رواية/ سعدى شقرديه ماتهاب و عربجيه غير عن كل البنات

[نجد العرب]

<< الفصل العاشر:>>
<<في المخيمات>
(المخيمات كانت روعه ماتوقعتها كذا،،كأنك قاعد في بيتكم بس على شكل خيمه،،مجهزينها بكل شي،،أول يوم كان فله بمعنى الكلمه،،لعبنا بالدبابات من جد وناسه،، مر اليوم الأول والثاني بسلام وهياص،،بعد تعب وإرهاق حطيت رأسي على الفراش وأنا بحال ما يعلمها إلا الله،، لا نيب قادره أفكر ولاألقى حل،،باقي يومين ونرجع وأهل منصور راح يتقدمون،،والله إني أمسك دموعي لا تطيح ما أبي أضعف قدام نفسي،،ضقت بقوة وطلعت برا المخيم شوي أبي أرتاح من الضيقه اللي خانقتني،، يا سبحان الله الجو كان مره خرااااافي ورهيب ومافيه إلا لمبات ضوءها خافت ،، وأنا قاعده أتمشى برا وألعب بجوالي،، لمحت زول واحد قاعد لكن ما قدرت أشوف من،، قربت أناظر له أبغى أعرف من؟!،، قربت شوي إلا طلعت خاله رقيه تصلي بالبراد إستغربت موب وقت صلاة لكن الظاهر تصلي صلاة آخر الليل.
(وقفت جنبها أحتريها تخلص صلاة وطول الوقت أفكر أقول لها أو لا)
خاله رقيه بعد ماسلمت:سعدى يمه وراك قاعده للحين.
سعدى وبتنهيده:ما جاني النوم ياخاله.
خاله رقيه:تعالي إقعدي جنبي،، وش فيك يا بنتي.
سعدى خانقتها العبره: لا ياخاله سلامتك ماتشوفيني زي القرد أناقز.
خاله رقيه وبتشكك:سعدى أنا مثل أمك الله يرحمها،،يمكن إني شديده عليكم بس ترى قلبي معاكم.
سعدى تأثرت:لا خلا ولا عدم يانظر عيني.
(سعدى سكتت وقعدت تفكر،، ليش ما أفضفض لها وأقول لها واللي يصير يصير بالطقاق والله تعبت من التفكير)
خاله رقيه:والله يا سعدى اللي يشوف وجهك المهموم يقول تحبين.
(سعدى داخل نفسها :إخس تعرف الحب)
خاله رقيه:قولي لي الصراحه أعجبك أحد من هالمصرقعين.
سعدى وبإبتسامه:هذاك قلتيها ياخاله مصرقعين موب من زينهم.
خاله رقيه:أجل وراه وجهك كذا؟!
سعدى:خاله عندي سؤال؟!
خاله رقيه:هاه وشو؟
سعدى:الحب حلال وألا حرام؟
خاله رقيه:هذا وإنتي جامعيه تسألين؟؟
سعدى:خاله عندك جواب وألا أطس.
خاله رقيه وبتعجب:والله يا بنتي الحمدالله الوحده تحب أهلها وأخوانها وصديقاتها إلا إنتي وش قصدتس بالضبط؟!
سعدى:يالليل ما أطولك ياخاله لا تستهبلين.
خاله رقيه تضحك:اها،،ما أشوف إنه فيه شي دام الأهل يدرون.
سعدى وبإسفهلال:يعني إنتي تحسين إنه شي عادي.
خاله رقيه وبإبتسامه:يا بنتي إذ لم تدر ما الحب وما الهوى،، فقم فإعتلف تبنا فأنت حمار.
سعدى وبضحكه عاليه:يالبييييه يارقووش يازين هرجك زيناه.
سعدى:طيب إذا واحد يحبك وإنتي ماتحبينه ومن زود القراده صديقتك هي اللي تحبه.
خاله رقيه:لا السالفه شكلها موب هينه،،إدخلي بالموضوع.
سعدى:أوعديني ما يطلع لأحد.
خاله رقيه وبجديه:عيب تقولين هالحكي أنا موب بزر عشان توصيني.
(سعدى داخل نفسها:يووه هذه العايله كلهم عرابجه وزاحفين)
خاله رقيه:سعدى أحتريك تهرجين.
(سعدى حكت لخاله رقيه السالفه كلها وفهمتها إن حصه تحب منصور،،وشرحت لخاله رقيه إنها ماتعتبر منصور إلا أخ وتتمنى إن الله يجمعه مع حصه على خير)
خاله رقيه وبعد صمت طويل:والله ياسعدى إن حصه تسوى قبيله وهي أحلى بنات العايله كلها.
سعدى وبفرح:ياخاله الله إن حصه نادره بهالوجود ومايجي منها إثنين.
خاله رقيه:شوفي سعدى خلاص أنا بإذن الله بحل المشكله.
سعدى وبفرحه غامره:وش بتسوين؟!
خاله رقيه:يا بنتي مافيه أحسن من إني أكلم صاحب الموضوع نفسه.
سعدى بإستغراب:وش دعوة بتكلمين منصور يعني؟!
خاله رقيه:إيه وش بها يابنتي أختصر السالفه كلها.
سعدى:ياجعلني فداك يارقوش قولي آمين.
خاله رقيه وبضحكه:تأدبي يابنت.
سعدى:لكن وش راح تقولين له،،لحظه لا تقولين له حصه ميته عليك لايشوف نفسه.
خاله رقيه:سعدى أنا أكبر منك وأعرف كيف أتعامل مع هالمواضيع وأبشري باللي يخلي منصور يخطب حصه من أول يوم تجي فيه،،وش تبين بعد.
<سعدى نطت من الوناسه،وضمت خالتها رقيه>
سعدى:وش لون أرد لك هالمعروف.
خاله رقيه:عيب أي معروف بين البنت وأمها.
سعدى:ياجعلني أفدى مواطيك على الأرض ياخاله.
خاله رقيه:سعدى عندك صوره لحصه.
سعدى وبتردد:ليش؟!
خاله رقيه:أبي أوريها منصور وأدخلها مزاجه خبرك هالولد يخق مع الزين.
سعدى:أبشري عندي بجوالي.
خاله رقيه:خلاص إنتي هالحين إرتاحي وبكرا أعطيني صورتها وبإذن الله مايصير إلا الخير.
(رجعت لفراشي وأنا ميته وناسه ،،آه أحس هم وإنزاح لكن إنشغل كل بالي في يوسف ليش كذا فجأه قلب علي وعصب وقعد يكلمني بذا الإسلوب،،ياربييييه أنا وش سويت....)
<في الصباح الباكر>
معالي:بنات،بنات قوموا يجعل العدو مايقوم.
كادي وهي متغطيه بالبطانيه:أعوذ بالله وش تبين بكل مكان وإنتي غاثتنا.
معالي:قومو ترى هذا آخر يوم لنا خلونا نستانس ونفلها.
(كل البنات قعدو،،وتجمعنا نتقهوى )
سديم:بنات مستحيل أصدق مر الوقت بسرعه.
أروى:أنا موب مصدقه إننا للحين ما ردينا لهم على مقلبهم السخيف.
معالي:أنا عندي مقلب خطير بس أبغاكم تكونون قدها.
سعدى وبشهامه:أفا من متى عمرنا خذلنا بعض.
هبوب:إيه والله إني أبي أي شي يبرد خاطري فيهم.
بشرى:مستحيل أنسى ذاك اليوم يوم خربو وناستي.
حمده:ياجعلهم مايتهنون شهر وأنا أتدرب على الرقص وآخرتها يسوون فينا كذا.
(طق،،طق،،طق)
آحم احم احم درب تغطوا يابنات.
<سالم ونواف وإبراهيم وأنس داخلين>>
نواف وببجاحه:هيه إنتن تغطن ترى خاله رقيه قالت روحو للبنات مجهزين لكم الفطور.
أنس:بسرررعه تراني فاطس جوع.
كادي:عساكم ماتشبعون قولو آمين.
أسماء وبصوت غنج: أووف منكم مقرفين بكل مكان ورانا.
إبراهيم:يآآآآي شوي شوي لاتقطعين موب من زين هالحلايا.
سعدى:والله محد طلب رأيك إنت وصلعة رأسك اللي كأنها بطيخه منتهيه صلاحيتها.
نواف:يالليل النشبات تكلمت سعدى.
إبراهيم:سعدوش إلا وش رأيك تنضمين لقروبنا ترانا خققيشن.
<إدعس يالمصطلح الجديد>
سعدى:معصي ماعاد إلا هي.
أنس:إخلصوا هاتو فطوري جعت.
بشرى:ورى ماتقوم شف الفطور بالزاويه على السفره.
معالي:إبلعو بسرعه وأعطونا عرض أكتافكم تعبنا من الغطاء.
نواف وبسخريه:ههههه مايحتاج شفناكم إنتم وهبالكم بالحوش خاشين جو على بالكم بالنمساء.
سعدى :يا مال الفقع اللي يفقع عيونك أنت واللي شاف معك.
نواف:إيه والله مالت عليكن أحلى وحده فيكم بشرى وألا الباقيات حومتن كبدي وصرت أشوف كوابيس بسبتكن.
<<بشرى إستحت أول مره أحد يمدحها>
سعدى:أقول ورى ما تبلع وإنت ساكت وبعدين خلاص أعطونا ظهوركم ولا تهرجون معنا.
<<سالم إنسان ضحوك ويضحك على أتفه شي>>
سالم:هههههه سعدى إنتي نكته.
سعدى:هههههه بايخه.
سالم:لا عندي وحده أحلى،،ما وجه الشبه بين الملح والحريم.
نواف:وشو؟؟
سالم:هههههه كلهم يرفعون الضغط.
إبراهيم:هههههه حلووه رهيبه تكفى عطنا وحده ثانيه.
سديم:لاتصدق ياسالم تراهم يستهبلون عليك.
<سالم رايق وعايش جوه مايهمه إنتقادات ولاشي بالدنيا ممكن يعيق ضحكته>
سالم:هذه النكته إهداءخاص لبنات الشرقيه فوز وسعدوش،،مره خروف ونعجه جالسين على البحر،،قالت النعجه: مبااااااع،،جاك الخروف مجاوب:يالبيييه هالصوت.
فوزيه:لا بالله إحلف ياشيخ.
إبراهيم فاطس ضحك:إنتن وش فيكن على سلومي.
سعدى:قل لسلومك ينطق أبرك،،ياشين ثقالة الدم من صباح الله خير.
سالم:هههههه آخر نكته تكفون.
أنس:يا تسبدي<كبدي>ياسالم كمل ماعليك.
سالم:فيه فريق نمل ومعاهم صرصور ليه؟؟
إبراهيم:ليه؟؟
سالم:ينقالك لاعب أجنبي ههههه.
<<البنات يحاولون مايضحكون بس إسلوب سالم بالكلام غصب يفطس ضحك>>
أنس: هههههههههههه.
سالم:فيه قرويه ركبت الطياره وجت المضيفه تقدم الوجبات،،قالت القرويه للمضيفه: يابعد عيني عين أهلك والله لو درينا بنكلف عليكم ما جينا.
فوزيه طاحت ضحك:هههههههههههه آه يابطني قسم باالله ذكرني بموقف.
سعدى وبإحراج:فوزيه إن ما سكتي لا أكفخك.
فوزيه: لا سالم هذه اللي أعرفها حلفت على الطيار تعطيه فلوس التوصيل هههههه.
<<كانت تقصد جده عيده>>
سالم:هههههه والله إنها مهويه ومنتهيه.
<بلاك ماتدري إنها جدتك>
نواف:هههههههههههه.
سعدى وبداخل نفسها:حسبي الله على العدو الظالم كلما بغيت أنسى رجعتو ذكرتوني.
<<شوي ودخل دهام ومعاه سلطان وطلال>
هبوب:لاحول إكتملت الجلسه وش جاب هذولا بعد.
دهام:هيييييه إنتي وين فطورنا.
سعدى:خيييير يا أبو الشباب وش ذا الإسلوب.
دهام:إنتي لاتهرجين معي تسدين نفسي عن الفطور،،إخلصو وين الفطور؟
سعدى:أعوذ بالله يالمشافيح.
دهام:سعدى لا أسمع صوتك إنتي واللحوج اللي جنبك ترى تجيني قرحه إذا سمعت صوت الغنم.
(العيال هههههههههههه حلووه دهام هههههه)
سعدى وبنرفزه:الله يصبرنا عليكم يالبعارين.
طلال:وحده تصب لي شاهي مع حليب.
أروى:قم إخدم نفسك بنفسك.
طلال:أعوذ بالله حرام ينقال عنكم بنات،،واللن إنكن عفاريت وملسونات.
هبوب:اللي يحترمنا نحترمه.
طلال:وع عليكن موب من زين هالأخلاق الله يكفينا الشر.
سعدى:أقول إقضب القاع ولا تغلط ،، خوش والله جاي عندنا وتغلط.
سلطان: يوه الواحد عندكم ما يعرف يتأمل بالأكل إسكتو خلاص.
سالم:هههههه إسمعو هذه آخر نكته،،واحد خكري راح يعزي خويه،،المهم إنه مررره تأثر، وهو طالع قال لأخو المتوفي:طيب يعني مافيه أمل يرجع.
(الشباب فطسو ضحك يعشقون سالم وضحكته الهبلا)
<<ماجد طب علينا هو و منصور>>
ماجد:الحبايب مجتمعين.
سعدى:لا بالله اللي يومنا أقشر كملت.
ماجد:الجلسه بدوني ماتسوى ورى تفطرون وتخلوني.
سلطان:إلا يوسف وينه.
ماجد:يا أخي هذا مدري وش فيه،،أمس ما تعشى،، ويقول موب مشتهي فطور.
"سعدى داخل نفسها تقول:يا الله وراه حساس لايكون للحين زعلان مني،،كيفه بالطقاق ما قلت له شي يزعل""
هبوب:غريبه عاد يوسف كان رايق ومتحمس للطلعه.
دهام:أبوك ياالقهر لو أعرف ذا الولد وش لون يفكر.
سلطان:فديت يوسف الغالي.
ماجد:بس يوسف اللي تفديه وألا معاه واحد ثاني يبداء بحرف الميم بس موب معالي.
(الشباب على الفطور فطسو ضحك)
(معالي إنحرجت حييييل)
دهام:الحمدالله شبعت يازين فطور خاله رقيه.
كادي:من قال لك إنه خاله رقيه هي اللي مسويته،، حنا اللي من الصبح نكرف ونسوي.
دهام:إيه هذا إنتم يابنات غيورات.
سعدى:وه ياوجع قلبي منكم.
((دخل يوسف بهدؤ،، ياشباب خالي محمد يقول تعالو اللي يبي يرمي بالشوزل(البندقيه)
طلال:أخيرن ياالله جينا.
يوسف يطالع البنات:صح على فكره خالي محمد يقول حتى البنات اللي تبي ترمي تجي.
(البنات قامو يصارخون من الوناسه)
دهام:هههههه هم من يشوفون الشوزل تشوف غبرتهم من الخرعه.
سعدى بتحدي: نشوف يا دهام.
(البنات والعيال كلهم طلعو برا)
الخال محمد:شوفو اللي يصوب الهدف 1000 ريال بتكون في جيبه.
(العيال إشتطوا وحالتهم حاله والوقت صار كله لهم)

