حليمة و الهيئة و المعرض و المغازل ..

[أدمنت حبك]

هلااااا

همي أشيل همك ..

الله يسمع منك ,,:praying:

بس المشكلة أن ( بعض رجال الهيئة ) مثل ما تقولين مصخووها,,

و السؤال : إلى متى بس ما بيتعدلون و يتعاملون بشكل حضاري؟؟

تحياتي: أدمنت حبكــ..

[محمد القحطاني]

حياك وبارك الله فيك
انا لم اقل لك انهم على صح فيهم الي كانت اكبر داشر وتطوع عربجي بالاساس انا اطالب انه رجال الهيئه يكونون على عل مستوى بكاليورس شريعه واصول الدين
اما الخوف انا عايش بالرياض ماحصل لي الي تقوله الحمد لله امشي بطريقي ولاحد تعرضني حضك طبيبت بناس مو رجال هئيه رجال عصابات حسب مافهمت من كلامك عنهم خيل لي انهم رجال عصابات
بخصوص سوالك هي ترسبات عقليات حصلت لها مشاكل بسبب مرادهم الفحش
من كشف مصانع الخمر من كشف بيوت الدعاره؟ من غير رجال الحسبه وفقهم الله
بخصوص الرجل ههههه هذا اتحدى ان يكون هو ورئيسه عندهم متوسط بس
انا كرجل عندي قليل من العلم بالدين اقول انتم يالاثنين يارجل الهيئه ورئيسك انتم جله لابد ان يعاد تعليميكم
بالاخير راي خاص فيني ولااريد اجباراك به
طلن يطرح رايه فقط
شكرا لك واعذرني باضل احاوركم الى ان نصل لحل وسط

[جامعي]

سلام عليكم أخباركم....

عندي تحفضات كثيرة على الهيئة .. طبعا لا ننكر أن لها دور في حفظ الأعراض وأبرزها قضايا الأبتزاز..

ولاكن يوجد تشدد مبالغ فية وكأن الأصل التهمة وان الناس متهمون حتى يثبت العكس وقد كانت الأخت المثقفة

حليمة في كامل حجابها وحشمتها وكذالك بقية المثقفين رجال ناجضين عقليا وليسوا شباب مراهقين... الله يهدي الجميع

[ياطيييوب]

شكراااااااااا ع الموضوووووووووع

[طفلة البحر]

الف شكر ع الموضوع

[أدمنت حبك]

هلااااا

محمد القحطاني

و الله انك جبتها ( رجال عصابات ), يعني تخيل مجموعة ماشية بذاك ( الجيب ) و كل من شكوا فيه مسكوه و طقوه,, و تخيل نفسك مكان هالمواطن اللي اعتدوا عليه قدام مجمع تجاري في الرياض بدون أي سبب وش بتقول عن الهيئة ؟ و القصة منشورة في جريدة الرياض على هذا الرابط..

http://www.alriyadh.com/2009/03/19/article416922.html

لااااااا و المضحك المبكي أن المواطن اشتكى على الهيئة ( الجهة الحكومية ) عند الشرطة ( الجهة الحكومية الثانية )

و أتمنى كل من يقرا قصة هالمواطن يعطينا رايه ..

عموما أنا أتفق معك أن كثير منهم محتاجين إلى إعادة التعليم من الإبتدائي و حتى الجامعي..

و ما أعتقد ان احنا بنوصل إلى حل وسط لأن موضوع الهيئة طويل و شائك, لكن يكفي ان احنا متفقين على بعض النقاط..

هلاااااا

جامعي

أتفق معك و ذكرت هالشي من قبل أن الناس عندهم متهمين حتى تثبت براءتهم..

عموماً أنتوا الاثنين ذكرتوا نقطتين محيريني من زمان مصانع الخمور و بيوت الدعارة و قضايا الابتزاز..

أنا بس أبي أفهم وش دخل أم الهيئة في قضايا مصانع الخمور,, يعني وين دور مكافحة المخدرات ؟؟ و الا اختصاص مكافحة المخدرات كوكايين و هيروين فقط و العرق من تخصص الهيئة ؟؟!!

و أبي أفهم وش دخل أم الهيئة في قضايا الابتزاز و بيوت الدعارة ؟؟ و ين دور الشرطة ؟؟ و الا اختصاص الشرطة قتل و سرقة فقط و كل ما يتعلق بالجنس و النساء فهو من اختصاص الهيئة ؟؟!!

و بعد وش دخل الهيئة في المجمعات التجارية المغلقة , يعني وش دور رجال الأمن ( السكيورتي ) ؟؟ هل تخصص السكيورتي الطق و الهواش فقط و المغازل من اختصاص الهيئة ؟؟


و مثل ما ذكرت في هالموضوع تدخل الهيئة في معرض الكتاب اللي من اختصاص وزارة الثقافة ..

