<<أي منـــاهج التي تطــالب صـــغارنا بدخـــول الانترنت...!!!

[المهره الاصيله]

عجبني موضوع في احد المنتديات
حبيت انقله لكم بشوف رأيكم بصراحه وانه جدا جدا مهم
عن الانترنت والمناهج

السلام عليكم ورحمة الله وبركاته


حبيت اطرح عليكم هذا الموضوع وابغى رأيكم بكل صدق يمكن يكون انا تفكيري غلط ويمكن يكون كثيير ممن يأيدون تفكيري


اللي صار ان المدارس واعوذ بالله من كلمة مدارس في هذا الزمن اصبحت مصدر خراب ودمار

لبناتنا اي والله بدون اي تردد اقولها وين معلمات قبل اللي كانوا يحذرونا من دخول الانترنت ويحذورنا من شر هذي الوسائل قبل خمس او ست سنوات فما بالكم اليوم وفي هذا الزمن

تجبر المعلمات طالبات فصلها وهم بصف اول متوسط والا سادس والا خامس
بدخول الانترنت ليش ؟؟

لتبحث عن واجب وش هذي المناهج اللي بتخرب بناتنا الله المستعان بس

ابقولكم سبب كتابتي لهذا الموضوع

قصة روتها لي احدى صديقاتي

تقول أن لها قريبة بالصف الاول متوسط

مالها اي خبرة بعالم الانترنت صح امها متعلمة ومؤهلها جامعي
والأب متعلم ايضا

بس هل الاب والام في هذا الزمن راح يتركون اشغالهم ويجلسون قرب بنتهم وهي تتصفح الانترنت كذاب اللي يقول .. نعم ..


المهم البنت هذي بريئة براءة لأبعد الحدود مالها بأي صلة بعالم التطور اقصد التخلف الرجعي اللي صاير الحين

وطبعا احتاجت الانترنت لأن معلمتها الفاضلة تجبرهم على دخول الانترنت
وهي جالسة حاطة رجل على رجل وتستلم راتب على خراب بنات الناس
الله المستعان

ليه يجبرون البنات على دخول الانترنت في عمر 12 او 13 سنة والله حرام
وليه يحسسونهم بالنقص اذا ماكانت تملك الخبرة في هذا المجال

وش فيها اذا كانت بنتي او بنتك طفلة بريئة مالها بوسائل التقنية اللي لوثت اخلاق ابنائنا وفتحت اعينهم على امور خطيرة يعتقد الكل انها مراح تسبب لهم اي ضرر

،،،،،،،،،،،،،،،،،،،،،،،

برجع لقصة البنت

البنت مع دخولها المستمر للأنترنت بغرض حل الواجبات طبعا اكيد راح تطلب انه يكون عندها ايميل

لأن في هذا الزمن بنتك لو ماعندها ايميل ادفنها اكرم لك

منجد عالم تخلف


طبعا البنت اضافة بنات فصلها وتتواصل معاهم وقريبتها تقولي محادثتها كل ابوها براءة في براءة لكن اكيد ما يخلو عالم او مجتمع من ناس منحطة وسافلة

اثناء وهي تتحدث مع احدى صديقاتها جاتها اضافة وبكل براءة قبلت الاضافة
اتضح انه ولد وكان يقولها افتحي الكام بس خمس دقايق
وهي اصلا ماهي عارفة ولا فاهمة شي وماهي فاهمة ليه هو يطلب منها هذا الطلب

وطبعا بنت في هذا العمر اكيد راح يكون عندها فضول
ومجازفة فتحت الكام وكان اللعين اللي راح تنرد في اهله بأذن الله

يعرض لها صور غير لائقة بدون اي خوف من الله

ولأنها تربت على الصح واذا هي ماشاء الله ربي سلمها من هذا الامر

فالامر نفسه اكيد راح يتدهور اذا صار لغيرها

البنت راحت وقالت لأمها عن كل شي

امها فهمتها انه هذا ما يخاف الله وربي راح يعاقبه
اخذت منها الجهاز ولأن خبرتها بهذا المجال معدومة ارسلت الجهاز لأحدى اخواتها وطلبت منها انها تحضر الدورس لبنتها
وتشوف وش اللي يطلبونه منها مدارس الخراب
من عالم الانترنت


