نصيحة لكل مستجده

[إبتسامة خجل]

المشاركة الأصلية كتبت بواسطة حُوْرْ

الله يعطيكِ العافية و ييسر لك

ويفتح عليكِ

ما تعرفي شقد ريحتينــي

أسئلة قد الحصى أبي استفسر عنها لقيتها هنـا

الله يحرم وجهك عن النـار

~~~~~~~~~~~~~~~~~

أنا الحين كل شئ فهمته

بالنسبـة للبس والجوال والمحاضرات

بس الجدول

الحيــن أسوي شئ ولا أنتظر إلى 16 |10



الله يسعدكِ

ويعافيك يارب

لا هذا اليوم الي تسجلين على البانر

اذا نزلت الجامعة الخطه او المجموعات مثل كل سنة لكم ترتبينه

[إبتسامة خجل]

المشاركة الأصلية كتبت بواسطة حُوْرْ

عندي سؤال

لما أدخل ع ذا الرابط

http://www.kfu.edu.sa/ar/Deans/Admis...ual143110.aspx

وين أروح عشان أسجل موادي وأعرف الدكاترة


عمادة السنه التحضيريه بالأحساء

ولا

كليـة التربية ( طالبات )

ولا

كلية التربية للبنات ~~> أقسام أدبيـة


علمـا بأني مقبوله في كليـة التربية للبنات - ادبي

بس ما عرفت ويـن أدخل

لأن كلية التربية جايه مرتين

أكرر شكري لك حبوبه :)

اتوقع كلية التربية بنات اقسام ادبية

بس انتو مقبولين بكلية التربية تبعنا :mh19:

ننتظر لما الجامعة تنزل المجموعات

العفو بالخدمة

[حُوْرْ]

تسلمي حبوبه :)

[jooOooli]

المشاركة الأصلية كتبت بواسطة إبتسامة خجل

نصيحة لكل مستجدة

بسم الله الرحمن الرحيم

السلام عليكم ورحمة الله وبركاته

بأرق معاني الود و الاحترام

وبعنوان التبريك للمقبولين والمقبولات

هاأنتم تقفون على عتبات الجامعة بعد سنين الدراسة في المدارس

وقد ارتسمت الابتسامة لتعانق فضاء فرحتكم الغامرة

فألف ألف مبروك لكل المقبولين والمقبولات

أن شاء الله نفرح بخبر تخرجكم بعد اكتمال 4 سنوات الدراسة مع مرتبة الشرف

دخولك الجامعة يعني مرحلة جديدة حلوه :g8:

نبقى جد و اجتهاد من بداية السنة :150:

هذا الموضوع لكل مقبولة في الجامعة وتبقى تستفيد وناوية تجتهد وتشد حيلها و تاخذ مرتبة

الشرف عند تخرجها

أما إذا كنتي تبقين تغيرين جو ودخلتي الجامعة وناوية تضيعينها لعب فياليت

ما تتعبين نفسك وترجعين خلف وتوفرين على نفسك وقت وجهد :103:

ندخل في الموضوع

طبعا في يوم من الأيام كنت بمكانكم كمستجدة وكنت فضولية في كل شي

الجامعة بالنسبة لي شي جديد ابقي اعرف كل شي " من .. إلى "

الجدول – اللبس – التخصصات – الدكاترة – الأختبارات .. الخ

حبيت انزل الموضوع للي يبقى يستفيد

وأدرج الأسئلة إلي تكثر في راس كل المستجدات

بطريقة سؤال جواب >>> أقرب للمعنى

************************************************** ************

نبداء بسم الله

*بجهز لبس للجامعة شنو الألوان المسموح فيها ؟

بالنسبة للجامعة

طبعا جميع الألوان مسموح فيها غامق فاتح

يكون لبسك كم طويل أو نص ما في مشكلة

البعض يلبس ربع كم اوكي

طبعا ما يلبسون ربع كم إلى المتمردين على النظام

بس تلبسين شبه حفر هذا مو حلو يعني أنتي جايه جامعة موبيتكم

تنبية " الأمن إذا شافوك لابسة ربع كم يكتبوك تعهد وتهزئ ما

يسوى عليك تحطين من كرامتك علشان لبس"

اهتمي انك تشترين ملابس مريحة مو ضيقة

بالنسبة الكلية الأداب

قميص ابيض و تنوره سوده

" بس البنات معطينهم أشكل ويلبسون على كيفهم والألوان إلي تعجبهم "

يعني نسبيا الألوان عادي بس إذا بتراجعين الإدارة من الباب يقولون لك مخالفة ما نستقبل

وما نصحك تشترين من البداية يعني تشتري تنورتين حتى لو جنز اسود او كحلي

وبعد ما تجين أول سبوع تشوفين الأوضاع كيف يمكن تتغير أنظمتهم

لأن العام مسموح بجميع الألوان

وبعدها شددوا وقالوا بس ابيض وسود وبعض الدكاترة يعتبرونك غياب اذا لبستي غير الأبيض:no2:

************************************************** **********

& الشنط &

وإذا بتشترين شنط للجامعة اشتري لك الشنط الكبيرة نسبيا

لأن كتبك عبايتك أغراضك كل شي راح يكون فيها

مو كبيرة حيل ولا صغير

لأن مو مثل المدرسة أيام الدلع والدلال تحطين شنطتك و عبايتك و ما ترجعين لها إلى نهاية

الفسحة وهي ما تغيرت من مكانها

لا الحين أنتي كبرتي وصرتي بنت جامعة شنطتك طول اليوم على يدك مع أغراضك

يعني هي في يدك والأغراض تختفي

كيف لو حاطتها ومشيتي والله تختفي كلها فالعباية مانصحك تحطينها حتى

لو على الصناديق >> أكيد شفتوهم في القياس

