[ جامعة فيصل ] : تجربتي في السنة التحضيرية ( جامعةالملك فيصل )

[بتيسي]

موضوع رائع جداً أتمنى تستفيدون منه


السلام عليكم ورحمة الله وبركاته


مبروك للمقبولين بجامعة الملك فيصل بلأحساء ..حبيت في هالموضوع اكتب بعض المعلومات عن السنة التحضيرية في الجامعة عشان لا تنكبون اول يوم في الجامعة وتصيرون نفس حالتي .


انا درست في الجامعة تخصص ادارة اعمال وخلصت السنة التحضيرية بمعدل ممتاز (...) لكن لظروف خاصة خرجت من الجامعة وسجلت في جامعة الملك فهد للبترول والمعادن .


في هذا الموضوع ما راح اتطرق لكليةالصيدلة والطب لأن نظام السنة التحضيرية فيهم مختلف


الموضوع يحتوي على :


•.معلومات عن المواد في السنة التحضيرية & المدرسين


•صور للكتب ( جاري الرفع ) .


•اجابة للإستفسارات
المعدل المطلوب لتجاوز السنة لتحضيرية

الطب


3.5


الهندسة


3


الحاسب


3


الصيدلة


3


ادارة اعمال


3



نظام السنة التحضيرية مطبق على عدة كليات في الجامعة وهي :


• كلية الطب + الصيدلة الإكلينيكة : السنة التحضيرية فيها مختلفة عن باقي الكليات التي تحتوي على السنة التحضيرية ماعدا مادتين او ثلاث تشترك فيها مع باقي الكليات .


• كلية الهندسة و كلية الحاسب وكلية إدارة الأعمال : نظامها متشابه .


• كلية العلوم الصحية التطبيقية : كلية جديدة هذا اول عام لها وستطبق فيها السنة التحضيرية .
..
(( كلية الهندسة و كلية الحاسب وكلية إدارة الأعمال ))
هناك عدة مواد تدرس وكلها باللغة الانجليزية
math1 - math 2
English English 2
computer science 1& 2
علوم طبيعية ( تٌدرس في السمستر الثاني فقط لطلاب الهندسة والحاسب )
وهناك 3 مواد تٌدرس باللغة العربية وهي
: صحة ولياقة - البحث والتفكير - مهارات الاتصال
طبعا تلك المواد مقسمة على السمسترين .. (هذا نظام العام الماضي ما ادري اذا غيروه او لا)



نجي على المواد
MATH
منهج الماث لطلاب الهندسة والحاسب يختلف عن منهج الماث لطلاب إدارة الأعمال
منهج ادارة الاعمال سهل وبسيط و الصعوبة تكمن في ان المصطلحات والمسائل باللغة الانجليزية
الـmath1 : سهل يتطرق للتحليل والاعداد والمجموعات وأنواعها والمصفوفات وجزء بسيط عن اللوغاريتمات والتوافيق والتباديل .
الـ Math 2 : اكثر شي عن الاشتقاق والتكامل .
منهج كلية الهندسة و كلية الحاسب : ما اقدر احكم عليه صعب او سهل لأني ما خذته
لكن من كلام خوياي انه يحتاج مذاكرة بشكل مستمر خصوصا Math 2
فيه عن الدوال وجتا وجا ...
توزيع درجات الماث لكل سمستر راح يكون كالتالي :
الميجر 1 = 20 درجة
الميجر 2 = 20 درجة
الاختبار النهائي = 40 درجة
المشاركة والكويزات = 10 درجات
الواجبات = 10 درجات
( تحل الواجبات على موقع اسمه mathzone )
في ثاني اسبوع راح يشرحون لكم كيف تدخلون على الموقع وتحلون الواجبات واذا صارت لك أي مشكلة تقدر تروح للدكتور في مكتبه وهو راح يساعدك . راح يعطونك 12 واجب تحل منهم 10 واذا كانت متوسط (الافرج ) درجاتك في الواجب فوق التسعين يعطونك درجة كاملة في الواجب .
نصيحتي :
في الـ mathيعتمد على الدكتور الي يدرسك حاول انك تسأله و تشارك معاه اعرف طريقته في الشرح
طبعا الدكاترة الي راح يدرسونكم أردنيين وفيه هندي .. تختلف طريقتهم من واحد لواحد ..اغلبهم حبوبين لكن مو معناه انهم ما يدققون بالدرجات والتصحيح .. لا بالعكس بعضهم ولا يزيدك نص درجة .. وبعضهم العكس
نصيحتي : احضر كل المحاضرات ولا تغيب الا بسبب مقنع ولا تهمل الواجبات على الـ Mathzone
وتقول ما عليه الا 10 درجات .. هذي الـ 10 درجات تفيدك لو لاسمح الله كنت على الحفة و بترسب . اذا ما فهمت شي اسئل خوي كاو المدرس لا تقول تالي وصدقني بتاخذ Aولاتخاف من ناحية الشرح
اغلبهم يشرح بالعربي ..ما عدا الدكتور الهندي .
ان شاء الله راح ارفع صور كتب الماث .