[نجد العرب]

خال محمد:خلاص يا شباب هالحين دور البنات.
ماجد:والله ياخال ماعندهم غير الخرطي.
أسماء:يممماه إيش هالشي البشع والله ما أمسكه.
بشرى:لا لا وخروني عن الأسلحه والخرابيط.
سديم وبحماس:خالي هات أنا بجرب.
(سدوم جربت وإنبسطت مره وبعدين هبوب تجرأت يوم شافت سديم،،معالي ماعندها مشكله وجربتها بكل إنبساطيه،، يوم جاء دور سعدى الشباب العشره كلهم تجمعو هذه سعدوش موب أي أحد مسويه لهم قلق،،قعدوا يناظرون لها،، للأسف سعدى تحمست بقوة وإنبطحت على الأرض تصوب،، الخال محمد قعد عشر دقايق يبي يستوعب مصدوم بس آخر شي فطس ضحك موب مصدق وش سوت سعدى.
ماجد وبصوت عالي:هههههه سعدى وربي إنك مجنووونه.
دهام:أول أسمع عن العربجه بس هالحين شفتها هههههه.
<نواف هو وسالم طاحو من الضحك على شكل سعدى>
طلال ميت ضحك:سعدى أمانه وش تحسين فيه وإنتي منبطحه وتصوبين.
(سعدى موب حولهم تركز على الهدف)
سلطان يناظر ليوسف:لا لا هالبنت إنهبلت هههههه.
<التعليقات من كل مكان والعيال ميتين ضحك ،،شكلها غلط متغطيه بشرشف وآخرتها منبطحه تصوب>
(ههههههه يلعن أم الشكل التحفه)
من أروع اللحظات اللي لايمكن أنساها ، يوم قعدنا نرمي بالنيشان،، بنت أو ولد مايفرق لأن مبدأ خالي محمد لازم الإنسان يتعلم كيف يحمي نفسه لا قدر الله تحسب لأي موقف،،ومن الأشياء اللي أصر خالي محمد عليها،،أصر إنه يعلم البنات كيف يسوقون،، بصراحه أنا أعرف أمشي نفسي بالسواقه بس ما توقعت سديم مبدعه بالسواقه ،،فديتها أطلق من مية ولد،، ركبنا معها وهذا الموقف مستحيل أنساه ،، نزلت سديم وركبتني مكان السواق تبي تعلمني كيف أفحط،، هالشي هذا كنت أتمناه من قلب لكن مالقيت أحد يعلمني ومره إنبسطت إن سديم تعرف التفحيط،، بعدنا شوي عن المخيمات،،موب واجد يعني الكل يقدر يشوفنا،، سديم قعدت جنبي)
سديم وبحماس:شوفي سعدى التخميس مره بسيط وهو أسهل شي.
سعدى:الله ونااااااسه.
سديم:أول شي فري الدريكسون لآخر درجه.
كادي:بنات أحس إني بموت إستودعتكم الله باي بنزل.
هبوب:مالت عليك حنا يا نعيش سوا أو نموت سوا هذه التضحيه.
معالي:إدعس.
سديم:أول ماتفرين الدريكسون حطي رجلك على البنزين،،ثمن خلي الدريكسون مفرور ولاتشيلين رجلك عن البنزين وكذا يصير التخميس.
سعدى:وإذاخمست يطلع غبار
سديم تضحك :هوبس غبار، يطلع معاه أنواع الأصوات
"طبقت اللي قالته سديم، ،أول مره سويتها صح ،المره الثانيه من الوناسه ماحسيت باللي سويته ،المره الثالثه شفت الموت
هبوب:سعدى خلاص وقفي
سديم:سعدى خلاص
سعدى:ماأعرف أوقف
"كنت بحط رجلي على البريك على طول "
سديم وبصراخ:لالالا تقلب السياره.
"مافهمت الصراخ أربكني ،ماأشوف إلا الغبار،آه حسيت إن هذايومي ،كان كل تفكيري بالبنات اللي معي وش ذنبهم لو صار لهم شي،،فجأه طرالي يوسف وإبتسامته الهادئه،، وش لون لو إني مت وأنا ماإعتذرت منه على دفاشتي وجلافتي،،ودنيتي حصه اللي راح تجي بعد يومين،،بهاللحظات أشياء كثيره تجمعت فوق رأسي،،لكن رحمة ربي آه يارحمة ربي فوق كل شي،،كأن حاجه منعتني أحط رجلي على البريك،، لأن لو حطيتها وأنا بهالوضع كان قلبنا خمس مرات،،آه الحمدالله وقفنا بس نبض قلبي واقف من الخوف،، هذه المره الوحيده اللي خفت فيها بمعنى الكلمه،،وأول ما نزلنا تجمعوا الشباب علينا.
ماجد معصب:لا يا سعدى معليش ما توصل فيك لهدرجه.
نواف وهو متنرفز:قلنا سوقي ما إختلفنا بس تفحيط وخمسات،،إنتي مستوعبه وش سويتي يامجنوونه.
دهام: لا أبوكم بنات،،العيال ما تجرأو يفحطون كذا.
طلال وميت من القهر:إنتي عارفه إنكم بغيتو تقلبون وتموتن وألا ماهمك.
<سعدى ساحبه جلنط ولا ردت عليهم>
ماجد مطنقر:شوفي سعدى كل شي الواحد ممكن يتمادى فيه إلا إنه يصير أناني ومايفكر إلا بنفسه ووناسته.
دهام:إيه والله بغيتو تروحون فيها ونبتلش في جثثكم.
سديم تدافع عن سعدى:إنتم وش فيكم على سعدى أنا اللي علمتها.
ماجدوبصدمه:إخس يعني أنا بتزوج وحده عربجيشن.
<سديم قلب وجهها ألوان وبداخل نفسها تدعي على ماجد>
أنس:الحمدالله على سلامة سيارتي الله يطول بعمرها.
سعدى:مالت عليك إنت وسيارتك.
<تركنا الشباب وهم تحت تأثير الصدمه وإتجهنا إلى خيمتنا>
معالي:بنات قسم إن العيال قاهريني شايفين أنفسهم على وشو مدري.
سعدى معصبه:أنا سعدى يهزؤني والله أوريكم فيهم.
معالي:أنا قايله لكم عندي مقلب بس يبغاله قلب جامد يسويها.
هبوب:وأنا بنت خال سعدوش أبشري بعزك.
سعدى:هههههه أحس إني خربتكم.
معالي:شوفو حنا بكرا راجعين،،وأنا بصراحه ودي أعطلهم وأضحك عليهم شوي.
أروى:وناسه أكشن جديد ،،وش ناويه عليه.
معالي:الليله لا أظلمت الدنيا كل ثنتين يروحون لسياره.
بشرى:طيب وبعدين.
معالي وبحماس زايد: نفش كفرتين من كل سياره.
فوزيه:هههههه يالبيه.
سعدى:ياروح روحي ياذا المقلب.
أسماء:ياربيييه ليش مقالبكم كذا تعور القلب.
سعدى:يآآآي أعصابك .
سديم:حلو المقلب بس حرام خوالي راح يعصبون .
سعدى:ما عليك وش دراهم،، الليله ننفذ العمليه يستاهلون من قال لهم يحطون رأسهم بروسنا.
(حل المساء وخيم الظلام على المكان،،الكل كان متجهز علشان من يصبح الصباح نرجع للديره،،محد منهم كان متوقع المفاجأه الجنونيه،،الساعه 3 بالضبط الظلام كان دامس،، وفيه هبات هوى بارده تنعش الروح وريح المزارع اللي جنبنا تخليك تدوخ من روعة ريحتها،، هدؤ وماتسمع غير صوت صرار الليل،، تفرقنا وكل ثنتين راحو سياره،،سعدى من زود الحماس ومن كثر ماهوب مرتفع ضغطها من ماجد قامت فشت كل كفرات سيارة ماجد الأربعه.
<<هههههه والله مقرود حظ ياماجد>>
ولا وحده فينا قدرت تنام،،كلنا نحتري اللحظه اللي نشوف وجيههم فيها لا شافو السيارات.
"وفي الصباح الباكر....
الخال خالد:يامعين يارب إرحمنا.
الخال محمد:ياعيال قومو ترى مشوارنا طويل خلونا نستعجل.
<<بعد ما قامو الشباب مستعينين بالله ..
ماجد وبشهقه:شباااااااب تعالو بسرررررعه.
(تجمعو العيال يناظرون لسيارة ماجد،،وكلن عصب ما يدرون وش السواة،،راحو من باب الشهامه يبون يفزعون لماجد ولكن لسؤ الحظ طاحت الصدمه فوق رؤوسهم يوم شافو سيارتهم كلها كذا!!
طلال بصدمه:لا السالفه فيها بلاء.
ماجد:قسم لو أعرف من لا ألعن خيره.
يوسف:معقوله هالحين بنصلح كل هالسيارات.
دهام:المصيبه موب بالتصليح سيارتي مابها كفر سبير<إحتياط.
<<الشباب طنقرو وكل واحد أخلاقه بخشمه،، فعلا كان مقلب روعه،، إنبسطنا وحنا نتشمت فيهم وهم مشتطين يفكون الكفرات ويصلحونها،،وأحلى حاجه بردت قلبي ،،هبوب يافديت خشمها صورتهم تصوير كامل،، جاء المغرب وحالتهم يرثى لها)
الخال محمد:خلاص يا شباب الليله ننام هنيا وبكرا على خير نمشي،،ما نقدر نمشي على وجه الليل ومعنا عوايل.
ماجد:لا ياخال أنا ما أقدر عندي دوام بكرا والله لايصكوني إنذار.
يوسف وهو متضايق:حتى أنا ما أقدر عندي محاضره مهمه.
الخال محمد:تستاهل هذا اللي يأخذ كورس صيفي.
يوسف:اللي يسمعك يقول بكيفي.
الخال محمد:أجل خلاص روحو بالسياره الصغيره إسبقونا للديره.
(هذيك الليله كانت من أونس الليالي،،أشكالهم تفطس ضحك،، وأكثر واحد كان يموت ضحك سالم خربها وفصخ ثوبه وقعد بالسروال والفنيله)
<هههههه البصمه السعوديه للرجل السعودي>
من بكرا وبعد جهد جهيد وطلعة الروح صلحوا سياراتهم ورجعنا للديره،، بعد ما رجعنا سوينا نفس حركتهم لكن هالمره بطريقه أحلى،،
يمكن بحدود الساعه 10 بالليل خلينا خاله رقيه تنادي العيال للمقلط لأن التليفزيون هناك،، المهم جهزنا لهم سفره كامله فيها فطاير وكيك وحلويات حتى العصيرات حطيناها.
منصوربتعجب:لا صاير بالدنيا شي البنات مسووين لنا كل هذا.
ماجد وبتشكك:والله ناغزني قلبي منهم.
طلال:ورى ما تأكلون وإنتم ساكتين وإحمدو ربكم أحد أعطاكم وجه .
أنس:أنا والله بأكل ميت جوع.
سالم:وإنت من عرفناك وإنت جيعان.
(العيال ما قدرو يقاومون الأكل وقعدو يهجمون بشراسه وأثناء الأكل دخلت نينا)
نينا:بابا ماجد هذا أنا مافيه معلوم.
(كان معها شريط فديو من البنات)
ماجد: وشو ذا؟
قرأ ماجد وش كان مكتوب عليه< البنشري كومار بفنيله بدون سروال>
ماجد بالبدايه قعد يضحك وعلى طول شغل الشريط،،وإنصدم صدمة العمر بالتصوير اللي شاف.
سلطان مصعوق:أيا الحقيرات النذلات وصلت فيهن هالمواصيل.
<ماجد حاط يدينه على رأسه من هول الطامه>
طلال:يلعن أمك يالمخ اللي سواها.
يوسف معصب:لا عاد إلى هنا ولازم سعدى توقف عند حدها زودتها.
أنس يدافع:بس لا تنسى بعد حنا وش سوينا في البنات.
ماجد مطنقر:لحظه لحظه من اللي بدأ ومن اللي تحرش قبل،،هين إن ما وريتك في سعدى ما أكون ماجد.
نواف طالع من طوره:كلهم يبغالهم من يأدبهم موب بس سعدوه.
يوسف: هالخبول يعني ولا وحده فيهم عاقله فكرت لا قدر الله تورطنا وقعدنا بالبر وش راح نسوي والسيارات مبنشره.
سالم:والله إنهن دلوخ وعلى رأسهم سعدى.
<شوي وتدخل نينا ومعها رساله وتجمعو العيال على ماجد يقرأونها>
كان مضمون الرساله:
((إلى القروب الخائب،،،
أحيانا تخوننا الشجاعه في التفكير ولكن لا يمكن أن يخوننا الفعل في التصرف،،وكما قيل طبخن طبختيه يالرفلا كوليه،،وهذا أقل ما تستحقون جزاء وردع لأمثالكم،، صحيح حنا بنات بس عن ألفين رجال،، وهذا أبسط وسائل هجومنا،، وللمعلوميه حنا عرابجه بأجساد أنثويه محد يدوس لنا طرف<إحذر شر الأنثى إن طغت وإحذرها إن أحبت وإحذر شديد الحذر إذا كنت أنت سبب في حزنها ودموعها فسوف تحرقك بجنون >،،فساتيننا التي أعدمها الوحل في تلك الليله الشنيعه رمينها بالغساله،، ولكن كفرات سياراتكم الجديده روحو دورو لها زباله محترمه،،
نرجو أن تستمتعو بالحفله البسيطه والكيكه الرائعه التي تعبر عن فرحتنا بالإنتصار متمنين لكم قضاء وقت ممتع بمشاهدة الشريط الكوميدي من إنتاج وإخراج هبوب ومعالي ومساعدة البقيه،،
هههههههههههههههههههههههه)
<<ماجد قطع الورقه من القهر>>
دهام إهتاج كالبعير الهايم: الله يأخذهم هالسلق ،،أنا أجمع رواتب 3 شهور عشان أجيب لي كفر سنع وآخرتها بكل برود يسون كذا.
إبراهيم:أبي أفهم هم خبول من جد يعني ما يعرفون قيمة كفر السياره.
نواف:ماعلينا من القيمه،،المصيبه لو إبتلشنا ومالقينا سبير والله لا نقعد فيها.
دهام:شباب أنا بدخل عليهم وأضربهم ضرب ألعن خيرهم.
يوسف:ترى ماهيب من المراجل الواحد يفكر كذا.
منصور:وش نفعتنا فيه المراجل مع هالعفاريت.
ماجد وطلع الشريط من الفديو:شباب يحرم علي فنجان القهوه مع الرجال إن ما أعطيتهم درس أخليهم يتأدبون.
إبراهيم:أبشر وأنا أخوك باللي يفزع معك.
أنس بحماس:الوعد قدام ياسعدوه إنتي والمساطيل اللي معك.
ماجد وبتحدي: يومين بالكثير أو أربعه والله لأخليك تكرهين حياتك ياسعدى وأخلي دموعك أربع أربع.

