‌‌‌‌‌ ‌ ‌ ‌‌‌‌‌ ‌‌‌‌‌ ‌ ‌‌‌‌ ‌‌ من الظلمآت الى " النور !

[ريمنقو]

-

-




من بين زوار المدونه وحده كنت انا وهي شي واحد .. عمر صداقتنا 8 او9 سنوات
اعرف يقيناً انها تقرا كلامي هذا رغم انها ابداً ماقالت لي انها تتابعني و..
بشهاده منها ماجاء مني ردى ولا جاء مني مايسيئ لها وهذا مايهمني ان اكون طيبه وان لا أضر احد

العشره تفرض علي التقدير
فمن يرفس هذي العشره ويتناسى كل شي فهو ردي ..
مازلنا الى الان نتواصل ونأخذ علوم بعض واخر مره كلمتها اليوم ،،

من وفائي اكتب عنهآ الان !
لله وفالله والايام تمشي فان غدت بي الدنيا اذكريني بخير

[ريمنقو]

-



تقول آمي والله لو ادري اخر دراستك هذي فلسفه ماكان خليتك تدرسين اصلا
ههههههههههه صجيتها بفلسفتي
انا ما انتبه لنفسي اني أحلل المواقف واحلل التصرفات والسلوكيات واقول لها مستقبلاً وش النتائج
وهي تتملل من هذي الفلسفه اللي هي ( علم )
مانتبه لنفسي اني صرت اسأل كثير عن التفاصيل أكثرت من ( ليه ، كيف ، شلون ) ليه مايصير كذا بدلاً عن كذا
شلون صار كذا ؟ كيف صار ؟

والله مانبهني الا هي ،، اشوف الامر ايجابي لانه يعطي نتيجه ايجابيه فعند طرح الاسئله حول مشكله ما ، نلقى حلول
عند ملاحظه سلوك معين يثير التساؤلات نوصل الى نتائج قد تكون هذي النتائج سلبيه وقد تكون النتائج تفعّل الدور الوقائي
فانا كثير ما الاحظ شي الجميع يغفل عنه واذا تكلمت اتكلم من جميع جوانب هذا السلوك وبالأخير اطلع انا صح


شطحه
تذكرت مره شغالتنا في عز الظهر كل شوي طالعه بزباله للشارع فمحد لاحظ كثرة طلعاتها الا انا
قلت يالربع ذي والله ورآها علم ماصارت زبايل
اخر كيس طلعتّه روحّت ماعاد لقيناها .. تطلع على اساس تقط الزباله وهي تشوف جاء سؤاقها او لا
شف كيف دهاء الشغالات بالنحشات

[ريمنقو]

-


الصبآح


مايليق له الا الرواقه والنفس الطيبه ،، فابتسم واشعر بتنفس الصباح !

[ريمنقو]

-



بعد تدوينه الصباح ..
توكلت على الله وطلعت .. ركبنا السياره والامور طيبه
كنت اسمع كالعاده ( في ظلال السيره ) وماسكين خط عام ..

غارقه بتفاصيل حياة حبيبي رسول الله .. فمره ابتسم ومره ابكي
المهم فجأه الخوي طاح راسه ع كتفه وطلعت السياره عن مسارها ..
الخوي غطّه النوم
لطف الله بنا وقدر يسيطر على السياره ..
والله لولا لطفه لكنا في خبر كآن
وكم من خبر كآن انجاني الله منه فالحمدلله الحمدلله

يالربع تكفون يالربع لاحد يسوق وهو ينعس

[ريمنقو]

-




سامح كل من اساء لك واخطئ في حقك وكدّر مزاجك وقلل من قدرك وكال لك بمكيالين
( ادفع بالتي هي احسن )
انت قادر ان تأخذ حقك ( وجزاء السيئه سيئه مثلها ) ولكن مابعد هذا الكلام قوله (فمن عفا وأصلح فأجره على الله إنه لا يحب الظالمين)
يكفينا والله ان اجرنا على الله الكريم العدل الحق ..
البعض يظن ان في هذا اذلال له وضعف وينسى قول الرسول صلى الله عليه وسلم وهو يقسم بها
( ما زاد الله عبدا بعفو إلا عزا )


في حادثة الإفك دروس كثيره نتعلمها من وقفات النبي صلى الله عليه وسلم وابو بكر وابنته
شاع الخبر بين الناس ومن بينهم قريب لابو بكر رضي الله عنه اسمه ( مسطح ) يشترك مع من اشتركوا في اذاعه الحادثه وكان ابو بكر ينفق عليه ..
فلما برأ الله عائشه قال ابو بكر والله لا انفق على مسطح شيئاً ابدا ,
ومن يقف بموقف ابو بكر لا غرابة بأن يقطع عنه النفقه وهذا اقل عمل يعمله ,
فمن الناس لو وقف بهذا الموقف ممكن يقتله ومنهم من يبرحه ضرباً فقط لانه ( اشترك بحادثة الافك )


لكن شوفوا وش كان رد الله عليه ..
نزلت ايه لابو بكر
( ولا يأتل اولو الفضل منكم والسعة أن يؤتوا أولي القربى والمساكين والمهاجرين في سبيل الله وليعفوا وليصفحوا الا تحبون أن يغفر الله لكم والله غفور رحيم )

ولايأتل = ولايحلف


فقال أبو بكر: والله إني لأحب أن يغفر الله لي، فرجع إلى مسطح فأنفق عليه،
وفي بعض الروايات أنفق عليه ضعف ما كان ينفق عليه من قبل

اعظم درس

[ريمنقو]

-





اتصددّ منك والله من حيآي ..
والحقيقه شوفتك هي مطلبي

لالمحتك كن روحك في حشآي
واختلط مابين شرق ومغربي ..


