دفعة 2009 كل مايختص بدراسة التمريض

[¤§©¤ ريم ¤©§¤]

مساء الخير للجميع ..

بداية ألف مبروك القبول للدفعة الجديدة دفعة 2009

في كلية التمريض في جامعة الملك فيصل للبنات ..

أتمنى لكن التوفيق في حياتكن الجامعية التي ستكون مليئة بالمغامرات
والأحداث الجديدة عليكن ...
فأنتن قبل كل شيء قد انتقلتن من مرحلة الدراسة المدرسية البسيطة إلى عالم فسيح وهو المرحلة الجامعية ..
لن أقول بأن الأمور ستكون سهلة عليكن .. ولن أقول ستكون صعبة ..
ففي كل تخصص تكمن صعوبة مجهولة .. ولكن بالجد والاجتهاد والمثابرة
بأذن الله ستكون الأمور أسهل بكثير ..
و أنا هنا أقدم لكم هذا الموضوع الذي سيكون شامل لكل صغيرة وكبيرة تنتظركن ..

بسم الله نبدأ
¨°o.O (البداية ) O.o°"

اول شي مثل ما انتوا عارفين طبعاً سويتوا الفحص الطبي وسلمتوا اوراقكم وكل هاذي الأمور ...
في ورقة عطوكم اياها المستشفى وسلمتوها للجامعة الي بدورها صورتها وخذت الأصل وعطتكم الصورة صح؟؟

في شغلة من فوق في الورقة مكتوب رقم الطالب ..
وهو رقم مكون من تسعة ارقام مبتدأة بـ 2090
وهو رقم الطالبة الجامعي واهو الي راح يستمر معاها طول فترة الدراسة ..
فالطالبة في الجامعة لاتعرف بأسمها بقدر رقمها الجامعي ..

حيث أنه لا تحتسب لها نتيجة أي امتحان ما لم تكتب رقمها في الجامعي في الخانة المخصصة له في ورقة الأمتحان ..
حتى بعدين ان شاء الله نتايج الأمتحانات ماتقدرون تطلعونها الا بهالرقم ..

نصيحتي / حاولوا دائماً تكون هالورقة معاكم في بداية الدراسة خصوصاً بتكونون لسه ماحفظتوا الرقم بس ترى مع الوقت راح تعتادون وتحفظونه مثل اساميكم ..

¨°o.O (الأسبوع الدراسي الأول ) O.o°"

راح تبدأ الدراسة في يوم السبت تاريخ 11/10/1429 هـ
راح تكونون متواجدين في نفس المبنى الي قدمتوا فيه اوراقكم وهناك قبل لا تدخلون إلى مبنى 65 من برا كلش بتشوفون قاعة مكتوب عليها ( قاعة المحاضرات العامة )
أهني راح يكون لكم فيه حفل ترحيب بالمستجدات لمدة يومين السبت – الأحد

راح تكون فيه محاضرات و تعريف بالكليات .. وراح تكونون مع بعض ..
الطالبات المستجدات لكلية الطب
الطالبات المستجدات لكلية العلوم الطبية
الطالبات المستجدات لكلية التمريض
الطالبات المستجدات لكلية العمارة والتخطيط
طبعاً راح يعرفونكم على نظام الكلية و تشوفون بنات خريجات من الكليات وتسمعون تعليقاتهم وبنات من السنوات المتقدمة وتسمعون تعليقاتهم على الدراسة وغيره .. وغيره الكثير ..
طبعاً في يوم السبت راح يسوون لكم جولة على الجامعة .. المباني .. المعامل .. المكتبة .. الكفتيريا .. واماكن كثيرة راح تشوفونها ..

يعني مافي دراسة خلال هاليومين راح تقضونهم في التعرف على الجامعة والطريقة المتبعة وكل شي .. وطبعاً راح يعطونكم اوراق مفيدة فيها نظام الكلية .. والخطة الدراسية وغيرها الكثير ..

نجي الحين ليوم الأثنين .. في هاليوم راح تكون لكم محاضرة للترحيب بالمستجدات في مبنى كلية التمريض ..
طبعاً مبنى كلية التمريض اهو المبنى الي يلي مبنى الثقافة الأسلامية ويطلق عليه أسم ( c 3 ) – ( ج 3(
وهاذي المحاضرة راح يلقيها عليكم عميد كلية التمريض محمد حجازي
بيتكلم لكم عن الكلية وتاريخها ومبادئها وغيرها وغيرها .. وطبعاً بالأضافة إلى المعيدات في الكلية والي ماتحضرني أسمائهم وبالأضافة إلى منسقة كلية التمريض الأستاذة شادية والي صج راح تحبونها لتعاملها الطيب معانا ومع جميع الطالبات ..
بالإضافة إلى الدكتورة ميرفت وغيرهم من الي راح تتعرفون عليهم ..
طبعاً راح يقومون بتقسيم الدفعة إلى مجموعتين
( قروب 1 وقروب 2) وراح يعلقون لكم قوائم المجموعتين فكل وحدة لازم تعرف اهي من أي قروب لأنه حتى الكلاسات الدراسية بتكون مختلفة بين القروبين ونفس الشي الجدول الدراسي ..
وراح تكون لكم جولة في الكلية نفسها تشوفون اقسامها ومعاملها وكلاساتها ..
طبعاً المبنى جداً جميل وجداً مميز وجديد بعد وراح تحبونه وترتاحون فيه..
نصيحتي / انتبهوا لهالثلاث ايام زين لأنها راح تفيدكم في اشياء كثيرة .

