فكرة بسيييييييييطة ومطورة لتزيين الفصل ..

[مرشدة مغرورة]

بسم الله الرحمن الرحيم
سلاااام لكل أعضاااء وزواار المنتدى الغالي ..
حبيييت اليوم أعرضلكم فكرة لتزييين الفصل و خااصة مع بداااية السنة الجدييييدة وعودة طالباتنا الحلواات و الغاليااات إلى مقاااعد الدراااسة ،، فكرة بسيييطة وغير مكلفة وناااعمة بنفس الوقت و سهلة مااا يبيلها شيء ..
وكانت من تنفيذي أنا المرشدة المغرورة في فصلي يوم كنت بثاالث ثانوي اقتبست جزء من فكرتها من معلمة اللغة العربية ..

أترككم مع الصور

،
،
،
،
،


هذي صورة عاامة للفصل ،، عااد أهم شيء الكراااسي رافعينها حنا البنات عشاان كنا يوميا ننظف فصلنا بروحنا بنهااية الدواام .. " ماشاااء الله علينا !! "
وحتى مرة طلعنا الكراااسي و الطاولااات برة و شمرنا على سواعدنا و رفعنا مرايلنا زي رباااات البيوت و نظفنا الأرضية بالموية و الكلوركس كان حماااااس يومها ..
بس كنت شوي معصبة لأن البناااات الله يهديهم قامو يرشون الموية على بعض وبهدلو الدنيا كلها ..حتى فيه بنت من زووود حماااسها جابت سطل موية و اسفنجنة و جيف و قامت تنظف النواافذ و مجموعة مسكو الجدراان و لمعوها تلمييييع ..
المهم ان رووووح التعاااااااون مرة ممتع أتمنى إنكم تجربونها .. وبنفس الوقت توفروون على المدرسة مصااااريييف العمال اللي ينظفون مسيكنييين .. و تتعلمون على أساس إذا بكرة تزوجتو و قمت تنظفون بيوتكم تتذكرون أياام ما كنت تنظفونها بالمدرسة ..




وهذي صورة اقرب شوي للوحة ..
الفكرة ان الخلفية تكون بيضاء و تحطون الاطار أسود ..
و بالنص زي ما أنتو شايفيين سوينا زي البرواز و حطينا باليمين جدول الحصص و باليسار أسماء الطالبات و من فوق اللي بالفراشات مجلس الفصل ..
والقلوب هذي سويتها من الكرتون العادي اللي تنباع بالمكتبة بريااالين وصبعا ساعدوني البنات الله يعطيهم العافية عشاان نقصها لأن سوينا أكثر من ثلاثين حبة ..
وبعدين جبنا فراشة سودة لقيتها بالنت طبعناها و صورناها و قصينها ودبستها تحت القلب و بعديين جبت شريطة بيضة وطويتها بالنص و دبستها من فوق ..



وكان الفصل الدراسي الثاني وكنا بنتخرج فعطينا لكل بنت وحدة تكتب لها كلمة ودااعية أو أي شيء يجول بخاطرها ..
بس كتابات البنات ما طلعت بالتصويير ..
وبس !! الفكرة مرة بسيطة و سهلة بس يبيلها تعااون ..


الصورة التااالية :





وهاي طاولة بسيطة حطيناها بزاوية بالفصل وحطينا عليها بخور وكنا نبخر الفصل كل صباح ،، وكان فيه عندنا معطر جو نبخ منه في الحالات الطاارئة " يعني لو فيه وحدة جابت شبس أو كان فيه فطور سري من المطعم وما أحد درا عنه يعني من هالمشكلات "
وطبعا ما نسينا مؤنسنا في حالت الطفش والخمول اللي كانت تصيبنا صديقنا و صديق الجميييع " سبونج بوب " ..
فيوم كنا نطفش نولعه ونخليه يطبل لنا أحلى الأصوااات ..
وأهم شيييييييييييييييء المراااية اللي ما فيه أي بنت تستغني عنه بس يدق الجرس البنات كلهم صحو من نومهم و راحو لمن المرااية .. لا وبعد الفسحة ما شاء الله على فصلنا يصيير مشغل يستقبل البناااات من كل جيراننا من فصول ثواالث و طبعا ما ننسى ناخذ ريال من كل وحدة تدخل وتتفرج بالمراية " أمــــــــــزح "








وهذي طاولة أستاذتنا حطينالها كل شيء تحتاجها من " دباسة ، أوراق ملاحظات ، فواحة ، أقلام ، صمغ ، وصندوق البطاقات اللي بعد شوي بنعرف شنو اهيا ، و دفتر كل مادخلت معلمة تكتب لنا ذكرى أو أي شيء حلو صارلها اليوم وبنهاية العام نصوره ونخليه ذكرى بيننا "



وهذي بعد فكرة حلوة من اختراعي بس شكله للحين ما اعطوني عليها " شهادة براءة الإخراع "

معلقين فيس عااادي على الباب بس الفم حقه راسمينه بورقة ثانية من جهة مبتسم ومن جهة حزين و دخلناه بالفيس من أطرافه اللي قاصينه و اذا جات الاستاذة بتطلع تعطينا رأيها فينا اليوم " هل هو سمايل و لا حزيين "
وما عليها إلا تدور الابتساامة و يصير اللي تبي ..
والحمد الله ما قد صار حزييين .