الحين كثير بيقولون ان الام غلطانة طيب هي مالها ذنب كون انها جاهلة بعالم الانترنت

ومراح تتفرغ وتترك الخمسة اللي عندها علشان تجلس وتتصفح الانترنت

يعني انا ابغى افهم ليه دخول الانترنت لبناتنا في هذا السن اجباري من قبل معلماتهم

،،،،،،

انا بنت اختي تطلب منهم المعلمة اي معلومة من الانترنت ويوم تحاول وتجتهد بكتابة

الواجب بنفسها

ترجع لها الواجب ثاني يوم المعلمة ويوم اسألها ليه رجعت لك الواجب

تقول لي خالة المعلمة تقول جيبوه من الانترنت

انتي يومك تطلبين من بنات فصلك يدخلون هذا العالم انتي عندك علم هل عليهم رقابة في البيت او لا

احنا تعلمنا اذا غابت الرقابة في البيت فالمدرسة هيا البديل

كلمتي لكل معلمة اتقي الله في البنات اللي يتربون على يدك
واتركي عنك الاهمال والرجعية الزايدة

كوني مفتاح للخير مغلاق للشر

وتذكري قول
الرسول صلى الله عليه وسلم
(إن من الناس مفاتيح للخير ، مغاليق للشر ، و إن من الناس مفاتيح للشر ، مغاليق للخير ، فطوبى لمن جعل الله مفاتيح الخير على يديه ، و ويل لمن جعل الله مفاتيح الشر على يديه )
الألباني {السلسلة الصحيحة 1332}

واذا البعض راح يقول لي المعلمة وش ذنبها

المعلمة بإمكانها تعمل سي دي تعليمي او تطالب بهذا السي دي لطالباتها

من ادارة المدرسة وتقوم بعمل بحث هي وكثير من اخواتها المعلمات
عن اهمية هذا السي دي كمرجع للطالبات

مو راتب وينحط في الجيب والسلام

الله المستعان


ولكم التعليق على الموضوع منو يمسك المايك..

منقول...

[دوم في قلبي]

انا امسك المايك
احم احم
فعلا كلمك صح ميه ميه((قلبت هنديه
المهم أختي الفاضله موضوعك رائع وفي الصميم
أنا خواتي في المتوسطه والثانويه والابتدائيه كمان يطلبون منهم المعلمات كل شي من الانترنت من أوراق عمل ومطويات وبحوث يمكن صح المعلمه تستطيع ترك هذا النشاط او ادخل على الدرس يبطريقه رائع دون الحاجه الى طلبها من الطالبات ..لانك تجربه شخصيه فأن حرصآ على خواتي من الانترنت أعلمهم كل شي في الانترنت لكن أكون موجوده معهم وأرقب ماذا يعملن ..وفي هذا السنه زاد الخوف على خواتي من الصديقات حيث بدأ في الدخول عالم الراويات وأسمائهم من حرصي عليهم صرت أدخل أنا وطلع كل شي يطلب منهم
أسفه على الاطاله
تقبلي مروري

[المهره الاصيله]

نورتي موضوعي
دووم في قلبي

[L U X U R Y]

وَ الله كلام بِ الصميييييم ,
ماعندي تعليق أكثر من اللي انقال بالموضوع . . .
عسى يدين كاتبتها ماتمسها النار
وَ عسى اللي ناقل الموضوع الجنّة

بالتوفيق

[أبـــو راكـــان]

وزارة التربيه والتعليم تحتاج لتعليم وترميم البعض من مدرسيها وكوادرها ..
وكثرة مشاكل هالوزارة من تغير وحذف بعض المناهج ووضع صور
غير لائقه في أحدى المواد ودمج الصفوف الاوليه ..

لاهنتي على النقل ..

