؛¤ّ,¸¸,ّ¤؛°`°¤ صـوره و نـقـاش ¤°`°؛¤ّ,¸¸,ّ¤؛ - [ التعصب الجاهلي ] ص25 -

[درع الجزيرة]

الغش أنا أذكر غشيت في أول ثانوي في الفيزياء وبصراحة شعور لاينوصف مع إني مذاكر بس اللقافه كتبت القوانين في ورقه وصورتها وصغّرتها ويوم دخلت الإختبار ضيعت اللي مذاكره وأطلع البراشيم والمراقب شايفني ومادريت عنه وشوي الا المراقب سحب ورقتي وصفر في الإختبار ونجحت بالنظام اي مادة غير العربي والدين إذا كانت مادة واحدة ينجحونكـ ومرة في الإنجليزي ماغشيت الا التعابير والمدرس محدد لنا ست تعابير وأنا مبرشم خمس قلت أكيد بيخيرنا بين تعبيرين وتفاجئت بتعبير واحد فقط لاغير وهو التعبير اللي مابرشمته ودخل المدير وقال ياشباب اللي معه براشيم يطلعها وأنا أطلع وأعطيها المدير
هذي كلها في أول ثانوي الله يغفر لنا
مع إني كنت ممتاز من الإبتدائية الى المتوسطة وبعدين نزلت لجيد جداً في الثانوي

اللي يغش الله يهديه يضيع عليه الوقت خاصة اللي يتلفت اسمعوا في أول سمستر وفي قاعة الإختبارات فيه واحد أول يوم خلص قبل نصف الوقت قلت ماشاء الله هذا اللي مذاكر صح واليوم الثاني نفس الطريقة قلت ماشاء الله والإختبار اللي في آخر يوم خلصت أنا قبله وطلعت وإنتظرته ويوم طلع قلت له ماشاء الله عليكـ شكلكـ تذاكر أول بأول ويطلع البلاكـ بيري ويقول هذا اللي يخليني أخلص قبلكم يغش من البلاكـ بيري وفيه ناس يغشون من الآيفون الله يهديهم وش تقول لهم كلهم يعرفون إن الغش حرام ولاخليته نصحته وقلت له يمكن تنجح وبمعدل جيد وبدون غش ويوفقكـ الله قال جزاكـ الله خير

[تشتيتي مركز]

الغش ... هههه

هي مره وحده اللي قررت اغش .. واشش الفصل كله معي ..
كان عندنا مدرسه مصريه .. >> دايم كذا شكله ..
المهم حطت الورق حق الامتحان وراحت تكلم احد عند الباب ..
واجي طالت عمرتس واسرق الورقه واحله كله واوزع الحل على الدوافير اللي مثلي
ونحل وبدقيقه نسلم اورق .. ويوم صار من بكرا وتجي الاستاذه معصبه .. انا احسبه اكتشفت ...
بس طلع معصبه عشان .. كلما اخذنا صفر واطلقنا اخذت 1 ..

عقبها ما كررت المحاوله .. حسيت انه فن ما يتقنه الا ناس محترفين خخخخخ ..



نجي للجد .. صراحه وباختصار .. اذا الواحد عرف ان الغشحرام وان يتطور الوضع لندخل في حدود مصدر الرزق الحرام .. هنا يكون فيه قناعه ان الموضوع ما يسوى .. والبعد عنه خير وبركه ومن ترك شي لله عوضه الل باحسن منه ..
الظاهره للاسف احيننا تصل للتفاخر .. وان فلان بطل قدر يغش .. وش عليه ابطوله ..
نحتاج لطريقه توعويه اكثر تاثير على اطفلنا لاقناعهم ببشاعه الغش .. ولنقضي على مبدا انه شي حلوو ولكاعه ومدري ايش ..

ملك الموضوع يطول الحديث فيه .. لكني مضطره اختصر للاسباب اللي انتي خابره ..
احسنتي الاختيار تحياتي لكي ..

