رواية/ سعدى شقرديه ماتهاب و عربجيه غير عن كل البنات

[نجد العرب]

(فيه صوت ماهوب غريب ولا يمكن يكون غريب)
<<ياجعلكم ما تربحون إنشاءالله من عيال،،جرجرتوني جرجره يامال الماحي اللي يمحى العدو من على وجه الأرض>>
(سعدى مصدومه وما هيب قادره تتحرك من مكانها)
سديم وبصرخه:مستحيل هذا صوت جده عيده.
(فتح طلال الباب وإذا الجده عيده بكامل صحتها ومعها عصاها اللي ياما صقعتنا فيه)
<البنات من هول الصدمه والفرحه صاحو بزياده،،وقعدو يركضون لجده عيده اللي تحب رأسها واللي تضمها وتبكي عليها،،الجده عيده تروعت ما هيب داريه وش صاير>
ماجد يناظر لسعدى:كان ودنا نخلي المقلب يستمر لكن بصراحه دموعكم كسرت خاطري.
سديم وهي تصيح:إنتم سافلين.
أروى تمسح دموعها:موب معقوله وصلت فيكم هالحقاره.
معالي مصدومه:الشرهه موب عليكم،،الشرهه على اللي يعتبركم رجال.
(أبوك يالمقلب البايخ يا شين مزح العيال دفاشه في دفاشه)
(البنات قاعدين يسبون ويشتمون الشباب،، والعيال ما غير فاطسين ضحك)
سعدى وبهدؤ غير معتاد منها طاحت على رجول جده عيده وتحبها وتصيح،،الشباب والبنات إنصدمو من ردة فعلها ومره تأثرو لموقفها.
جده عيده:بسم الله عليك يابنتي شكلها عين ما صلت على النبي.
(من عذرها المسكينه مستغربه سعدى وتحب رجولها هذه معجزه)
سعدى قامت وقبل لاتطلع ماتكلمت ولا كلمه بس ناظرت لماجد وأعطته كف جامد وطلعت.

