تجربتي فـ التسجيل بكلية سعد الأهليه

[Amina Saleh]

السلام عليكم و رحمة الله وبركاته
حابه أكتب لكم تجربتي فـ التسجيل و الإجراءت اللي بعد التسجيل .
و مايمنع انكم تشاركون وتكتبون تجاربكم ,

اول يوم رحت للكليه في رمضان استفسر عن النسب المطلوبـه
وعطتني الموظفه ورقـه فيها جميع الاوراق المطلوبه :
راح اكتب لكم :

الوثائق المطلوبه عند التقديم :
- الشهادة الثانويه
- نتيجة اختبار القدرات و التحصلي .
- 8 صور شخصيه
- شهادة اختبار الأيلتس .
- بطاقة التطعيمات
- اجتياز الفحص الطبي
- بطاقة الاحوال او العائله .
- جواز السفر
- موافقة ولي الأمر

من شروط القبول (النسبه) :

اللي يدخلون الاختبار [تحديد المستوى]

اللي نسبتهم بالقدرات والتحصلي عالمطلوب اللي يبونه وأعلى ..

القدرات والتحصيلي مطلوب فيها : من 70 وفوق

الثانويه مطلوب فيها : من 80 وفوق

يعني اللي اقل من النسبه المطلوبه راح تدخل التأسيس بدون الإختبار ,


و رجعت البيت فكرت فيهاا وقولبتها بمخي وموافقة اهلي؟
قررت اني اروح الكليه وأدفع رسوم التسجيل : 1000 ريال
و بعدها خذيت اوراق الفحص الطبي و رحت المستشفى أسوي التحاليل
وفي المستشفى وخلوني أدفع 200 ريال عشان أسون هالتحاليل !
دفعت وسويت المطلوب ..


و حددت لي الموظفه تبع سعد
يوم الاختبار لـ تحديد المستوى الي هو اليوم بـ هالتاريخ أدون لكم :

18 / 10 / 1436 هـ


وقت الأختبار على قولتهم يبدأ الساعه 8 الصباح
ولازم يكون فيه تأخير بالمواعيد و الحمد لله بدأ الأختبار فـ اثناء توزيع ورق الاختبار
تكون فيه ورقـه اسماء الطالبات عشان كل طالبه توقع جمب الأسم انها حاضره الأختبار
فـ لما وصلت عندي الورقـه مالقيت اسمي وخلوني انزل للإداره اشوف شسالفه
عاد انا على وجهي كنت احسب ان خلاص مالي قبول بالكليه
ولما سألت قالت لي ان اعفيناج من الإختبار لان القدرات والتحصيلي اقل من المطلوب
فـ راح ادرس تأسيس - نقول الحمد لله .
و رسوم التأسيس بالورق كاتبين 8500 ريال و اليوم سبحان الله صار 9100 ريال شامل الكتب !!!
طبعا انا ابي تخصص ادارة معلومات صحيه , فـ وحده تقول لي , رجعي اختبري
و المس الثانيه تقول لا ماتختبرين على طول تأسيسي خلاص .

وبس أتمنى أفدتكم وأنتم يالبنات أكتبو تجاربكم ,
ياليت تكتب كل وحده وش تخصصها عشان نعرف بعض
تكفون خن نصحصح القسم

[هادي القحطاني]

موفقه ي دوبااااااااااا

[احلام م]

موفقه
التأسيسي هي السنه التحضيريه ؟؟

[Amina Saleh]

^
على خبرتي ان الفونديشن هو تأسيسي تأهيلي لا يشمل ال 5 سنوات .
بالنسبه للتمريض ؟ فهو تحضيري والترم الثاني يكون التخصص .
ادارة المعلومات ؟ تأهيلي ترم ويوجد سنه تحضيريه .

[Roodi613]

السلام عليكم , بداية أشكرج اختي على هالموضوع
طبعا أنا راح اكتب لكم تجربتي عشآن أفيد المستجدآت واللي ناوين يسجلون ..
انا لما رحت أسجل سجلت في أول يوم دراسة بمعنى ثاني ( تسجيل متأخر ) وبالنسبة
لرسوم التسجيل المتأخر 1500 ريال .. دخلت شؤون الطالبات و سلمت لهم أوراقي و انقبلت
على طول الحمدلله .. طبعا فهموني كل نظام الكليه و إيش الشي اللي لازم نسويه و إيش
الشي اللي مفروض ما نسويه .. مثلا , اللبس عادي تلبسين أي شي بس ما يكون شفاف و
جوالات الكام ممنوع !!! عطوني ورقة التحاليل و رحت سويت التحاليل بعدها دخلوني غرفه
عشان أسوي مقابلة .. المقابلة عموما كانت ما تخوف نهائيا أسئلة بسيطة .. مثلا : ايش تعرفين عن التمريض ؟ ليش اخترتي التمريض ؟ هل كنتي تدرسين بمكان قبل ؟ وكذا يعني .. خلصنا مقابلة و طبعا ما اختبروني اختبار تحديد المستوى لأني سجلت متأخر ف دخلوني فاونديشن على طول ( الترم التحضيري ) .. غالبا دوام طالبات الفاونديشن يبدأ بعد طالبات التمريض بأسبوع .. الحين نتكلم عن ترم الفاونديشن .. ترم حلو و يعتمد عليك بشكل كبير , يعني كل ما تعبتي على نفسج أكثر و ذاكرتي عدل بتمشين عدل , ترم تاخذين فيه إنقلش بمهاراته الأربع( سبيكنق , لسيننق , ريدنق, رايتنق ) + مآث + علوم + مصطلحات طبيه + أخلاقيات الأنظمه الصحية + حاسب + مقدمه في التمريض . طبعا هذي المواد للي تبي تدخل تمريض أما بالنسبه للإدراه ف أنا آسفه ما عندي خلفيه عن موادها نهائيا . عشان تنجحين من الفاونديشن وتدخلين تمريض لازم تجيبين 70% و فوق في اختبار ال English PET واذا نجحتي تدخلين تمريض السمستر اللي بعده على طول .
أتمنى أكون أفدتكم بتجربتي البسيطة و Good luck all