[نجد العرب]

<الفصل الحادي عشر>


سديم وبفرحه غامره:بنات عندي لكم مفاجأه.
معالي وفي برود:يوه ماعاد أتحمل مفاجأت تعبنا.
هبوب:من جد إجازتنا كلها مقالب وقلق.
كادي:تدرون أحس إني على أعصابي.
سعدى وهي تلعب بالجوال:ورى ما تقولين وتفكيننا.
سديم:تخيلو من قاعد يسلم على خالاتي.
أروى:أكيد واحد من هالعيال المشافيح.
سديم وهي تناظر لسعدى: سعدوش حصه برى.
<<سعدى لا شعوريا نطت من فوق الكنب وقامت تصارخ من الوناسه>>
بشرى:ياحظك ياحصه اللي مأخذه قلب سعدى.
(سعدى قعدت تركض وما إنتبهت إن أنس قدامها)
طراااآآآآخ
سعدى:وجع توجع قلبك.
أنس مصدوم:يامال المغص خرعتيني.
سعدى:إنت اللي تخرع ياالبرميل.
أنس:إسكتي من زينك يا عود المسواك.
سعدى وبجرأه:وخر عن وجهي موب فاضيه لك.
أنس:والله ماتستحين ورى ما تحطين الشيله على وجهك.
سعدى:كيفي وش دخلك.
أنس:يممماه عوبا أعوذ بالله.
سعدى:ورى ماتفارق صكيت الطريق إنت وكرشك.
أنس:شين وقواية عين متبليتني بلوى وآخرتها تعايريني.
سعدى:ياأخي فارق والله إنك بلشة البلشات.
أنس:يااارب لاتجيب لي زوجه مثلك.
سعدى:داعيه عليها أمها اللي تأخذك يادب.
(سعدى دفت أنس وكملت طريقها ولا كأن شي صار وأنس مسكين تحت تأثير الصدمه)
أنس:حشى موب بنت واحد من الربع ،أعوذ بالله ياكافي.
(سعدى صقعت الباب ودفته بقوة وداخله للصاله وبصراخ)
سعدى:حصوووص ياخايسه ليش كذبتي علي موب قايله إنك راح تجين الثلاثاء.
حصه وبضحكه:ياقلبي أبغاها مفاجأه.
<سعدى تضم حصه>:مالت عليك وأنا ما جهزت نفسي.
حصه وهي تضم سعدى بإشتياق:سعدى يعني ما أعرفك.
<سعدى سحبت حصه تبي توديها للبنات،،تجمعت الشله كلها بالغرفه>
سديم:يوه حصه مره متغيره وش عندك.
معالي:إيه من جد محلوه يابنت لايكون إنخطبتي.
حصه تضحك:ليش مايزين إلا اللي ينخطب.
<سعدى سرحت شوي،،تذكرت موضوع منصور،،معقوله خاله رقيه توفي بوعدها وتخلي منصور يخطب حصه؟!>
هبوب:لا لا سعدى اليوم موب مع الناس.
أروى وبغيره:أكيد موب حصه هنيا.
سعدى تطالع أروى وبضحكه:لا عاد أنسى نفسي ولا أنسى آراوي حبيبتي.
<البنات ضحكو على شكل أروى وهي متقطعه غيره على سعدى>
(هههههه أجل وش لون لو درت إن حصه تحب منصور أخوها)
حصه:يا الله إشتقت لكم حيل يا بنات من زمان عن الفله والوناسه.
بشرى:هههههه لا يرحم والديك لا تطرين الفله على لسانك.
حصه: وراه؟!
سعدى:هههههه من كثر بلاوينا.
أسماء:ما عقب آخر مقلب سويناه.
معالي:إيه والله قسم بالله سلطان كسر خاطري حيل تكلف في قيمة الكفر.
<البنات يناظرون معالي بإستغراب>
سعدى:خير وش قلتي،، ليش أبو الشباب شاكي لك الحال.
سديم:هههههه قابلوني أكيد مكلمها ومسوي نفسه ضحيه.
كادي:معالي من جدك تكلمين سلطان.
معالي:تبغون الصدق وألا ولد عمه.
سعدى:والله نبي الهرج الوكاد.
معالي وبإستحياء:اممم إيه أكلم سلطان وبصراحه أكثر هو مستعجل يبغانا نملك.
سديم وبشهقه:حسبي الله على العدو ،،ما أمداكم إركدو عيب.
هبوب:إيه لو ماجد موب عيب.
سديم:وش دخل ماجد هالحين.
هبوب وبضحكه:ياعيوني إنتي أدرى.
<<دخلوا البنات في جدل كالعاده وقعدوا يتهاوشون،، أنا من كثر موب مشتاقه لحصيص مانيب حول البنات،،سحبتها ورحنا للمجلس الثاني،،ما خلينا شي ما سولفنا فيه،،وأعطيتها التفصيل الممل لكل شي صار لي مع هاللحوج>
حصه:سعدى إنتي مجنونه بالخط العريض.
سعدى:هههههه أدري.
حصه:وعادي عندك.
سعدى:حصوص إنتي أكثر إنسانه تعرفيني ما يهمني شي إلا رضى ربي فوق كل شي ثمن أبوي وعيدوه.
حصه: هههههه حرام عليك للحين تنادينها كذا ورى ما تحترمينها.
سعدى:شوفي لا تنكدين إجازتي أنا مره مبسوطه إنها راحت قعدت عند خالي سليمان وفكتنا من قلقها،، ما أنسى ذاك اليوم يومن كبت علينا الماء وحنا نايمين.
حصه:هههههه تستاهلون جزاكم.
سعدى وبإنحراج: حصوص بعض الأحيان الواحد ينسى وش وده يقول خاصه لما يكون حيييل مبسوط.
حصه وبنظرات حنونه: ينسى وش وده يقول وألا تقصدين يخونه التعبير ومايعرف وش يقول.
سعدى وبضحكه عاليه:هههههه يا شيخه محد فاهمني غيرك.
حصه:أختي وصديقتي أكيد أفهمك.
سعدى وبهواش:إلا تعالي إنتي ماتدرين إني أكره حركات المفاجأت اللي مالها داعي.
حصه:إيه أدري.
سعدى وبتعجب:دامك داريه ليش سويتيها فيني.
حصه وبنذاله:أبي أشوف ردة فعلك.
سعدى:حصه إنتي عارفه طبعي وعارفه إني أنصدم أكثر من إنها تكون مفاجأه.
حصه:أمحق من طبع أعوذ بالله، تراك دوختينا،،مدري وش نسوي بك.
سعدى:تقبليني مثل ما أنا وإرضي بأقدار الله إنك إبتليتي بسعدى.
حصه:أحلى بلوى بحياتي الله لا يحرمني غلاك ويجمعنا على طاعته.
سعدى وبتصريفه:آمين ،شكلنا طولنا على البنات.
حصه فاهمه سعدى:هههههه طولنا وألا إستحيتي.
سعدى:لاحول خلاص موب رايحين يمهم.
حصه:سعدى كتبتي شي جديد.
سعدى تحاول تتذكر:اممم إيه خاطره وحده جديده هذولا المصرقعين ما يخلون أحد يخش جو ويكتب زي الأوادم والناس.
حصه:طيب عن وشو؟!
سعدى وببرود :مدري إقرأيها يمكن تكونين أحسن مني وتفهمين شي.
حصه قعدت تقرأ خاطره سعدى:
(zzz(((حائط كبرياء !!! ))
هكذا كنت دوما'' .. و ستبقى ..
ربما استطعت الصمود !!
لكن .. الى متى تخفي حنينا'' احاط بعينيك ..حتى خلق هالة اقرب ماتكون الى غيمة شتاء..
أرعدت .. فبدا قطوب حاجبيك كبرق لم يفارق سماه...
بعد ذلك ..
تطلعت الى قطرات ندم !! .. فلم تهل !!
حقا'' ! .. كم كنت مخطئه حين ظننت أن الحنين كفيل بإرجاعك!!
أتعلم ... ربما ابعث اشواقي لتلتقطك يا أسير كبريائك.. فذبول عينيك رجاني ان اسقيها عذوبة لقائي ..
هاك عبيري... و هنيئا'' لك بوردة ابت ان يقطفها سواك..)
حصه قامت تناظر لسعدى: روعه سعدوش والله ويطلع منك بس وش أفهم منها؟؟
سعدى :طلعت معي كذا،، بليز حصه لا تسألين ولاسؤال لإنك ماراح تحصلين جواب يبرد خاطرك.
حصه والذهول يكسو محياها: سعدى تحبين؟!
سعدى:ههههه أسمع فيه بس والله مدري وشلون قايل.
حصه:مصيري أعرف هالخاطره وش وراها.
سعدى:إيه هين يصير خير.
(جاء وقت العشاء وإجتمعنا كلنا وكان يومنا ولله الحمد حافل بالوناسه،،خاصه إني موب مصدقه إن حصه قدامي،، هذه أول إجازه نلتقي أنا وهي مع بعض ،،مر يومين تقريبا على جية حصه للقصيم،، المهم كنا قاعدين كلنا ونخطط إلى أي ملاهي نروح،،قعدت أناظر أدور حصه فقدتها موب موجوده ،،شوي ويدق جوالي.
ترن_ترن_ترن
سعدى:آلو أرحبو.
حصه وبصوت مخنوق:تعالي لحالك يم غرفتنا.
سعدى تروعت:وش فيه؟؟
حصه وموب قادره تتكلم:تعالي بسرعه ولا أحد يجي معك.
(رحت بسرعه أشوف وش السالفه،، وقف قلبي،،بحياتي ماسمعت صوت حصه كذا مخنوق من العبره،، أول مادخلت صكرت الباب وعلى طول ضمتني حصه قامت تصيح،،خفت مليون شي طرى في بالي)
سعدى وبخوف:تكفين ياحصه لاتخرعيني وش فيك.
<حصه موب قادره تحكي>
سعدى:أحد ضايقك من العيال هالمصاطيل والله لأوريهم نجوم القوايل.
حصه تحاول تهدأ:لا سعدى محد ضايقني.
سعدى:يا غلا الروح ترى ما أتحمل أشوف دموع أحد.
حصه :منصور.
<أول ما قالت منصور حسيت الدنيا دارت فيني وطاح قلبي برجولي،،لا يارب ما يكون اللي في بالي،،يارب ما خذلتني خاله رقيه،،ما أبغى أنصدم كافي صدمات>
سعدى وبعصبيه:وش فيه ذا التبن بعد!!