طيب ليش ما نسكر مكافحة المخدرات و الشرطة و وزارة الإعلام و إدارات المجمعات التجارية و نخلي الهيئة تقوم بكل الشغل دام انهم حاشرين خشومهم في كل مكان و نسميها ( السوبر هيئة ) ..

و بعدين دام انهم يتدخلون في كل هذي الأشياء وينهم ما سمعنا عنهم يوم العالم كله نزل أسعار السيارات الا وكلاء السيارات عندنا زادوا الأسعار ليش ما راحوا يأمرونهم بالمعروف عشان ما ينهبون فلوس الناس دام وزارة التجارة ما قدرت عليهم ,, ليش خلوا حملة ( خليها تصدي ) تقوم بالدور,, و الا خايفين من الوكلاء بعدين ما يعطونهم ( جيووب ) ؟!!

تحياتي : أدمنت حبكــ..

[أدمنت حبك]

هلاااااااا

ياطيييوب

طفلة البحر

و ألف شكر على المرور اللطيفــ..

[محمد القحطاني]

ادمنت ارى من خلال ردودك انه لك مشكلة كبيرررررررررررررررره وسوابق لدي الهيئه هذا الشي قد اكون مخطي
انا يامحاكيك خبره مشاكل والله لايرد ذيك الايام كل يوم يومين هوشه بالشرطه تلقاني حتى صار العسكر بالقسم يقولون انت شكلك حالف الا تمسك معنا خفاره
انا انمسكت في الهئيه طبعا ماصليت جالس نصحوني اربع مرات طبعا ابشر ويروح ويرجع وانا جالس طبعا قام قال قم صل قمت نفخت عليه وقلبت هوشه بجد لانه وقتها ابوي وهو ابوي ماكان يقول لي كلمة من هبال وهياط براسي مو خفوو مني بس يبي يتفك مشاكل لانه لو تكلم علي او هزئني صدقوني اقلب على خواني اطلع الشارع اقرب واحد اهاوشه ويانوصل للشرطة
طبعا انا نفخت عليه قام ايش سوا مد يده طبعا وعطاني كف مامداه ينزل يده الا الكف بوجهه طبعا تخل الثاني والعسكري وركبوني الجيب وعلى طول للمركز طبعا قالو لرئيس المركز الوضع كذا كذا
طبعا قال خلوه عندي وبس
اول شي قالي ياولدي صلي ونتفاهم بعدها قلت مابي اصلي حر مابي اصلي طبعا ضحك وقال كلمه مابنسها بحياتي قال والله رجل غيرك يصلي لنا وانت ترا ماحد بينفعك وانت الي بتحاسب علينا نصحناك وانت الي بتذوق حر النار طبعا قلت طيب وين دورة المياة الله يكرمكم وضيت وصليت طبعا بعدها رجعت لرئيس المركز
تفامنا قال ياولدي ليه تمد يدك على رجل الهئيه قلت له وهو من اعطاه الحق يمد يده علي طبعا هنا دخل قال نصاناه قام ينافخ قلت مانافخت الا بعد مانت نافخت علي طبعا شدينا شوي المدير تدخل قال كلكم غلطانين قال طيب الان بنصكك بتعهد ورجا لاترجع لي
قلت احترام لك بس اما هذا ماله احترام قال طيب احترمه من احترامك لي
شوفو شلون الفرق بين هذا وذاك
المدير باسلوبه خلاني اسوي الي يبي هذاك عناد ولاسويت شي
لذا لانحكم عليهم جميع ونعمم
انا وانت لسنا نحكم القرارفي من ينفذ الشغله الفلانيه انه الشرطة او غيرها
بخصوص التجاره والتجار هنا اتمنى منك ان تتقى الله
لانه بكلامك اتهمتهم بالرشاوي هذا ظلم وبهتان ميزايتهم من اوقى الميزانيات في الدوله
الرجاء اغلاق الموضوع لسبب واحد انه سوف يزاد في اتهام رجال الهئيه
ملحوظه احس ماثر فيك فكر جريده الرياض التي لااطيقها لانها ذات فكر غير سوي

[أدمنت حبك]

هلاااااااا

محمد القحطاني..

أولا مثل ما قلت لك أنا و لله الحمد ما صار لي أي موقف شخصي مع الهيئة غير الموقف اللي ذكرته مع هنود الكفتيريا

أما مشكلتي مع الهيئة فهي مشكلة كل مواطن يرفض الشك في نزاهته و نزاهة أهله و حريمه مثل ما صار مع المواطن اللي شفت قصته على رابط جريدة الرياض

ثانيا .. بالنسبة حق قصتك فاسمح لي أولا أهنيك على شجاعتك و ردك على اللي غلط عليك ..

