قصص قصيرة_

[Rasselرسيل]

قصص قصيره (مفيده للكل )
مختصره
!________¤_________¤________!

1ببدا باول قصه ورأح يستغرب القارئ منها ~ باختصار ~
هذا طالب في الجامعه ثالث سنه اسمه حمد
وله خوات 9 الحمدلله 3 متزوجات
في يوم من الايام كانت لي صوره شبه حلوه شافتها اختي بدولابها حق الكتب تنظم كتبها ليوم الدراسي ،، أخذت صورتي معاها للمدرسه
وبالفسحه ،، تعطي صديقاتها صوره أخوها
~ اغلب البنات قالن شين ~
الا بنتين يقولن والله يجنن
وحده اسمها : شروق
والثانيه : اسمها : وجدان
وكانن يتهاوشن بينهن هذا زوجي والثانيه تقول لا لي انا
(مزح بنات ) طبعآ
الطالبه اللي كان معها صوره اخوها (ارجعت البيت)
وعلمت أخوها السالفه
وضحك آخوها
قال: ايهم العوبه
قالت أخته : وجدان عوبه
وشروق تحب اللي يحبها
قال : اي وحده تتوقعين انها تليق زوجه لي
( انهبلت أختي ) قالت : صدق
( قآل : نعم بخطبها )
قالت : شروق حلوه وانت اطول منها بس ملامحها تجنن (وصفتها لآخوها)
( الوصف أعجبني )
قآل: للوالد انه بيبخطب : قال (ياليتني افرح بك) شقتك فوق انا اثثها لك(بيتنا ملك)
الوالده : قالت : خلاص ودنا انت لاهلها نخطبها لك
أتصلت أختي على (شروق )
وقالت :بسير عليك انا وامي مشتاقه لك ياشروق
( قالت حياكم الله )
وصلت امي وأختي لبيت شروق
وحسب كلام الاهل
افتحت الموضوع الوالده لاهلها (وقالو نفكر ) واعترفت اختي لشروق على جنب قالت : انا قلت انك اعجبتي بالصوره ومدحتك له وانتي مايحتاج مدح طيبه وتستاهلين أخوي تراه مايقصر بوالديه ومعانا يأاخواته
( شروق تبكي فرح ) تقول لااختي انا تخيلت انه زوجي
(بس ماعلمت أحد)
وماتوقعت انه يطلبني للزواج
بس موقف غريب( انا موافقه )
بس باقي الوالد
والرجال وسوس ياربي هم يوافقون ولا لا
قالت الوالده : اهلها موافقين بس لازم تروح لابوها معك ابوك لانه يعرف ابوك زين
(وفعلأ) رحت انا والوالد لهم
جيت لابوها وقلنا اننا طالبين يد بنتك لحمد
(قال ابوها عز الله الساعه المباركه )
وسالت عنه فوق ماني خابره قريب للحاره واشوفه بالمسجد عسا الله يثبته
( وافق الوالد)
وجا شيخ التمليك
وسوا لنا (عقد نكاح)
وصار حفل ( التلبيسه )
والحمدلله تم زواجي من شروق
وكانت تقول صديقاتي انهبلن
يقولن لها ( اخو تغريد )
اللي بالصوره ( خطبك )
كنتي تتمنينه انتي ووجدان وخطبك انتي الف مبروك
الف مبروك ،واعزمتهن للعرس هي وتغريد،
(حتى وجدان افرحت وأحضرت الزفاف )
والحين عنده ولد اسمه
( عايد ) على اسم الوالد
وكان هذا الزواج بدايته صوره
( لكن الحمدلله عاشو حياه سعيده والله يسامح كل حاسد)