<في غرفة البنات>
تجمعو البنات بالغرفه وكل وحده فيهم واصله حدها من الضيقه والإنهيار.
أروى:بنات معقوله الدنيا توصل لكذا.
سديم وهي حاطه رأسها على بشرى:صحيح الدنيا مقالب بس عاد ما توصل للموت.
كادي وبتنهيده:ليش يسوون كذا؟
(سعدى منسدحه على الكنب وتناظر للسقف مصدومه)
معالي وهي تمسح وجهها بالمنشفه:آه يارأسي والله إنهم موب رجال ولافيهم نخوة وشهامه وألا وين المراجل يومن يستانسون على دموعنا.
هبوب ورابطه رأسها بشيله عقب ما إغمي عليها:ما أقول غير حسبي الله عليهم،بغيت أموت أحس وقفت عروق قلبي.
أسماء:أوف خلاص أنا تعبت من هالقرف اللي يسوون معانا.
فوزيه:مالقو غير جده عيده يتفألون عنه.
<سعدى شبه منهاره وماغير تناظر للسقف>
حمده:وه ياحر تسبدي منهم.
سديم:سعدوش ياقلبي خلاص الحمدالله إنه مقلب.
(سعدى مقهوره ومصدومه،، ما قد إنحطت بموقف بهالطريقه،،الشباب خلو سعدى تنهار وتبكي قدامهم وإستمتعوا بهالشي،،عاشت أصعب موقف مر عليها،،قعدت تفكر سعدى إنه فعلا لو جده عيده ماتت وش راح يصير بدنيتها،،وش راح يكون معنى الخساره وقتها،،أكيد راح يكون لها معنى ثاني،،يوسف وش مكانته في حياة سعدى!!
كان هالمقلب كايد بالنسبه لسعدى،،لا هيب قادره تقول ولاكلمه،،
بعد مرور يوم على الموقف المأساوي في حياة البنات،،كل وحده فيهم صارت تتصل على جده عيده تتطمن عليها وهي مستغربه من هالبر المفاجئي.
<ههههه الله يعطيهم العافيه الشباب علمو البنات قيمة جده عيده>
حصه وبهدؤ:سعدى لا يضيق لك خلق،خلينا ننبسط بااللي بقى لنا من إجازه.
سعدى وبوجه هادئي:تدرين ياحصه على قسوة الموقف إلا إنهم علموني درس قوي بحياتي.
حصه وبتعجب:مافهمت؟
سعدى وهي تحاول تمسك دموعها:خلوني أعرف قيمه الناس اللي بين يديني،،ما كنت في يوم من الأيام أتخيل إني بفقد جده عيده،،كنت أنرفزها وأحب أتهاوش معها وأحط رأسي برأسها،،لكن هالحين ماعاد أبيها تبعد ولا دقيقه.
حصه وبتعجب:الظاهر خويك اللي يتكلم موب سعدى>>تقصد جنيها.
سعدى وبإبتسامه:تقدرين تقولين بدأت أحس باللي حولي.
حصه:ههههه عقبال ماتحسين في يوسف.
سعدى:إلا على سيرة يوسف،،هو للحين مارجع؟
حصه:خبري هبوب تقول موب راجع إلا إلين تنتهي الإجازه.
سعدى:طيب ودوامه؟
حصه:يمكن أخذ إجازه.
سعدى:اها،،طيب حصوص عن إذنك بروح بشيك على إيميلي شوي.
حصه وبإبتسامه:على راحتك،،وإذا مالقيتي شي ترى مايمنع ترسلين لهم.
سعدى وبإبتسامه:يممماه منك.
(شيكت سعدى على إيميلها وتوقعت إن يوسف رد على إيميلها،،لكن للاسف ظنها خاب وما لقت منه شي،،ضاق خلقها وبعد تفكير عميق قررت إنها هي تتخذ خطوةالإعتذار وتعبر عن شعورها بطريقه تحفظ لها كرامتها،وكتبت له:
بالله ارجع شوف وجه المدينه.؟
تبكي شوارعهامن اسباب فرقاك،،
حتى المباني من فراقك حزينه.؟
الريح صوت ونبرة الحزن شباك،،
والليل بيح في غيابك حنينه.؟
ينشد نجومه وين طلعت محياك،،
بردوظلام ودمعته وسط عينه.؟
راح يتلمس في زواياه يمناك،،
كنه طفل غاب الفرح عن سنينه.؟
يشتاق لك ويحن لك ويترجاك،،
والشمس تطلع تسأل الليل وينه.؟
تقطع خيوط الليل منشان تلقاك،،
تاقف وتمشي كنها لك رهينه.؟
تمشي وتاقف في سماها تحراك،،
ياصاحبي صاحبك الله يعينه.؟
محدآ عرف وشلون حاله بلياك،،
عزيز نفس ولارضى بالغبينه.؟
البعد يغبن والغبن كيف ينساك،،
من زود حبك صرت دمعه بعينه.؟
يخاف لاتنزل رجوله توطاك،،
حال الفراق المر بينك وبينه.؟
يرمي حبال الوصل يمك ولاجاك،،
شاعر صدى حرفه يترجم انينه.؟
يموت حي لافقد مثل شرواك،،
هذا أنا وجروح قلبي دفينه.؟
تعال داو جروح بعدك بلاماك،،
هذاأناودموع عيني سجينه.؟
هذاأنا ياصاحبي لاعدمناك،،
إرجع بدونك بيض الايام شينه.؟
ياخي حراااااااام إرجع ترى
الكل يبغاك،،
بالله إرجع ضاااااااق صدرالمدينه.؟
تبكي مبانيها من اسبا بفرقاك،،
<أهدي لك هذه الأبيات يايوسف من صميم الأعماق،،وأتمنى إنك تفهم موقف شقرديه ماتهاب،،خلاص يا يوسف إرجع،،إرجع الكل يبغاك>
بعد يوم رد يوسف:
(أحبك ياسعدى وأنا راجع لعيونك لمدينه مافيها غير قلوبنا الصادقه)
من الفرحه ما قدرت سعدى تنام،،أغرب إحساس بالدنيا تملكها،،<آه معقوله عقب كل اللي سويته يرجع يحبني،،صحيح إني موب فاهمه وش يحس لكن أنا حاسه إن هالشي اللي يحسه يوسف مره كبير،،وأحس إن الحب أكبر من أي إحساس ينوصف.

[نجد العرب]