وهذي أقوى و أحلى حركة ..
تخلين البناات يتحمسون مرة مرة مرة ،، زي ما تشوفين بالصورة كاتبة فوق " الطالبات المتميزات ، هيا تميزي معنا ، واحصلي عند جمعك لثلاثين بطاقة هدية مميزة " بلاك بيري " "
وعاد فيه كل أنواااااع البطاقات منها " بطاقة مشاركة ، بطاقة هدوء ، بطاقة تعاون , بطاقة حرص على النظافة ، بطاقة تميز ، بطاقة أدب وأخلاق وفي منها شين زي بطاقة إثارة شغب ، بطاقة كلام ، بطاقة تعلك وعاد هذي أهم وحدة "




اذا حلوة تصير + 1 و اذا شينة تصير – 1 و أنت ماااشية ..
والبطاقات تحطها الأستاذة بنهاية كل حصة أو رئيسة الفصل ..
وطبعا أسماء الطالبات كبرتهم بالمكتبة ب 8 ريال يعني مرة رخييييييييييييص ..
ولا تاخذي هم إذا فيه عشر بنات جمعوا ثلاثين بطاقة لأنك زي ما لاحظتِ أنا ما كتبت جوال بلاك بيري ، بس كتبت بلاك بيري ، وبلاك بيري بالانجليزي يعني " التوت الأسود " يعني روحي لأي هايبر ماركت واشتري لها علبة من التوت الأسود تبع التشيز كيك ، سعرها ما يزود عن العشرين ريال " هاهاهاها حلوة صح وطبعا لا تقوليلهم أبدا في أثناء المسابقة إنه موب جوال خليهم يصدقون و اذا سالتك الوحدة قوليلها اللي بتفوز بجيبلها بلاااك بيري يعني واضح الكلام و بعد إذا جات وحدة بتقولك بتجيبين لعبة صح ولا لا ؟ قوليلها بجيب بلاك بيري أصصصصصلي . واالي بتقولك أكيد بتجيبين صيني برضو قوليلها بجيب بلاك بيري أصصصصصلي ..
وبصرااااحة البنات مرة انخقوا عليها و عجبتهم مرة وحتى صارت الأستاذة تنادي صديقتها من الأستاذات وتوريها مشرووووووعي العظييييييم .. احم احم ..
و إذا فازت وحدة كرميها بالطابور و حطي صلصة الكيك قي صندوق البلاك " الجوال " واعرضيها قدام بنااات المدرسة و امدحيها و من هالكلام ..
بتصييير مرة وناااااسة ..

بس هذا اللي عندي ،، و أتمنى إنه عجبكم ،، وما راح أزعل على وحدة ترد على موضوعي بالعكس حيشرفني تواجدها و مرورها برضو ..

كنتم مع ابداعات طالبات ث / 19 / بالدمام

مع تحياااتي مرشدة مغروووووووورة ..

[مرشدة مغرورة]

عذراااااا .
شكله فيه مشكلة بتحمبيل الصور ،، بحااااول أحملها ..
لذا رجااااء انتظروني يوم ، يومين أسبوع .....

[jωαнєя~♥]

اووك ننتظر ي عسل

[متعب الرياض]

انا اللي لفت نظري النك ...

مرشدة مغرروة .. الارشاد والتوجيه لايحتاج للغرور والكبر والترفع عن الناس ..

يحتاج تواضع .. تنازل .. اخلاق .. ادب

موفقه ياخيه

[زيدان9]

بانتظار الصور ....

بس حركة " البلاك بيري"

بالتوفيق ،،،

[زيدان9]

بعد إذن صاحبة الموضوع

الى الأخت :jωαнєя~♥
توقيعك :
تعلمِت مِن [ صدام ] أدوس عيآلَ الحـَرآمَ
مِن [ القذافي ] عدمِ الإ ستسلام .. =p


أعتقد ان هذا ابسط شيء من الممكن ان نتعلمه من رجل عظيم وقائد مجيد كالشهيد " صدام حسين المجيد "

تحية للجزء الأول من توقيعك ... وحرية الرأي مكفولة لك في جزءه الأخير
بالتوفيق ،،،

[معاني الوضوح]

با انتظار الصور

[مرشدة مغرورة]

شكرياااتي لكل من مر على موضووووعي ..
وتقديري و امتنااااني لكل من رد على موضوعي ..

[مرشدة مغرورة]

المشاركة الأصلية كتبت بواسطة متعب الرياض

انا اللي لفت نظري النك ...

مرشدة مغرروة .. الارشاد والتوجيه لايحتاج للغرور والكبر والترفع عن الناس ..

يحتاج تواضع .. تنازل .. اخلاق .. ادب

موفقه ياخيه

جزيت خيرا على الملاحظة ..
بس أنا كنت سكرتيرة ارشاااادية فقط لا غير و متواااااضعة جدا جدا .. طبعا بدون غرور ..
والنك جا من موقف صار لي وبعدين أطلقت على نفسي مرشدة مغرورة ..
وبس ..

[مرشدة مغرورة]

ان شاااء الله بحاااول مع هالصور ..