لماذا تم إغلاق موضوعي (( 2 ))

[N o o r a h]

يعطيك العافية أبو محمد

المواضيع ما تغلق إلا إذا طلعوا من الموضوع واغلب المواضيع كلها سوالف

اتكلم عن نفسي ليش أسكر المواضيع

[NOW OR NEVER]

فـ انا اشوف ان سالفه حذف ردود الأعضاء المخالفين احسن نوعآ ما & اعطاء انذار للعضو في حاله مخالفته & تقيم سلبي وان استمر ( باند )
يعني مو على طول حرمان ومن هالكلام الا في امور تتوجب علينا اننا نعطيه باند سريع "

اكيد مو على طول باند ولم اعني هذا

هناك اعضاء سجلهم حافل بالمخالفات

وهناك اعضاء سجلهم حافل بالمشاركات الإيجابية والفعالة والمفيده للجميع

يجب ان يتم التعامل مع كل عضو بخصوصية تختلف على العضو الآخر ..... مو ؟

[شخصية مجهولة]

الله يوفق الجميع

[нησ0]

زآدكَ المنَآنَ بسَطةَ فَ العلمْ* ..

[أبو محمد]

المشاركة الأصلية كتبت بواسطة prestigious

/ يحق لك وضع موقف سابق بشريطه عدم وضع اسماء أو التمليح عن الي سبب الإغلاق او المشرف الي اغلق ..

هذا ماخطته يداك ابو محمد !!
والموقف هو موضوعي المقفل!!
ايش تبغاني اتكلم فيه !! موقف مثل ايش ممكن توضح !!
ومشكور سلفا
واتمنى ان يتسع صدرك لردودي
وصل على محمد
انتم كتبتم الموضوع من باب الشفافيه والتعامل مع الاعضاء وطرح ماهو مفيد وإصلاح وتسهيل العقبات التي تحصل في كتابة المواضيع

الله يهديني وياك ..

انا كتبت ممنوع التلميح وانت حاط الموضوع بكبره والمشرفه كاتبه ردهآ ..
انت ما لمحت .. أنت أصبت وأدللت على الموقف .. !!
تقدر تذكر الموقف بدون ما تجيب الرابط ويكون موقف عآبر من ضمن المواقف الي صارت ..

[أبو محمد]

المشاركة الأصلية كتبت بواسطة ǺĽ ẕeeห

بااك "

احب اشكر اخوي - ابو محمد - على طرح مثل هالموضوع للمره الثانيه امام الأعضاء من زمان كنا محتاجين مثله قدام الملآ "
عشان نشوف ونقرآ وجهة نظر الأغلبيه من مشرفين واعضاء و مراقبين و اداريين "

اولا / اغلب الأعضاء بـ هالمنتدى وخاصه الأقسام الدراسيه " يحسبون ان هالمنتدى مثل غيره من المنتديات "

اقصد - نظام السواليف و الردود الي مالها اي صله بالموضوع -

ثانيآ / كلنا معرضين للخطآ محد معصوم منه " فـ التذكير خير علاج لـ هالمشكله "

مع اننا وضعنا شروط وقوانين المفروض نمشي عليها كلنااا بدون استثناء لكن " لابد من الخروج عن المسار "

سياسه اغلاق المواضيع ايجابيه بنفس الوقت سلبيه "

ايجابيه / في حاله خروج الموضوع عن مساره للمدى البعيد "
مثال - استفسار وتم الرد عليه تستمر الردود لين يطلع الموضوع عن مساره "

مع ان المفروض يتم اغلاقه "" تضامنآآ مع هالشرط "


سلبيه / في حاله وحده فقط وهي - ظلم لصاحب الموضوع "

انا ما الوم الأعضاء ودهم بمكان يطلعون فيه الي بخاطرهم و احنا مامنعنا هالشي لكن بالحد المعقول الذي - لا يؤدي - الى الأبتعاد عن مضمون الموضوع "

كل مشرف ومشرفه لهم سياستهم ب اقسامهم بس ب مثل هالأشياء - نمشي كلنا على نظام واحد -

اناا / ساعات ادخل موضوع سواء كان استفسار او حل واحب او اي كان

وارد عليه و اتركه كم ساعه وارجع له الاقي الردود ماشاء الله وصلت مدري لوين وكلهاا مالها دخل بالموضوع "
بـس "" ما اغلق الموضوع اكتب لهم - اتمنى عدم الخروج عن مسار الموضوع - كـ تنويه لهم "

بعضهم يستجيب و البعض لا مدري هو من باب العناد او ماذآ ؟

وصلت لبعض الأعضاء يقولي - احنا طفشانين وانتي فاضيه و اشتقنا لـ اغلاق المواضيع وحذف الردود "
ههههههههههههاي وش اقوله بالله " اكتفي بـ حذف رده و اكمل "

