[ محتوى مقرر ] : *** .. مشروع التخرج ــــ الجزء التطبيقي حياكم .. ***

[salman1]

المشاركة الأصلية كتبت بواسطة painkiller

سلمان انتا كيف نشرت استبيانك ..؟؟
اذا كان عن طريق موقع استبيان يا ريت تتفضل وتشرح طريقة جمع البيانات ..
انا راح اشرح طريقة نشره على قوقل درايف

اهلين بنكلير استبياني وزعته على عينة الدراسه ماسويته عن طريق قوقل

[Painkiller]

التعرف على الجدول اللي وصلكم من عينة البحث ..

افتحوا الصورة للجدول اعلاه
راح تلاقوا كل سؤال له خانه
السؤال مكتوب فوق بالعرض
واللي جاوبوا العينة متسلسلين تحت بعض بالطول
كانت عينتي 120
اقتطعت جزء من العينه في الصوره أعلاه ..
امسكوا اول خانه اللي هيا اول سؤال واسحبوا راح يمشي معاكم واعملوا نسخ


مالكم شغل بالباقي راح اشرح على نفس الصوره كل خانه بسهم لون مختلف






افتحوا ورقة عمل جديده على الاكسل وفي أول خانه يمين اعملوا لصق مكان السهم الأخضر





دحين سار عندكم كل الاجابات ملصقه في اول خانه
انا هنا مقياسي كبير وكبير جداً وقليل وقليل جداً واخرى 5 خانات اللي يهديني تخنتها




دحين ابغى اعمل فرز للخانات ابغى اعرف كم واحد جاوب بنعم وكم واحد جاوب بـ لا وكم واحد جاوب بـ احياناً


وراح اشرح على مقاييسي


اشوف اول واحد جاوب بكبير احط الماوس واسحب لين نهاية العينة
واضغط على الزر "فرز وتصفيه" احطته بدائره موف في الصورة
برضوا مالكم في الاشياء التانيه اللي في الصورة ركزوا على الخطوات اللي قاعده اشرحها





لما تنفذوا زر التصفيه راح تطلع عندكم فقط اجابات الخيار الاول عندكم نعم ومثالي كبير جداً
اعملوا نسخ والصقوا التصفيه في اول خانه زي السهم البني مهم اول خانه راح تظهر عدد التكررات اوردي وفق تسلسل الخانات





تخلصوا باقي الخانات اللي هيا لا واحياناً بنفس الطريقة "فرز وتصفيه" وتحطوهم في اول خانه


عشان كدا اقولكم 3 خيارات للاجابات كافيه عشان ماتتعبوا


لانكم راح تعملوا الشغله هادي في كل الاسئله اللي 30 واللي 50 سؤال هههههه




طريقة عمل المخططات في المشاركة التالية


يتبع

[Painkiller]

ماهي البيانات الاساسية المطلوبه من الطالب؟

التكرار :


نجده من خلال التصفيه ونسخ كل نتيجة "تصفية كل خيار "
"نعم/ لا / احياناً "
والصاقها جنب بعض في جدول الاكسل في خانة رقم 1
اوردي عرفنا كل اجابه كم مره اتكررت لاننا محتاجينها في معرفة النسبة المئويه


لاحظوا الصوره والتكررات ظهرت من التسلسل كل خانه كم تكررت



قليل جداً امام الرقم 2 ـــــــــــــ كعدد التكرارات
قليل امام الرقم 3 ــــــــــــ كعدد التكررات
متوسط امام الرقم 12 ــــــــــــــ كعدد التكرارات
كبير امام الرقم 22 ــــــــــــــ كعدد التكرارات






النسبة المئويه :


مطالبين فيها أكيد


كيف نطلعها ؟؟
درسنا الصيغ على برنامج الاكسل وأكيد تعرفوها .. اللي ما يعرفها مالي شغل


الطلاب اللي استبيانهم وزعوه بنفسهم على عينة بحثهم ..
يحسبوا اكيد بالآله الحاسبة عادي ..


والطريقه للي ما يعرف للاكسل او عينته محليه

التكرار ظاهر من خلال الصورة او تحسبه نظري بمعرفتك


عندي هنا اشرح على عينة موظفيين حكوميين عددهم طلع في التكرار 71
ابغى اجيب نسبة كبير
عدد تكرارات كبير 32÷ العدد الكلي 71 ضرب * 100
طلعت النسبة 45% زي ما تشوفوا في الصوره


نسبة الخيارات الباقية تطلعوها بنفس الطريقه يا بالصيغه بالاكسل او بالإله الحاسبة


كمان المتوسط الحسابي مهم لكن مش لكل البيانات على حسب نوعية دراستكم ..
ونوعية البيانات اللي راح تطلعوا متوسط حسابي لها



الانحراف المعياري بعض الطلاب يطلعوه لكن ببرنامج spss
البرنامج حسب معرفتي ان ماله واجهه عربيه والتعامل معاه يحتاج خبير احصائي او ملم باللغه الانجليزية
ربما صدر له مؤخراً نسخه عربيه ..
كأني سمعت كدا بس لم ابحث مو خلصت ولله الحمد ايش لي في النشبه




في دراستي ما طلعت الانحراف المعياري اكتفيت بالتكرار والنسبه المئويه والمتوسط الحسابي
على الاكسل
ولم اجرب العمل مع برنامج spss
فمش ضروري ترهقوا نفسكم وتدوشها فيه




يتبع

[Painkiller]

المخططات ..

