزوجت عليها الا بسبب بعض الأمور اللي فيهـآ ..
واني لا زلت محتفظ فيها علشانها وعلشان عيالها > هذي بحد ذاتها نعمة
يا تجي وتعيش مثل ما كانت معززه مكرمه .. ولا الله يستر عليها .~
دامني متطمن اني ما قصرت عليها بشـي واني حاولت اعلمها وما تعلّمت ما علي خلاف ..
بهالفتره دام زوجتي الثانيه طيبه .. اكيد بتفزع لي مع عيـآلي ..~ في حال اني اخذتهم او جو عندي في أي وقت ..
واذا حلت لي مشكلة عيالي اكيد اني بعطيها عيـوني .. وتنسيني الأولى والثالثه والرابعه ..

رأي قـــآسي > منك لله يـ مُوج ..

يعطيك العآفيه منـآل ..

[حنيِن.]

كيف بتصرف لو إني رجال


أولا قبل ما اعرس عليها أظن اني اعطيتها فرصه تضبط وضعها, وتشوف حل لنفسها
بالنهايه هي حدتني اجيب الثانيه, وانا رجال ادور راحتي,
واذا على عيالي اقدر اشوفهم أي وقت ..


بس هذا مايكون مبرر مايخليني اوضح لها واعطيها اسبابي,
ان تفهمت وضعي واسبابي وتقبلت على عيني وراسي ,
واكيد اني راح اكون عادل بينهم, وراح افهمها اني ماسويت شي يخالف شرع الله
الغلط اللي سويته اني تزوجت بالسر عليها .. واتمنى تسامحني وان رضت وجت معي
مايصير خاطرها الا طيب,
و اذا عيت ومارضت الله معها
الايام ترضيها ...


و بالنسبه لزوجتي الثانيه, حرام اظلمها معي وهي مريحتني ع الاخر
وطيبه والحمدلله مايجي منها قصور
ف اكيد أني بتمسك فيها
بعدين لانها مو مجبوره تتحمل النتايج ...




ويعطيك العافيه منال

[طموح شايب]

“أم العيال ولا مريّحة البال؟”


الحديث ذو شجون
وما فيه أحسن من الصراحة في هالامور


يا بنت الناس مكتوب اني اتزوج الثانية وهذا قضاء الله وقدره
ولا تكرهين هذا الامر لأنه يمكن يحبط عملك
قال تعالى" كرهوا ما أنزل الله فأحبط أعمالهم"
والتعدد أنزله الله على المسلمين
وقال صلى الله عليه وسلم "اذا سألت المرأة زوجها طلاقا من غير بأس فحرام عليها رائحة الجنة"
ومثل ما انتي زوجتي في الدنيا ابيك تكونين زوجتي في الجنة
ولك علي تبقين في مكانتك وقدرك ما ينقص
انتهى .....




...............................
خارج النص


يقولون اذا نويت تتزوج الثانية فتزوج الثالثة بعدها بشهر
عشان يبرد قلب الاولى
وتحس الثانية بقرصة الاولى
وتدري الثالثة انك راعي صملة


"هم يقولون" انا مالي دخل >> والله هم اللي يقولون >>> النحشة يا ولد

[عبدالله الشّلاحي]

المشاركة الأصلية كتبت بواسطة Turki201

موضوع روعة كروعة صاحبته واشكرك كل الشكر على هذي الفكره الرائعة

بخصوص السوال ولو كنت انا في موقف الاب وش بيكون ردي


بقول لاخوي ان البنت مخطوبة لناصر واعتذر منه كل الاعتذار واذا ماقبل اعتذاري اليوم بيقدرني بعدين وبيعرف اني ادور مصلحة وسعادة بنتي على ولده الداشر ههههههه


العادات القبلية ولت وانقرضت او بدت تقل والحمد لله انا همي اشوف عيالي مبسوطين وسعيدين ومستانسين وانال الدعاء بعد عمر طويل لي ... مو يدعون علي وعلى الي كتب كتابهم وزوجهم


وبخصوص الاخ عبدالله الي ذكر انه يفكر بالقرب منه ... انت اذا جاتك وظيفة مرموقة وراتب كويس يبعد عن المنطقة الي اهلك ساكنين فيها منت رايح لها
نفس الشي وانا اخوك اختك جاها نصيبها وبتروح بيتها وبتكون لها امبراطورية صغيره على قدها في بيت زوجها مو في بيت اهلك


وخير دليل اختي الغالية مو في نفس المنطقة الي حنا عايشين فيها والحمد لله والشكر عايشة سعيدة ومبسوطة مع رجلها وعيالها




والله يوفق الجميع

طبعاً الوظيفة تختلف لأني سأذهب وابناءي معي .. لكن ياصديقي لو انتقلت من أجل وظيفة مرموقة بكل تأكيد سأسعى للنقل والعودة وسأعمل على ذلك جاهداً .. إذاً من الآن ساسعى لقربها عندي

