‌‌‌‌‌ ‌ ‌ ‌‌‌‌‌ ‌‌‌‌‌ ‌ ‌‌‌‌ ‌‌ من الظلمآت الى " النور !

[ريمنقو]

-

اذا وثقت بنفسك وبقدراتك
فلن تؤمن بالمستحيل

[ريمنقو]

-


لاتحصر الكرم في المال فقط ؟!
اذا اكرمت فأكرم بكل شي بالفعل والقول الطيب لان الكرم ماهو دايم بالعزايم
الكرم في كل شي بهذي الحياه ..!

[ريمنقو]

-


ادعوا لي بالشفاء في كل ليله لابد من الذهاب للمستشفى حتى استريح بمنامي
قدر الله قبل يوم ان ينقطع عندي التنفس ، مسكين الانسان والله ضعيف ضعيف
لولا رحمه الله بنا حنا ولاشي
الحمدلله على ماكتب والحمدلله على العافيه فلو العافيه تباع وتعطوني كل أموال الدنيا مافرطت بالعافيه نعمه عظيمه نجهلها
فاحمدوا الله

[ريمنقو]

-





دكتور [صفوت] طلبتك تكتب افراجي
ماهو بحقٍ تحرم النفس وتشقيها

مانت بمداوي الوجع ماعندك علاجي
تكفى طلبتك من [الجرعات] تعفيها




# لعب فينا دكتور صفوت

[ريمنقو]

-

الله يجزاكم خير جميع من دعا لي وذكرني بدعواته ..
وانا مانسيتكم من دعائي ..
الحمدلله على ما أصابني حتى يبلغ الحمد منتهاه ..
شكرا لكل من ذكرني بالدعاء وشكرا لكل من وقف معي ومسك أمور الجامعه في غيابي

عدىّ الشر ان شاء الله والله يتم ويمن علي بعافيته
مازلت أعاني ولكن لطف الله وسع كل شي ..

سبحان ربي في غمضه عين بين عشيه وضحاها يبدل الحال الى حال
فالبدايه كان مرض عادي (حمى ) ولكن وصلت الحراره الى مايقارب 40 الا نصف
والأمور بدت تتغير وتتضاعف فماصارت حمى انقطع التنفس !
اسبوع كنت يوميا اروح واجي على المستشفى فكانت حالتي مره توب ومره داون
والحراره مستمره في كل يوم

سويت أشعه على الرئتين وحده منهم كأنها ماكوله مافيه الا نص رئه سليمه
فقال دكتور صفوت (تنويم) مافيهاش كلام والله كأنه صفقني دارت الدنيا والشريط أنعرض احسب اني بموت
لانه من كلامه خوفني وينافخ علي يوم جا يكشف يرفع صوته لفي ع جهة اليمين واذا كحيت يهاوش
ياخي نفسيتي تعبانه وانت تتعبها اكثر وش ذَا سجن مب مستشفى

كنت على كل جهد اتعب تعب شديد كأني في سباق ماراثون
الكلام يتعبني والى الان يتعبني فما اقدر على ان اقول ( الحمدلله رب العالمين ) جمله واحده
حالتي تحسنت كثير بفضل الله عن السابق رغم وجود التعب الى الان ولكن الحمدلله قبل حرف واحد والله ماقدر على نطقه

المرض دائما أراه نعمه من الله لانه يخليني احس بعظمة العافيه
فمن كان ينام على جنبيه وعلى بطنه وظهره ويتلذذ بمنامه فليشكر الله والله اني الان اتمنى انام فقط براحه
فالتعب يجبرني ان اجلس طول الوقت حتى وقت النوم جالسه
واالحمدلله
تذكرون يوم حلمت بذاك السوال ( هل هناك تعب مع الله ) كنت كل ماقلت تعب ذكرت هذا السوال فهان كل شي علي

:
اكثر شي فقدته اثناء التعب وأفقده الى الان هو ترديد الآيات مع القارئ
فالسابق يوميا افتح ع مقطع سوره البقره او اي سوره احفظها وابدا اردد مع القارئ
امس حاولت لاني اشتقت لهذا الفعل ولكن ماقدرت كني مكينه سياره تنتع قاطعني من كان معي قال اص اص لاتتكلمين صجيتينا