(يوه حتى أنا وقف قلبي معاها)
حصه:منصور خطبني.
<سعدى شهقت وماقدرت تقول ولاكلمه>
حصه:أنا موب مصدقه إن هالحب اللي كبر في داخلي من سنين وما فيه أحد داري عنه إلا إنتي تحقق.
<سعدى ساكته وكان ودها تبكي لكن ماسكه نفسها>
حصه تمسح دموعها:تصدقين ياسعدى إني فقدت الأمل وحاولت أنسى منصور.
سعدى وهي تحت تأثيرالصدمه: معليش حصه ترى ما أعرف أتصرف بهالمواقف.
حصه:سعدى لاتقولين شي أشوف الفرحه بعيونك،، ويكفيني وقفاتك معي.
سعدى:وش دعوة حنا خوات وما بيننا هالكلام،الحمدالله هذا توفيق من ربي روحي إسجدي سجدة شكر له.
حصه:سعدى أنا للحين موب مستوعبه هذا منصور اللي طول حياتي أحلم فيه،،كذا من غير مقدمات جاء وخطب.
سعدى:تستاهلين كل خير بعدين إنتي ووجهك مستهينه بعمرك،،ترى ألف من يتمناك.
حصه:بس القلب ما يتمنى إلا منصور.
سعدى:يا ذا المنصور اللي راح يناشبني فيك.
حصه:هههههه يخسي إلا هو.
سعدى:سبحان الله صدقتك هالحين منصور يخسي.
حصه:قدام سعدوش كل شي يهون.
سعدى وبضحكه:أروح ملح،،دخيلك لاتقولين سعدوش مدري من وين إخترعوه العيال يقطع عدوهم.
حصه:هههههه بس وربي لايق.
سعدى:زين جت على سعدوش ،،أنا خفت لا يعايروني بشي أردى.
حصه: هههههه إلا وش رأيك أقول لأمي إني موافقه ونخليها رسمي.
سعدى وبحماس:أكيد وش تحترين.
(بعدها بثلاث أيام تم إعلان خطبة حصه على منصور رسمي،، العايله مره إنبسطت لأن حصه كلها أخلاق وذوق وغير إنها أجمل وحده من بنات العايله.)
معالي:مبروك حصوص حركات يله عقبالي يارب.
<<وخزياه والله صادقه جده عيده بنات هالوقت ما يستحون>>
حصه:هههههه آمين يارب.
سديم:والله شي هذه الإجازه الحلوه من أول ماجيتي إنخطبتي.
سعدى:بسم الله قولي ماشاءالله.
حمده:هذا الحظ موب أنا مالت علي ماخليت عرس ماطامرت فيه،،وكل أنواع الرقص تعلمته بس ياحسره على عجزنا اللي ما يحبون إلا اللفح بالشعر.
سعدى:هههههه أجل خلاص تعلمي اللفح وعلى طول تنخطبين.
حمده:وأسفاه على رقبتي اللي ما ذاقت للراحه طعم،حاولت من قال لك لكن شعري حالف يخونني بالعروس ما يتسنع معي.
هبوب:حمده إنتي لوتصبرين مثلي ربي بيرزقنا برجال هوامير ما يعرفون غير دقني دقني ورقصهم يا ولد شوي يمين شوي يسار.
حمده:هههههه تبغين الصدق صحيح إني رجه بس أبغى واحد عاقل عاد مايصلح كلنا شعلل المسرح ياقدع.
سعدى:مالت على الطموحات الناس وصلت القمر وإنتم تفكرون بالمراقص!
أروى خاشه عرض وميته غيره:أوف مدري وش هالطيحه اللي طاح فيها منصور،،وه اللي يعين أخوي.
<حصه إنحرررجت وما عرفت وش فيها أروى شايشه عليها.
أسماء: يابخت منصور في حصه كل الزين فيها.
أروى:وش ينفع الزين فيه.
<حصه مره تضايقت وطلعت من الصاله>
سعدى وبعصبيه:أروى ولا كلمه لأمسح في وجهك الأرض.
<<يالبييه هذه الصداقه>>
أروى:بداء محامي الدفاع،وش فيها زود يومن صادقتيها.
سعدى كأن أحد صكها بقوطي: صدق من قال شر البلية ما يضحك.
أروى:كيفي أقول اللي أبي،، أنا ما أبغاها زوجه أخوي موب من زينها هالخايسه.
سعدى لاشعوريا عطت أروى كف:حدك ولا تغلطين على حصه تراني أعطيتك أكبر من حجمك.
<أروى قامت تصيح>
سديم وهي تناظر للبنات:بنات خلونا نطلع ونترك سعدى مع أروى.
سعدى:خلاص إسكتي.
أروى تصيح:إنتي ماتحبيني.
سعدى:من قال ما أحبك.
أروى وبطفوله:إنتي تحبين حصه أكثر مني.
سعدى:أروآي تبغين أهرج معك على إنك بزر ومراهقه وألا على إنك بنت خالي الحلوه وإختي الصغنونه اللي أحبه.
أروى:وش تبين.
سعدى وبحنان:شوفي يا أروى محد يقدر يجبر الثاني يحبه صح أو لا!!
أروى وهي تصيح:طيب.
سعدى:أنا يوم حبيت حصه وبديتها على كل العالم وخليتها تصير صديقتي من بين كل هالعالم كان لأسباب كثيره.
<أروى تسمع لسعدى بإنصات شديد>
سعدى تواصل حديثها:وعلشانها رفضت صداقات كثيره ورفضت أصادق غيرها،،والناس اللي رفضتهم مافكرت ولا لحظه إني أجرح إحساس أحد.
أروى:أنا ما جرحتها.
سعدى وبحزم:خليني أكمل.
أروى وبتهيده:أوف كملي.
سعدى: وسعت دائرة معارفي ومامنعت أحد يتعرف علي لكن ما سمحت لأحد غير حصه يتجرأ يقرب لي هي الوحيده اللي فعلا أثبتت نفسها بحياتي.
أروى بعصبيه:أنا أحسن منها.
سعدى تحاول تمسك أعصابها: يا أروى لا تقارنين نفسك بأحد وإفهمي كلامي،،اللي أبغى أوصله لك إذا حبيتي إنسان لا تفرضين عليه إنه يكون ملك لك،، ولا تحاولين تجرحين أحد فهمتي لإنك إنتي الخسرانه.
أروى:وش في حصه زود عني؟!
سعدى كاتمه الضحكه: لا لا أبد أبد محشومه مابها زود عليك بشي وبعدين حصه تراها صديقتي من يومن حنا بزران وأعتبرها أختي الثالثه.
أروى وبغيره:طيب وأنا وش أطلع.
سعدى ما قدرت تمسك نفسها وطاحت ضحك: إنتي بنتي.
أروى مطنقره:إنتي تستهبلين.
سعدى:مدري وش أسوي فيك وش اللي يرضيك مدري.
أروى:خلاص ما أبي منك شي.
سعدى:المهم إذا تعتبريني أختك الكبيره وتحترميني لاتجرحين أحد مره ثانيه وخاصه حصه يمين بالله اللي يغلط عليها ما يفكه مني غير رحمة ربي.
أروى:الله يعيني عليها.
سعدى وبعصبيه:المفروض تنبسطين إنها راح تصير زوجة أخوك على الأقل علشاني.
أروى:علشانك بتحملها الشكوى لله.
سعدى تضحك:علشان إنك أختي الصغنونه عديتها لك لكن مره ثانيه ولا ما تمشي على خير كل شي ولاحصيص.
أروى:أوف طيب.
<أحسن ما صار في الموقف إن سعدى قدرت تمسك نفسها ولا تجرح أروى>

[نجد العرب]

((في مجلس الشباب))

ماجد:إدعس يامنصور ماعندك وقت ما أمداهم يجون.
منصور:شفت عاد.
سلطان:هذا هو ماعمره بين شي أثريه ساكت على بلاى.
نواف متحمس:تصدقون يا شباب يمدحون حصه يقولون هي أحلى وحده من بنات العايله بالزين.
منصور:آحم آحم محارمنا ياولد.
إبراهيم:هههههه من هالحين.
أنس بلقافه:لا والله أنا أشوف سعدى أحلى وحده.
طلال:وين شفتها.
دهام:لا تقول إنك قزيتها يومن يلعبن البنات بالحوش.
أنس:لا بلاكم ما تدرون ،،أمس عند المدخل تصاقعت مع سعدى الرجه،،أول مره أشوفها من قريب.
يوسف:يعني شفتها زين.
أنس يضحك:ما شفتها وبس،،إلا مسحت فيني البلاط وقامت تعلق على كرشتي ،،ياربيييه ملسونه هالبنت .
ماجد:يعني هالحين تبي تقنعني أن سعدى حلوه.
أنس: تبي الصدق إيه والله الشهاده لله إنها مملوحه مره،،ملامحها شوي ناعمه لكن نظراتها تخوف حاده ومشعلله تحس إنها تبي تكفخ العالم.
ماجد:تدري إني شفتها ذاك اليوم بس ما قدرت أطالع لها زين عوبا ولسانها طويل.
نواف:بلاك موب حولها تناظر لسديم.
(الشباب ضحكو)
أنس يدافع:صحيح إن شعري أطول من شعرها وماهيب حاطه غير روج والكحل اللي تارس عيونها لكن والله إنها حلوه وتشرح النفس.
دهام:والله لو إنها ملكة جمال ترفع الضغط ،،أحس لو أتزوجها من أول ليله مكافخ .
سلطان :يرحم أهلك إنت وسعدى دمار شامل.
دهام:لا لا أعوذ بالله لا أحد يتفاول لي بسعدوش.
سالم :ههههههههه يا أخي والله إن هالبنت زاحفه بس قسم إنها مسويه لنا جو ,,,خبركم الإجازات اللي قبل نموت من الزهق.
طلال: مالت عليها لا أحد يجيب لي سيرتها ,,سيارتي للحين ما لقيت لها كفر سنع.
ماجد:ما عليك مردوده لها هي والخبول اللي معها.
((يوسف طول الوقت ملتزم الصمت ومحتفظ بإبتسامته الغامضه ولا يحب يخوض الهرج الزايد معاهم))