[Ệliẑaḇễṱĥ]

الحمدلله ماقد غشيت اثارينى عاقله << ماتقصد تشتيتى ابد < دوعابه يافتاه
بصراحه ياملوك من وانا صغيره امى الله يحفظها عودتنا على طرق دراسيه صارمه واسست فينا ان الغش
حرام حتى اخوانى وهم عيال ماقد تاثروا بخوياهم الحمدلله صدز فيهم اللى رسب بس مافكروا يغشون
انا مره وحده صار لى موقف عن الغش وانصدمت من حفظ ربى
قبل كنت ادرس انجليزى انتظام بالكليه وعندنا ماده اسمها صوتيات لازم تدخلين المعمل وتستمعين
لنطق الحرف وتستخرجين رمزه وهيك اشياء طبعاً هذا اختبار اعمال السنه يعطون 5 كلمات
انا حليت 4 وفهيت على الخامسه شكيت بين رمزين جنبى عاد فى اللاب وحده الله يهديها ان شاء الله
من ناس غير [ عاد افهمى ] ما ابى اصرح ويتقفل الموضوع
كانت تحترمنى كثير وتقدرنى لان تعاملى معاها رسميه واذا شفت منها خير اقابله بخير ,,,’
المهم البنت ذى دافوره ماشاء الله وخلصت بدقيقه لتفت على واثاريها شافت ورقتى انى مدقره بكلمه
قامت نزلت ورقتها من تحت الطاوله وحطتها على رجلى عشان انقل انا ياحليلى متكيه على الطاوله على بالى طاح منها شى ومدنقه تاخذه يوم نزلت راسى وشفت الورقه على رجلى ربى عمااااااانى عنها وقسم بالله
شفتها بيضاء مافيه ولاكلمه الا قلت بصوت عالى لا لا بغت تسمعنى المعيده البنت انخرعت وسحبت ورقتها شكلها قالت ذى فيها جنى المهم يوم طلعنا قلت لها لاعاد تسوين هالحركه معى مره ثانيه
بس سبحان الله كنا بالتحفيظ المعلمه تعزز عندنا الثقه سبحان الله ومنزله المراقبه لله
توزع علينا الاوراق وحنا تقريبا 50 طالبه بالحلقه وتطلع ولا عندنا احد والله ما احد يرفع راسه ويسال الثانى
والا يطالع بورقته وكلهم ساكتين كن عندنا مراقبه واقفه علينا
معلمتنا الثانيه تقول انا كنت ادرس قبلكم هنا وكانت وكيله المدرسه مدرستى فلما توزع الاوراق تطلع بس
كاتبه فى اعلى الورقه الايه الكريمه [ يعلم ُ خاينة الاعين وما تخفى الصدور ] تقول والله ما احد يرفع عينه خجل
من الله - الله يذكرهم بالخير مدرساتى اشتقت لهم بجد اهتموا بالايمانيات واعمال القلوب الله يجزاهم الجنه ..,’
يسلمو ملوك على الموضوع اللى جاء بوقته

[درع الجزيرة]

شكراً لكـ اختي الكريمة ملاك الغامدي على مثل هذه القضايا

انا أعرف واحد يعرف واحد يعرف واحد

لاجد تخرج ممتاز وبالغش له كم سنة ولاحصل وظيفة الله يرزقه ويرزق المسلمين والمسلمات ولايبحث الا عن الرّاتب العالي وإذا نصحه أبوه يقول له توظف لو بشركة بـــ2000 ريال يقول ممتاز وآخر شئ 2000 ريال واللي متخرجين معة توظفوا وترقوا ورواتبهم ماشاء الله تباركـ الله ويحتمل والله أعلم أنها بسبب الغش وهناكـ من توظف وهو غشاش ولكن الله يبتلي عبادة ليرى منهم شكر النعمة والصبر

والغش في الإختبارات وكذلكـ مثله الغش في السلع وكذلكـ في المشاريع كلها سنسأل عنها

عفا الله عما سلف الله يرحمنا برحمته ويغفر لنا ويغنينا بحلاله عن حرامة

[دوحه غَنّاء]

مره كنت طالعه مع واحد من اخواني


ومرينا بــ أحد الاحياء


قال اخوي الله ذكريات يوم من ايام الاختبارات جيت هنا





قلت له ليش؟؟


قال نشتري اسئله


قلت ويحك ياغلام

تدري ان مسألت شرائك للأسئله قد تدخل في الرشوه


قال الله يغفر لنا عاد ليتك تدرين


شريت الاسئله وجيتك فازع اصورها واوزعها على اصدقائي


واسوي لي برشومه


قلت بعععد :hahahahaha h:


ما يكفي ان الاسئله معك

قال والله تعرفين نتعيجز

قلت لا والله تقليد

قال المهم اني برشمت و ما قدرت اغش بالاختبار

يقول ما جتني شجاعه اطلع الورقه المدرس سعودي و عيونه رادار


وقعدت اخر واحد على وعسى لكن المدرس كان صااامل وقالي لاااا








هو كان بمدرسه خاصه ومدلعييييينهم على الاخر

واسئلة المراجعه شبه اسئلة الاختبار بس ما يقتنعون

واغلب المدرسين أجانب

وهم اكثر من كان يبيع الاسئله

[Abu ali55]

الله يعطيك العافيه اختي ملاك على هذه القضيه

وبصراحه استمتعت بمشاركة الاخوان والاخوات بارك الله فيهم ...