[المهره الاصيله]

انا ماحبيت سالفه المذاكرة عن طريق النت

الله يرحم ا يامنا
اذا طلبو بحث رحنا المكتبه واخذنا الكتاب وطبعنا كم صفحه
ووديناه لابله نقول هذا بحث

واخذنا درجه كامله
......
:::انا بعلق عى الايميل:::
الا على سالفه الايميل خواتي يوم كانو بمتوسط ماعندهم ايميل واخذ ياتطنيز ليه ماعندهم ايميل
وانتن من العصر الحجري انزين انتم توكم صغار على الايميل

يعني اذا ماعندها ايميل خلاص صار تخلف!!!!!؟

ا
انا نفسي ماسويت ايميل الا لمادخلت الجامعه
لان اغلب زميلاتي عرفتهم من الجامعه
واتواصل معهم عن طريقه والله مايقصرن حتى الملخص يرسلونه بالايميل... .

سوري طولت بسالفه

[L U X U R Y]

من جد يستخق التثبيت

[المهره الاصيله]

يسلموو عالتثبيت

[تشتيتي مركز]

اسمحوو لي لي وجهة نظر .. وخلونا نحلل الموضوع ونتناقش ..

الانترنت ضروره الحين .. و تصفحه مهم ..
الغلط اللي صاير مو انه تطلب منها واجب بحث بالنت ..
الغلطه هي ليه ما يكون هناك حصه توجيه عن مساوء هالتقنيه ومحاسنها وتنبيه من المفاسد اللي فيه .. بالمدرسه او كلمه بحث معينه بحيث الاستاذه تطلب شي محدد وصفحه هي عارفتها عشان مايكون هناك تعمق..

مساله حجر وصكصك انا ضدها .. وبكرا يكبرون وتنفتح الدنيا بوجيههم على سن مراهقه (( واي شي ممنوع مرغوب ) ولا راح تقدرن تسيطرون عليهم ان ما صار قدامكم فهو من وراكم ..
لانه بيصير تمرررد من الانغلاق ..

انا استخدمت النت من يوم كنت باول متوسط (( كانو يحسسوني اهلي اني حره واستخدمه بحريه)) .. وكان له اثر كبير علي بالاطلاع .. وخبره .. وربي للحين ادعي لابوي لاني كنت من الاوائل اللي دخلو هالعالم ..
وكان عندي كنترول على نفسي يرجع لثقه اهلي فيني.. وما مريت باللي مروو فيه ناس اعرفهم اهلهم متشددين باصول التربيه شعارهم بالحياة كل شي ممنوع .. كان كل شي عندي وكنت اعرف حدودي ..

و كان فيه ثلاث اجراءت قبل ما ينحط قدامي النت ..
اولا محاضره من امي وابوي .. واضحه عن انه هالتقنيه فيها خير وفيها شر .. وان الواحد يبحث عن الفايده ويبعد عن اي شي غلط ومن هالكلام ..... واي شي يصير لا زم اطلعهم ..

الثاني فيه اعدادات امان .. لحظر المواقع المشبوهه .. ما يمنع بس يقلل من خطر الوقوع فيها .. وحنا اصلا الانترت عندنا محجوووب ..

الشي الثالث .. يكون الكمبيوتر بوسط الصاله .. كمبيوتر عام .. والاستخدام قدام الكل .. مو اللي صاير الحين اي باد والا اي بود والا لاب وبالغرفه والله واعلم وش يصير .. ووش يفتحون .. هذا غلط ..



راح اقرب فكرتي .. ورايي ..
في ظاهره تشبه النت .. بس كانت قديمه حبتين ويمكن للحين موجوده بعض البيوت ..
اذا بيت فيه قنوات فضائيه .. والتلفزيون موجود بالصاله طبعا معروف القنوات اللي فيه لانه حق العايله عرب سات مثلا ..

وفيه ناس مانعين عن عيالهم التلفزيون.. وبغرفتهم مدري مكتبهم كل انواع القنوات .. بحكم ان التلفزيون خراب على عقول عياله ..