بس بعض المواضيع اجباري اغلاق موضوعها خصوصآ اذا تم الرد على صاحبهاا وخروج الموضوع عن مضمونه بقووووه ""
يعني ساعات توصل لـ كلمات & صور & ترقيم بـ التلميح ( عيني عينك )

سياستي " ""
اغلق / و اكتب السبب / وارسل اعتذار لصاحب الموضوع مع كتابه - تم الرد على استفسارك اذا كان استفسار "

اكثر المواضيع الي نغلقها تكون - استفسار - "

يعني مواضيع الواجبات او الملخصات او اي شي يخص المحاضرات نواجه بها كم رد فقط وان زادت نقدر نحذفهااا و يستمر الموضوع ""

بخصوص / معاقبه العضوو المخالف : حرمانه من دخول القسم قرار غير مثالي بوجه نظري
بكذآ راح نأجج في اغلب الأعضاء الكراهيه والحقد

هم خلقه ما تعجبهم تصرفاتنا راح يكون هالشي سلبي مو لنا احنا للأعضاءمتى ؟
اذا كانو قروبات او يعرفون بعض ان زعل واحد بيتضامنون معه 10 "

احنا ماورانا شي بس وش ذنب الأعضاء تخربون القسم لهم بـمواضيعكم او ردودكم المخالفه من باب العناد - يعني تعااقبونا -

الي بيزعل و يمكن توصل للتهديد او يسجل هو الي معاه بعضويه و يكتبون مواضيع مخله الأداب ب اغلب الأقسام و نضطر لـ - مطاردته - وحذف مواضيعه

وكل ما حجبنا عضويه بيدخل بغيرها و ان حظرنا حساباتهم عادي بيدخل من جهاز اخر "
ومو كلنا نتواجد بـ المنتدى بنفس الوقت عشان نتدارك هالشي "

ناخذ الحل بـ التدريج " احسن "
بعضهم يحتاج للتذكير و مو كلنا نفس مستوى التفكير و الأستيعاب واعمار البعض ما تسمح بإستخدام نفس الأسلوب "

فينا الكبير و الصغير و الي استيعابه سريع والعكس "لازم نعيد مره و 2 عشان يثبت هالشي في ذهنهم "

فـ انا اشوف ان سالفه حذف ردود الأعضاء المخالفين احسن نوعآ ما & اعطاء انذار للعضو في حاله مخالفته & تقيم سلبي وان استمر ( باند )
يعني مو على طول حرمان ومن هالكلام الا في امور تتوجب علينا اننا نعطيه باند سريع "

اسفه ع الأطاله تكلمت عن كذا نقطه ودي اشوف نظرة الأغليه ونتناقش ونطلع كلنا بحل مرضي للجميع ""

ومثل ماقال ابو محمد اكتبو اشياء واجهتوهاا بدون ذكر الأسماء - مشان نتناقش فيها -
غايتنا الأولى و الأخيره - انتم -

أشكرتس ع الاضافة الجميلة ..
وصحيح .. سياسة التدرج هي الحل الأمثل ..
ومع هذا في مخالفات ما نتجاوز عنهآ الا بالطرد ..

[أبو محمد]

المشاركة الأصلية كتبت بواسطة ليثاوي الرياض

ارفع لك عقالي احترم و تقدير

ابو محمد

رغم ان الموضوع السابق قدم المطلوب

لكن لك رساله واضحه و هي نجاح و استمرار المنتدي في القمه

حرصك على استكمال الموضوع محل اهتمام و تقدير الكل

ابو محمد لي عوده فالموضوع موضوعي و ابشوف كل صغيره و كبيره فيه

إحترام متبادل ليثاوي ..
صحيح .. أتفق معك ان الموضوع السابق قدم الطلوب من وجهة نظر البعض ..
ولكن مثل ما انت عارف لولآ إختلاف الآرآء لباضت السلع ..

من وجهة نظري أن يستمر بعد شوي

سلمت وغنمت .. وننتظر عودتك إن شاء الله ،،

[أبو محمد]

المشاركة الأصلية كتبت بواسطة وطني

وعليكم السلام ورحمة الله وبركاتة


هلا فيك اخي الكريم ابو محمد وموضوع طيب من رجل طيب ومحترم ونقدره ...