<الفصل الرابع عشر والأخير>


نواف وبتأنيب ضمير:يا شباب ماتحسون إن المقلب كان جامد وماله داعي.
أنس:تدرون إني ندمت.
يوسف بإستغراب:إنتم وين عقولكم وإنتم تسوون كذا؟
دهام وبطفاقه:يستاهلون يا أخي وهم وين قلوبهم يوم فشو كفرات سيارتي،،3شهور وأنا أجمع فلوس وآخرتها تسذا<كذا>.
طلال:والله إنهم كسرو خاطري خاصه سعدى آخر إنسانه توقعتها تبكي.
إبراهيم وبتعجب:إيه صدق هذه توقعت لو يقولون أبوك مات يمكن ماهمها.
يوسف:وش دعوة حرام عليكم تراها إنسانه.
سلطان:تبغى الصدق يوم شفتها تصيح جاني شعور إني ما نيب رجال ولو معالي ماهيب هنيا كان ضميتها.
طلال:إخس ياالصدر الحنون.
يوسف ويخز سلطان:تضمها علشان أضم ضلوعك وأكسرها.
<الشباب إستغربو من يوسف بس محد علق>
منصور داخل بسرعه وميت وناسه: شباب خلاص ملكتي أنا وسلطان حددوها الشيبان يوم الأربعاء الجاي.
سلطان نقز من الوناسه:إحلف ياشيخ.
منصور:ما بغو قسم بالله رفعو ضغطي إلين ما وافقو.
ماجد وبعد تفكير عميق:هالحين كلكم تبون تعرسون وأنا منثبر لا شغل ولامشغله.
طلال:أعرس معاهم وخلنا نفتك من مقالبك.
منصور:ماجد ورى ماخطبت سديم رسمي وش تحتري.
ماجد وقاعد يحك رأسه:مدري ماطرى في بالي إنشغلت بسعدى ومقالبها.
يوسف:طيب رح تقدم وخلنا ننبسط فيك إنت وخشتك.
ماجد وبتردد:والله ودي بس خايف من سعدى.
يوسف:وش دخل سعدى؟!
ماجد:عقب المقلب اللي سويته فيها والله إني على أعصابي والتبن أعطتني كف نسيت حليب أمي.
أنس:هههه يا إنه كف جامد،أنا إنحشت خفت تصطرني من قلب.
إبراهيم:ماجد لازم تعتذر لها،،لأن على كلام البنات إنها مره تأثرت وتبي تسافر في أسرع وقت.
ماجد مصدوم:معقوله.
إبراهيم:كادي تقول إنها من أول وهي فيها شي مضايقها وجاء المقلب اللي حنا سويناه،،عقبها ماعاد شافوها تضحك وإحتمال تمشي قبل ملكةالشباب.
يوسف مصدوم:خير وش تهرج.
إبراهيم:عاد أنا وش دراني كادي هي اللي قالت كذا.
ماجد وبكبرياء:تعرفون ما أعرف أعتذر لأحد وبعدين هذه غلطه مشتركه من الجميع.
أنس وبعد تفكير:شباب أنا عندي فكره حلوه على الأقل نبرئي ذمتنا.
<الشباب:وش هي>
أنس:نأجر إستراحه ونسوي لهم حفله ونتعاون مع خاله رقيه تضبط أمورنا.
دهام:معصي 3شهور وأنا أجمع....
ماجد قاطع دهام:دهام إسكت تراك ذبحتنا وذليتنا بهالكفر،،والله لأجيب لك 6 كفرات لكن فكنا من هالسالفه.
سالم:هههه بدور عليها نكته هههه.
يوسف:تصدقون فكره حلوه.
سلطان ويناظر يوسف:بعض الناس متحمس واجد.
<يوسف يدق سلطان على كتفه ويهمس في إذنه<هذا الحب ومايسوي>
سلطان إنصدم وماقدر يرد موب مستوعب إن هذا يوسف.
ماجد:هذه فكره حلوه ومقدور عليها.
نواف:وش رأيكم بعد نعبي الإستراحه لوح كبيره ونعتذر لهم.
طلال:إيه البنات يحبون الألوان اللي مدري وش لون قايله.
منصور:الله حماس تحمست.
<فعلا الشباب ما قصرو وأجرو إستراحه وبالتعاون مع خاله رقيه ونوره،،قعدو يوم كامل وهم يضبطون فيها،،يوسف ومنصور وإبراهيم كتبو اللوح علشان خطوطهم حلوه وعبو الإستراحه كلها لوح إعتذار>
ماجد وسلطان ودهام كان عليهم ترتيب الحفل ،،
سالم تكفل بالمسجل علشان حمده ترقص وتردح على كيفها،،نواف وأنس عليهم نفخ البلونات لأن عليهم نفس طويل.الشباب دعثو بالحفله من قلب<ههه إنعكست الصوره بدال ما البنات هم راعيين الحفلات صارو العيال هم اللي مشتطين>
تم تجهيز المكان بكل شي وكل واحد من العيال كاتب إسمه بلوحه وكاتب جنبه الإعتذار وكان أبرز إعتذار من ماجد و