وللغش سوالف وحكايات الله يعفى عنا ايام الثانوي لاكن سبحان الله ما قد غشيت بماده الا يا ساقط هههه او ناجح بالدف,,, واخبر مره تهورت ودخلت معي جهاز تسجيل صغير معلقه بالسروال فيه كل الملخص بصوتي بعد والله كل ما اتذكر اقول وين عقلي انا ,, لاكن الحمدلله عدت سلامات وتوبه ان شاءالله من الغش وطريقه الله يغفر لنا ,,, لاكن ما نلام صراحتاً ماكان فيه اسلوب من المدرسه او المدرسين يبين لنا وش معنى الغش سواء في دراسه او غيره بأسلوب ديني يقدر يقنع شباب في في مرحلة مراهقه ويحتاجون نصح دائم بأفضل الطرق ,,, كل اللي اتذكره كلمة اللي بنصيده يغش ساقط ,,, او اللي يغش راح نرفع اوراقه للوزاره ونعلم ولي أمره ... وندبس سرواله او فنيلته اللي مبرشهم عليها بالمحظر,,, سلامااااات


واخيراً نتذكر قول رسولنا الكريم عليه افضل الصلاة والتسليم (من غشنا فليس منا)


واسمحولي هنا ان انقل لكم قصه عن نبينا الكريم صلى الله عليه وسلم

كان النبي –صلى الله عليه وسلم- في السوق ليشتري ما يحتاجه، فاستوقفه منظر كومة من طعام –جاء في المستدرك أنها من الحنطة- وقد عرضها صاحبها للبيع.
ومن النظرة الأولى أُعجب النبي –صلى الله عليه وسلم- بالطعام فهو يبدو فائق الجودة والنضارة، لكن الفحص الدقيق يُظهر ما كان خافياً، فقد أدخل النبي عليه الصلاة والسلام يده الشريفة إلى تلك الكومة فإذا بها مبتلّةٌ على نحوٍ يوحي بقرب فسادها.
استدار النبي –صلى الله عليه وسلم- إلى الرجل، وألقى إليه بنظرةِ لائمٍ وأتبعها بسؤال المعاتب: ( ما هذا يا صاحب الطعام؟ ) ، فأطرق الرجل رأسه في خجل وقال: ": أصابته السماء يا رسول الله"، وكأنه يريد أن يعتذر عن فعلته ولكن بما لا يُعتذر به، وأن يُبرّر موقفه ولو بأقبح التبريرات، كل ذلك محاولةً منه في تخفيف غضب النبي عليه الصلاة والسلام وعتابه.
لكنّه رسول الله، ومعلّم البشريّة، ومتمّم الأخلاق، ما كان له أن يتغاضى عن موقفٍ كهذا، وليس الموقف موقف مجاملات أو صفحٍ عن خطأ فردي، ولكنّه أوان ترسيخ مبدأ عظيم يحفظ حقوق الناس ويصونها من العبث والتدليس: ( أفلا جعلته فوق الطعام كي يراه الناس؟ من غش فليس مني)

[sadeem_5]

موضوع شئ شئ وشكراً زوز ع الأحم

وكلش يوم قلتي يمممى الله يرجتس انا مَ صدق تطيح عيني بالغلط ع ورقة اللي جنبي > دعابه

وملوكه ربي يعافيك دووم كيذا

وأول مرا ألحق عـلى قضيه

أحم لــي سوابق مع الغش

أستغفر الله يَ رب لاتعاقبني

بس أنا بالأنقلششش ميحححححححححح عرفتوا المييحح ميححح
وكنت بـ أول ثانوي وكان علينا إختبار إنقلش > وكنا نظام مقرارت يعني الأنقلش مووت

وأنا ذاكرت اللي قدرت عليه بس كنت عارفه أني بجيب العيد ذاكرت ولا مَ ذاكرت

المهم أستغفر الله كنت معلقه بـ مقلمتي ميداليه وفيها أوراق صغار وعليها أذكار > شوفوا اذكار وأغش

وكانت مغلفه تغليف حراري يعني أقدر أفتحها من النص وأكتب براشيم والأوراق من برا مَ فيها شئ