كل ماذكرته يا اخي الكريم ينطبق عليك انت شخصيا وقليل القليل من المراقبين

وبحكم تجربتي فكل ما كتبته هو بالنسبة لبعض المراقبين حبر على ورق وكالمشاريع التي ترصد لها الميزانيات ولا تنفذ وبالاخير تكون مجرد دراسة لعقود طويلة

لان بعض ما ذكرته ان لم يكن كل ماذكرته صعب على المراقبين تنفيذه لانه سوف يجعل غرورهم بالسلطة يتلاشى انا مثل تم سبي وشتمي واسوء من هذا من مراقبيين وانت اعلم بهذا الموضوع ...! ولم نجد اي عقاب لاي مراقب او مشرف

مع اني اغض النظر عن شللية بعض المراقبين لما يسمح ان اشتم واسب امام عينه وبعضهم يتهرب واشاهده يتابع ولكن عاجبه الامر ... يعني ما الفائده من المراقب اذا انا كل لحظه بروح اشتكي للقسم او بخصك انت للشكوي وحل مشاكلي

فكل ماذكرته اخي الكريم لن يتم تنفيذه من المراقبين انفسهم فكيف للعضو العادي يطبق هذا ...

المسئلة بحاجة الى سلطة قوية تحكم الوضع وتوقف المراقب عند حده ليعتبر الاعضاء من هذا

اما انك تعاقبني وتمدحه فهذا اسلوبنا الحياتي وليس بغريب ان نشاهده في المنتديات

فلا تقنعني بالوهم بأنه حقيقة

ولكم الشكر والدعاء

حياك الله بالموضوع ..

ويا حبك للأمثلة بالأمور السياسية .. من الوآضح مهتم بهالجانب ..
ما يهمنآ بالمثال هو التوضيح ..

على العكس .. كثير من هم أفضل من أبو محمد ..
أختلف معك بنقطه الغرور ..
ولله الحمد ما أبي اقول كل المشرفين والمشرفات هنآ متوآضعين ويخافون الله بعملهم ..
ولكن على الاقل نسبة عالية جداً منهم .. وولانزكي على الله أحداً ..

أود ان أبين لك ان إختيار المشرف ما يتم بشكل عشوآئي .. ع العكس .. هو إختيار بعناية ..

قضية أن مشرف يوقف على الشتم مصفقاً فمآ أعتقد أنهآ موجوده هنآ ..
أو بالاحرى ما عمري انا شاهدتهآ هنآ ،،
أتوقع انك تقصد أمر آخر وسأحسن نيتي تجاه حروفك ولعلك تقصد ان مشرف ما يوقف مع عضو مآ بالنقاش لانه صديقه أو لانه بنفس فكرة ..

الأروآح كمثل الطيور .. قد تتآلف وتحب بعضهآ من الشاشات ..وقد تكون العكس ..
المشرف قبل ان يكون مشرف هو عضو بالملتقى ..
فـ يحق له ان يقول رايه ويناقش ويكتب ما يشاء كـ عضو فعال مثله مثل غيره ..
إن وضع اللايك على رد غير ردك فمآ يعني ان الاشراف ضدك ..
لآ والف لا .. هذا يعني ان الشخص العضو الفعال الي مُكلف بالاشراف ع القسم هو من ضدك ..
فالاختلاف طبيعة البشر بالحياة ..
وعلشان كذا نجد آراء كثير من الناس تختلف في أمر مآ .. وكل شخص منهم يذهب إلى حيثما يجره عقله وفكره ورأيه .. وأحيانا قد يتعصب الشخص لرأيه ويرفض النزول عنه او حتى النقاش فيه حتى لو كآن على خطأ بيّن ..!!
ويرجع هذا كله لقناعته التامة بصحة ومصداقية رأيه عن غيره من الآراء التي تطرح هنآ .. وعلى هذا رآح يبقى الخلاف قائم بين كل فكرين متخالفين طول ما هناك آراء وافكار متضاده بقضية مآ ..

وأستوقفتني جملتك بإن تقول يُعاقبني وامدحه وان هذا اسلوبنآ الحياتي ..
أختلف معك ولا أتفق معك مثل عدم إتفاق الزيت مع الماء ..
ولعلك تقصد نفسك بالمثال .. اما انا إن عاقبت فلا امدح غيرك تصفيقاً له وتقليلاً من شأنك ..
قدم الإحترام تجد الإحترام ولو كآن من فئه القليلين الأدب ..

أخيراً قضية معاقبة المشرف ..
هي بالفعل موجوده .. لكن انت ما تشوفهآ ولا تطلع عليهآ ..
فهي في مكآن لا يصله الا المشرفين ..

ويآمآ عاقبنآ مشرفين وصل معنآ العقاب الى الطرد من الملتقى !!
فـ المصلحه العامه فوق كل إعتبار ..