أما الرئيس اللي تقول أن تعامله الجيد خلاك تسوي اللي يبي , فأنا أشوف أنه حتى هو غلطان .. ليش ما يعلم هالأخلاق و التعامل للناس اللي تحته,, ليش ما يعطيهم دورات في السلوك الحضاري قبل ما ينزلهم للشارع و يحتكون بالناس ؟؟!! ..
ليش ما يعاقبهم إذا غلطوا على خلق الله ؟؟

لكن مثل ما يقول المثل ( من أمن العقوبة أساء الأدب ) و هالناس لو وراهم أحد يحاسبهم على أغلاطهم ما كان صارت هالمشاكل ..

ثالثاً .. أنا عارف أن توزيع المهام بين الجهات الحكومية لا أنا و لا أنت نقدر نتحكم فيه ,, بالضبط مثل موضوع قيادة المرأة السعودية للسيارة الموضوع اللي ثبتناه و ناقشناه و عملنا له تصويت و احنا عارفين أن أعضاء الملتقى كلهم ما راح يأثرون في قرار مجلس الشورى .

و عارف أن موضوعي و غيره من المواضيع اللي تتكلم عن الهيئة ما راح تغير أي شي في الواقع و ما كان هذا هدفي من الطرح ,, أنا طرحت الموضوع من دافع الغيرة على سمعة البلد أولا و الغيرة على حقوق المثقفين في هذا البلد و هي بلد الثقافة و الحضارة . بس اللي صار في معرض الكتاب مهزلة , يعني تخيل أنك تروح معرض كتاب في بلد أجنبي و تشوف مثقفينهم المشاركين في المعرض يقادون مثل المجرمين أمام الناس , وش بتقول عن ذاك البلد ؟

و هدفي كان أني أخلي الناس اللي يدافعون عن الهيئة يعيدون حساباتهم و يفكرون هل الهيئة فعلا تستحق هذا الدفاع أو لا ..

أما بخصوص التجار , فأنا مازلت عند تساؤلي .. إذا كانت مهمة الهيئة الأمر بالمعروف و النهي عن المنكر مهما كان المعروف و مهما كان المنكر,, فليش تتعامل بأسلوب ( ناس و ناس و الكيل بمكيالين ) ؟؟ وينها عن هالقضايا المهمة اللي تمس المواطن بشكل مباشر ؟؟ ليش ما حاولت تنقذ المواطنين من أطماع التجار و وكلاء السيارات ؟؟

و بعدين أنا ما اتهمتم بالرشوة .. أنا طرحت القضية على شكل تساؤل بريء ,, يعني أنا ما جزمت بهالشي و قلت ( هم ساكتين عن وكالات السيارات عشان أنهم يعطونهم جيوب .. أصلا وش دراني هم يعطونهم الجيوب ببلاش أو بفلوس ) و لو أني أتهمهم بالرشوة كان جزمت و ما تساءلت ..

أما بالنسبة للتهم , فأفعال و تصرفات الهيئة هي تتكلم عنها و احنا هنا في هذا الموضوع و موضوع الأخت ليمونه كول نقلنا أحداث حقيقية صارت على أرض الواقع ..

و بالنسبة حق جريدة الرياض .. تدري أني ما أتابعها و لا أدري وش سياستها , بس لقيت هالرابط في أحد المنتديات دخلت عليه شفته وصلني عندهم .. و هل نقل خبر عن جريدة ما يعتبر تأثر بفكر الجريدة ؟؟!

و بالنسبة لإغلاق الموضوع فهذا راجع للإدارة و حنا تحت أمرها ,, لكن قبل ما يسكرونه لازم يراجعون الموضوع من بدايته و يشوفون الدافع وراء الطرح هل كان مجرد التهجم على الهيئة أم مناقشة تصرفاتها اللي أساءت إلى سمعة البلد و إلى المثقفين في هذي البلد ..

و أنا قلت لك من أول ما أتوقع أن آراءنا بتتوافق 100% لكن يكفينا الاتفاق على بعض النقاط ..

عموما أنا سعدت بالنقاش معك و مع الإخوان و الأخوات سواء اللي وافقوني أو اختلفوا معي و مثل ما يقولون ( الاختلاف في الرأي لا يفسد في الود قضية )


تحياتي : أدمنت حبكــ..

[أخت القمـر]

أدمنت حبك
تحيه لك على هيك ردود
فعلاً كانك تعرف وش بكتب << قولي والله

طبعاً انا مابزيد شي على الموضوع لاني ان بديت بيتفرع الموضوع لألف جهه:mh19:

لذالك اكتفي بتأييدي لكلامك

يعطيك العافيه يادكتور


بالنسبه لأغلاق الموضوع
ماتوقع انه يستاهل نغلقه حالياً
خلاص كل واحد حط وجهة نظره بالموضوع
ووضح رأيه
ومانجبر احد على الأقتناع برأي الطرف الثاني