#نيو

[ريمنقو]

-


* محاوره من وحي الخيآل يشهد الله انها من وحي الخيآل .. تقمصت شخصيتين وكتبتها
قال وقلت وهي كلها كلامي اصلاً


قلت :

اتصددّ منك والله من حيآي ..
والحقيقه شوفتك هي مطلبي

لالمحتك كن روحك في حشآي
واختلط مابين شرق ومغربي ..





قآل :

ساقني قلبي عليكم من عمآي
وان تعثرت بخُطاي احبي حبي

اذكرك في كل لحظه من ولاي
وان بغيت ادعيك قلتي وش تبي؟



قلت :

لامنعت الوصل ماهو من ردآي
هي سلوم الحب واصل المذهبي

لانت من ربعي ولاهلي واقرباي
ولانت تجهل ياعريب المنسبي


قال :

من سلايل نجد وانتي في حماي
حافظك في سد دقني وشنبي

وحافظن سر المحبه في خفاي
ومقتدي بفعل الصحابه والنبي


قلت:

كل طيّب مبتداي ومنتهآي
وكل حرٍ بالفعايل يطربي

الجبال الشامخه هي مرتكاي
والفعايل ماهي بعرض نكبي


قال :

يالاصيله الردى ماهو ورآي
ومن نوى بك شر يخسى ويهبي

ماعرفتك بين ارضي او سمآي
آمري باللي تبينه وآطلبي ..

قلت :

عاش طيّب والردي جعله فدآي
من تنكر من ورى ذيك العبي

لاتنشّد عن رجآي ومبتغآي ..
دام مالي حيل وقل المزهبي ..



آنقطع حبل افكآري الى هنآ , بالله وش رآيكم

[ريمنقو]

-




* ابوي مرسل لي على البريد ملف يبي رايي فيه


http://www.ckfu.org/pic4u/uploads/ckfu14638510491.png



والله مانت في حاجة رايي يابوي
انا اللي اجي اخذ الراي , هو ماشاء الله تبارك الله مايحتاج

شوفوا بس كيف الكلام (بنشارك بها ) ( نرسلهآ ) يتكلم عني وعنه
هذا شغله كله ومع ذلك يتكلم على اساس اني معه ,
وقتها كلماته عاديه يمكن علشاني كنت مشغوله معه بس الحين يوم رجعت اقراها جميله معناها كبير اعجز عن وصفه
وآخر الكلام يحسسني بالثقه
كلمته دايم ( لاترسلينها لأي كان , لايعرف أي كان ) وخلاص مايحرصني اكثر ولاحتى يسألني بعدين ..
يعني ثقته بعيده مدى مالها حد
اسرارنا واجده

الله لايحرمني منه ولايحرمكم من غواليكم امين

[ريمنقو]

-



نكرآن المعروف امر بشع
ولا اسميه معروف خدمه ، او ابسط بعد من كونها خدمه ..
ولا أمّن والله امر يسعدني ولكن نحتاج لتقدير العمل حتى لو هو بسيط ..
امر جداً يزعجني ويحزنني ان اقدم كل شي واسمع كلام ماكأني عملت اي شي ..
صرت اذا بسمع كلام يزعجني حطيت السماعات وشغلت على القرآن ، كلام الله احسن من بربستهم ..

[ريمنقو]

-

اوقفتني مره بنت عمرها 15 سنه ما اعرفها الا بالاسم بسبب شغلي بذاك الوقت
تقول انا عندي مشكله وتكفين ابي حل وعيونها تتكلم قبل لسانها ،، وتتلعثم بالكلام
في نفسي قلت هذي مشكلتها كبيره ياساتر !

فقالت انا امي وابوي حليلين مره ومربيننا تربيه صالحه
انا وحيدتهم من البنات والباقي عيال وكلهم يحفظون القرآن وأخلاقهم حسنه مع والديني
وانا احفظ القران واعامل والديني احسن معامله
وكل شي كويس لكن اشوف اخواني احسن مني وفيه حاجه اخاف اني اكون عاقه فيها وبكت
قلت لها وش هالحاجه ؟
قالت امي تجبرني اني ما اشتغل علشاني اجي من الدوام تعبانه ووراي مذاكره فتحلف علي ما اشتغل
وانا احلف عليها اشتغل وتزعل علي امي

وأخذت البنت تبكي المهم اننا تفاهمنا انا وهي بالموضوع ووصلنا لحل مرضي للطرفين


قلت هذي القصه لان مشكلتها هزتني وهزني همهإ
شف الى درجة وين هوس البر والخوف من العقوق وهي بنت صغيره ماشاء الله ربي يزيدهم من فضله
تتسابق مع اخوانها على البر .. الله لايحرمهم من هذي النعمه واللذه