‌‌‌‌‌ ‌ ‌ ‌‌‌‌‌ ‌‌‌‌‌ ‌ ‌‌‌‌ ‌‌ من الظلمآت الى " النور !

[ريمنقو]

-




‏عسى مقبلة الايام تجبر عزآ اللي راح
‏وعسى الضيقه اللي فالصدرتنقلب فرحه
‏.
‏اسولف مع العالم واجامل مع المزّاح
‏واناوسط صدري شي يصعب علي شرحه
‏.

[ريمنقو]

-


ياحزن كبدي حزن من ضاق ثم حام
اخذت فروخه مدري ليه ولوين؟

بعد ما شاف العش عيدان وعظام
خاالي تفكر فووق ويساار ويمين

خلا عشاها فيه ومن الوطى شاام
زبن على روحه وفل الجناحين

[ريمنقو]

-


‏ '
‏.
‏عفى الله عن جوفٍ به الحزن ما ينشاف
‏يكن الضيق في صدره ولا جاب له طاري
‏


؟؟!!

[ريمنقو]

-




ههههههههههههه وش هذي التدوينات الكئيبه من امس
ادري اخر شي بندم على أني طرحت هالأشياء هههههههههههههههه


احس حيلي منهد نفسيا ، نفسيتي احس بها نوم وخامله
محد يصدق اذا قلت انا ما اشكي لاحد او افضفض .. انا ماتكلم الا باشياء معينه ويكون اخذ الراي فيها وهذا نادراً اذا الامر محيرني او متشعب وكبير
لكن غالباً ماتكلم ..
وان تكلمت فهم لأشخاص معينين واختارهم بدقه ولكل واحد فيهم مجال معين

[ريمنقو]

ياحزن خف شوي صاحبك مخنوق ‏ماعاد له من ضيقة الصدر حيله ‏ياليت لو يجلي بي الهم طاروق ‏جريت وناتٍ ..بصدري ثقيله /اااه ياضيقة الصدر قسم على الجرح

هذا اللي يقول لك يزيد الهم هم هههههههههههههههههههههههههه
ترى ماحب اجواء الحزن .. الله يصلح قلبك على الدقه انتي
اذكري الله وعيني خير عيني خير



--

انسي الحزن بقول لكم سالفه
تذكرت موقف صعب
خالتي عندنا بذاك الوقت .. على اساس جمعة الأهل بهذيك العطله عندنا ننتظر بقية الربع يجون

يوم الخميس الساعه 1 ونص ظهراً بعد الغداء انتشروا اهل البيت محد حولي
اتصلت وحده وانا رديت وبادرت بالترحيب دون ان اسمع صوتها على طول ( ارحبي يالله حيها والخ ) وكان صوتها مريب مختلط بالعبرات والغصات وبدون مقدمات قالت وين امتس قلت مدري قالت وخالتس قلت مدري محد عندي !
قالت وهي تختنق محمد توفى ( ولد خالتي ) سمعت الخبر وكأني مصفوعه انلخمت كانت صدمه كبيره بالنسبه لي
المهم قالت علميهم وسكرت ..

جلست في نار من اقول له ؟؟؟؟ وكيف اقول ؟؟؟؟؟ و وش ردة فعله ؟؟؟؟؟
امي مستحيل أفاجئها بهذا الخبر توقعت انها بتنهار هي خلقه لو اقول لها ( بقولتس شي ) تبدا بالارتعاش
فشلتها من القائمه ،، فكرت اقول لأبوي بس ما اذكر السبب اللي منعني عنه

المهم اخر حل هو اني اقول لخالتي وهي تقول لامي
توقعت خالتي هي الاقوى هي اللي بتكون عون لامي فأمي ضعيفه بهذي المواقف ..
بصراحه كان جُل تفكيري بأمي كنت اخاف عليها من الصدمه ،،

اذكر اني اثناء تفكيري ادور فالبيت فلما اقول بقول لفلان واروح له أتراجع وارجع مع دربي
فاذا قلت بقول لفلان اروح لين أوصل لمكانه ثم اتراجع وأرجع
حتى اتخذت القرار الحاسم باني اخبر خالتي .. جيتها وكنا لوحدنا وبدون مقدمات قلت لها الخبر
كذبتني فالبدايه وتوترت واتصلت على الأهل وتأكدت ثم انهارت انهيار عظيم
وعرفت امي وعرف الجميع