__2____________________________
كان مره في واحد من ديره قريبه للرياض محافظه الخرج
كان توه متزوج عريس الرجال وعنده سياره ددسن جدديده2003
ومستاجر شقه بالخرج موظف عسكري بالقاعده الجويه الرجال ساكن فوق عند جيرانه من بعد عرسه (بثلاث شهور) وبيوم من الايام اعزموه على عشاء
(تمايم ولد ولدهم الكبير)
جالس هو بالمجلس مع الرجال المعزومين
(جا ولد جارهم عمر ناداه على جنب
قال: ابي مفتاح سيارتك بحط صحون العشاء بالحوض
(قال ابشر وعطاه:بس المفتاح بميداليه وفيها مفاتيح شقته والباب اللي تحت )
ولاانتبه للشي: كان مستعجل ولد الجيران )مراهق(
راح بددسن جارهم وشاف المفاتيح ولعب به الشيطان
( نسخ على المفاتيح )
ورأح اخذ صحون العشاء وراح أخذها للبيت
(نزلو صحون العشاء )
وقلطوه للرجال ¤ ولد جارهم وصل المفاتيح لراعي الددسن
(وتعشو الرجال من نعمه الله )
جلسو ساعه بعد العشاء وكلن قام يطلع
رأح جارهم اللي فوق لبيته وجت بعده بربع ساعه زوجته
ويتكلمون يقولون والنعم بجارنا وهذيك تمدح الحريم وهو يمدح الرجال ¤¤ نام الزوجين وصحا زوجها الصباح الساعه7 يبي يداوم افطر وطلع لشغله (زوجته سكرت الباب وارجعت نامت) الساعه 10فتح باب الشقه كان ولد جيرانهم اللي راح يجيب صحون العشاء
مشا شوي شوي الى ماوصل غرفتها :
( فتح باب غرفتها بدون حس)
قرب للسرير والزوجه لابسه لبس خاص للزوج (روبه)
حست بحركه للبطانيه وقامت
((( ماصرخت ))) قالت معقول شكلي انا قاعذه احلم
تقوله: اللي انا معجبه فيه أشوفه قدامي
:: قال :: انا حاس من نظرأتك لي يوم تكوني مع زوجك احسها نظرأت حنان
((( خيييييانه ))) زوجه لزوجها
)فصخت قدامه ) وقالت بسوي قهوه عموري : اسمه عمر :
قال اي بتقهوا انا وانتي بنسا همومي معاك
رأحت للمطبخ وهو راح معاها بس مانتبه لحركاتها مشغول بالنظرات لجسمها :
وهي آخذت دله قهوه
)عبتها زيت(
وبريق الشاي : (عبته زيت(
وحطتهن على النار وغلتهن غلي صارن حارات مررررره
واخذتهن للمجلس وراح معها هو جالس على )الكنب( هي واقفه تصب الشاي (زيت الحار( (وقهوه(بعد
اول مامسكت دله قهوه
(افتحت الغطا اللي فوق وانثرت الزيت على راسه وقام يصيييييح صيأح ازعج ثالث بيت بالحاره وكملت عليه ببريق الشاي الى مانصرع
(اتصلت على زوجها وقالت تعال ضروري)
جا زوجها : وقالت السالفه واكبرت بعين زوجها
وتشوه الولد وصار مايتكلم واخذو زوجته للتحقيق واطلعت بالحق لها وكان والده جارهم الشايب يقول لو اذبحته انا متنازل(وتبرا من ولده) وسكن جارهم راعي الددسن على طول ببلاش وقال زوجتك والله وعن سبعين رجال مثلي
وسوالهم عشا وقال الردا بولدي مو فيكم