ENGLISH
في الاسبوع الاول راح يختبرونكم اختبار تحديد مستوى للغة الانجليزية وراح يقسمونكم في مستويات
( الي سمعته ان النظام تغير و زادوا عدد المستويات )
النظام القديم : فيه 4 مستويات وكل مستوى لهم كتاب .. وفي كل سمستر تنهي كتاب
• المستوى الاول : مستواهم غير جيد : وراح يبتدون معاهم من الاحرف والارقام .واشياء بسيطة جدا .. لكن بعد 6 أسابيع تقريبا من بداية الدراسة راح ينتقلون للمستوى الثاني .
• المستوى الثاني ( الكتاب الاصفر ) : مستواهم متوسط وراح يعطونهم كتاب نورث ستار الاصفر
• المستوى الثالث ( الكتاب الازرق ) : مستواهم جيد وراح يعطونهم كتاب نورث ستار الازرق
• المستوى الرابع ( الكتاب الاخضر ) : لا يدٌرس في السمستر الاول حتى وان حصلت على درجة عالية في اختبار تحديد المستوى وهو ليس اجباري إلا على من درس الكتاب الازرق في السمستر الاول .
مع احترامي للعمادة السنة التحضيرية النظام في الانجلش غير منظم و حتى الدكاترة احيانا كنا نسألهم و ما كانوا يعرفون وش النظام .
( نظامهم
كل اربعاء : اختبار 4 اقسام على كل المادة ولا فيه محاضرة للمادة :
listening & reading & Speaking &grammar . كل قسم 50 سؤال اختياري ماعدا الغرامر
السبت : يحددون لك قطعة في الكتاب يوم الاربعاء وتختبر فيها كويز يوم السبت 30 نقطة.
الأثنين : كويز على القواعد التي اخذتها في الاسبوع . 20 نقطة
الثلاثاء : كويز على الفوكبلري ( الكلمات ) التي اخذتها في الاسبوع10 نقاط .
في السمستر راح يكون اسبوعين او ثلاثة للمراجعة
توزيع الدرجات لكل سمستر راح يكون كالتالي :
5 درجات : للحضور ( تقدر تغيب 39 غياب لكن بعد 24 غياب راح يبتدي الخصم و عند الـ 40 حرمان )
المشاركة : 5 درجات ( وكل اسبوع عليه 20 نقطة للمشاركة )
الامتحان النصفي ( الميدتيرم ) = 10 درجات
الكويزات = 10 درجات
الاختبارات الاسبوعية ( كل اربعاء ) = 30 درجة
الاختبار النهائي = 40 درجة
طبعا المشرف على قسم اللغة الانجليزية في السنةا لتحضيرية معهد اسمه الشبكة للتدريب
وهذي الصفحة الي راح تشوفون منها درجاتكم في المادة :
shabakaprep.moodle.ae
و الدكاترة او بالأحرى المدرسين كلهم اجانب وجنسياتهم : اما استرالية او أمريكية او بريطانية او كندية .
للأسف فيه مدرسين لا يشرحون و كل المحاضرة سوالف ولا يعطيك ولا يشرح لك وش المطلوب
ونكب ربعي وخلاهم يعيدون المادة امثال harry و نفس الوقت في مدرسين ممتازين لهم خبرة مدرسين في كوريا واليابان و....
وفي بعضهم للأسف اصلا هو مب مدرس بس خذ له دورة او درس سنة وجا يدرس وللأسف يجي يدرس وبعد ما ينكب الطلاب يسافر دولة ثانية ..فلا تعتمدون على المدرسين بشكل رئيسي
نصيحتي المتواضعة لكم :
• ذاكر اول بأول ولا تهمل الكويزات القصيرة وتقول ما تأثر على درجتي ..شارك مع المدرس حتى ولو كان ما يعرف يشرح .
• لا تغيب بدون سبب وحرام تضيع عل روحك 5 درجات مجانية يمكن ترفع معدلك وتدخلك رغبتك . عدم غيابك لأي محاضرة راح يخلي المدرس يهتم فيك ..والاجانب يقدرون هالشي وصدقني بعدم غيابك راح تضمن درجات المشاركة
• اسأل ربعك في الشعب الثانية اسألهم عن داكترهم وش يقولون عن الاختبارات وش راح يجي في الاختبار لا تتوقع كل المدرسين ممتازين وراح يجونك ويقولون لك ترا اختبار يوم الاربعاء كذا و هالسؤال وذاك ماراح يجيك ..انت اسأل ربعك ..فيه كم دكتور يطلعون على الاسئلة والاختبارات ويعلمون طلابهم فأنت استغل هالشي .
• حاول انك تستمع للمدرس حتى لو كانت لغتك دماااار ..لو اسمتعت راح تتطور لغتك واترك طريقة انك تسأل الي يمك وش قال الدكتور . ترا ما راح تستفيد .
• احضر قبل بخمس دقايق لأن تأخير ثانية عند كثير من الدكاترة يعتبر غياب حتى لو حضرت المحاضرة راح يخليك غياب ويخصم عليك .
الدرجة المطلوبة للنجاح في الانجلش هي C يعني 70 درجة ولو اخذت 69.5 راح تعيد المادة ..العميد الجديد شوي مشدد في هالشي خصوصا لو كنت طالب هندسة او صيدلة او حاسب .