المشاركة الأصلية كتبت بواسطة king of silence

الخطاء كان من البداية .. وهو الزواج بالسر
لا يوجد رجل بمعنى كلمة رجل يتزوج الثانية بالسر .. ( ليش تقدم على خطوة مانت بكفوء لها ) ؟

ايش يمنع قبل لاتتزوج تقنع الأولى بزواجك وتبين لها تقصيرها .. وترضيها !! .. مالومها لو سمعت الخبر من غيرك ومشت وتركتك .. لأنه يعتبر خبر مفجع لها كما لو أنها سمعت بوفاتك ( والأخبار المفجه يكون وقعها في النفس اقوى ) .
كنا زمان نشوف هالكلام في المسلسلات المصريه ونضحك عليهم .. وبالسنوات الأخيره بدأت تنتشر هالظاهره في مجتمعنا تحت مسمى ( زواج المسيار ) .

نصيحتي لهذا الشخص ( ماني بقايل الرجل ) بأن يصبر على زوجته الأولى شهر شهرين ثلاثه .. سنه !!
واذا اصرت على الطلاق بعد سنه .. يطلقها ويرتاح ويكون ريح ضميره

واذا رجعت !! ( عسى الله يعينه )
ولا لك إلا الصبر وش وداك له ؟

شكراً منال

الكنق رجاءً لاتزعلنا حنا حقين الزواج بالسر .. جيب الحق حكمت علينا بدون سبب
ولا ع شانك مدير رآح نسكت
هههههههه

فعلاً الزواج بالسر إلى متى سيطول في الأخير سيكشف .. لكن أعتقد أن بعضهم المقصد منه أن لايغامر قبل التأكد من نجاح الزواج وأرتياحه له وإذا نجح أعلن وإذا فشل يادار مادخلك شر لامن شاف ولامن دري ويرجع لبيته سالم غانم دون أي خسائر تذكر

المشاركة الأصلية كتبت بواسطة صَعب

نؤمن بهذه العبارة ويمنعنا عنها الكثير ,,

المشاركة الأصلية كتبت بواسطة نسيم الصبا

ردودك بشكل عام تعجبني،بس نجي لموضوع الزواج والتعدد وتنرفزني صراحة..
بغض النظر عن الخطأ في ردك السابق،،بس فكرتك وصلت
طيب اذا الزوجة الأولى قالت لك خلاص دام تزوجت ماأبيك،من باعنا بعناه لو كان غالي..
وخلت لك العيال وراحت لأهلها،وبعد كم شهر تزوجت ، والثانية ماتبي العيال وكل شوي تقول عيالك وعيالك،وبدال ماتصير مريحة البال صارت مزعجة البال بسبب العيال..
ايش موقفك في هالحالة ؟؟

دام تعجبك ردودي اعتبري كلامي الأخير كلام جرايد بس

[Turki201]

في البداية راح اجلس مع زوجتي وام عيالي وافضفض لها مافي جعبتي من امور لا تعجبني فيها واحاول تغيرها علشان يتم هذا البيت متماسك (وابين لها قوة كلمتي علشان تعرف اني جاد في الموضوع )اذا حصل تجاوب الحمد لله كان بها وانتهى الموضوع


واذا لا تتحمل عواقب افعالها والشرع سبحانه وتعالي ماشرع شي الا لحكمة والزواج بالثانية احد الحلول


المراءة بتراجع حساباتها بعد زواجي وبتكتشف انها مقصرة بحق زوجها ومهما كان يجب عليها ان ترجع بيت زوجها وابو عيالها الا اذا فيه عيب شرعي وهذا شي ثاني


وهذا حل جائز ولا عيب فيه والشرع محلل للرجل الزواج بالثانية والثالثة والرابعة

[لوسيندآ]

لاحول ولاقوه الا بالله ..< جاتها ضيق من هالخيال :D


لو بتخيل .. بقول من الاساس الرجل ضعيف والا ليش يروح يتزوج بالسر!
طيب من المفترض انه يتصرف صح .. وفي اسواء المراحل يكلم (حكم من اهلها وحكم من اهله)
والقصور وارد بلا شك من الطرفين ..
في حال مافي اي استجابه .. ولا تغير.. هنا يبدا يصرح بأنه راح يتزوج ..
ووقتها ماعليه لوم .. ولها القرار ..


لكن في حال ماتم ذكره ..
الافضل انها ماترجع الا (اذا تعيش بمبداء عز نفسك تجدها .. وكأن كائن لم يكن)
او الله يباركله في الثانيه والثالثه والرابعه..
وهيه بيجي نصيبها والله يبارك لها ..
وعظم الله اجر (الاطفال )في انانيه امهم وابوهم ..