(وعاش الزوجين حياه سعيده)
الله يديم محبتهم
القصه كانت مختصره
_________"_________"________3_ قصه ثالثه
كل شي واضح بس الخافي اعظم
هذا واحد قبيلي عشق بنت قبيليه (خلود) القحطاني__وكان يموت بتراب اللي تمشي عليه وهي كان كل حياتها هذا الشخص (عامر) الرشيدي لكن كيف تعرف عليها تابع القصه من طق طق لسلام عليكم،،،!
كان عامر دكتور في احد المستشفيات الخاصه مثل
) مستشفى التآمينات(
كان (عامر) يدور البنت بوصفه هو يتخيلها عشان يتزوج منها
على سنه الله ورسوله
كان موجود (عامر) بالمستشفى وجاءت سياره الاسعاف شايلين معهم بنت معها اخوها كبير دخلوها على الدكتور (عامر) بالعنايه المركزه
(وماعلى المريض حرج)
يعني لو يشوف كل شي فيها حلال بس يغض البصر ولد الناس وكانت أثر حادث الحمدلله مافيها الا جروح ونزيف خارجي وتنومت بالمستشفى وكان الدكتور يزورها وعلمها انه هو اللي كان تحت عنايتها وكان تبي تطلع من المستشفى وتفاهم معها قبل لاتروح وقال بتزوجك
( صارت تحبه )
طبعا الكلام بالمستشفى ولما اطلعت من المستشفى أتصلت عليه وماصدق انها اتصلت
بس وش قالت له
( كل الشباب نصابين ) يكذبون على صديقاتهم يقولون بتزوجك وهم كذابين
قال( عامر )
وين بيت اهلك بطلب منهم الزواج منك
وصفت له البيت وجاهم هو والوالد والوالده
قلطو عند اهل البنت(خلود)
واطلبو بنتهم لولدهم (عامر)
وارفضو قالو انتم ماأنتم منا
عيب نزوج غير ولد عمنا
واطلعو بكسحه اوجيه
ورأح عامر للأمام المسجد
وقاله ياشيخ تكفا اقنع ابو البنت اللي بخطبها ان التنابز بالالقاب حرام انا ابي البنت بس رفضني اني (رشيدي) قال الشيخ ابشر بروح انا وياك ومعنا كم مطوع
وراحو وقلطو وتكلمو مع ابو شبيب وشهد له الشيخ ان ( عامر ) دايم يصلي بالمسجد وافي لامه وابوه
(وان الصلاه تهدئ قلوب المؤمنين)وموظف ودخله الشهري 8الاف
كالعاده رفض واطلعو من البيت !!!!!!
والبنت (خلود) عندها خبر انه جا اكثر من مره
راحت لابوها وقالت والله ما اخذ غيره انا تمنيت اني اتزوج دكتور و الحين ماتبون اتزوجوني
اتصلت (خلود) على (عامر)
وقالت بنحاش معاك : وين ماتبي انروح نروح
خاف وقال لا بجي عند ابوك الى مايوافق : وجاهم مره ثالثه ومعه عمه وكان عمه واصل( كان تقريبا مساعد وزير)
وناس واصلين من اصدقاء وقرائب واطلبوه القرب وضل رافض وقال وش يقولون عني الجماعه لو أزوج الغريب
قاله وأحد من اصدقاء(عامر)
كل بيت له ستره وانت لو تحتاج جماعتك اللي تقول وش بيقولون عنك لو زوجت بنت لعامر يابو شبيب لو احتجت شيخكم صد عنك ولاكنه شافك
ويابو شبيب ترا كل بيت له ستره
و تربيته،
وشاف ان كلامهم صدق
وقام ابو شبيب وقال انا موافق بس كيف اعيالي كان اثنين كبار والباقي بنات
كانو موجودين عياله
سالهم (عامر) أنا فيني نقص ياشبيب وعلي قالو
لاعز الله بك الخير وحنا نمثل نفسنا مانمثل الجماعه اذا انت رجال تصلي وطايع لربك واهم شي والدينك حنا موافقين
تمت الموافقه
وفرحت ( خلود )
وعطا اهلها مهر وكان الزفاف في قأعه فخمه وحضر ناس كثير
وعأش عامرو خلود حياه مطمئنه وسعيده
تحققت امنيه عامر عسا الله يسعد اوقاته
وتحققت امنيه خلود
والف مبروك لهم
ملاحظه :
((( الناس اللي تتبع الاصول واللي يقولون مانزوج غير من نفس القبيله مابهم خير
( كلنا لأدم وادم من تراب )
البنات اكثر من الرجال ويعنسن وتقابل وجه ابوها أذأ ماتزوجت
ولايهمك حكي الشاعر
تراه وناسته بالقصيد
وشكرأ لكل من تابع هالقصه
_____________________________
4_
كان في اثنين شباب اصدقاء من يوم كانو يدرسون رابع ابتدائي والزين والشين مرو عليه
وأحد اسمه (احمد )
وألثاني اسمه ( ماجد)
وطبعا هم كبار وموظفين
حمد موظف بوزاره الصحه
وماجد موظف بهيئه المواصفات والمقاييس(علامه الجوده)
كانو بنفس العمر كلهم
وبعد من جماعه وحده
كل وأحد فيهم يبي يخطب بنت فلان والكل يتحدا عليها
كان ماجد فاضي باأحد الايام