حبيت انقل لكم شي مريت به ، وأقولكم اني باذن الله وبحوله وقوته بخير والشعير بخير
اسأل الله العلي العظيم ان يشفي كل مريض ويلبسه لباس الصحه والعافيه ويكتب اجره

شكرا مره ثانيه لكل من خصني بدعوه وخصني بسؤاله واهتمامه وخصني بتذكير و وصايا
ف والله مايخفف العنف النفسي اللي سببه دكتور صفوت غير كلماتكم ووقفاتكم
اسال الله ان يسعدكم ويحفظكم ويحفظ أحبابكم وابنائكم من كل مكروه

موقف الأب يشوف بنته تتألم وهو مايملك شي شعور قاسي وده يحط كل مايملك لأجل العافيه فقط
فالله لايذيقكم حر هذي المواقف ويبعدنا واياكم ومن نحب عن كل مكروه ونعوذ بالله من الامراض وسوء الاحوال وانقلابها

[ريمنقو]

-

اقرى بعض التدوينات وتذكرت حلمي في ابو بكر رضي الله عنه
ماراح اقول التفاصيل ولكن ودي اوصفه لكم تخيلوه ..

طويل ونحيف وابيض
شعره اسود قصير وشبه كثيف
لحيته قصيره وماهي كثيفه وله زوائد على الخدين فيها شيب وباقي لحيته سودا
خشمه طويل وعيونه صغيره ووجهه طويل رضي الله عنه
واسع الفم واسنانه تقريبا كلها بنفس الطول ومتراصه مافيها فراغات
اعرف اوصف؟

يمكن هذا الحلم العام او قبله يعني قريب ..
وللحين مستانسه اني شفته وبوضع جميل ومكان اجمل

[ريمنقو]

-


عندي حبوب تسبب النعاس اذا اخذتها لازم انام
اخذت لي حبه بعد صلاه العصر وتجهزت لمتابعه محاضره ..
بدأت الدكتوره السلام عليكم ورحمه الله طلابي وطالباتي .. ونمت ماقمت الا وهي تقول استودعكم الله طلابي وطالباتي
عاد نومة العصر شينه تخلي الواحد منفس ومصدع
المهم ان حالتي اليوم منتكسه يارب سلم سلم احاول اكون على مايرام
لكن تطورت الحاله الى اني ماقدر أمارس اي نشاط بسيط ، اليوم اول مره احس بمثل هذا الالم
يعني الصلاه ماقدر عليها ولا حتى الوضوء الا بمشقه
وبما ان هذا اول يوم لهذي الحاله الغريبه قلت بصبر لين بكره واشوف الوضع


الحمدلله فما زلت بعافيه الله يتمها ..
احيانا اسولف بمثل هذي المواضيع لاني أبيكم تكثرون الشكر والله مقصرين كلنا بالشكر
والله وعدنا ان شكرنا زادنا ..

[ريمنقو]

_


وش اسوي بالنتفه اللي عندي ياناس ..

اذا شاف له واحد ملتحي غنى له ( يامطوع لاتلوع انتا الالوع )
واذا جلس جنب احد قال له ( خلك بدنبي لاتخليني )
واذا صار اكشن غنى ( حي من يقدم ولايحسب حساب الظلوف ) وينطلق فازع


ينوكل اذا قال يامطوع لاتلوع

[ريمنقو]

-



مما تعلمته بتخصصي

اذا جاء العميل وبدا بالمشكله واسترسل بالكلام ويتكلم بالم وحرقه
ماقول له ( حاسه فيك ) او اي كلمه تشعره بقدر ألمه وتعاطفي معه
بمعنى بعض الكلمات اذا قلناها تزيد من المشكله ونحن نظن انها تخفف من الضغط النفسي
لاحظت فعلاً اذا قلنا ( حاسه فيك ) نشوف البنت تبدأ تبكي او تزيد بالبكاء وتزيد سلبيتها

معلومه جميله مفيده في حياتنا اليوميه ..

[ريمنقو]

-

كاتبه معرفي بالعربي واشوف الناس تبدع في كتابته مره رمنقوا ومره رمينقو ومره رمنقو
وانت ماشي . .

قررت أغيره جدياً الى

1- R E M N G O

او

2- أم جركل

او

3- ام معيض


صوتوا رقم 1 او 2 او 3 ؟؟؟
بكل صدق كنت افكر برقم 2