الحين نجي للجد شوية .. لعبتوا وتونستوا بهالكم يوم ؟؟ خلاص نروووح للجد الحين ..
طبعاً راح أكتب لكم المواد الي راح تدرسونها في السمستر الأول واسماء الدكتورات المتوقع انهم يدرسونكم ..
1/ مادة الثقافة الإسلامية ( الدكتورة هبة بكر آل خميس ) سعودية .
2/ الفيزياء الطبية التطبيقية ( الدكتورة أمل القحطاني ) سعودية .
3/ الكيمياء ( الدكتورة هيا ) سعودية .
4/ اللغة الانجليزية ( الدكتورة غزالة ( باكستانية ) ، الدكتورة روز ماري ( امريكية ) الدكتورة كيث ( بريطانية ) الدكتورة ريم ( سعودية ) )
5/ مقدمة في أساسيات التمريض و أخلاقيات المهنة ( الدكتورة حنان كفافي ، الدكتورة ميرفت أدهم ، الدكتورة كميليا صابر ( مصريات ) )
هذولا المواد الي راح تدرسونهم في السمستر الأول .. قبل لا اتكلم عن مادة مادة .. اول شي راح اتكلم عن الجدول الدراسي ..
خلال يومي الثلاثاء والأربعاء من الأسبوع الأول راح يعلقون لكم أرقام السي آر أن للمواد لكلا القروبين ..

ماهي أرقام الـ crn ؟؟

لكل مادة دراسية في لها رقم خاص فيها .. وطبعاً لازم تسجلون هالمواد في نظام البنر في موقع الجامعة عن طريق ادخال رقم السي آر أن الخاص بهالمادة ..
ولمه يصير حزتها بعلمكم بكل شي .. طريقة التسجيل .. وغيرها وغيرها ..
طبعاً لازم تنتبهون لشغلة .. ارقام السي آر أن للقروب الأول تختلف عن ارقام السي آر أن للقروب الثاني فلازم تاخذون الأرقام الخاصة بالقروب الي انتوا فيه ..
طبعاً الجداول مختلفة بين القروبين من حيث اوقات المحاضرات وغيرها وغيرها ..

ما هي طبيعة المحاضرات ؟؟

الحين بكلمك عن طبيعة المحاضرات .. طبعاً راح يكون لكم جدول اسبوعي تمشون عليه وراح تعطيكم اياه الكلية نفسها .. المحاضرة الأولى تبدأ الساعة ثمان الصبح .. وطبعاً نهاية الدوام تختلف من يوم ليوم على حسب جدولكم ..
بس في السمستر الاول سنة اولى كحد اقصى يكون نهاية دوامنا الساعة ثلاث العصر ...
واحياناً الساعة 12 الظهر ..

طبعاً في بريك لكل السنوات ولكل الجامعة من الساعة 12 ظهراً حتى الساعة الواحدة ظهراً لتأدية الصلاة ..
الحين نجي نتكلم عن مادة مادة وشلون طريقة محاضرتها ..

مادة الثقافة الإسلامية :

مكان المحاضرة / مبنى الثقافة الإسلامية .
عدد المحاضرات / محاضرة واحدة في الأسبوع .
مدة المحاضرة / ساعتين متواصلتين .
ملاحظات / راح تحتاجون انكم تكتبون الي تكتبه الدكتورة على البورد بالإضافة للتعليقات الي تقولها .. وطبعاً الدراسة باللغة العربية في هالمادة وسهلة جداً وهم بعد معاها تسميع قرآن في نهاية السمستر .. وايضاً انتوا مطالبين بالمشاركة في المحاضرة علشان درجات المشاركة .

مادة الفيزياء الطبية التطبيقية :
اقسام المادة / نظري وعملي .
عدد المحاضرات / محاضرة واحدة للنظري ومحاضرة واحدة للعملي في الأسبوع .
مدة المحاضرة / ساعة واحدة للنظري ، ساعتين للعملي .
مكان المحاضرة / النظري في الكلاسات الدراسية في كلية التمريض ، العملي في المعمل في مبنى المعامل .
ملاحظات / مممممم المادة سهلة وحلوة ترى حدها وممتعة في الدراسة وفي العملي جداً بتستمتعون وطبعاً لازم تطبقون الي تاخذونه في العملي وتدونون ملاحظاتهم في اللاب منول والي اهي ملزمة العملي وتسلمونها في نهاية المحاضرة للدكتورة وراح تعطيكم درجات عليها من اربع ... وطبعاً في نهاية السنة درجات العملي تضاف لدرجات النظري .. وما يحتاج اقول لكم انه لغة الدراسة في هالمادة بالأنجليزي .