Computer Science
مادة سهلة وصعبة نفس الوقت .. تعتبر هي والانجلش اكثر المواد الي عادها الطلاب في السنة التحضيرية
هي 3 ساعات مقسمة على محاضرتين في الاسبوع ... المنهج بشبه منهج الحاسب في الثانوية اللهم ان المصطلحات والشرح بالإنجليزي ..
السمستر الاول : تاخذ عن الاقراص والفلاش مميوري والأنترنت وعن الورد
السمستر الثاني : عن بقية برامج المايكروسوفت : الاكسل ,الباوبوينت و ...
اغلب الطلاب يعيدون هذي المادة لأنه لغتهم الانجليزية ليس جيدة وللأسف في الاختبارات تأتي بعض الاسئلة النظرية وفي مصطلحات صعبة.!!
طبعا كل اسبوعين او ثلاثة فيه كويز نظري وعملي على الكمبيوتر
فيه كتاب للمادة لكن نصيحة لا تذاكر منه ..الدكتور راح يرسل كل نهاية اسبوع سلايدات ( باوربوينت ) + واجب
ذاكر من السلايدات اسرع واحسن لك .. والواجبات حلها يكون نسخ ولصق من السلايدات اكثر شي
طبعا الدكاترة : من الجنسية الهندية .. محترمين وفيهم الطيب وفيهم الشين بس نصيحة تفاعلوا معاهم واحترموهم وراح يبضبطونكم في الدرجات والاختبارات .
في موقع للمادة في شروحات فلاشية للمنهج باللغتين العربية والانجليزية اسمه era
الواجبات والمشاركة = 20 درجة
بحث = 10 درجات
الاختبار النصفي : 30 درجة
الاختبار النهائي : 40 درجة
الاختبارات راح تكون على برنامج era وراح تجيك أسئلة نظرية وعملية عن المنهج وقبلها راح يخلونكم تتدربون وتاخذون اختبار تجريبي في البرنامج
نصيحتي انتبه في الشرح وركز معاه .. من شرحه راح تعرف وش راح يجي في الاختبار خصوصا في القسم العملي من الاختبارات .
مهارات تطوير الذات
هي عبارة عن 3 مواد : : صحة ولياقة - البحث والتفكير - مهارات الاتصال
مواد مملة نوعا ما ..لكن لا تظهر ذلك للدكتور لأنه ماراح يتساهل معاكم في الدرجات خصوصا في البحث .
الاسئلة في الاختبارات تكون سهلة اومتوسطة لكن في مادة الصحة واللياقة لازم تذاكر لأن فيها شوي معلومات وارقام .
اكثر شيئ متعب في هالمواد البحث خصوصا انك تكون مع مجموعة ما تعرفهم وبعضهم يتكل على البقية .
نصيحة حاول انك ما تغيب كثير لأنه 8 غيابات وتاخذ حرمان على مواد ما تستاهل و مملة .
الدكاترة : من الاردن ..طيبين لكن بعضهم متشدد في البحوث .. المادة ساعتين في الاسبوع ..