طبعا كتبت كلمات الأملاء الـ 20 كلمه > أضمن 10 درجات
وكتبت التعبير والحمدلله جابته >لأن أعلى الدرجات ع التعبير والأملاء
وقالت لي وحده من البنات إذا تبين مساعده بالقرامر دقي كرسيي برجلك ~> تعاطفاً معي فقط لا غير

بس الحمدلله مَ أحتجتها
> وبالنهايه التيشر عرفت أني غاشه > لأني مَ نقصت ألا درجه >تفووو مَ شاء الله عــلــي
بس تدرون عرفت وعادي وقالت الله يوفقك ولا تعيدينها> لو مَ أنتهينا من التصحيح ورفعنا الدرجات كان رحتي بـ خبر كان >
و عندنا أبلـةة العربي قــبل وربي تغششنا تمر ع البنات واللي مَ تعرف تقولها
ووو أي بعد السمستر اللي طاف أنا والشله ناوين نغش

بس للأسف القاعه مليانه مراقبات > بتنطرد من الموضوع >


بس والله جد تراني مَ أغش يومني بالثانوي الا بالانقلش وقسم بس الانقلش

وبالنسبه لـ زوز بـ إختبار قالت لـنا الأبله أنا مابراقبكم وكل وحده تراقب نفسها وتذكر مراقبةة ربي لها

وحلووا > وبـ تصرفها هذا قلييييييل غشوا ولا قدرنا بـ الأساس نغش وربي أستحينا

لأنها ذكرتنا بمراقبـةة الله عزوجل لنا قبل مرراقبتها > لو يتخذون هالأسلوب بالتعامل

المهم أقول الله يغفر لنا ويهديــنـا

والواحد قبل لايغش يتذكر مراقبةة ربي له > لي وجه أنصح بعد

بس جد أتكلم

الواحد يثق بربــي أنه حتى لو ماذاكر ربــي بيوفقه وبيجيب الفل مارك ويتذكر من ترك شئ لوجه الله ربي يعوضه >
والله تحسوون برررراحه و أن ربي بيعينا ويساعدنا بس نترك الغش لـ وجه الله وسبحان الله ربي يعوضنا بـ أعلى الدرجات >

بس أحسنو الظن وخلوا الثقهه بربي كبيررره وترون العجب

والله يوفقني وإياكم وويهدي اللي يغشون


اي صح كلمه أخيره

بليز من بتختبر بنفس مقر أختباري > لزوم تضبيط العلاقه

> مجرد دعابه دعابه وربي

والله يعطيكم العافيه أعطي المايك للي بعدي

[Ệliẑaḇễṱĥ]

^
العفو سوس
تدرين تذكرت العام بالقاعه يوم نمتحن مبادى الاداره وانت وراى يوم ماشاء الله عليتس مدهره بالحل
عينى عليتس بارده
لبى قلبتس ينفع اضبط العلاقه انت عارفه كل سمستر نختبر سوا بس شكل هالسمستر
انا بقاعه وانت بقاعه الا بالمواد العامه
اوما مداليه اذكار وفيها براشيم ماتركب يابنت العم
عجبنى كلامتس لا فوض فوك
الله يرزقنا خشيته فى السر والعلن ..,’

[₪ حـكـاية روح|~]

انتوو وردوودكم .. يبي لكم وحده مروقه .. وتشرب حليب جلكسي لجل ترد > ام الروقان

>> اما الحين فـ الروقان رايح يمين .. وانا رايحه يسار

تصبحوو ع خير > نام بكير واصحى بكير .. وشوف الصحه كيف بتصير <

[برق الحيا]

موضوع جميل ملاك
انا اذكر موقف اتفقنا مع واحد من الشباب وكنا بالثانويه اختبار انجليزي وهو جيد
نجي بدري الصباح ونحجز لسيارته موقف قريب مرة عند شباك قاعة الاختبارات
بوقت الاختبار نحل الي نقدر عليه وبعدين نوقف نستناه يحل بسرعه ويطلع ويركب السيارة المدير يشوفنا واقفين يقول ياالله بسرعه حلو لاينتهي الوقت
متفقين معه طبعا واحنا عارفين اسئلة صح وغلط تبي تجي كثيرة
يقوم هو يدق بالمنبه (البوري) دقه طويله يعني انتبهو
عاد احنا متفقين دقه وحده الجواب يكون صح ودقتين يكون غلط
كانت حركتنا وحدة بالحل والمدير معنا بالقاعة ولاقدر يسوي شي

يوم وقف قمنا كلنا سلمنا ورقة الاجابه والمدير طايرة عيونه