كلامه مره حلو وطويل:
(إلى شقرديه ماتهاب سعدوش،،من ماجد زعيم القروب الخائب،،
تمضي بنا الأيام ولا يبقى لنا سوى الذكريات تجنح بنا حيث البعيد،،ضحكاتنا ،،مقالبنا ماهي إلا أهازيج فرح لن ننساها لطالما عشنا في هذه الحياه،، سعدى أعتذر من الأعماق إن كنت<دفش>في بعض الأحيان ولكن لا أحمل لك سوى كل حب وخير،،منذ قدومك والخير علينا أطل،،ضحك ،فرح ،هياص ودجه ،جعلتينا وللمره الأولى نشعر بطعم الإجازة،،أعترف بأني أمام شقرديه عن ألفين رجال،،
أعتذر منك على مقلبنا السخيف ونرجو إنك تحللينا وألا بنسوي فيك مقلب ثاني ونقول أختك فوزيه ماتت،،
تحياتي مجود مصادق اللحوج))
أما نواف فكان كاتب:
((إلى سعدى مهجدتنا،،،
بصراحه ما أعرف أرتب الهرج بس إنتي يا شيخه كأنك واحد من أخوياي،،من جيتي وإنتي مسويه لنا جو وحماس وزحمه والشارع فاضي،،
إنتي أحسن شي بالحياة وأسفين يا أبو الشباب ونعتذر لأخوياك المهابيل،،
<أبوك يا الإسلوب>
سلطان ومنصور كانو كاتبين:
(سعدى حنا ماقصدنا لكن إنتي اللي بدأتي علينا ولكن حنا نسينا الماضي وفتحنا صفحه جديده وخلاص الصفحه هذه رشي عليها شويه مويه وخلاص تنسينها،، سوري يالحبيبه وأسفين))
أما دهام فكتب:
(معليش تعيشين وتأكلين غيرها،،أنا أجمع رواتب 3 شهور قيمة الكفر،،بس موب مشكله قلبي كبير وعديتها لك وأنا مسامحك إنتي والخبول اللي معك والعذر والسموحه سعدوش)
أما أنس:
(شوفي سعدى إنتي مملوحه وقصة شعرك حلوه وسيقانك اللي كأنها مسواك أحلى وأحلى وبعدين تراك ما قصرتي فينا لاتصيرين عبيطه ودلوعه خلاص ودعنا الماضي وصح على سيرة الماضي تدرين إني من مقلبكم بطني للحين موب راضي يوقف،،لكن ترى سامحتكم يامهابيل))
<<هههه حشى أمحق من إسلوب إعتذار>>
أما إبراهيم وطلال:
(إسمعو حنا نعتذر لكم وإنتم كيفكم وهذه حفلة إعتذار قبلتو حياكم،،مابغيتو إتركو الحفله لنا ومع السلامه)
<وش ذا الإسلوب هههه>
سالم:
(ههههههههه والله إني أنا اللي جايب المسجل عشان تردحون وتطلعون اللي في خواطركم هههههههههه)
يوسف:
((قسم بالله إني ماسويت شي وكنت مسافر موب معاهم بس أعتذر على المقالب اللي قبل،،وأحبكم من حب الشقرديه فيكم))
(البنات دخلو الإستراحه وهم على بالهم إنها عزيمه عاديه مثل ماقالت خاله رقيه،، تفاجأو من اللي شافوه وقامو يصارخون،،إنبسطو بمعنى الكلمه،،البنات وقفو قدام لوحه لوحه وفطسو ضحك،،سعدى تقطعت ضحك على لوحهم.
سديم تضحك:وش هالإسلوب الزفت ،يافديت مجود هو أحسنهم.
سعدى ميته ضحك:يالباهم ما توقعت كذا.
أروى:أحسن حسو بتأنيب الضمير.
حمده:أويلاه مسجل،أبي أرزف حبه حبه على قلبي حبه حبه.
معالي وهي مره مبسوطه: ياحليلهم وجايبين شموع.
(البنات مره إستانسو بالحفله وخاصه سعدى ما توقعت يكون كذا إعتذارهم كأنهم بزران،،
<الليله كلها كانت وناسه بالنسبه لي،، من جد على كثر ماكنت متضايقه ومالي خلق حسيت إنهم كسرو خاطري،،وكملو حفلتهم بالكيكه طعمها كان مره لذيذ ومكتوب عليها <<سعدوش واللحوج اللي معاها حنا أسفين>>
يا إني فطست عليهم ضحك،،إسلوبهم زاحف،،عيال ماعليهم شرهه مايعرفون يتفاهمون لكن رغم كل شي أحس ربي عوضني ب9 أخوان وحبيب.
بشرى وبصوت عالي ومعها الجوال:بنااات بسرعه تعالو إقراو المسج من ماجد.
مكتوب بالمسج(لعبةالبحث عن الهديه>>إلى البنات المفهين،،
رحمه منا حبينا نسوي لكم جو،،كل وحده تحوس بالإستراحه تدور على هديتها المكتوبه بإسمها)
البنات صرخو>>>