علوم طبيعية
هذي المادة خاصة بطلاب الهندسة والحاسب وهي تدرس بالسمستر الثاني ..وعي عبارة عن مادتين كيمياء وفيزياء .. تدرس الفيزياء والكيمياء بشكل عام خصوصا القوانين وغيرها من التطبيقات
ما اقدر احكم صعبة او لا ..لكن الي اعرفه انها تعتمد على الدكتور وشرحه .. لكن تحتاج مذاكرة مستمرة
نظام الدرجات فيها ملخبط ..يدرسون الفيزياء ثم يختبرون فيها نهائي وبعد ما يخصلون الفيزياء يختبرون كيمياء 5 اسابيع او اكثر ثم يختبرون نهائي وتالي تُجمع الدرجات . الصراحة كثير من الطلاب جابوا العيد فيها وفيه طلاب خذوا a , b+ فيها ..يعتمد عليك وعلى شرح دكتورك .
الدكاترة : من الاردن وفيه باكستاني . ما تعاملت معاهم عشان احكم عليهم
اسف على الكلام الطويل لكن كل الي حسيت ان راح يفيدكم كتبته لأني العام الماضي في مثل هالأيام كنت نفس حالتكم ولا كنت ادري شي عن الجامعة ولا دريت انه في سنة تحضيرية الا اول يوم

[troooke]

يعطيك الف عافية بتيسي

انشآآآء طلاب التحضيري يستفيدوا من هالمعلومآآت

موفقين

[Magnificent]

-


مهم جداً , يعطيك الف عآفية ..


-

[اوشي]

يعطيك العافيةة

بس عندي سؤال جامعه البترول والمعادن فيها بنات

[Magnificent]

-


لآ طبعاً , جآمعة البترول لـ الطلاب فقط ..
الأخت مجرد نآقله لـ الموضوع وحبّت أن الجميع يستفيد منه ..


-

[نظراة أمل]

شكرا على النقل بس سؤال من وين ناقلة الموضوع ؟

[طبخة]

كلية العلوووم الزراعه والتغذيه مافيهااا سنه تحضررريه ..؟؟

[بتيسي]

اعتقد لا