(في صالة الخاله رقيه)
بشرى وبهمس: حصه تعالي نطلع شوي أبغاك.
حصه وبإستغراب: سمي يا قلبي.
بشرى: سم الله عدوك,,بغيتك بسالفه.
((طلعت بشرى وحصه للغرفه الثانيه))
بشرى: أنا أبغى أدخل معك بالسالفه على طول.
حصه : أبشري واللي بخاطرك من عيوني ألبيه.
بشرى: ماتقصرين.
حصه: عسى خير إنشاءالله.
بشرى: قبل فتره كنت أنظف غرفتنا وطاح بين يديني دفتر خواطر سعدى وإنصدمت بقوة.
حصه وبتعجب:دفتر خواطرها,,من جدك.
بشرى: بالصدفه ,,وللأسف أنا غبيه وملقوفه قرأته.
حصه وبإندهاش:والله لو تدري سعدى لا تقلب الدنيا فوق تحت ويمكن تحرق الدفتر كله.
بشرى: وهذا اللي خوفني إني أقولها وش بخاطري.
حصه: بشرى معليش ترى هذا من خصوصياتها ولاتحب أحد يتلقف عليها.
سعدى: أدري والله أدري لكن غصب عني قرأته.
حصه: طيب وأنا هالحين وش المطلوب مني؟؟
بشرى وبحماس: أعجبني إسلوبها وأحس لها مستقبل بهالمجال ,,,تملك موهبه موب بسيطه,,,حرام والله لازم خواطرها تشوف النور.
حصه وبتفكير:اممممم حاولت فيها بس ما رضت تقول ماله داعي الناس يشوفون شي هم ما عاشوه ولا راح يفهمون عمق الألم اللي خلاني أكتب فيه.
بشرى:طيب يمكن فيه ناس عاشو نفس التجربه وراح يفهمون وفيه ناس ممكن تثير فيهم المشاعر حتى لو ما عاشوها.
حصه وبتفكير: مدري بس سعدى تقول إن مافيه أحد راح يفهم وش هو شعوري غيري عشان كذا ليش أخلي كل من هب ودب يقرأ أحاديث نفسي.
بشرى وهي تحاول إقناع حصه:بالعكس فيها إستثاره للعواطف يعني يومن قرأت خاطرتها عن أمها مره تأثرت وحمدت ربي على صحة أمي وعافيتها.
حصه: والله مدري وش أقول.
بشرى : لاتقولين أنا اللي أقول,,وش رأيك نختار خاطره من خواطرها وونزلها بمجله معروفه.
حصه:لالالالالالالا مستحييييييييييل ماراح ترضى.
بشرى: محد عارفها.
حصه : إنتي مستوعبه إن هذه سعدى اللعب من وراها نكبة النكبات.
بشرى:ما عليك أنا أبي أدور طريقه أقنعها بس إنتي ساعديني.
حصه: والله يا بشرى إني خايفه ,,صديقتي وأعرفها زين موب كل شي يرضي غرورها.
بشرى: ماعليك بس أهم شي أبي خاطره جديده وحلوه لها وخلي الباقي علي.
حصه: أهم شي لاتدخليني بالسالفه طيب.
بشرى: من عيوني لكن تكفيييييين دبري لي خاطره جديده.
حصه وبتفكير عميق: أحااااااااول لكن ما أوعدك.
((تركنا المجلس وإنضمينا لباقي البنات .,,, مر إسبوع ونص على جية حصه,, واللي زادنا حماس ووناسه,قرر منصور إنه يبي يملك على حصه قبل لاترجع للشرقيه,,أنا تضايقت من هالموضوع بقوة,, أحس بدري على الملكه,,أصلن ماكنت متهيئه نفسيا للموضوع,,,ولا أحاول أفكر فيه,,حتى حصه ما سمحت لها تناقشني بالموضوع أو تعرف وش خاطري فيه لأن بصراحه ما أبي أضايقها,,مرت الأيام بسرعه وحلوة إلين ما جاء يوم الخميس بالتحديد,,,كان أصعب موقف مر بحياتي,,كنت متوقعه إنه ما في أصعب من زواج حصه لكن اللي صار لي يوم الخميس أفقدني توازني وإحترقت من القهر والصياح,,وبدأت أعيد النظر في اللي قاعد يصير حولي,,,يوم عصيب بتاريخي تاريخ سعدى شقرديه ماتهاب,,كان بصمه مؤلمه الله لا يعيدها.))

[نجد العرب]

نكمل معكم الجزء الثاني عشر....

[نجد العرب]

<الفصل الثاني عشر>
<<يـــــوم الخمــــــــــــــيس>>
البيت كان فاضي ومافيه غيرنا حنا يالبنات ,, العيال معزومين بقريه ماهيب ببعيده عنا,,وخوالي وخالاتي مجتمعين عند جده عيده في بيت خالي سليمان.
من الوناسه رحنا لمجلس الشباب وبسطنا فيه,,,وجبنا قهوتنا وحب وحلويات وقعدنا نتفرج على التليفزيون لعنبو بليسهم كل القنوات فيه وألا حنا ياحسره مافيه غير قناة السعوديه الأولى والثانيه.,,المهم فليناها سوالف وضحك وتعليقات ما خلينا أحد ما حشينا فيه,,,شوي وتنقز حمده جنب هبوب.
حمده: ونااااااسه لاب توب تكفين إفتحيه دوري طق.
هبوب:هههههههه العيال ما وجيههم وجيه طق.
حمده: لحظه بروح بجيب فلاشي كله مليان طقاقات.
هبوب وهي تشتغل على اللاب:سعدى إركضي أبي أوريك صورة عيال عمي اللي بألمانيا.
سعدى: الله ترى أنبسط على الصور وريني.
>>هبوب لفت الجهاز على سعدى<<
((سعدى قعدت تناظر الخلفيه وصرخت صررررررررخه جامده من قلب))
هبوب تروعت:عسى ماشر وش فيك.
((سعدى مصدومه وسحبت الجهاز تناظر للخلفيه وموب مستوعبه))
سديم نطت:بسم الله عليك ياسعدى وش فيك؟؟؟!!
حصه وهي تمسح على شعر سعدى:قلبي ورى ماتحكين وش صاير.
((كانت الخلفيه مصممه بطريق عاديه جدا,,صورة واحد قاعد على عتبة الباب ومنزل رأسه والخلفيه كانت ضبابيه ,,معالم الصورة غامضه وموب واضحه مره ,,ومكتوب فيها على الطرف بالخط العريض الأبيض
<<<طبعي غريب ولا لقى له مداوي>>
سعدى وهي تحاول تسترد أنفاسها: بسرررررعه هذا جهاز من؟؟!!!
هبوب: وش فيك هذا جهاز أخوي <يوسف>.
سعدى وبصرخه مدويه: يوسف,,يوسف يوسف ماغيره.
حصه وبهلع شديد: سعدى حاولي تهدئين شوي.
سعدى وهي ترجف:هبوب متأكده إن هذا جهاز يوسف.
هبوب: لو موب حق أخوي ما كان تجرأت ومديت يدي عليه,,بعدين شوفي توقيعه.
سعدى ووجهها ضارب ألوان: توقيع يوسف <طبعي غريب ولا لقى له مداوي>.
معالي: يوووه ياسعدى هذا توقيع يوسف من زمن جدتي وكلنا ندري فيه.
سعدى وهي كاتمه العبره:هبوب ممكن الجهاز شوي.
هبوب:عادي بس تكفين لاتدخلين على ملفات يوسف الخاصه والله لايسوي لنا قلق.
(سعدى خذت الجهاز وقامت تفتح ملفات يوسف وتتفرج وهي مصدومه,))
سعدى وبعصبيه: بنات ممكن تخلوني وتبعدون شوي .
(قامو كل البنات إلا حصه حاطه يدينها على ظهر سعدى تحاول تهدئيها,,طبعا سعدى ماتقدر تقول شي لحصه لأنها بالنهاية راح تقول لها كل شي ,,سعدى وهي تتفرج على ملفات يوسف تبغى تلقى الدليل اللي يقطع الشك باليقين...تقريبا دخلت على أغلب الملفات ,,وطاحت عينها على ملف بالمستندات مكتوب بعنوان<<خاص سعود>>,,,يوم فتحت الملف لقت الإيملات اللي ردت فيها على يوسف على إنه شخص مجهول,,يوم شافت وتأكدت إن يوسف هو الشخص المجهول اللي يحبها ويراسلها,,,رمت سعدى الجهاز وهي في حاله يرثى لها وطلعت من الغرفه,, حصه على طول لحقتها))
<<سعدى الشقرديه اللي ما تهاب قعدت بصمت مؤلم ماهي قادره تتكلم ولا تحكي ,,,حصه فاهمه سعدى وما ضغطت عليها ولا حتى سألتها و شفيك<<
سعدى وهي متوتره :حصه أبغى أقعد شوي لحالي.
حصه: طمنيني تراني على أعصابي,,ياعسى الضيقه فيني ولافيك.
سعدى وخانقتها العبره:يا عساها ماتجيك ياقلب سعدى ,,أبغى أرتاح شوي وأوعدك إني أقول لك.
حصه وهي ماسكه يد سعدى:راح أخليك ربع ساعه وأرجع ولو تموتين ما أطلع .
سعدى وهي مغمضه عيونها: ياروحي تسلمين.
<طلعت حصه وقعدت سعدى تفكر بعمق :
((آه آخر إنسان توقعته بالكون,,يوسف صاحب الإبتسامه الرزينه,,,الإنسان الهادئي,,يحب وحده معربجه وزاحفه مثلي,,,صحيح إني أخلاق وما أتجاوز حدودي بالغلط لكن ولا للحظه تخيلت إن يوسف يمتلك كل هالمشاعر,,آه موب مصدقه,,قعدت أسترجع كل المواقف اللي صارت لي معاه يوم كنا بالسوق وكيف كان إسلوبه روعه,,ويوم زعل مني وقال عمرك ماراح تفهمين,,الخواطر اللي كان يرسلها من قلب,,لا وفوق كل هذا شافني ووصفني بطريقه ما كنت متخيله إنها أنا,,آه لا لا ما أبغى أفكر بالموضوع أحس بطني مغصني ونفسي إنسدت عن كل شي,,,خذاني التفكير واجد وندمت إني رديت عليه,,,يـــوسف,,يــــــوسف يحبني موب واضح عليه هذه وش لون جت ,,لكن لا مستحيل أفتح قلبي لأحد أو أسمح لأيا كان إنه يتجاوز معي و يوسف بوقفه عند حده,,أنا الشقرديه اللي ما تهاب محد يلعب معي على الحبلين)
<<سعدى حطت رأسها على المخده ومالها خلق أحد ,,جاء وقت العشاء,,,ودخلت حصه على سعدى>>
حصه تغني وتبغى تلطف جو سعدى: وووش فيك منت راااااايق,,,فيك شي ومتضايق.
سعدى وتصطنع الإبتسامه:لا هالحين راااايقه ,,ماعليك ضيقتي أذبحها لو طولت موبأنا اللي أضيق عشان سي مايسوى.
حصه:تبسم للزمن ترى صمت القهر حراق....وحذاري تذرف الدمعه ولو النفس مجروحه.
سعدى: يالبييييييييييييه فاهمتني.
حصه وبذوق:طيب وش هالشي اللي مايسوى قلبك فوق وتحت.
سعدى: عشان إنه مايسوى وش رأيك مانهرج فيه.
حصه: كيفك بس لاتنسين إنك وعدتيني وخبري فيك ماتتراجعين عن وعد قطعتيه.
سعدى بإبتسامه:تعرفين نقطه ضعفي.
حصه:سعدى ماراح أجبرك لكن ما عمرنا خبينا عن بعض شي,, إهرجي وش صار؟؟!!
((سعدى وبعد تردد قالت لحصه كل شي وخلتها تقرأ الإميلات وقالت لها كل شي))
حصه متفاجئيه:معقوله يوسف هائم فيك ولا أحد شك.
سعدى: وهذا اللي مجنني ومستغربه منه.
حصه:تصدقين إن يوسف يستاهل من يحبه.
سعدى وتخز في حصه: وش قصدك ؟؟!
حصه: لا أبد بس قبل لاتسوين أي شي فكري إن يوسف موب مثلهم,,لو جرحتيه ممكن ينسحب وهو مجروح ولايمكن يهين كرامته علشانك.
سعدى: بالطقاق,,ليش يسوي هالحركه فيني ويراسلني بإسم مجهول ,,ورى ما قال إنه يوسف من البدايه.
حصه: ترى ماينلام لأنه خايف من ردة قعلك ومليون بالميه لو قال لك إسمه من البدايه إنه يوسف ماراح تتجاوبين معاه.
سعدى: شفتي هذا اللي أبي أوصل له,,دام عارف إني ماراح أعطيه وجه ليش يروح لإسلوب النذاله.
حصه: يابنت الأجواد خبري فيك تفكرين زين,,لا يأخذك الكبرياء إنك تجرحين الآدمي.
سعدى وبعد صمت:حصه أنا ما أبغى أعيش تجربه حب ولا أبغى هالشي يصير معاي أنا بالذات.
حصه: وش معنى إنتي بالذات؟؟!
سعدى:اممممم حصه أنا هالحين مطنقره وما أعرف أهرج خليها بعدين.
حصه:وبإبتسامه:براحتك لكن نصيحه لاتجرحين الولد دامه حبك بصدق,,وبعدين ترى فيه بيت يقول لاتندم على من حبيت وخلاك ,,إندم على من حبك وخليته.
((بعد يومين من إكتشاف سعدى لشخصية<طبعي غريب ولا لقى له مداوي>كانت تحاول تبين للجميع إنه مافيها شي رغم إن كل تصرفاتها تدل على إنه فيه حاجه منكده عليها))
هبوب بإستغراب:سعدى بصراحه إنتي ويوسف أكثر ناس معقده شفتها بحياتي ما قدرت أفهم عليكم.
سعدى بربكه: رجاء خاص لاتجمعين إسمي مع أحد.
هبوب: اللاب فيه بلى موب طبيعي.
سديم خاشه عرض بالسالفه: إيه والله صدقتي ,,الله لا يعيدها من ليله,,شكل سعدى يخرع وهي ماسكه الجهاز تصارخ.
<سعدى تحاول تحافظ على أعصابها وتبتسم عشان محد يشك>
هبوب: لا ياسديم إنتي ماتدرين يوسف وش سوى بعد يومن قلت له إن جهازه قلب سعدى فوق تحت.
سعدى وبوجه ممتلئي تعجب:وش سوى؟؟
هبوب: تخيلو مسح فيني البلاط ,,وقعد يسب ويشتم ,,بحياتي ما قد شفت يوسف طالع من طوره كذا.
<سعدى وبداخل نفسها :أحسن يدري إني كشفته على حقيقته النذل>
معالي:لالالا تمزحييييييين.
هبوب: لا وبعد أزيدكم من الشعر بيت,,أمس ما نام هنيا,,راح نام عند واحد من أخوياه.
<سعدى تفاجأت وماردت ولاكلمه>
حصه:ليش ما قال لك وش فيه؟
هبوب: حاولت أعرف لكن ماقدرت ,,أنا يوم وصفت له خشة سعدى يوم شافت توقيعه إنهبل علي.
كادي:تصدقين يمكن متفشل من توقيعه إنه موب ذاك الزود.
(سعدى ساكته وتناظر لحصه)
بشرى: لا ما أتوقع تفكير يوسف كذا,,بس يمكن مايحب أحد يلمس أغراضه.
هبوب:بهذه صدقتي,,يكره أحد يقرب منه أو يعرف عنه شي.
معالي وبفخر: إلا سلطان صديقه الروح بالروح.