حلوة صراحه وتحسسكم انكم ياما هنا وياما هناك مع انها سهله جداً


كل ماعليكم عمله
كتابة المحورين السيني والصادي
اللي هما


خياراتكم للمقياس
نعم
لا
احياناً
يقابلها
النسبه المئويه لكل خيار كما يشير المربع الاخضر في الصوره ادناه



عندي مقياسي كبيرجداُ وكبير و و و


حددو المحورين السيني والصادي اللي عملتوهم في جدول اكسل احطتهم بالمربع الاخضر

ومن قائمة ادراج تظهر لكم المخططات
نقره واحد والمخطط مشرف عندكم في الصفحه
ولو بياناتكم طلعتوها بالورقه والقلم لا تترددوا افتحوا الاكسل واعملوا المحورين وخلوا المخطط يشرف عندكم

اذا اخترتوا عامودي زي الصوره فوق وهناك المزيد من الخيارات




دائري زي هنا







او دائري ثلاثي الابعاد


كل واحد وذائقته لكنها مهمه في حصد الدرجات

ويقبل النسخ تنسخوه وتحطوه دايركت في ملف الوورد اللي تشتغلوا عليه

[Painkiller]

شرحت اعلاه للي يعمل الاستبيان على قوقل درايف او وزع الاستبيان على عينته بنفسه اما موقع استبيان فهمت ان الموقع يعمل كل شي .. ويمكن مريح .. لكن لا اعرف كيف يستقبل هذه البيانات ماجربته .. اللي عملها يتفضل بشرحها لزملاؤه

[Painkiller]

المتوسط الحسابي

كيف نطلع المتوسط الحسابي للبيانات

هنا موضوع للزميله سنديان

طريقة استخراج المتوسط الحسابي للاستبيان من الاله بطـريقة بسيطـه بدون برامج

[Painkiller]

ممكن نجيب المتوسط الحسابي طبعاً بالاكسل والداله للمتوسط الحسابي زي محنا عارفين average

[Painkiller]

لما تطلع لنا القيمه نكتبها بالتقريب .. يعني العدد لما يكون 37.4
نكتبه زي ما هوا


لكن لو طلع المتوسط 37.7
على طول نكتبه مقربه ويكون المتوسط 38

[Painkiller]

لما نجيب كل هادي البيانات ونفرغها على شكل جداول ومخططات سواء على الاكسل

او في كشكول تحسبوا فيه زي ما شرحت لكم اذا عينتكم مش الكترونيه او ما تعرفوا للاكسل

هادا الجزء مهم جداً راح يكون فصل خاص بعنوان رئيسي واضح

تحليل وتفسير نتائج الدراسة ومناقشتها

تاخدوا كل سؤال تكتبوه وتحطوا تحته جداولكم أو مخططاتكم ..

تشرحوا اللي حصل .. وتستخلصوا نتيجة هادي الدراسه اللي عملتوها

لكن ايش هيا أهم نقطة راح تشرحوا عليها ؟؟

أهم شي المتوسط الحسابي هوا اللي يعطينا فاعليه للدراسة

فهو يقيس متوسط كل القيم مهما كانت متطرفه باتجاه الموجب او متطرفه باتجاه السالب

مثال : على الدراسة الوهمية " قيادة المرآه للسياره "

لو طلع عندي المتوسط الحسابي لهادا السؤال

هل تعتقد بوجوب توفير وسائل نقل عامه لتسهيل تنقل السيدات

نعم/لا/ احياناً
كيف اجيب المتوسط انا طلعته بالصيغه على الاكسل
لكن على شرح الزميله سنديان فوق في الموضوع المرفق
تكرارات نعم 40
تكرارات لا 20
تكرارات احياناً 10
المتوسط الحسابي 40×3+20×2+10×1÷ 3 اللي هوا عدد خيارات المقياس =56.6


نحط المخطط عملت نموذجين دائري ومخروطي كماثل
انتو وذائقتكم
ونكتبوا تحته ..









مهم .. تكتبوا شرح زي كدا .. وعلى حسب دراستكم
بالنظر الى اجابة عينة الاستبيان
وتكتبوا النسب المئويه تكون قدامكم في المخطط
نلاحط ان نسبة نعم 57% و لا 28 % واحياناً 14%
بتموسط حسابي 56.6
يتبين أن أهمية توفر وسائل نقل عامه لا تغني عن الحاجه لقيادة المرأة للسيارة بل ربما حرمان الاسره ضرورياتها ..
وهذا ما اجابت عنه العينة في أهمية توفير وسائل نقل عامه للاستغناء عن قيادة المرأه بمتوسط حسابي بلغ 56.6 وهي نسبة متوسطة ..مما يعني أن الحاجة للقيادة الخاصه مازال خيار مطروح

[Painkiller]

تمسكوا المخططات والجداول اللي هيا نتيجة افراغ الاستبيانوتشرحوها سؤال سؤال كل اجابه على حده ..


وبكدا تكونوا خلصتوا المرحله الثانيه " الجزء التطبيقي "


اللي من خلال الشرح أكيد عرفتوا انه جزئين
جزء تفريغ للبيانات وجزء تحليل البيانات وتفسيرها




حاضرين لاستفساراتكم .. نأمل أن تكون الشروحات واضحه


واهلاً بكل المشاركين لمساعدة زملائهم