[نجد العرب]

سديم:بنات بسرعه خلونا ندور الهدايا.
معالي:إسمعو خلونا نتقسم ,,ناس تروح برا للحديقه وناس داخل هنيا.
((بدأت رحلة البحث عن الهدايا))
بشرى:بنات تعالو هذه هديه مكتوبه بإسم سديم.
>>تجمعنا وفتحنا هدية سديم<<
(كانت من ماجد وكان داخلها قميص نوم و وكاتب تحتها أبو سراديب يتمنى لك كوابيس سعيدة))<<أم الإحراج قامت سديم تدعي عليه والله مايستحي.
((تحمسنا بقوة نروح ندور باقي الهدايا))
حمده وتصارخ:هذه هديتي خلنا نشوفها.
>>فتحنا هدية حمده وطحنا من الضحك كانت بدلة رقص ,,يا إنها تفشل بقوووووة ,,<<
حمده: ياعساهم للوجع اللي يمصع عروقهم اللي ما يستحوون.
أروى:بنات لقيت هديتي وهدية معالي:
>>هدية أروى دبدوب صغير من أبو ريالين,,,أروى طنقررررررت عليهم بقوة,,,أما معالي كان برواز عليه صورة سلطان<<
معالي: خيييييييييييير وش يحس فيه ماصدق خبر يترزز لي بصورته.
تفرجنا على هدايا البنات كلهم,,بس إستغربو البنات مالقو هدية سعدى!!!!
حصه: مستحييييييييييل وهدية سعدى وين؟؟
سعدى وببرود:موب لازم يكفيني الحفله وعاد موب من زينها هداياهم تجميع صيني.
سديم:برسل لماجد بسأله.
سعدى:خييير صاحيه إنتي؟؟
سديم أرسلت لماجد ورد عليها :كان ودي أطلع روحكن بس حرام كسرتو خاطري,,,وخاصه سعدى لكن حرام خلاص نبي نخليها تنبسط,,,هدية سعدى تحت الطاوله يالدلوخ.
((البنات هجمو تحت الطاوله,,كان صندوق خشبي عودي اللون وكبير,,,داخله أكياس صغيره وكل كيس مهداء من واحد من العيال,,,,نواف كاتب إسمه بطريقه جنان بس الغبي جايب لسعدى ميداليه على شكل سيجاره,,
سعدى:هههههههههه يقطع شرك يانواف وش يحس فيه.
بشرى:هههه مأخذين فكره غلط عنك.
((هدايا الشباب لسعدى تفطس ضحك,,,اللي جايب لها جمجمه وعظام واللي جايب لها سيارة بريموت صغير,,,واللي مهدي لها كبك فضي<<ههههه موب صاحين الظاهر يدورون الأشياء الزايده عندهم>>
كانت هدايهم على بساطتها إلا إنها تفرح القلب,,,لكن أحلى هديه إستوقفت سعدى ربع ساعه تتأمل فيها كانت من يوسف((عقد مره بسيط على شكل نمر صغنون وكاتب معها بورقه<<<مستنمرتي أحـــــــــــبك بتمردك وطغيانك,,إعصيني لطالما أحببت عصيانك,,إكسري حدود صمتي وفجري عروق قلبي بحبك,,,لك مني قبلة على جبينك من محب هام في جنونك))
حصه وبصرخه:يلعن عدوه وش ذا الهرج.
هبوب مصدومه:إخس يايوسف طلع الولد مطيح معك.
<سعدى إنحرجت وصكت الورقه>
معالي:يااااااهوووووووه حبتين.
سديم:سعدوش حركتات نص كم من ورانا هيييييييييين.
سعدى:أقول طسي وراك إنتي وإياها,,مالكم شغل بسوالف الكبار.
أروى:هههههه إذا هذه سوالف الكبار أجل وش خليتو لنا ياحسره.
(البنات قعدو يضحكون من قلب)
إنتهت الحفله بسلام وودعنا حزن ذلك المقلب المرير,,الشباب طيبو خواطرنا,,ورسمو البسمه إلى شفاهنا بس بإسلوب ما فيه من النعومه والذوق شي.
<بعد يومين من الحفله>
حصه: سعدى ماكنت أتوقع هالإجازه غير.
سعدى:ليش يعني؟