[نجد العرب]

<<طبعا البنات ولقوا سالفه يهرجون فيها...وقعدو يتناقشون,,ما يتصدقون يلقون خبر عشان يهذرون فيه,,أما سعدى بوادي ثاني ,,كانت تفكر كيف ترفض يوسف بإسلوب ما يجرحه,,,راحت للغرفه وفتحت إيملها وأرسلت ليوسف:
<<بإختصار من شقرديه ماتهاب عندي لك كلمتين,,,
اللي يحب يا يوسف يكون أرقى من كذا,,والإنسان الصادق ما يلبس أقنعة المجهول عشان يوصل للي يبغى,,عندك شي واجهني فيه من الأول,,لكن الآن يا يوسف ما عاد يمديك على شي,,إمش بطريق وأنا بطريق اللي يودينا لبعيييييييييد وبعيد مره يايوسف ولازم تفهم هالشي.>>
عشر دقايق وجاني رد من يوسف:
<طبعي غريب ولا لقى له مداوي>
((بإختصار إيه أحبك قلتها والله يعين,,
الحب ما يعرف يا سعدى الأقنعه,,,وأنا لايمكن ألبس قناع الكذب,,
حبيتك بأصدق ما أملك ,,وأغليتك من أعماق قلبي,,,إن رفضتيني ماراح أجبرك على شي بس قبل لاترفضين خليك واثقه إني أكبر من إني ألبس الأقنعه,,,
حبي أصدق من قلبك الطاره,,وأنقى من رذاذ على خد ياسمينه,,,حبي أكبر من الوصف ,,
طلبي الأخير لاتحرمين قلبي المحرووووم ياسعدى.)))
قرأت سعدى الإميل وإرتبكت مره وقاعده تقول لنفسها:من وين طلع ذا الآدمي,,موب فاضيه له يعكر جوي ويخليني غصب أحبه.
<مسكت سعدى الكيبورد وردت عليه بكلام قاسي كله تجريح لكن تذكرت كلام حصه يوم قالت لاتجرحين واحد مثل يوسف تندمين>
قعدت سعدى تفكر وش لون ترد عليه بطريقه تبين إنها رافضته بس بدون ما تجرحه,,ذبحها التفكير وأخر شي قررت تكتب له هالأبيات:
<شقرديه ما تهاب>
يمكن يكون الصدق هالوقت معدوم,,,
ويمكن بعد مريت في حب فاشل,,,,
أشياء كثيره تخلي إظنونك تحوم,,,
وتنثر على درب السعاده قنابل,,,
الحب مبطي له تقاليد وسلوم,,
ويا شيخ في ذا الوقت تحصيل حاصل,,
شفني تعبت أقوم وأطيح وأقوم,,,
وجسمي من طعون العلاقات ناحل,,
مالي ترى بالحب مقسوم,,
وتاريخ حبي بالخيانات حافل,,
زيك من الحب محروم,,
ويمكن بعد مريت في حب فاشل,,
ركز معي هالحين برجد لك علوم,,
إسمع إذا حدك من الضيق واصل,,
إسجد لربك إذا إمتلئ قلبك هموم,,
ربك على تصريف الآحزان كافل,,
تلقاه بالشده معك دايم الدوم,,
يوم إنك بوقت الرخا عنه غافل,,
وإن كنت ناوي تحب من بعد هاليوم,,
خل الوطن والأهل هم الآوائل,,
((بعصبيه قفلت سعدى الجهاز وراحت للبنات,,لكن سعدى ما إرتاحت ,,كل ساعه تروح تشيك على إميلها تشوف إذا وصلها رد من يوسف لكن للأسف ما حصلت شي,,,سعدى تعبت نفسيا,,وتغير مزاجها,,كل شي توقعته إلا شباك الحب المفاجئي,,صارت سعدى تحت ضغط نفسي كبير,,وش هو الحب اللي يدور عليه يوسف,,وليش أنا موب راضيه أستوعب إحساسه ومشاعره الجياشه,,يعجبني يوسف ويمتلكني هدؤه,,,إبتسامته تأخذك من حدودك هنا لأبعد حدود الزمن هناك بس ما كنت أشوف إنه هالأشياء تعني لي أي حاجه لأني أشوف يوسف له مكانته بس موب داخلي))
ترن_ترن_ترن
سعدى:آلووووو.
هبوب:سعدى وينك؟
سعدى وبسخريه:بالمريخ يعني بالله عليك وين راح أكون.
هبوب:سعدوش تكفين طلب لاترديني.
سعدى وبشهامه: آمري رقبتي سداده.
هبوب:إنتي عارفه إن ملكة حصه قربت وأبغى أشتري لها هديه لكن ما أعرف وش الشي اللي تحب.
سعدى:عادي اللي منك حلو.
هبوب: لاتكفين أبغاك تروحين معي ولاتدري حصه.
سعدى:أوكيشن ماعندي مشكله.
هبوب:طيب إطلعي إلبسي عباتك هالحين أنا جايه.
سعدى :ليش إنتي وينك؟؟
هبوب:أنا عند مريم بنت جيراننا تبغاني في شغله.
سعدى:من راح يودينا؟
هبوب:طبعا يوسف أخوي بالله تبيني مثلا أروح مع ماجد.
سعدى:خلاص موب رايحه معك.
هبوب وبنرفزه:أجل مره ثانيه لاتقولين رقبتي سداده وإنتي موب قدها.
((ههههههه عرفت هبوب نقطة ضعف سعدى))
سعدى وبتردد:أنا قد كلمتي خلاص تعالي بروح معك.
(طلعت سعدى وهي في حاله من الإرتباك,,كان كل همها إن يوسف ما يحس بربكتها,,علشان مايجي في باله إن سعدى مهتمه فيه أو في موضوعه))
<ركبت سعدى وهي موب قادره تقول ولاكلمة>
يوسف: مرحبا سعدى.
سعدى وهي تحاول تمسك نفسها:هلابك.
يوسف يحاول تجاذب أطراف الحديث:مبروك خطبة حصه.
سعدى:الله يبارك فيك.
يوسف:عقبالك يارب.
سعدى وبنرفزه: أقول لايكثر.
(يوسف سكت وما رد,,هبوب إستغربت من إسلوب سعدى مع يوسف,,تحس إنه فيه شي موب مفهوم حولها)
نزلت سعدى وهبوب بالمول وقعدو يتسوقون وبعد ما خلصو قالت هبوب لسعدى..
هبوب: سعدى خلينا نقعد بالكوفي شوب رأسي مصدع أبي قهوة إسبرسو. .
سعدى:إنشاءالله قهوة سيلانيه أنا أبي أي شي.
هبوب:ههههههههههه.
(قعدنا بالكوفي وهبوب أحلى ما فيها من النوع اللي يحب النقاشات بس أعطها طرف السالفه تجيك داعسه طبلونها كله,,))
سعدى وبداخل نفسها:يالليل هذا يوسف وش يبي جاي صوبنا لايكون يبي يقط وجهه معانا.
(يوسف أقبل على هبوب وسعدى)
يوسف:هاه خلصتو.
هبوب:إيه لكن تعال إقعد تقهوى معنا.
(هنا أنا قفلت معاي الأخلاق،،وش يقعد معانا عسى ماشر،، أكيد إنه إستخف)
يوسف:والله إنها موب شينه القعده معكم.
(سعدى ساكته ماردت)
هبوب:حياك.
يوسف:معقوله خلصتو بسرعه خبري في البنات ساعتهم بسنه.
هبوب<تذكرت شي>:لا مستحيل تذكرت ما عندي عطر.
سعدى وبوجه ضارب ألوان:موب لازم اليوم تشترين خليه يوم ثاني.
هبوب مستعجله:مستحيل إذا ما أخذته هالحين مافيه وقت ثاني.
سعدى:وش هالبلشه ياهبوب.
هبوب:ثواني بروح ركض للمحل اللي هناك.
سعدى وبتعجب:خير وتخليني بلحالي.
هبوب:سعدى المحل قدامك موب بعيد،ماراح أطول.
(هبوب ما أعطت فرصه لسعدى تناقش معها وركضت بسرعه مع السلم المتحرك،،بقي يوسف مع سعدى)
أصعب حاجه بالدنيا إن الواحد ينحط بمواقف زي كذا ،،مايعرف يتصرف أو يأخذ ردة فعل سريعه،، بثواني حسيت إني تشتت،،لكن سنين الوقت كلها ماراح تجمع هالشعور،، أنا ويوسف بيننا بس طاوله،،فجأه إحساس الدنيا خذاني لعيونه،،والله ماهوب شوق ولا هو حب أو وله،، شي غريب بس الوكاد إني أكابر ولا أبيه.
يوسف قطع سلسلة أفكاري:ممكن أهرج معك سعدى.
(سعدى وهي تناظر للناس الجايه والرايحه وماردت عليه)

[نجد العرب]