راح يكون عند عيالهم شغف وتعطش لكل شي جي بالتلفزيون وراح يركزون بتفاصيلالتفاصيل ..
بينما اللي عندهم التلفزيون بيكون وضعهم عادي لانهم يناظرون تحت اشراف اهلم بالصاله ومع الايام صار زيه زي اي وسيله ترفيه بحياتهم .. يعني مو الشغله شفاحه .. (( وهالشي فطره بالنسان اذا قل الشي او منع يصير مرغوب بشكل شديد ))

ما راح يكون تاثيره عليهم زي اللي ما عندهم تلفزيون ..صدقوني عيالهم يحفظون كل اسامي الفانين .. اذا راحو لناس يسنترون عن التلفزيون .. وما يناظرون الااسوء شي .. وهذاشي حاصل وشفته كثير .. واذا كبرو شوي مرحله مراهقه تكون شديده وتمرد غريب .. ومن ورااا الا هل بلاوووي .. ما يصدقون اهلهم يغفلون ..
كل هذا ليه .. لان اهلم صاكين عليهم ..

ليه انفرهم مني ليه ما افرض سيطره عليهم بدون ما يحسون وامتلكهم بصغرهم عشان اكسبهم اذا كبرو .. وما يشوفوني (البعبع) اللي يحارب وناستهم ..



التقنيه موجوده بحياتنا .. وصار شر لا بد منه .. وخيرها يغلب شرها اذا عرفنا نستخدمها ..
والقمع والانغلاق مو الطريقه السليمه لمواجة هالشي .. امنعو قفلو صكوو مو حل ..

انامع الاسلوب الجديد بالتعليم عن طريق البحث عن المعلومه .. ولا تقولون كتب .. من منا الحين لا بغى معلومه را ح يدور كتاب .. البحث يبدا من الشيخ قوقل .. خلونا واقعيين .. الزممممممممممن تغير .. ولازم نجاريه ..
اسس التربيه وحده .. بس كيف نشكلها بحيث ما تكون عائق .. يسبب تخلفنا ..



اذا بتناقشون ظاهره حلوها لا تحاربونها .. يعني بدل ما تحطون اللوم على الوزاره .. ابحثو عن حل واقترحوه على الوزاره .. قولو يا وزاره لازم حصه توعويه لمضار الانترت قبل لا يبحرون اطفالنا فيه ..
ودائما التربيه من البيت قبل المدرسه واللي تاسسيه صححححح لا يمكن يغيره شي ومهما تغير يرجع للي تربى عليه ..

لا تحاربووووون كل شي حلو ويخلي للتعليم متعه .. صراحه الله يذكر ايام تعليمنا بالخير تلقين تلقين تلقين على غير سنع .. هنا فيها تحريكه مخ .. وتشجيع على الابداع ..

((مو كل شي يصير بهالدنيا نحسبه ضدنا ونتحزم له ونحاربه ليه التفكير السلبي هذا.))


وسلامتكم ..

[Abu ali55]

