جــــــدول الخــواطـــر ~~~~

[P e a c e]

لما تكون معصب من شخص وزعلان منه ورايح له تبي تزنطه
بس أول ما تطيح عينك في عينه تذوب وينطفي غضبك كله
وبدل ما تفرغ شحنة الغضب تصير تفرغ شحنة حب وغزل

وش الحل مع هذي الحالة؟
جد يعني

[P e a c e]

الحمدلله على نعمة النور

والحمدلله على نعمة الظلام أيضا
فهي نعمة الهدوء والاسترخاء والستر
والنوم والأمان والسكينة

[P e a c e]

على طاري الظلام والأمان


مرة قريت تعليق لطيف في هذا الموضوع في أحد المواقع، يقول
You’re only afraid of being alone in the dark because you’re afraid you’re not actually alone.

انت خائف أن تكون وحدك في الظلام لأنك خائف ألا تكون حقا وحدك

[P e a c e]

من الأشياء اللي مرتاح من عدم وجودها في مجتمعنا السعودي هي البقشيش أو الإكرامية، بالإنجليزي ال Tip
الوضع كذا أكثر وضوحا، تعرف كم بتصرف

مرة كنت مسافر لإحدى الدول العربية وهذا الموضوع أربكني جدا
كنا نروح المطعم ونتعشى ويجي القرسون يلمح للإكرامية، أنا هنا فهمته بس استحيت أطلع المحفظة وأعطيه فلوس بعد ما طلب، حسيتها مثل الطرارة، فمشيت مبتسما ومحرجا، وأقول في بالي ليش ما يحط مبلغ الإكرامية في الفاتورة وأنا أدفعه وخلصنا، ليش هذا الأسلوب

المشكلة رحنا مرة ثانية بعدد أكبر وتعشينا بمبلغ يعتبر عادي في السعودية على عددنا، حدود ١٨٠ ريال، بس كان بالنسبة لهم مبلغ كبير لدرجة الطاولة كانت مليانة، فبعد ما خلصنا جونا خمسة يبون إكرامية، أنا هنا ما عرفت شسوي لأني كنت مخطط أعطي واحد بس، فأعطيتهم المبلغ اللي مجهزه لواحد وقلت لهم تفاهموا انتو
بس جد لو يحطوه في الفاتورة يوفروا علينا وعليهم هالإحراجات
أو مثلا لو كان المقدار ثابت، مثل في أمريكا الظاهر البقشيش متعارف عليه يكون حدود ٤% إذا ما كنت غلطان، فصاير شي ثابت وشبه رسمي.

[P e a c e]

على الرغم من أن الحزن.. حزن
لكن فيه شيء من الجمال، واللذة، تدفع الناس للذهاب إليه والتمسك به
نبحث أحيانا عن معزوفة ناي أو قصة مأساوية
ونعيش نشوة الحزن
وقمة النشوة.. في نزول الدمعة
الرغبة في استمرار الحزن هي كالرغبة في المواساة
كاحتضان غزيز ومسحة رأس حانية

[P e a c e]

مع نمو الأبناء واتجاههم نحو الاستقلال بشخصياتهم تزداد توجيهات الآباء حدة

هذي المرحلة اللي خايف أوصل لها مع أبنائي
ما أبغى تكون علاقتي بهم علاقة تهزيء
لأن المراهق معظم تصرفاته ترفع الضغط، لأنه توه قبل فترة بسيطة ولدك الصغير اللي توجهه في كل شي، فجأة صار كبير ويبي يتصرف باللي يشوفه هو صح، وانت عارف أن اللي يسويه غلط، لكنه يبي يتوصل للنتيجة بنفسه، ومن هنا تجي رفعة الضغط
وتصير شغلتك معاه طول الوقت سوي كذا ولا تسوي كذا

فلو صار همك هو توجيهه نحو التصرف الصحيح ما راح تخلص
لا زم أتحمل أشوفه يغلط شوي
لأني لو ما رضيت بالغلط راح تتحول العلاقة بيننا إلى علاقة باردة وجافة وكلها زعل

يقال أن إحدى الأمهات سألوها عن كيفية التعامل مع المراهق
قالت: مثل طبخ الجريش، خفف على النار بس لا تتركه

[P e a c e]

مما تعلمته من الحياة عموما ومن وسائل التواصل وتويتر تحديدا
انك إذا قلت أي شي ومحد اعترض عليك وهاجمك
فمعناه أن كلامك لم ينتشر بالشكل الكافي

[P e a c e]

هلا بالزوار
هلا بالمتغليين
هلا باللي ما يبون يسجلون دخول بعضوياتهم
هلا بالمبسوطين لأننا نسأل عنهم ونحسبهم غايبين وهم مسنترين معانا كزوار

[P e a c e]

لما تكلم أحد ويرد عليك بكل برود أو ما يرد أصلا ويتكرر هذا الشي لفترة طويلة فأنا شخصيا أعتبرها إشارة للابتعاد فأبتعد قليلا
لو كانت مرة ومرتين وثلاث ممكن تقول عنده ظروف، منفس، تعبان، لكن لما الموضوع يكون بالأشهر فهنا الواحد ينسحب بكرامته أحسن
طبعا لو ما كان هذا الشخص من أهلي، لو كان أخوي مثلا هنا ما فيها ابتعاد، يستحملني غصب عنه

المصيبة أحيانا الشخص اللي أبتعد عنه يلومني بعد فترة ليش صرت ما أسأل عنه
هنا أنا ما أعرف إيش أرد، معقولة كنت فاهم برودك غلط؟ ولا حاب تخلي مسؤوليتك بالكامل؟ كل شي جايز

[P e a c e]

تقييد الصلاحيات للموظفين على الأجهزة شيء جميل من ناحية الأمان في الشبكة المحلية وفي الأجهزة

لكنه في نفس الوقت مزعج لما تحب تعمل تغيير بسيط، لا زم تتواصل مع الدعم الفني ويرسلوا لك الفني يشوف لك المشكلة والسالفة أحيانا بالأيام
مثلا عندك طابعة جديدة تبي تعرفها على الجهاز، لازم تكلم الدعم الفني وأحيانا الموضوع ياخذ أكثر من يوم اعتمادا على الزحمة

أذكر أول ما اشتغلت كان يمديني حتى أفرمت الجهاز وأركب ويندوز وأعرف الطابعة من السيدي اللي عندي وزي الحلاوة
ألحين باقي بس يقفلوا جوالي علي

في وظيفتي السابقة كانت حتى فتحة اليو إس بي غير مفعلة وكذلك السيدي والفلوبي (مو موجود ألحين) كلها كانت تحتاج تصريح للاستخدام، خوفا من تسلل الفيروسات للشبكة.