يوسف بذوق:ممكن تسمعيني شوي؟؟
(سعدى مازالت ساكته ولا تبي ترد)
يوسف:مشكورة على الأبيات اللي أرسلتيها كأني فهمت إنك ماتبين تعيشين قصة حب جديده.
سعدى إنصدمت:عفوا أنا ماعندي تجربه قديمه عشان يصير لي وحده جديده.
يوسف بهدؤ:طيب مالك خاطر يصير لك تجربه من هالنوع.
سعدى وبنرفزه:يوسف إختصر وبلا مقدمات وش ورى هالهرج؟!.!
يوسف:اللي وراه قلبي.
سعدى:وقلبك وش يبي؟؟
يوسف: يبغاك ياسعدى.
سعدى وبدأت يدها ترتجف من الربكه:يايوسف لاتحلم واجد,,أنا أبعد من السماء عن الأرض.
يوسف يحاول يقنعها:ليش موب فارس أحلامك وألا القلب فيه واحد ثاني؟؟!
سعدى وقد إحتد توترها:أبغى أفهم ليش إنت مصر إن في قلبي أحد,,يا أخي لا إنت ولاغيرك,,أنا موب حول هالأمور ولا أبيها.
يوسف:الحظيظ اللي مشى قلبه بطوعه,,ياحظك اللي قدرتي تمنعين قلبك عن الحب.
(سعدى ماردت عليه ولاكأنه موجود))
يوسف يواصل إقناعها بالرغم إنه يحاول مايهين نفسه:سعدى أنا ما أبغاك تفهميني غلط أو تحطين في بالك إني ألعب على الحبلين,,,ماتراسلت معك,,بشخصيه مجهوله إلا إني أبغى فرصه أوضح لك اللي عندي علشان أقل شي إذا صرحت بهويتي تتقبليني .
سعدى :هذا موب إسلوب,,عموما بكل الحالتين الموضوع مايفرق معاي,,,ومنتهي بالنسبه لي ,,ياليت تصك السالفه يكون أحسن.
يوسف:سعدى أعطيني فرصه أعبر لك عن اللي في خاطري.
سعدى وهي مرتبكه:معليش يوسف مضطره أقوم عندي مكالمه.
يوسف ومايبغى يهين نفسه:لا تحاولين تتهربين أنا اللي راح أقوم,,وإذا جت هبوب أحتريكم بالسياره.
((راح يوسف وراح وهو شايل معاه قلب متحطم,,أدري إني قسيت عليه ,,بس لاهو بيديني ولاهو بيديه,,ما أبغاه يتعلق أكثر من كذا,,قعدت أناظر له وهو يمشي بكبرياء,,,ما كأن ورى هالجسد قلب عاشق ممتلئي بالجروح,,آه ياترى اللي سويته صح أو غلط,,يوسف قلب الدنيا علي,,معقوله يكون مقلب مسوينه فيني يبغون يكسرون شوكتي,,بس لا لا مستحيل يوسف أرقى من إنه يحرج نفسه أو يتلاعب في أحد,,أفكار واجد لعبت في حسبتي وعكرت مزاجي,,..
هبوب وبصوت عالي:بنت وش فيك صار لي ساعه أناديك.
سعدى وكأنها قامت من سبات:لالا بس كنت سرحانه شوي.
هبوب:لايكون تأخرت عليك.
سعدى: لاخلينا نمشي يوسف بالسياره.
هبوب:بسرعه تكفين تأخرنا عليه عنده دوام بكرا بالجامعه.
سعدى بإستغراب: ليش هو للحين يدرس.
هبوب: لا بس يوسف محاضر بالجامعه.
سعدى:خير من جدك تهرجين.
هبوب:غريبه ليش ماتدرين!!
سعدى :والله الغريبه إنه مع هالمصرقعين.
هبوب:هههههه أجل لو قلت لك إن ماجد يشتغل مهندس معماري وش تقولين.
سعدى صقعت الطاول من هول الصدمه: والله لوتحلفين من هنا إلين بكرا موب مصدقتك.
هبوب ميته ضحك:هههههه أدري موب مبين على خشته.
سعجى: الشغله هذه يبغالها ناس راكدين موب واحد مجنون مثل ماجد ياكافي.
هبوب:أجل خليني أصدمك بعد,,تدرين إن أنس يحضر الدكتوراه في علم المايكروبولوجي.
سعدى حطت يدها على رأسها:لالالا هذا الدب يبي يصير دكتور جامعي,,وبعدين وش ذا التخصص اللي يلوع الكبد.
هبوب:لا وأزيدك من الشعر بيت سالم مدرس عربي.
سعدى طاحت ضحك:هههههههههه سالم هذا النكته المفهي مدرس عربي ,,عز الله راحو فيها طلابه.
هبوب ميته ضحك:مره سالم يقول دخلت الفصل ومشتهي أضحك,,فقلت للطلاب اليوم مافيه درس لكن ما أقدر أخلي الحصه فاضيه,,علشان كذا راح نطبق اللغه العربيه بالنكت وأنا بقول لكم نكته ثمن بعدين إنتم<<رأى ثعلب غرابا فوق الشجره وفي فمه قطعة من الجبن فقال الثعلب الماكر<أيها الغراب غني لي بصوتك الجميل>>,,فوضع الغراب قطعة الجبن تحت جناحه وقال ليش وش عالى بالك تحسبني الدلخ اللي في كتاب المطالعه.
سعدى فاقعه ضحك:موووووب صاحي وربي مهووس نكت,,ياحظ طلابه حظاه.
(وصلنا أنا وهبوب السياره وكان يوسف مره متضايق ومطنقر,,والله إني حاسه فيه لكن مقدر أجبر نفسي على شي ما أبيه.,,وصلنا البيت ونزلت بسرعه أبي أفتك من هالقلق اللي في داخلي))
هبوب أول مانزلت سعدى ناظرت ليوسف:الله يقطع شرك أحرجتني وحطيتني بموقف ماله داعي.
يوسف:تسلمين ياهبوب والله ماراح أنسى وقفتك وأنا أخوك.
هبوب: أموت وأعرف وش كنت تبي في سعدى,,وليش كل هالحوسه اللي سويناها؟؟
يوسف يصرف:اممم فيه موضوع عن سلطان ويبغى معالي تعرفه وموب عارف كيف فقلت له مافيه أحسن من سعدى.
هبوب:اها عسى ماهوب كايد.
يوسف: لا أبد مامن خلاف.
هبوب:الله يوفقهم.

[نجد العرب]

<<في المجلس الخارجي للنساء>>
حصه:سعدى الله يخليك لا تحسسيني إني غريبه من أمس ووضعك موب عاجبني!!
سعدى وتتظاهر بالقوة وبإبستامه ذابله:الله يوفقك ياروح سعدى مافيني شي ولا تنشبين لي واجد.
حصه:قابليني روحتك أمس مع هبوب ويوسف موب عاديه.
سعدى:لا والله كل شي كان عادي لكن....
حصه:لكن وشو.؟؟
((سعدى ما طاوعها قلبها تخبي شي عن حصه,,وقالت لها كل شي صار مع يوسف))
حصه وبتعجب:سؤال يسدح نفسه,,إنتي وش تبين بالضبط؟؟
سعدى:ما أبي شي ولا أبيه يحبني.
حصه:تكرهين يوسف ياحصه؟؟
سعدى بإستغراب:وش بيني وبينه عشان أكرهه.
حصه:مدري عنك,,مسويه قلق وصاكه الدنيا بوجه يوسف.
سعدى:والله ياحصه إنتي اللي مسويه زحمه والشارع فاضي.
حصه:ماراح أهرج معك واجد بس ماعندي غير كلمه,,بتندمين لو جرحتي إنسان مثل يوسف,,,بس لاتكابرين.
سعدى وبتفكير:كبرياء وش دخل ذا بموضوعنا.
حصه:إنتي تكابرين ولاتبغين تعترفين حتى بداخلك إنك تحبينه.
سعدى وبعصبيه:حصه أنا بدأت أدخل معمعه مالها داعي تكفين لاتضغطين علي.
حصه:وش المشكله لو أعطيتي يوسف فرصه.
سعدى وبنرفزه:بإختصااااااااار أنا ما أبغى أعيش تجربة حب خلاص فهمتي وإرتحتي.
حصه:طووووول عمرك عنيده.
سعدى:أوف صكي الموضوع لاعت كبدي.
(قامت سعدى وهي متضايقه,,ومسكت اللاب وكالعاده فتحت إيميلها تشيك عليه,,جاءه إيميل بعنوان
<علمتني دمعتي سر السعادة,,يوم جربت الشقاء ميزت نوعه>,,كان الإميل من يوسف وكاتب فيه<حاولت أجمع كل الحكي ومالقيت شي يوصف الألم اللي في داخلي,,خواطري كلها سطرتها لكن ما أثرت فيك..لعل وعسى الشعر يلقى مدخل لقلبك وتفهميني.
ومرفق معها هالأبيات:
تدري لو قلت لك قصة حياتي بالأبيات,,
كان إدمعت عينك بدل دمعها دم,,,
محبوس منها داخل العين عبرات!!
وقلبي في ذكراهاحزين ومغتم!!
قصه تعاسه،وحزن ،والام،وأهات!!
وجرح وعذاب القلب هم ورا هم!!
مكتوب لي أسهربليلي ولاأبات!!
أجمع بقايا أنسان تاه وتحطم!!
تاهت دروبي بدنيا المتاهات!!
تايه أدور نور بليل أعتم!!
أنا قتيل الهم عايش ولامات!!
الروح ماتت مابقى غيرهالجسم!!
مرات أنا أشكي وأبكيهمرات!!
ومرات أقرر أنتحر لكن أندم!!
حتى حبيبي اللي مع بالمسرات!!
راح وتركني وصد عني وماأهتم
(حست سعدى إنه هالإميل هزها,,وقامت تمسح عبرات من دموعها خنقتها,,أشياء كثيره ماهيب قادره تفسرها,,أصعب حاجه على الإنسان القوي إذا حس بالضياع,,وده يسوي شي لكن يكتشف إنه مية حاجه وحاجه توقف في طريقه,,وبعض الأحيان وده يصيح لكن عزة نفسها تخليه يكابر لآخر لحظه)
صكت سعدى اللاب وحطت رأسها على المخده,,خذاها التفكير,,وقعدت تفكر:ياترى معقوله كل اللي يصير,,وش هالقدر اللي جمعنا نقعد على طاوله مافيه بيني وبينه إلا (رقيب وعتيد),,,وش بلاني ما قدرت أفهم هرجه,,,أو أستوعب وش هو يحس فيه؟؟,,إيه أعترف صحيح يوسف يجذبني,,هدؤ وعقل ومايخلو من شوية لقافه,,ملح أهل نجد كلها فيه,,إن بغيت أحكي عن عيونه ضعت فيها,,أو إبتسامته اللي خذتني لعالم غريب,,أشياء كثيره مالها تفسير,,مشاعر تزاحم بداخلي كلما شفت هالوجه السموح,,,وش أخسر لو عطيته فرصه إن كان صادق ونيته ماوراها لف ودوران,,أصلأ وش هي عيوبه يومن أصده,,لكن لالااالا موب سعدى اللي تحتاج لمشاعر أحد,,موب سعدى اللي تدخل قصة حب مالها ساس,,
آه يازحمة الكلام اللي بعثرت كل المشاعر,,وياقسوة الأيام اللي خلتني بليا مشاعر,,يمـــــه ياليتك هنيا حولي يمكن أفهم وش يصير,,أو أرتب نفسي من جديد,,ضعت من بعدك وتحديت الدنيا عشان أقوم مره ثانيه,,ما أبي أطيح وأضيع كافي ضياااااااااااااااااااااااااااااااااااااع,,,كاااااا افي يايوسف قسوة الدنيا علي كافي لاتزيد همي هم..))

<<الســــــــــــــــــاعه 10 صبــــاحــــا من إشراقة يوم جديد>>
سديم:بنات بقول لكم شي.
أروى بلقافه:وشو؟؟
سديم:بنات إنتم ملاحظين شي على سعدى.
بشرى:اممممممم مثل وشو؟؟
سديم وبتفكير:مدري هالإسبوعين موب على بعض وراها شي.
معالي:إيه صدقتي أحسها بايعه الدنيا وأخلاقها قافله.
هبوب:حتى إبتسامتها أحس تجامل فيها ,,موب طبيعيه فيه شي منكد عليها.
((يوه صدقت سعدى هالبنات مايتصدقون خبر يلقون شي يهرجون فيه)))
حمده:إش إسكتو خلاص جت.
سعدى وبصوت منهك :أروى هاتي لي بسكوت من المطبخ وكوب شاهي.
أروى:من عيوني الثنتين.
(رمت سعدى نفسها على الكنب بتثاقل شديد.,,كأن كل الدنيا فوق رأسها وتفكر بآخر إيميل من يوسف))
معالي وبصوت نشاز:ياااااااااااهووووه,,,ياعرب وين وصلتي,,سعدووووش.
سعدى صاقعه فهاوه:هلاهلا معكم ,,هاه وين وصلتو.
فوزيه:هههههههههه حنا هرجنا عشان نوصل.
سديم:لالا سعدى إنتي فاصله وبقووووووة.
بشرى:تكفين سعدوش إرجعي للشبكه وإشبكي معنا بالخط نفس سعدى اللي قبل.
سعدى وبضحك:ههههه ماعليك برجع بس خبركم العواصف الرعديه والأمطار عطلت الشبكه شوي.
حمده:إلا سعدى وش رأيك أعلمك الرقص المصري.
سعدى:خييييييييييير وش تحسين فيه!!
أسماء:لا سعدى علموها الهيب هوب((رقصه أجنبيه)).
سعدى تناظر لأسماء ودها تصطرها:إلا أسماء وش رأيك أعلمك الهرج السنع ووخري عن الدلع الزايد ,,ترى الصخل شين لاتدلع.
أسماء:وع إيش هالأمثال هذه البايخه,,بعدين أنا صوتي وجمالي طبيعي من ربي.
سعدى:أقول وخروها عني لأعلمها وش لون الجمال الطبيعي على أصوله.
(البنات قعدو يضحكون))
سعدى:إلا حصوص وينها؟؟
أروى وبغيره:وإنتي هذا اللي همك ماغير تسألين عنها وحنا ساحبه علينا جلنط.
سعدى:ههههههههه أما جلنط أشوفك عربجتي.
سديم:سعدى دريتي عن آخر خبر,,,سلطان تقدم رسمي لمعالي وملكته بتكون مع منصور بنفس اليوم.
سعدى نطت من الفرحه:قولي قسم.
سديم:قسم بيكون بعد إسبوعين.
سعدى تناظر لمعالي:حبتين ,,يله تستاهلين الله يوفقك ويجمعكم على طاعته.
(معالي ينقالك مستحيه منزله رأسها وألا هي بديره والحياء بديره))
سديم:عقبالي يارب.
<قعدو يضحكون البنات عليها>
((قمنا تغدينا على حود الساعه 3 العصر,,وخذتنا السوالف ,,سالفه تجر سالفه إلين ما صدع رأسي,,بعد المغرب تقريبا ركب الشيطان فوق رأسي,,وجاء في بالي أرد إيميل قوي على أبيات يوسف اللي أرسلها,,أبغى أوقفه عند حده,,تعبت من كثر التفكير والهواجيس ,,خلاص أبغى أحط حد للسخافات اللي مالها سنع,,حتى إجازتي تنكدت يعني ما بقى إلا كم إسبوع وبسافر ما أبي جوي يخرب.فتحت إيميلي ورديت على يوسف:
بيض الله وجهك ياللي ساتره تحت القناع,,
ورايتك بيضا معي وياعسى عمرك طويل,,
يعني أعطيك الثقه وتردها بلوي الذراع,,
يا أخي ماشاءالله عليك أبدعت في رد الجميل,,
وعلى فكره بعد في خاطري شي ثاني ودي أقوله لك يايوسف:
والله لو تبعد فلا همني رضــــاك .. واسمع كلامي زين دام انتهـــــادي
ماكنت شي وشلون ازعل لفرقاك .. عادي وجودك كان وان رحت عادي
جايزاكون اول تعاطفـــــت وياك .. لكن فبالي كان تركك وكـــــــــادي
لاتنفعللاتثور لاتبرر خطـــــــــاك .. ماينفع الغرقان مـــــــــدالايادي