ارهقني الخيال ي فاتنه

[Dr ʀeнαв]

المشاركة الأصلية كتبت بواسطة Perf Manal

تخيل لـو - الحلقة رقـم (2)
“أم العيال ولا مريّحة البال؟”


تخيل لو كنت رجال متزوج ولك ٧ سنوات وعندك ولد وبنت اعمارهم ٦ و ٤ سنوات
انت تحب عيالك جِدًا لكن زوجتك متعبتك في بعض الأمور وطلباتها واجد وتقصر بواجباتها
حاولت تعدلها وتنصحها لكن مافي فايدة ولا قدرت عليها
ومع الأيام فكرت انك تتزوج على وحده ثانية بدون ماتدري زوجتك الاولى
وعلمت زوجتك الجديدة ان موضوع زواجكم يصير بالسِر
لحد ماتِلقى فرصة وتقدر تكلم زوجتك الأولى بإسلوب حِلو
وفعلا صار هالشيء ومع الأيام اتضح لك ان زوجتك الجديدة تختلف نهائيًا عن الأولى
هي افضل في الاخلاق والدين والتعامل وتهتم بالبيت وتعرف تطبخ وووو
وفعلا ارتحت معها وماقصرت عليك بشيء

مرت الايام وزوجتك الاولى شكت في تصرفاتك لانك صرت تتأخر برا كثير وتكلم بالجوال وأنت مقفل باب الغرفة
لذلك كلفت اخوها اللي في الجامعة يراقبك وفعلا اكتشفوا موضوع زواجك ووقتها انهبلت الحرمة واخذت عيالها وطلعت من البيت
وحلفت عليك مالها رجعه الا لما تطلق حرمتك الجديدة
الآن حرمتك تركتك وراحت لبيت اهلها من شهر
وانت بين نارين ودك ترجع حرمتك الاولى علشان خاطر عيالك خصوصا انهم يقولون لك يابابا نبيك ترجع لنا انت وماما مع بعض
وفي نفس الوقت حرمتك الجديدة مالها ذنب علشان تطلقها : (
كيف راح تتصرف في هذه الحالة؟


بإنتظار تجاوبكم وخيالكم الخصَب

_

شوفي حيآة زوجيَه بدون حَب و احترآم أبد ماهيب نآجحة ..
الرجال ماتزوج على زوجتَه الا وهو غاسلن يده منها 7 سنوآت كفيلَة أنك تعرف الشخص المقابل كويس ..
وأكيد عارف ومتأكد مستحيل يقدر يتأقلم معها أو يحبها ..
#ان طلق الثانيه ورجع لها بيظلم نفسَه " لانه مش مرتاح معها , وبيندم كل يوم ويتحسر ع طليقته "
وبيظلم زوجته الثانيه " ممكن تكون نصه الثاني , ودامها ماهيب مقصره معه "
وبرضو بيظلم زوجته الاولى "راح يملأها الشك كل مره يبطي أو يتأخر , راح تحس بالجرح كل مره تكون فيها معه ... الخ "
وبيظلم عياله "كونهم بيعيشو في بيئة مليانة مشاكل لا منتهيه "

لذلَك : السالب مع السالب بيتنافرون , والموجب مع السالب بيتجآذبوَن ..
يطلق الأولى ويظل مع الثانيَة والعيال دامه حريص عليهم أكيد بيوفر لهم كل سبل الرآحة
سواء كانو عنده او عند امهم

[ريمنقو]

-


لو اني بمكانه ما اتخذ قرار الزواج بالثانيه أصلا
والامر هين (تقصير زوجه) اقدر بكل الطرق احل الموضوع دون ان اخسر استقرار بيتي

قرار الزواج بالثانيه او الطلاق ربما يكون حل للطرفين ولكن مضرته كبيره على الأبناء
فمايهمني هنا هو استقرار ابنائي نفسيا واسريا وابتعد عن اي حل يشتتهم ويعيشهم بصراعات نفسيه

[Dr ʀeнαв]

المشاركة الأصلية كتبت بواسطة ريمنقو

-


لو اني بمكانه ما اتخذ قرار الزواج بالثانيه أصلا
والامر هين (تقصير زوجه) اقدر بكل الطرق احل الموضوع دون ان اخسر استقرار بيتي

قرار الزواج بالثانيه او الطلاق ربما يكون حل للطرفين ولكن مضرته كبيره على الأبناء
فمايهمني هنا هو استقرار ابنائي نفسيا واسريا وابتعد عن اي حل يشتتهم ويعيشهم بصراعات نفسيه

_

هو متزوج ومخلص وانفضَح والكل درَى , تخيلي نفسَك نمتي وقمتي ولقيتي كل هالاحدآث
عندك لحيه وشنب وزوجه زعلآنه تبي الطلاق والثانيه تحتريك وعيالك يقولو تكفون لاتتطلقون

والا الصدز اكيد محد فينا بيفكر بالزوآج بالسر