موضوع مميز بارك الله فيك ,,,,

فعلاً الانترنت يملك في طياته الكثير من الاشياء اللي ممكن تشكل خطر على عيالنا وعلينا نحن الكبار ,,, ولاكن هل هذا الجانب هو الغالب في عالم الانترنت ... اكيد الجواب لا من وجهة نظري لأن فيه الكثير من المحاسن والأامور اللي ما نقدر نستغني عنها ... التجاره اصبحت تعتمد على الانترنت ,, الدراسه الجامعيه كحالتنا نحن المنتسبين تعتمد على الانترنت ,,, ايضاً المنتظمين لا يتسغنون عن الانترنت ,, الكتب الالكترونيه ... المكتبات الاكترونيه ,,, التسوق الالكتروني والكثير الكثير من الاشياء النافعه ...
لذا انا ارى ومن وجهة نظري اللي اتفق بها مع الاخت تشتيتي مركز ان يعطي الاهل بعض الوقت لتعليم ابنائهم على الانترنت ويجب ان يكونو حريصين على تعليمهم ان هذا العالم به المفيد والغير مفيد والمضر ايضاً,, يجب متابعتهم وعدم اعطائهم الفرصه بالانفراد كثيراً وتصفح الانترنت بدون رقابه ,,, ومن يرفض من الابناء او البنات هذا الشيء يجب الانتباه له اكثر لأن رفضه لمتابعة والديه له في هذا السن انما يدل على بداية حدوث شيء غير صحيح ... فيه ناس تقول انه الاهل مو فاضيين يتابعون عيالهم ,,, هنا اقول سامحهم الله اللي مو فاضين لعيالهم ,,, ليه جابو هالعيال ؟؟؟ ما يدرون ان كلكم راع وكلكم مسئول عن رعيته !!
الانترنت عالم مليء بالفائده لمن اجاد استخدامه وتعليم ابنائه وبناته ايضاً الاستخدام الامثل ... اما من لا يجد الوقت الكافي لمتابعتهم هنا اقول له ان اقل شي تسويه هو تركيب شبكه ببرامج صنعة مخصصاً للأطفال وصغار السن تقوم بحجب كل ماهو ممنوع او مشبوه حتى لو كان بداخل الايميل بعض الايميلات المشبوهه لا تقوم الشبكه بفتحها ... او تركيب برامج مشفره على نفس اجهزة الابناء بحيث تضمن ان ابحارهم في عالم النت سليم ومفيد لهم ويعود بالفائده عليهم ... قد يعتقد بعض الناس ان متابعة الابناء في كل شي غير جيده لهم ويفقدهم الثقه ,, وانا اقول هنا ان هذا الكلام غير صحيح ... لأن اي شخص يجب ان يتابع ويهتم بأبناءه ولاكن بالطريقه الصحيحه وبعيداً عن التعامل معم بأنهم مازالو اطفال ,,, الطفل من عمر 7 سنوات يجب ان يتعامل معه والداه على انه كبير حتى يكتسب ثقتهم كل يوم ويكون اقرب منهم ووقتها راح تكون متابعته اسهل ...
الانترنت نت تقنيه اهدت لنا الكثير من الفوائد اللتي لا تحصى فلا يمكن ان نستغني عنها لعدم تمكننا من السيطره والمتابعه السليمه لأطفالنا ...
ارجو البحث عن حلول دائماً تسهم في تقدمنا وبما يعود بالفائده علينا بما لايخالف ديننا ,, وترك محاربة بعض الاشياء اللتي تحتاج لحسن التعامل والتفكير بها لنستفيده منها خير فائده .

المشاركة الأصلية كتبت بواسطة تشتيتي مركز

اسمحوو لي لي وجهة نظر .. وخلونا نحلل الموضوع ونتناقش ..



اذا بتناقشون ظاهره حلوها لا تحاربونها >> أؤيدك في هذه النقطه وبقوه
.. يعني بدل ما تحطون اللوم على الوزاره >> الوزاره لها كثير من السلبيات بصراحه ومن ضمنها ادراج استخدام الانترنت بدون تقديم حصص خاصه عن استخدامه ومخاطره وايضاً عن فائدته وعن المعلومات المفيده اللتي نستطيع ايجدها عن طريقه ,,على الاقل لترم دراسي كامل ولو بحصه واحده كل اسبوع .
.. ابحثو عن حل واقترحوه على الوزاره .. قولو يا وزاره لازم حصه توعويه لمضار الانترت قبل لا يبحرون اطفالنا فيه ..

ودائما التربيه من البيت قبل المدرسه واللي تاسسيه صححححح لا يمكن يغيره شي ومهما تغير يرجع للي تربى عليه >> اتفق معك 100% ان البيت هو مكان التربيه الأول وليس المدرسه فالمدرسه مجرد مكمل ,, وانا اشوف ان المدرسه بعد في اياماً هذه لا تزيد بالتربيه ولا شيء لأنها اصبحت مؤسسه تعليميه بحته ويمكن اوقات تعلمه اشياء نحن في غنا عنها ,,لذا التربيه في المنزل ثم المنزل ثم المنزل .

لا تحاربووووون كل شي حلو ويخلي للتعليم متعه .. صراحه الله يذكر ايام تعليمنا بالخير تلقين تلقين تلقين على غير سنع .. هنا فيها تحريكه مخ .. وتشجيع على الابداع ..

((مو كل شي يصير بهالدنيا نحسبه ضدنا ونتحزم له ونحاربه ليه التفكير السلبي هذا.)صحيح وانا معك بهذه النقطه اننا اصبحنا نحارب اي شيء بدون محاولة ايجاد حلول له بما يخدمنا وينفعنا وبما لا يخالف ديننا الحنيف .


وسلامتكم ..الله يسلمك

اسف على الاطاله وتقبلو تحياتي