بعد ماتم الإرسال,,قرأت وش أرسلت إنصدمت,,حسيت إني إنسانه بلا إحساس ولا عواطف,,يوسف ما يستاهل مني إلا الخير,,هذا جزاءه اللي حبني بكل صدق,,أنا متأكده عقب ذا الكلام والله ماعاد يلتفت صوبي ,,الرجل أهم ماعليه كرامته ولاإنجرحت كرامته الموت أهون عليه ولايرجع للي أهانه.
(زادت ضيقة سعدى وحصه طول الوقت تحاول تخفف عنها,,لكن سعدى متمسكه بموقفها ولا تبغى تتنازل عن كبرياءها,,وزاد عنادها ماتبغى تضعف بأي طريقه حتى قدام نفسها.,,بعد ما أرسلت سعدى الإميل قعدت ثلاث أيام تنتظر يوسف يرد على كلامها لكن للأسف الشديد ماجاها أي رد منه.
((من عذره ما باقي إلا تمسح فيه البلط مايسوى عليه المسكين))

[نجد العرب]

<< الفصل الثالث عشر>>
(في الصــــــــــباح ,,الجو رايق وراكد وكان هدؤ)
بشرى بإسفهلال:بنات اليوم فله ووناسه.
سديم وفيها بقايا نوم:يا الله صباح خير،،أمدانا نصبح علشان نعرف شي.
كادي:عسى الفال طيب.
بشرى: البيت فاضي اليوم. ,,ماجد يقول إن خوالي كلهم عند خالي سليمان والشباب راحو يأجرون إستراحه ويمكن ينامون هناك.
سعدى:يالبيه هذا السنع،، كذا الواحد يزحف على كيفه.
حصه:ياقلبي يا منصور يعني موب شايفته اليوم.
<البنات هجمو على حصه>
هبوب:على الأقل منصور يروح ينبسط لكن يوسف اللي من يومين مدري وش بلاه.
<سعدى ميته تسأل عنه بس كبرياءها منعها وقامت تناظر لحصه إنه إسألي>
حصه فهمت على سعدى:ليش يوسف موب رايح معاهم.
هبوب وبتنهيده:يا بنات الولد فيه بلاى قالب 180 درجه وصاير أهدأ من أول وماعاد يطيق يهرج معانا،،وصاير ماله خلق لأي شي حتى لأعز أخوياه سلطان.
حصه وبفضول:طيب ما سألتيه وش مضايقه.
هبوب:مستحيل يتكلم لكن إستغربت يقول إنه يمر بإختبار صعب وشكله بيرسب.
حصه فهمت السالفه وقامت تناظرلسعدى بتوعد:هبوب خبري ما يدرس يوسف هو موب محاضربالجامعه.
هبوب:إلا بس أنا وش دراني عنه عجزت أفهمه،،وأمس أخذ أغراضه وسافر.
(سعدى شهقت شهقه الكل إنتبه عليها)
كادي:وش فيك سعدى؟!
سعدى وبتصريفه:لا بس الشاهي حار حرق لساني.
أروى:يوسف وين سافر؟!
هبوب:يقول أبي أروح للرياض ويمكن موب راجع إلا نهاية الإجازه.
(سعدى كأن أحد أعطاها كف على وجهها،،قامت طلعت من المجلس بسرعه ولحقتها حصه في الحوش)
حصه:وش صاير لايكون مسويه للولد مصيبه اللي نحشتيه من الديره كلها.
(سعدى ضمت حصه بقوة وهي موب عارفه وش تقول)
حصه:سعدى حرام كافي اللي تسوينه في نفسك وفيك،،إنتي تحبينه لكن رافضه تعترفين.
سعدى وبربكه:ماعاد أعرف وش أبي بالضبط.
حصه وأول مره تعصب:ضايعهوضيعتي مشاعر صادقه من بين يدينك.
سعدى:حصه لا تقسين علي مدري وش السواة؟
حصه:إعتذري له يمكن ويمكنيسامحك.
سعدى وبشموخ:معصي أنا أعتذر من أحد.
حصه وبنرفزه:لا تكابرين على شي غلط،،جرحتي يوسف وما تبين تعتذرين هذا قمة الضعف.
سعدى:حصه لا تقولين عني ضعيفه.
حصه:إذا إنتي قويه صلحي غلطتك بكل ثقه.
سعدى وبتنهيده:حصه مدري أوف.
حصه:سعدى لو يوسف فيه عيب كان عذرتك لكن مافيه إلا الزين وعلوم الرجال.
سعدى عصبت:خلينا ندخل لا أحد يشك.
(دخلنا عند البنات،،اليوم كان بدايته حلو ،،هياص ودجه وقعدنا لأول مره في مجلس الشيبان،،كله مليان دلال ومعاميل وتحس إنك بمجلس هياط وإسترجاع التاريخ الأغبر،،قعدنا نصور ونستهبل،،لكن دايم يقولون إن الفرحه ما تتم وإن لكل شي إذا ما تم نقصان،،إما إن الشقاء مكتوب لي أو هذا إبتلاء،،بينما حنا قاعدين ومستانسين طق باب المجلس،،إرتبكنا لأن حاطين في بالنا إنه مافيه أحد،،لبسنا جلالاتنا بسرعه،،دخل إبراهيم وهو وجه أسود يخرع وداقها لطمه بالشماغ،،وكان ساكت:
سعدى بتشكك:إبراهيم في أحد صاير له شي.
(إبراهيم ساكت يمسح دموعه)
شوي ويدخل دهام وعيونه حمر ومتلطم بشماغه ومعاه نواف ومنصور وسالم وحالتهم يرثى لها.
سعدى وبصراخ:وش فيها وجيهكم كذا مصفوقه،،ردو يمال الخرعه وش صاير.
معالي:يا شباب ماله داعي تخرعوننا بسرعه تكلمو.
أسماء:يممماه ليش تصيحون وعيونكم حمر.
(شوي ويدخل طلال ومعاه أنس مقطع نفسه صياح والعيال يمسكونه ويحاولون يهدأون ما فيه أمل أنس قطع نفسه صياح،، كادي يومن شافتهم كذا وهي ما تدري وش السالفه تأثرت من صياحهم،، سعدى كل عضله من جسمها صابها فتور من كثر الخوف وما تدري وش السالفه)
سديم وبكلمات متقاطعه:أعوذ بالله واحد منكم يهرج وش صاير؟
(دخل سلطان وماجد يوم شفنا أشكالهم تأكدنا إنه فيه مصيبه صارت لكن في من الله أعلم)
سعدى وهي ميته خوف:ماجد دخيلك وش السالفه.
ماجد وبعد صمت عشر دقايق:يا سعدى كذا حال الدنيا وكلنا على نفس الطريق.
(يوم قال كذا صكت الدنيا فيني،،مافيه أحد ماطرى في بالي،،ما أبغى اسأله وإنصدم،،أبي أطلع قبل لا يتكلم لكن مامن فائده.)
هبوب وهي ترجف:من ياماجد اللي توفى؟؟!
(ماجد ومنزل رأسه وموب قادر يتكلم)
سعدى مسكت ثوب ماجد من قدام وتهز فيه:إخلص تكلم من توفى!!
ماجد وهو موب قادر يناظر لسعدى:ترحمو عليها ماينفع إلا دعاءكم.
فوزيه:طيب هي من؟!
ماجد وبتردد:الله يشفع فيها،،دموعكم والله ماتنفع.
(العيال يشاهقون من الصياح)
ماجد وأخيرن هرج:ترحمو على جده عيده.
(البنات صرخو صرخه فجرت المجلس)
<أنا حامت كبدي موب قادره أستوعب أول مره دموعي تنزل أربع أربع لا شعوريا،،قعدت على الكنب وكل ذكرى مع عيدوه جتني،،،
معقوله كذا أفقدها بكل سهوله أفقدها،،الإنسانه الوحيده اللي عوضتني عن الأم لكن ما كنت حاسه بهالشي أبد،،صحيح إنها ملسونه بس كل شي فيها كان مسوي لي جو،،حصه تضمني وتصيح والكل قاعد يبكي بطريقه هستيريه وأنا موب مصدقه مستحيل هي ماكان فيها شي،، نزلت رأسي على المركا،،الدنيا دارت فيني وأحس إختنقت،،أنا اللي بحياتي ما بكيت قدام أحد حتى قدام نفسي إنهرت بالمجلس،،
<صح أعترف والله أعترف أحبك ياجده عيده،،كنت أكابر أو يمكن ماحسيت بقيمتك،،ذكريات عشتها معك،،معقوله كذا راحت،،ماتت وأنا حتى ما إعتذرت منها،،حتى ما قلت لها إني أحبها،،ليش كذا؟؟ليش إذا فقدنا إنسان عزيز مانحس بقيمته إلا بعد ما يضيع بين يدينا،،ليش كنت دايم حاطه في بالي إني ماراح أفارقها رغم إن الموت مكتوب ومقدر،،هذيك اللحظه حسيت إني أضعف إنسانه،،أنا كنت من أول ضايقه فيني الدنيا بسبب موضوع يوسف وهالحين موت جده عيده هذه الشعره التي قصمت ظهر البعير.
ماجد:خلاص ياسعدى ما ينفع اللي تسوين.
(هبوب قامت ترجف وأغمى عليها، والبنات تخرعو بزياده وبعد عشر دقايق من الصياح الشباب قعدو يحاولون يسكتوننا والكل يحاول يلطف الجو لكن الموضوع أكبر من أي كلام،، الموضوع إنه جده عيده ما عاد لها رجعه خلاص)
آه أصعب اللحظات اللي تخليك تفقد قوتك،،وتفقد توازنك وتدوس على كبرياءك يومن يجيك خبر وفاة شخص عزيز على قلبك،، ما قد إعترفت لعيدوه إني أحبها أو حتى فكرت بيوم من الأيام إني أضمها لأني ما كنت متوقعه هاللحظه،، آه ياصعبها من دقايق،،أبغى جده عيده،،آه يا جده كذا معقول تتركيني حتى بدون وداع،،قعدت أرجف من الخوف بهاللحظه هذه ما تمنيت إلا يوسف أبغاه جنبي )
سلطان:يا بنات الحمدالله على كل حال إحتسبو الأجر.
(أنس قطع نفسه صياح،، أما سعدى ما عاد تحس بنفسها أو تستوعب وش تقول وحصه ما سكتها عشان ما تسوي في نفسها شي)
حمده وهي ميته صياح:سعدى حبيبتي لاتسوين في نفسك كذا مالنا إلا الصبر.
(سديم ما هيب قادره تقول ولاكلمه)
بشرى تبكي من قلب:إنا لله وإنا إليه راجعون.
(الجو اللي عشناها هاللحظات كان أبشع جو مر علينا،،دموع وبكاء،،حاله من الإنهيار،،وشعور بمرارة الذنب ،،الدنيا قست علينا وأهدت لنا مع قسوتها نظرات شفقه وقهر)
إستمرينا على هالحال ربع ساعه،،وحالتنا حاله ،،وكل ما فينا يعبر عن الحزن والألم،،
ماجد وبصوت جهور:هيه خلاص صدعتن روسنا إسكتو أعوذ بالله.
(سعدى تناظر لماجد بحسرات ودها تقوم تكفخه،،)
طلال:فيه أحد على الباب يا بنات.