المشاركة الأصلية كتبت بواسطة وطني

طبعا جدول العقوبات خاص بالاعضاء وليس المشرفين

نحن بحاجة الى مكافحة فساد في المنتديات بصراحة

طبعا بدون زعل لصاحب الموضوع او الاخوه الموافقين

فكل ما كتب مجرد احلام لا اكثر والله نحن لم نشاهد هذا في حياتنا العملية والعامة

فهل يعقل نشاهده في منتديات هي اكثر مجال للفساد

بالنسبة لي لن يحدث هذا ابدا الا بعوامل استنساخ مثلا نستنسخ كذا ابومحمد ونوزعهم كمشرفين

او بمعجزه تعكس ظاهر الكلام على باطنه

او ان كل ماحدث قد يتحقق وانا مخطأ في الرأي

ولكم الشكر

على العكس يا وطني .. انا اصرح بهآ .. في من أبو محمد كثّر والله ..
وعلى كل حال .. لا يخلوآ مكان من النوآقص .. حتى في أبو محمد نفسه ..
فنحن بشر قبل كل شيء ..

[أبو محمد]

المشاركة الأصلية كتبت بواسطة الدانهـ ه

السلام عليكم

مووضوع جدير ورائع ياأبــو محمد ..

صراحتا مشكلة إغلاق المواضيع بالنسبه لي مااشوفها مشكله ولا تصل لحد ان الواحد يزعل ولا يتضايق صراحتــآ

المشرف او المراقب مايغلق الموضوع الااذا شاف فيه خطــأ أو تطــآول ممن بعض الاعضاء ..أو انه يقلب الموضوع سوالف وضحك ..

احنا من كتابة مواضيعنا نبي نوصل هدف نبي نوصل صوت الي هو "التعليـــــم والاستفاده "من المواضيع

فكل ملتقى وله مواضيعه الخاصه

ملتقى المواضيه العامه <<تكلم بكل مايجول بداخلك لاكن بحدود المعقول
وملتقى الفنون الادبيه <<اكتب وعبر عن اللي بداخلك من بيت شعر ولا قصيده بشرط انك ماتنسبها لك وانت مقتبسها من منتدى أخــر

الامــــــــــــانهــ اهم شي

وملتقى الطلاب والطالبات الترفيهي<<العب امرح استمتع لاكن بأدب وبإحترام وبدون اي خلل

وملتقى الطلاب التعليم عن بعد لجميع المستويات <صراحتا اشوف كثرة المواضيع المتكرره اللي بتلخبطك وتلحس مخك

بتلقى ردود تختلف عن بعض وكذا بتشوف التدهور اللي بيصير بالمنتدى

وهذا هو سبب اغلاق كثير من المواضيع .وصراحتا انا مااشوف شي يزعل ولا يسمح للانسان انه ينقهر

اولا واخير هذا منتدى ونحن متخفين خلف الشاشه

الكيبورد <<هو اللي يبين حقيقة الشخص بإسلوبه وأخلاقه وإحترآمــهـ

نحن هنا لدراسه والتعليم انت عندك موضوع واغلق هذا الموضوع لاكن نحن نستطيع زيارت الموضوع ووضه اللايكات ع مايعجبنا
فكذا تكون انت وصلت المعلومه للاعضاء وحصلت ع عدد كبير من اللايكات دليل ع اعجابهم بموضوعك ودليل بكثرة الزوار لصفحتك

.
.
.
لكـــــ كــــــل الشكــــــــــر يــآبو محمد والله يطول بعمرك وعمر كل اخواني واخواتي ع الطـــآعــــه


لروحـــكم الطاهـــرهـ

وعليكم السلام ..

كلام جميل وحروف تعكس معنى التفهم ..
لكن في بعض المواضيع ماهي خاصة بالدراسة .. وهذا الشي يقد يسبب إنزعاج للعضو ..
مثلاً موضوع بإقسام الساحه العامه ..

لو أتى المشرف وأغلقه بدون ما يكتب السبب !!
في هذي الحاله نعتب والله على المشرف ..
لان العضو بطبيعه الحال لو ان عنده علم ان الموضوع مخالف مآ كآن كتبه .. فمن الوآجب ان المشرف يبين مخالفه العضو وسبب إغلاقه للموضوع ،،

[أبو محمد]

المشاركة الأصلية كتبت بواسطة n o o r a h

يعطيك العافية أبو محمد

المواضيع ما تغلق إلا إذا طلعوا من الموضوع واغلب المواضيع كلها سوالف

اتكلم عن نفسي ليش أسكر المواضيع

الله يعافيتس ..

سؤال ممتاز لو توجه لعضو تعرض للإغلاق ..

حياتس الله نورة بالنقاش