والمفاجأة ؟؟


امي كانت الاقوى كانت عكس ماظنيت واخطيت بظني فيها وبقراري
صحيح هي تأثرت واجد لكن كانت الاقوى
والله الجميع تأثر بما فيهم انا ! فحنا متربين مع بعض والعيال اخواني وانا أختهم وكلنا تربينا على هذا الشي
ماكنت أتصور اني بفقد احد قريب لي .. كانت هذيك الليله موحشه صدق مانمت من الخوف
ماكنت اتخيل اشوف قريب منهار بهذا الوضع !
كانت الدنيا عندي لعب ووناسه وضحك ما كنت ألقي بال لهذي المواقف .. ولا احسب حسابها
متناسيه كلياً الموت مره مره مره مايخطر على بالي .. ولكن من بعد هذا عرفت ان الموت اقرب من كل شي
بغمضة عين يروح الانسان ..

وعرفت كيف أدير مثل هذي المواقف .. اسال الله العلي العظيم ان يبعدني واياكم عن هذي المواقف
وان لا يحزن قلوبنا بفقد احبابنا يارب امين ..

[ريمنقو]

-



اتمنى يصير فيني هوس على البرامج يعني اتابعها يوميا واتفاعل ... ملوله مره ..
حتى الألعاب أطول مده انسمجت فيها اسبوع وبعدين تركت اللعبه ..
البلايستيشن يمكن لي 9 شهور مالعبت به
والبرامج اللي الناس متفاعله فيها انا مادخلها باليوم الا مره وحده لمدة دقيقه الى دقيقتين
سواء كان واتس او تويتر او اي شي من وسائل التواصل .. ممكن بالايام مادخل عليها
كل البرامج كنت في تفاعل بعدين خلاص تركت كل شي .. صار شغلي يا يتيوب او اقرا بالنت بعض الكتب والأخبار
ماراح ارجع انقز بحلوق الخلق الا اذا اتقنت العبريه ههههههههههههههههه

لي فتره طويله كذا حتى قبل البرامج اتملل من اي شي كان يشغلني حتى الدراسه
فيه احد مثلي والا بس انا :(

[ريمنقو]

-

جزاكم الله خير ..
القصه اللي ذكرتها لها سنين طوووووويله طويله فوق عشر سنوات

قصة آخرى قديمه بعد !


بقي على عطلة الحج يوم وثالث يوم من العطله معزومين لزواج
فاتفقنا ان نسافر قبل الزواج بيوم .. ولكن قبل ان تبدا العطله تغيرت كل الخطه ؟!
ليه وش السالفه !
قرر ابوي في ليله دامسه ان يقول بنروح لهم مفاجأه الليله ؟ ولاحد يعلمهم مانبي عزايم وذبايح؟
علامات الاستفهام فوق رأسي من متى ابوي يسافر بالليل ؟! واسال امي وش عنده يبي يمشي الحين قالت انتي بس تولمّي ؟

تولمّي = تجهزي

المهم ركبنا وطلعت امي الجوال قالت بتصل على امي ورفض ابوي وقام يتعذر ممكن نايمه لاتزعجينها واصلا ما ابي احد يعرف ولاتتصلين على احد
انا وضعت يدي على خدي وأتأمل المدينه قبل الخروج منه والتساؤلات فوق راسي

وبدا ابوي يسولف مع امي عن عيال خوالي وعددهم سوالف عاديه
ومن ثم تعمق بالسوالف فخصص واحد من خوالي اخذ يسأل عنه وعن تفاصيله وكأن ابوي مايعرفه ..!
طول الطريق يتكلم عنه وامي تجاوب وتتكلم معه على انها سواليف هذا ولده صغير وعمره كذا وهذا كذا