حصه:أشياء كثيره فينا تغيرت وصار لنا أشياء ماتوقعناها.
سعدى ومنسدحه على الكنب:بهذه صدقتي,,أحلى شي صار لي إنه شفت طعم ثاني للحياة,,وعرفت إن الشقاء والسعاده بداخلي وأنا من يدور عليها,,بتفكيري أقدر أكون أسعد إنسانه وبنفس ذا التفكير أقدر أصير أتعس وحده بالدنيا.
حصه وتناظر بإستغراب:هذا عربوج اللي يهرج والأ أخوه.
سعدى وبضحكه:ههههههههههه لا ذا ولا ذاك سعدى بنت أبوها هي اللي تهرج وما أرضى أكون غير ذاتي يا حصه لو تنطبق السماء على الأرض.
حصه وبإعجاب يالبيه يا الشقرديه.
سعدى:ههههههههههههههه
حصه:سؤال يسدح نفسه وخاش عرض تحبين يوسف؟ ؟
سعدى:جواب يسدح نفسه سدحا مميتا والله إني مدري.
حصه:هههه لاجد وش تحسين إتجاهه.
سعدى:اممممم مدري ما أعرف أوصف بس إذا أحد قال <يوسف>ودي أقول يالبيه.
حصه:ههههههه هذه بداية خير.
سعدى: يوسف رهيب ويعجبني وموب مصرقع زي العيال الباقين.
حصه تقطع السالفه:ناظري جوالك يأشر.
سعدى نطت: يوووووه رقم غريب موب راده.
حصه :أحسن بعد.
(قعد الرقم يرن ولا 6 مرات وسعدى على عنادها ماردت,,آخر شي جاها مسج((( سعدى ردي ضروري))
طلعت سعدى من الغرفه وردت..
سعدى:الو من؟؟
يوسف:معاك يوسف.
<سعدى من الربكه حذفت الجوال أول مره تسمع صوته باالتليفون>>
دق يوسف ولا عشرين مرررره وبعد مادبل كبدها من الإتصال ردت.
سعدى وبربكه:عسى ماشر تتصل فيني؟؟
يوسف:طيب أولا السلام عليكم.
سدى :وعليكم.
يوسف:يهود حنا وعليكم سلمي زين.
سعدى: من الآخر وش بغيت.
يوسف:أخبارك؟؟
سعدى:مامن جديد وحتى لو عندي جديد موب قايله لك.
يوسف ميت ضحك:وراه وش سويت لك.
سعدى:ورى داق علي وبعدين نمبر تليفوني من وين لاطشه؟؟
يوسف يضحك:ما أبغى أقول إلا كلمتين.
سعدى وبإستعجال:إسدح اللي عندك؟؟
يوسف:حشى أكلم واحد من الربع موب حبيبتي.
سعدى تبي تستوعب:هاه وش قلت عدها لو فيك خير.
يوسف:أعيدها ونص ,,ليش إنتي موب حبيبتي؟؟
سعدى مصعوقه أول مره أحد يتجرأ يقول لها كذا:مافهمت هالكلمه ,,إبطح الكلمه اللي بعدها.
يوسف فااااقع ضحك:والله تعجبيني بكل حالاتك بجدك وإستهبالك.
سعدى وبجديه:أجل خذ الهرج الوكاد ترى ما أمزح وش تبي داق.
يوسف تغيرت نبرة صوته ورجع لهدؤه:روقي وخليني أعرف أحكي زين.
سعدى:هات مالديك يافتى.
((الشرهه موب عليك ياسعدى على اللي علمك الرومانسيه))
يوسف :والله إني أحبك ياسعدى.
سعدى وبنخوة:من طيب أصلك يالطيب وشكرن على حسن الأدب.
((هههههههه الظاهر يا إنها فاصله أو هذا اللي يقولون سكرة العشاق))
يوسف فاطس ضحك:أمانه سعدى بذمتك ماتعرفين تردين وألا تستهبلين.
سعدى:يوسف يالليل البعارين,,وش تالي الهرج.
يوسف:سعدى إنتي للحين متضايقه مني.
سعدى وبعفويه:أنا قلبي طيب وأنسى بسرعه.
يوسف :ياجعلني فدى قلبك يانظر عيني.
سعدى:إنت ورى هرجك خربان اليوم.
يوسف:لعيونك ياسعدى الحكي,,كلام من قلبي ما قد إنقال لغيرك.
سعدى أخيرن إستحت:شكرن من الصميم إلى الوريد