لأن حضرت جنابي كل يوم تكون عبايتي في الشنطة بس يوم كتفي انكسرمن ثقل الكتب

والأغراض و العباية قلت اليوم بخليها فوق الصناديق ودخلت المحاضرة

رجعت لها أبقى أصلي و ابقى ارجع عندي محاضرة

وفر وفر لما افتر راسي ولا شفتها

يعني ما يسوى عليك تتعبين نفسك

طبعا شفتها بعد بداء المحاضرة بنص ساعة فوق الصندوق الجهة الثانية

في حل لثقل الكتب ؟؟

الجامعة تأجر صناديق صغار وكبار الصغير سعرة في السنة 50 والكبير 100 >> ألا إذا ارتفع السعر

بس المشكلة أنهم سنة وأنتي تروحين وتجين على مايعطونك المفتاح

************************************************** ****************

*أقدر أحط مكياج ؟؟ :g4:

أي يا عمري تقدرين والي يريحك بس أنتي جاية في الصباح يعني مكياج خفيف

لا تحطين مكياج ثقيل من صباح الله اكتفي بودرة وروج وكحل >> حلاه البنت بنعومتها :g20:

إلا إذا كان في مناسبة عندك مو تحطين مكياج ثقيل مكياج هادئ

بختصار مو على طول الخط مكياج تتعبين بشرتك

************************************************** *************

*الجوال في الجامعة؟

طبعا مسموح وهذا معروف للكل بس جوال كاميرة ممنوع منعابات يعني مو بس الأمن ما يرضون

حتى الطالبات يعني أنا وحدة أخاف لما أشوفوحدة عندها جوال كاميرة ورافعته حنا بمجتمع كبير مختلط من ناس كثار

تفكيرهم يختلف في ناس تفكيرهم منحط وخلاقهم عدم >>> أنا ما خوفكم بس ماله داعي تجيبين النفسك كلام

وبس تدخلين القاعة للمحاضرة الجوال صامت لأن بعض الدكاترة اذا ماكان الأغلب يجن جنونه بس يسمع صوت جوال :c8:

************************************************** *****

خلصنا التجهيزات وبدت الدراسة

*متى أداوم في الجامعة – الكلية ؟؟

طبعا عادة البنات ما يداومون إلا الأسبوع الثاني

بس بما انك يا شطورة مستجدة يا حبذا تروحون اقل شي يوم واحد تدورون مكان القاعات

بيسهل عليك أول ما تبداء الدراسة الوقت حتى لو تأخرت السيارة أو تعطلت سيارة إلي يوصلك :s3:

" لا سمح الله " ما تحاتين انا بيضيع الوقت وأنتي تدورين القاعة يصير عندك خلفية مسبقة عنمكانها

************************************************** ***************

*طيب كيف اعرف مكان القاعة وأنا تو مستجدة ؟

لما ترتبين الجدول راح يكون فيه رقم في البانر مكتوب كذا 2810032>>> مجرد مثال

*شنو يعني هذا الرقم ؟

مبنى الطالبات2 0281003

يعني تروحين المبنى الثاني- 28>>>نفس المبنى بس له رقمين
لما تروحين المبنى

تدورين قاعة1003

مثل هالطريقة بقية المواد

الي لونته بلأحمر يكون رقم المبنى

ولي بلأخضر رقم القاعة

يعني بدل ما تعبين نفسك وتدورين قاعة قاعة في كل المباني على طول تشوفين أي مبنى وفي

الساحة الخارجية تشوفين كل المباني مرقمة والأرقام واضحة تروحين للمبنى المحدد وتدورين قاعتك

************************************************** ***

*وإذا ضيعت القاعة في بداية الدراسة شسوي ؟؟

اسألي اقرب بنت تشوفينها عادي اتعب وأنا أقولك عادددددددي

كلهم بيقدرون وضعك لأنهم كانو مكانك في يوم من الأيام و حاسين فيك لا تستحين وتفوتك المحاضرة

************************************************** ***************

يــتــبــع

يعطيك ألف عافيه اختي وتسلم اناملك بصرااااحه الموضوع فادني كثيييييييير

انا انقبلت اول شي بكلية المجتمع بس لمن ارسلت الاوراق حطوني بكلية الاداب

والحمد لله على كل حال انا من الخبر وماجاء قبولي الا بالحساء ومااعرف احد بالحساء ابد وخايفه لاني مااعرف احد

والله يستر....

وشكرا لك على النصيحه...

[إبتسامة خجل]

المشاركة الأصلية كتبت بواسطة حُوْرْ

تسلمي حبوبه :)

الله يسلمك

[إبتسامة خجل]

joo0ooli

حبابة ان شاء الله راح تكونين لك اصدقاء لأن راح تشوفين مستجدات كثير ولكل ضايع

ومع الأيام والمحاضرات راح تتعودون على بعض

والله يوفقك

[عابرةالظلام]

الله يعطيك الف عاافيه غلااتي

ودمتي بحفظ الرحمن

[مملكه روحي]

الله يوفقك يا رب افادتني المعلومات بشكل كبير

[إبتسامة خجل]

المشاركة الأصلية كتبت بواسطة عابرةالظلام

الله يعطيك الف عاافيه غلااتي

ودمتي بحفظ الرحمن

ويعافيك يارب

موفقه

[إبتسامة خجل]

المشاركة الأصلية كتبت بواسطة مملكه روحي

الله يوفقك يا رب افادتني المعلومات بشكل كبير

ويوفقك يارب