ف فطنت للامر اللي امي مافطنت له !
وقلت في نفسي ان خالي هذا لاشك انه توفى ؟ فمن متى ابوي يسأل مثل هذي الاسئله ويهتم بالسؤال عن عياله ؟
ابوي مايشوف كل عيال خوالي فالصغار مايعرفهم لذلك سأل عنهم
عرفت ان الامر ماهو مجرد سوالف وفضول .. كان عنده خبر ان خالي توفى لذلك قرر على ( المسرا ) في ليله ماهي ليله مساري !
ورفض اننا نتواصل مع آي احد حتى مانعرف بالخبر ! فالمسافة بعيده ومايصير نعرف بالخبر الا اذا وصلنا كان هذا افضل الحلول عند الوالد

كان يسال وهو متاثر ويفكر فعياله صاروا أيتام ! وكم يتيم اكثر من واحد ! طيب من يراعاهم ؟!
يسال وتجاوبه ثم يقول ايييي ويسكت شوي ثم يسال .. وامي المسكينه تحسبه يسولف معها كالعاده

بعد ماوصلنا الساعه 1 ليلاً البيت مظلم وهاااادي والجميع مجتمع بالصاله الا جدتي وينها ؟
امي جن جنونها تسال امي وينها ؟؟! امي فيها شي ؟؟! الوجوه يعمها الحزن والظلام .. تمسك خواتها تسألهم عن أمها ! ولا جواب !؟ كلهم في صمت

حتى قامت وحده منهن ملكت شي من الشجاعه وقالت لها بأن جدتي في بيت خالي لانه توفى ..
فكأن انصب علي ماء حار واسوّد وجهي وذكرت الله فأغمضت عيني فانا لا اقوى ان ارى امي بهذا الوضع ..
سمعها ابوي فناداها وهو يعرف الم الفقد

فراحت له وضمها حاول ان يهديها فكانت تضرب صدره الطاهر بيديها الطاهره ضرب ذاك الضعيف المنخذل المكسور وهو يزيد في ضمها ويذكرها بالله وهي تسال ( ليه ماعلمتني ) ( ليه ماعلمتني )

هو موجوع معك يا امي فانتي تقطعين قلبه وقلبي
هو طول الطريق كان يفكر كيف يخبرك اخبرها عند الوصول او اخواتها يتولون الامر؟
هو يفكر بردة فعلك وفعلي فهذا خالي الحبيب كنت اذا بسلم عليه ابوس راسه وخشمه ويرفض
يقول لي اذا جيتي تسلمين سلمي خشم بخشم
خشمتس يابنتي وينطحني بخشمه ف اتأذى وتدمع عيوني من نطحته ماكان يسلم بشويش ههههههه
يذكر الله ويذّكرها حتى هدت .. ليله اخرى موحشه بالنسبة لي وعطله بائسة
الله يبعدنا واياكم عن مايحزننا يارب امين

# ان تفقد اخوك يعني ان تفقد استقامة ظهرك

[ريمنقو]

-



( لانكلف نفساً الا وسعها )


فمايصيب الانسان من وصب ونصب وهم وغم الا وهو قادر على هذا
لاحد يقول انا ماقدر انت تقدر تتحمل ما بك وتقدر تتغلب عليه ولكن اعرف كيف تتحمله وتتغلب عليه

[ريمنقو]

-



نعفو فيرونه ضعف ، نتواضع فيرونه ذُل ومهانه ، نقول كلمه الحق فيرون ألسنتنا ماهي طيبه !
نؤيد فيرونه خضوع وانقياد ، نعترض فيرونه تكبر وعزة نفس ؟

بالله وش وضع هالناس ؟
من يفهمهم ان الحق حق ويزعل اللي يزعل ويرضى اللي يرضى


ترى مايجيب الضيم و الضغط والقولون
سوى كلمه من واحدن كنه إيانا

نعده من المضمون وأثره ماهو مضمون
ياربي لاتنكسنا ياربي لاتجفانا

[ريمنقو]

-


اعتذر للجميع ان احزنتهم والله ماكنت اقصد أحزنكم فانا كنت أقص القصص وجوي صافي
واعتقدت ان هذي القصص ماهي مؤثره لانها ماعادت تؤثر بي

نلتقي بصفحه اخرى هههههههههههههههه