مادة الكيمياء :
اقسام المادة / عملي ونظري .
عدد المحاضرات / محاضرتين في الأسبوع للنظري ومحاضرة واحدة للعملي .
مدة المحاضرات / ساعة للمحاضرة الواحدة للنظري وساعتين للعملي .
مكان المحاضرات / النظري في الكلاسات الدراسية والعملي في مبنى المعامل في معمل الكيمياء .
الملاحظات / بالضبط نفس مادة الفيزياء .

مادة اللغة الأنجليزية:
اقسام المادة / قرمر ، رايتنغ ، ريدنغ ، لسننغ ولكل قسم دكتورة .
مكان المحاضرات / في نفس الكلاسات الدراسية .
ملاحظات / ممتعة لأبعد حد وراح تحبون الأنجليزي حزتها .

مادة مقدمة في التمريض واخلاقيات المهنة :

مكان المحاضرات / في نفس الكلاسات الدراسية .
عدد المحاضرات / محاضرة واحدة في الأسبوع .
مدة المحاضرات / ساعتين .
ملاحظات / هالمادة شوي شدوا حيلكم فيها لأنها كلها بالأنجليزي و حاولوا تترجمون وتذاكرون أول بأول وكل شي بيتسهل ان شاء الله .

هاذي كل المواد وطبعاً راح تبدأون دراسة على هالمنوال ..
ولاتنسون تفصلون لكم لاب كوت أبيض للمعامل الفيزيا والكيميا لأنه الي ماتلبس لاب كوت تتنقص درجات ..
وتفضلوا هالموضوع فيه اسماء كتب راح تفيدكم في مشوار دراستكم للتمريض
http://box4.exaservers.com/~kfusorg/...ead.php?t=6158
اتمنى اني افدتكم وان شاء الله قدمت معلومات كافية ووافية

والي عندها سؤال عن أي شي تقول لي وانا بجاوبها ..
واحب انوه انه ان شاء الله راح احاول اسوي لكم جولة في الجامعة للاماكن الي مايودونكم لها الجامعة في جولتهم ..
اتمنى لكم التوفيق ..

مع تحيات مشرفة ملتقى كلية التمريض :
ريــــــم

[إيلاف]

مجهود جميل اختي ريم ..

أكيد راح يستفيدوا منه النيرسات الجدد ..

يعطيك العافية ..

[¤§©¤ ريم ¤©§¤]

الله يعافيج حياتي

وان شاء الله يلقون الفايدة المرجوة

:)

[احساس أنثى]

يعطيك العافيه ريوووووومه ماقصرتي وفيتي ..


بس المحاضرات وشلووون لازم نكتبها يعني مافي ملازم كتب شــي..؟؟




تحياتي .. احساس أنثى

[¤§©¤ ريم ¤©§¤]

ياهلا والله فيج اختي

بالنسبة للمحاضرات طبعاً الأسلمك انتي راح تكتبين وياها

بس بالنسبة للمواد الثانية ففي أول محاضرة راح تدخل الدكتورة وتعرف عن نفسها

ومادتها وتكتب لكم اسم الكتاب والمؤلف الي راح تذاكرون منه

وطبعاً تشترونهم اما من طالبات السنة الي راحت الي اهم احنا

او من المكتبات جرير والعبيكان و في مادة الأنترودكشن الي اهي المقدمة

راح يعطونكم ملازم للمحاضرات تطبعونها بعد كل محاضرة


واتمنى اني افدتج

:)

[سمر الأحلام]

مشكورة أختي

الله يعطيك العافية

ممكن إستفسار...

ما طبيعة اللبس لطالبات كلية التمريض.. ولونة؟؟؟؟؟؟؟؟؟


تحياتي

[¤§©¤ ريم ¤©§¤]

ياهلا والله فيج

بالنسبة للبس

طبعاً النظام يقول :

لبس طالبات كلية التمريض يكون

بلوزة بيضه وتنورة سودا وحذاء وانتي بكرامة ابيض

بس طبعاً سنة أولى عادي يلبسون اي لون واي شكل

ومامرة خالفوا على هالشي

بس لمه تروحون سنة ثانية وتبدأ روحة المستشفى

اهني لازم تلبسون الي قلته لج بالأضافة للاب كوت الأبيض

والله يوفقكم

واي سؤال انا حاضرة

:)

[x.احساس.x]

يعطيك العافيهـ

على مجهودك ريم وان شالله في ميزان حسناتك

اكثر من رووووعهـ

دمتي بود

[¤§©¤ ريم ¤©§¤]

العفووو
وانا بالخدمة

بأي وقت

:)

[noni]

يعطيييييييييج ربي الف عاااااافيه ماتصدقين قد شنو ريحتيني
ياليت اشوفك وابوسك تسلميييييييين والله