[نجد العرب]

يوسف:سعدى والله أحبك.
سعدى:يا أخي غثيتني من الصبح أحبك وأحبك وش ذا الحب اللي تهرج عنه.
يوسف:وش لون أشرح لك مدري لكن إسمعي هالأبيات:

الـــحب مـاهـو بـس قـــصه قــصيره،،
نـقعد نسطـرهـا عـلى بـيض الأوراقــ،،
الـــحب بــرد الــقلب وقـت الظــهيره،،
صـحيح حـــرفين بـس تـعدى الأفـــــاقــ،،
الـــحب يخـلي الــعين دايـم ســهيــره،،
إحــساس مـايـغفابـظلام ولا
بشـــراقــ،،
الـــحب قـــرب بـين ديـــره وديـــــره،،
ربـــط قـلوب الــناس وأرخـى أعـنـــاقــ،،
الـــحب كــلمه والـــمعاني كــثيـــره،،
مـعناه هـم وفـرح وحـزن وأشـــواق،،
الـــحب‏‏‏ يـحرك الـواحد ومـا
يسـتشيره،،
يـحببه بشـخص لـوعـمره مـا
إشـتــــاق،،
الـــحب حــاله والــمحبه فـيه كـبيــــره،،
مـالـــه إقــياس لــوطـــال الأشـفــاق،،
الـــحب ثــوره وإنـتـفاضه وحــــيره،،
شــعور دافـي يــمه الــــبشر
تــنســاق،،
الـــحب طـفله فـي صـــباهـا
صـغيــره،،
تــكبر مـع الأيــام وتــــهز الأشـــواق،،
سعدى إنحرررررجت بمعنى الكلمه: شوف يوسف بختصرها عليك ,,تبي شي واضح وماهوب على درب الرذايل ,,تعرف وين تلقى أبوي,,أما تبي تصرف وتقول خلينا شوي نتعرف على بعض هالهرج مايمشي معي.
يوسف وبحماس: والله لو تبين هالحين أروح لعمي يمين بالله لأملك.
سعدى إستغربت:المهم عندك شي رح إهرج مع أبوي ثمن يصير خير ,, وبعدين تعال يا أبو الشباب,,إنت وش لون حبيتني يعني كذا من الباب للطاقه؟؟
يوسف:ههههههههه حلووووة,,تبغين الصدق من يوم بدأت أتراسل معك بالبوتوث حسيت قدامي بنت رجال ماتلعب,,وردودها بالصميم ماعندها لف ودوران,,جذبني العناد اللي في عيونك,,إصراراك,,تحديك,,,واثقه ولايهمك إلا المبادئي اللي تربيتي عليها.
سعدى وتصحح المعلومه:لا وبعد ترى أخاف من ربي ولا أحب أعصيه.
يوسف:أشكر الله يوم جابك في طريقي.
سعدى عصبت:خلاص ترى ما أعرف أرد.
يوسف:ههههههههههههههههه
سعدى:تعال بسألك ليش ذاك اليوم يومن كنا طالعين للبر عصبت علي,,وأنا أصلن ما قلت لك شي.؟؟
يوسف:زعلت لإنك جرحتيني.
سعدى:إحلف ياشيخ لايكون بس ذابحه واحد من أهلك وأنا مدري.
يوسف يضحك:ههههههههههه أم الزحف اللي راكب رأسك بقوة.
سعدى :لا جد قعدت أفكر أنا وش قلت وكان ردك ماله داعي يوم قلت عمرك ماراح تفهمين.
يوسف:لإني فقدت الأمل من إنك تعرفين إني أعشق ترابك وأموت فيك,,بس حسيت إنك موب حولي أبد ولاراح تفهمين حبي وراح أموت ويندفن هالحب معي.
سعدى وبعفويه:يممممممممماه بسم الله عليك من الموت.
يوسف:يافديت اللي خايف علي.
سعدى إستحت:أيوه أخبارك بعد؟؟
يوسف بنذاله:عاش مصرف.
سعدى:يوه أعوذ بالله والواحد مايأخذ راحته.
يوسف بجديه:سعدى وش رأيك نملك مع منصور وسلطان؟؟
سعدى وبشهقه:معصي.
يوسف وبتعجب:ليش طيب؟؟
سعدى:أنا هالحين خلني أهجد قلبي شوي وأفهم وش قاعد يصير ثمن أفكر؟؟
يوسف:يعني تحبيني؟؟؟؟
سعدى وبتردد:مدري خلني أستفسر عن الموضوع ثمن أرد لك خبر؟؟
يوسف ميت ضحك:بتسألين من؟
سعدى:يا مفهي بسأل قلبي ثمن أقول لك.
يوسف:بطريقك بعد إسأليه إذا وده نملك؟؟
سعدى:لالا ملكه إحلم هالوقت,,أحتاج فرصه أتقبل وجودك,,,وبعدين أفكر بموضوع التربيط؟؟
يوسف:أي تربيط.
سعدى تستهبل:الملكه موب تربيط وحبال تخنق الواحد وتخلي الإثنين ينشبون لبعض.
يوسف فاااقع ضحك:وربي موب صاحيه.
سعدى:إيه أدري .
يوسف:سعدى إنتي للحين ماتقبلتي وجودي.
سعدى:إسمع يوسف أنا يمكن موب متعودة أعبر عن مشاعري أو حتى أعرف كيف أعبر لكن بقول لك شغله تراك وصلت للشي اللي محد قدر يوصله في شقرديه ماتهاب.
يوسف:يا عساني ماخلا منك يانظر عيني.
سعدى:ولامنك يايوسف.
يوسف:لا ياسعدى ترى كذا أروح وطي.
سعدى:أنا والله اللي بروح وطي لو تأخرت على حصه,,ما أطول عليك.
يوسف:تصبحين على خير ياأغلى من سكن قلبي.
سعدى وهي منحرجه:تصبح على خير يالغالي.
((إنتهت المكالمه بمشاعر ود صادقه وحنين يعتلج خلجات الفؤاد ,,جعل من روح سعدى تحلق بين أحلام ورديه لم تشعر بأنها ستعيشها ذات يوم))

[نجد العرب]

