بحكي لكم ..
في كل فترة من الفترات المتباعدة بهالزمن ,
تمّسك مع مخي اسئلة وجودية على اسئلة وهمية على اسئلة مالها اجوبة
وفي بعض الأوقات اطلق السؤال اكتبه بالدفتر عندي , او بالملاحظات ..
وتجيني اجابته إما في بوست او منشور
او وجهة نظر اسمعها , او بودكاست اياً كان اهم شي الإجابة تأتي ..
إلا هالسؤال مالقيت له إجابة
حتى كتبته بالتويتر إلي اكلم نفسي فيه ماجاتني الإجابة
علموني انتم
إن كان فيه احد يسمعني ..
هل حب البعض يعني حب الكل؟
صباح التفاح يإلي دخلتوا قلبي من دون مفتاح
اليوم صحيت من النوم وفي بالي طعم قهوة ومو اي قهوة ..
قهوه لها شروط , من أهمها :
1/ يكون الدفع وانا من السياره ما انزل .
2/ يكون طعمها زي طعم القهوة إلي شربتها في مكينة مطار الطائف ..
ولما رجعت ابغاها طلعت خربانه
مدري من خربها .. بالله احد يرفع خطاب لمطار الطائف يصلحون المكينة هذيك
وربي يا كان عليها طعم .. يخليني اعتمر واطوف مرتين من قوة الصحصحة
ولله الحمد وجدت ضالتي ولقيت وحده تشبهها
أشرق وكأن الكون كلة لك
التعديل الأخير تم بواسطة وينك يابوي ; منذ 3 يوم الساعة 09:43 AM
أمس خشيت الملتقى عشان أقول سالفة صارت لي يوم السبت ,
عشان اخلّدهاااااا
لأنها طيرت عقلي ولم اجد لها تفسير
الأسبوع إلي فات كنت ماخذه كورس ب اكاديمية اثراء .. تمام
نهاية الكورس بيكون فيه تطبيق عملي على المفاهيم إلي تعلمناها ,حلو
وأمام ضيوف وهذولا الضيوف بيكونون اول مره نشوفهم , مانعرفهم .
(يوم الجمــــــــعة )
جاء اليوم المنشود وجاو الضيوف وعرفوا على انفسهم ..
انا واقسم بالله ماركزت على اسمائهم , انتبهت لخبراتهم وش يشتغلون ,
خلصنا من التطبيق ومضى بسلام ..
وكلت مع اختي بيتزا وشربت كولا دايت مع ليمون وغنيت مع بنات خواتي لميامي ورجعت البيت ونمت
(يوم السبــــت)
اشرقت شمس يوم السبت وكنت نايمه نومه عميقه ,
وصحيت وانا اردد اسم
يعني حسيت بنفسي وانا نايمة واردد الاسم
والله انصعقت وخفت وانخرشت وكلها بوقت واحد
ميين هالأسم ؟ وليه صحيت وانا اردده .. علماً إني ما اعرفه
و ايش يعني هالتصرف وإلى ماذا يدل ويرمز
من الخرشة كتبت الاسم بالتويتر ( محمد الحمود ) مدري ليه يعني
طلع لي حساب صحفي بصحيفة مكة / انا اساسا اخر جريدة قريتها بحياتي ايام المتوسط
سحبت ع الموضوع ..
في الليل قبل انام تسولف معي وحده من البنات الي بالكورس
عن كواليس الكورس .. لاني طلعت بدري , زي ماتعرفون كنت ابي اكل بيتزا
ومع الحوار والحديث قالت : محمد الحمود مهتم بفكرة فاطمة الي قدمتها يوم الجمعة
قلت ميييييين ميين محمد الحمود هذا جاء بالكورس من ضمن الضيوف ؟
قالت ايييه هو صاحب كذا كذا / انا هنا تذكرته
عاد ماخليت السالفه بخاطري ,
رحت قلت لأختي الي كلت معها البيتزا عشان تعطيني تفسير ,
صرفت لي انه عقلي الباطن خزن الاسم بشكل لاوعي وردده .. قلت ماسمعته
/ قالت عقلك سمعه
لا اخفيكم اني بغيت ادهّر اكثر وارسله بالانستقرام
عسى ماشر أ. محمد صحيت من النوم وانا اردد اسمك إلي ما اعرفه تبغى شي
-
شكر خاص ورسمي وبرقية عاجلة أرسلها مع عشرين ذبيحة
للأخ صاحب معرف قعناص عشانه قيمني واكتشفت ان فيه احد يقرأ هنا
بعد مرور اكثر من سنه عن التقييم وهجران الاصحاب وثبات النقاط
اكتشفت ان لسة تونسني سالفة النقاط إذا زادت
يالله استأذكم نرجع للعمل والحياه , إذا قيمتوني ولا جاتني طاقة كلام زايده جيتكم
تدرون من بداية شهر 8 وانا كلامي الكتابي زايد
التعديل الأخير تم بواسطة وينك يابوي ; منذ 2 يوم الساعة 01:43 AM
2024- 7- 9
.gif "(115)")
.gif "(202)")
,