واخذ الوالدين وراح يخطب من اهلها وعلموه انه موظف وقادر يشيل نفسه وقد المسؤليه وارفضو بسبب ان البنت تبي تكمل دراستها بعد اسبوع راح لهم (احمد) ومعه اهله بعد
وعلموه انه موظف ويصلي ويطيع كل اهله وقالو ( نفكر )
بعد مده راح (احمد) واهله وقالو اذا عشان دراسه بنتكم ننتظرها لما تخلص وتتخرج من الثانوي
قالو خلاص حنا موافقين
واتفقو ببدايه العطله يملكون
(استانس حمد اول ماعلم ماجد)
قال : خطبتها واهلها وافقو
قال: ماجد مبروك مبروك
وفيه حزن قال (حمد) أشفيك
قال (ماجد) تكفا ياحمد فيني نقص شكلي يخرع ولا ماضيي اقشر قاله (حمد) أشفيك
قال (ماجد) خطبتها قبلك باسبوع وارفضوني
انهبل (حمد) يحسب انه سابقه
قال والله اني ماخطبها ولعيونك تكرم مدينه (قال ماجد) لا اخطبها وانا اجي عرسك قبل لاتجي انت قال (حمد) البنت انخبرها انا وانت من يومنا اصغار ومزيونه واهالينا امدحوها بس والله ماني من ظهر رجال ان خطبتها
وفعلأ ماخطبها
بس (ماجد ) وش سوا ؟؟
قال يا(حمد) لو أخطب منكم تردني قال انا موافق بس رأي البنت وابوي غير
ولا عني انا موافق
قال (ماجد) بجيكم انا واهلي ونشوف رضا والدينك ورضا البنت
وجا (ماجد) وقلط عند ابو حمد
ويعرف ابو حمد انه صديق ولده وقال ماجد انه طالب القرب منهم ويبي يخطب قال ابو حمد والله ولدي دايم يمدحك وابوك اعرفه من زمان وحنا مانقطعنا كلنا من جماعه وعز الله الساعه المباركه
وشافو رآي البنت ووافقت بعد ماتخلص الثانوي وكان اخر سنه
وبعد ماتخرجت من الثانويه جا شيخ وملك لهم وتزوج (ماجد) اخت صديقه حمد وعأشو حياه تسعدهم
و(حمد ) خطب وحده من الجماعه بس اهلها بمنطقه ثانيه وكان زفافه بعد زفاف صديقه باأسبوع والحمدلله كل وأحد فيهم قدر يكون نفسه والله يستر عليهم ويسعد حياتهم
_____________________________
قصه5
للحب ذكرى وللشوق عنوان
وللغلا صوره وللحزن هم مكسور
(كان في واحد اسمه طلال)
وساكن مع اهله ببيت ملكهم
في حاره وكان طلال بيوم من الايام جاي من دوامه بوقت الظهر الساعه تقريبأ 1:30 وهو نازل من السياره
وشاف ولد صغير مره بالشارع قدام بيت اهله (اخذه طلال)
وجا بيدق الجرس وفجأه وهو ماشي ولا شاف بنت بوجهها سحاب ونور قمر (طلال نزل الولد عند الباب)
وقال انتبهو للولد (قالت البنت) يعطيك العافيه ( وراح طلال)
بس قعد يفكر بالبنت وكان يفكر انها تكون زوجته وصار موسوس (يمكن امه) يعني متزوجه ( لالا) لازم اقول لا أهلي عن البنت وعلمهم بالسالفه وعن البنت
(وصفها لخواته)
وقالو هذي تصير خاله الولد اللي انت شفته وتدرس بالكليه
قال متاكدين (قالو نعم)
قال ابيكم تخطبونها لي
(قالت ام طلال)
انت صادق ياولدي
قال اي نعم ابي البنت اللي شفتها (قالت امه خلاص)
بعد كم يوم راحت ام طلال تخطبها له اجلست عند اهلها وقالت نبي نخطب فلانه لولدنا طلال (قالت ام البنت انا موافقه)
وشوفي رأي البنت اسالوها
وأخذو رأئيها وقالت (موافقه)
باقي الوالد ( راح له طلال ) هو والوالد وقال (انا موافق)
بس الله الله بنتنا (انتبه لها)
ولو تسكن بحوش البيت انتم فيكم خير وأنا عارف والدك زين ياطلال (استانس طلال)
وقال بيتنا وبيتك كلها بيت اهلي وحنا مانبي غير قربكم وانشالله اني برفع راسك
(ودفع لهم المهر حسب الاتفاقيات
(ملكو عند الشيخ بالمحكمه)
وصار الزفاف في احدى القاعات بالمنطقه الشماليه
وسكن خالد بشقه فوق بيت اهله وعاشو حياه مليئه بالزهور
وماحد قصر مع الثاني
تبادلو الحب والعطاء
وقال طلال لزوجته وين الولد اللي شلته لبيتكم
(بجيب له هديه)
واعترف انها من شافها حلف الا يخطبها

ملاحظه :
القصه مختصره

[(تع أعطMي بت)]

يسلممموو ياقلبي ع القصص رووعه ومتعوب عليه
تقبلي مرور اختك

[Rasselرسيل]

فديتك وفديت مرورك يالغلا

[ذكرى]

قصص رووووووووووعه

تحمل تفاؤب جمييل

سلمتيييييي

[Rasselرسيل]

ثانكس دلبووو

[اميره في دنيتي]

يسلمممممممممممممممممممووو

تقبلي مروري
يالغلاااا

[ღMs.Kღ]

يسلموو ..



<=== تقبلي مروري

[Rasselرسيل]

تسلمولي عالمرور