<<يوم السبت الجميل إجتمعت فيه العائله كلها ,,خوالي وعيالهم والجيران,,كان هذا يوم تاريخي في قلوبنا كلنا,,كان ملكة سديم على ماجد,,وحصه على منصور,,,ومعالي على سلطان,,أجواء الفرحه غمرت بيت خاله رقيه,,والبنات واصلين حدهم من الوناسه,,
أنا سعدى رفضت الملكه لكن أعطيت يوسف كلمه ما أثنيها ولايمكن أتراجع عنها إني بأبقى ليوسف ولايمكن أكون لغيره,,أحب يوسف ولاعاد أستغني عنه,,صار يوسف كل شي بحياتي ,,تقبلني بعيوبي ورضى فيني سعدى مثل ما أنا,,بالنسبه لي الملكه ماهيب رابط حتمي يخلي العلاقه تستمر,,ياما ناس وناس ملكو لكن ما إستمرو لذلك طلبت من يوسف نأجلها لفتره,,ما أحب أدخل هالأجواء إلا وأنا متهئيه نفسيا,,وعارفه وش أبي بالضبط..يوسف فديت قلبه إحترم رغبتي,,,,,,,,
بعد مــــــــرور ثـــــلاث ســـــــنوات من زواجي بيوسف ماكتب ربي إني أحمل,,
((ههههه الظاهر للحين معربجه وتطامر))
نواف تزوج بشرى الزواج العائلي التقليدي ,,مافيه بينهم أي علاقة حب,,,طلال وأنس صار لهم حادث وتوفو الله يرحمهم من جد كانت أيام عصيبه وذكريات مريره كلما ذكرت وفاتهم وكل ذكرياتنا تجي وتروح في بالي لكن هذا قضاء الله وقدره فوق مشئية الإنسان,,أما حمده فهذه من المعجزات اللي محد مصدقها صارت داعية بأحد دور تحفيظ القران الكريم ((إنك لاتهدي من أحببت ولكن الله يهدي من يشاء)),,
دهام صار تاجر كبير وتزوج من برا العائله>> من عذره يصير تاجر ذل سعدى ذل على كفر السياره القعاطه ذابحته)
سالم مدرس العربي المفهي خطب أسماء وأنا للحين حاسه مافيه مجال للتوافق بينهم ,,واحد زاحف وطعس راااايح فيها وهي خكريه ماعندها سالفه بالحياة,,
هبوب تحضر الماجستير في بريطانيا والعايله إستنزلت عليها وخوالي حاربوها وكلهم وقفوا في وجهها لكن الإصرار لبلوغ العلم خلاها تتحدى الكل وتسافر هناك مع أصغر أخوانها.
أما كادي إستغلت موهبتها في الطبخ وبدأت مشروعها في تسويق الطبخات المحليه..وكان عليها إقبال منقطع النظير,,لأن شغلها مره حلو..
أروى أحبها موت هالبنت وأختي الصغنونه اللي مالي غنى عنها,,أقنعت يوسف يخطبها لزياد أخوه إلين ماتزوجها وهالحين هي عائشه جنب بيتي وكذا أكون وفيت بالعهد والوعد اللي قطعته لها يومن قلت لها والله ما أخليك بلحالك ورأسي يشم الهواء,,
(((في ذاكرة كل منا عبق من الذكريات يفوح شذاها من وقت لأخر,,,تجري بنا الأيام مسرعه تسابق خطى الرياح,,,تبعثر همنا وتنتشلنا من حزننا لتأخذنا إلى أمل فجر جديد وإلى ضياء شمس مشرقه,,لم يتبقى منها سوى الذكريات التي تعطر جراحاتنا,,تلك الذكريات التي جسدت معالم شخصياتنا ,,أحببناها بحلوها ومرها,,فهي بالنهاية ليست سوى مجرد ورقه من الماضي ترسم على شفاهنا البسمه من جديد))
((أنا سعدى ,,شقرديه ماتهاب وعربجيه عن ألفين رجال,,لم أمارس جنوني وحريتي(( بالشذوذ)) ولكن رسمت لنفسي خطى وحدود مزجت بين المحافظه والتحرر بقيود,,بين الجنون والعقل بطريقتي أنا وبإسلوبي الخاص الذي لايقبل القسمه على إثنين,,قوية أنا كالجبل,,ثابته على النهج القويم,,عربجيه بالشكل ,,بالتصرف غير أن الحق حق والباطل باطل,,إنحرافاتي بحدود هواياتي ,,لا أقبل إمتهان كرامتي ولا أرضى إمتهان عزتي,,قاعدتي في هذه الحياة رضى ربي,,رضى ربي فوق كل شي وفوق الدنيا ومافيها ثمن أسوي وش ما أبي,,إذا كانت تصرفاتي تتطاول على حدود طاعاتي ورضى ربي فإني أتنازل عنها لأجل الله وما سوى ذلك لايعني لي شي بالحياة))
ودمــــــــــــــــــــــتم بود...
سعــــــــــــــــــــدوش.....

بقلم الكاتية/ستيفانه الطائيه.
كاتبة رواية:1_عشق بدوي يابنت ماتفهمينه.
2_أبشري بعزك ياريم النقاء والطهر.
3_ فواز تكفى سامحني.

ملاحظه: ($) من خواطر المبدعه سمــــــــاء

[نجد العرب]

أتمنى أن يكـــــــــــــــون تذوقي قد أعجبكم...
مروروكم يزيدني فخرا..

[نجد العرب]

الظاهر ذووووقي ما أعجبكم<<فيس حزيييييين

[نجد العرب]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[اخت البطه]

يعطيج العافيه
عن جد روايه حلووه

[نجد العرب]

شكرا عزيزتي على مروروك