اي سؤال عن الكلية والحياة في الكلية ..انا موجود

[عايض القحطاني]

السلام عليكم

بما ان الاسئله كثرت عن الكلية والمواضيع كلها تتكلم عن الموضوع نفسه.
فتحنا الموضوع هذا علشان اللي عنده اسئله غير اكاديميه واكررها غير اكاديميه يضعه هنا ونحن جاهزون للاجابه



دمتم بود ...............

[ابـوخليـل]

ياااسلام عليك جيت في وقتك

استلم :hahaha_2008:

1- كلمنا عن الدكاتره في الكلية من ناحية : جنسياتهم - اخلاقهم وتعاملهم - شرحهم - اختبارتهم

2- كلمنا عن التخصصات التالية : هندسة كهربائية , ميكانيكية , كيميائية .. من ناحية السهولة والصعوبة وايهم اصعب وايهم اسهل وايهم عليه طلب في التوظيف

3- نصائح للطلاب المستدجين امثالي :hahaha_2008: في اول ترم لهم ..

4- كلمنا عن اخطاء عملتها في اول ترم لك وندمت عليها


5- وجهة نظرك بشكل عام عن كلية الجبيل الصناعية .. هل انت مرتاح لها ام لا .. لانه في ناس اذا انذكر طاري كلية الجبيل قالوا اعوووذ بالله .. فماهي وجهة شخصكم الكريم من هذي الناحية

ولو فيه اسئلة ثانية راح اقولها :mh19:

شكرا لك

[ابـوخليـل]

محاضرة البدنية كيف طريقتها ؟

مثل الثانوي والمتوسط نغير ملابسنا في الكلاس ونطلع للملعب ونرجع ونكمل محاضرات

هل هي الساعة 11 الظهر مثلا

او العصر او بأي وقت ؟

وش نسوي فيها نلعب كورة ولا لياقة ولا سلة ؟

لازم نلبس لبس رياضي او بلباسنا :o3: ؟

[المرزوقي]

ماقصر اخوي النبراسي جاب كل شي ننتظر الجواب حبيبكم

[فصولي القحطاني]

اخوي اشكر جهدك الرائع ولك مني كل التقدير والاحترام....

حبيت اسالك عن اوقات الدوام يعني اقدر اغير اوقات دوامي او كل الطلاب على نظام واحد


تحياتي لك وشكرا

[أبـو طـيف]

لا هنت بسألك ..

كم النسبه المتوسطه لطلاب الكليه بالثانويه ..

يعني كم متوسط النسب اللي قبلتهم الكليه ..

لأني بشوف نفسي مقارنه معهم .. مرتفع أو منخفض ..

والقدرات بعد لا هنت ..

ومعليش ممكن السؤال موقعه غلط .. بس حب أطلاااع .. وإذا جاوبت بكون شااكر لك ..

[عايض القحطاني]

السلام عليكم

والله انكم ريحتوني كنت ماني متوقع بيصير طلب على الموضوع بس ابشروا بسعدكم وانا حبيبكم

اولا نبدا بالنبراسي واسئلته
الدكاتره من انواع الجنسيات يعني بتلقى امريكان وبريطانيين وجنوب افريقيين واستراليين ومصريين وهنود وبنقلادشيين وعراقيين وهولنديين فلسطينين يعني كل جنسية بتطري على بالك بتلقاها وخاصة في مبنى اللغه الانجليزيه واخلاقهم قمة في الاخلاق لان الكلية تمنعهم من اشياء كثيره مثل السياسه والديانات والكلام اللي من السرة وتحت

شرحهم ممتاز وعلى حسب نوعية المدرس بس انا اللي شوفه من المدرسين اللي درسوني انهم اوكي وماشي حالهم لان الكليه منقيتهم
واغلب الاختبارات موحده مثل المياجر اللي هي الاختبارات الشهريه والفاينل وهي اسئله موحده اما الكوزات على حسب المدرس بعضهم سهل وبعضهم صعب

اما من ناحية التخصصات

فكل تخصص له ايجابياته وسلبياته وكلها مطلوبه وتوظيفها ان شاء الله مضمون


نصائح لاول ترم


انك ماتعود نفسك على الوناسه 24 ساعه يعني لازم تضغط على نفسك اقل شي يوميا ساعه مذاكره علشان ماتروح فيها ولاتخلي الطلاب الفاشلين قدوتك في الكلية وتقول في نفسك العالم هاذي كلها داجه وانا بروح فيها ومن الكلام ذا
وابيك تدور صحبه زينه لان اذا صاحبيت ناس رايحين فيها اعلم انك بتصير مثلهم لانهم يخالطونك اغلب يومك
ونصيحه مهمه انتبهوا من التدخين تسعين في الميه من طلاب الكلية مدخنين تعال شوفهم في البريكات شلون يدخنون يحرقون حرق غير طبيعي انتبهوا انتبهوا انتبهوا


اخطائي اللي ندمت عليها

الحمدلله انا كنت ماشي كويس بالتحضيريه واللي ندمت عليه هو اني نجحت على الحفه في الرياضه


وجهة نظري بالكلية انها كليه كرهتها في التحضيريه وندمت على اني دخلت لها ولكن عقب التخصص حبيتها قسم بالله اني اذا رحت في الاجازات اشتقت لها ولكرفها وللشباب اخوياي وجوها اللي هو فعلا جو دراسه .

محاضرات التربيه البدنية

فيه مكان تغيير الملابس في الملاعب واحضر بدلتك معك في كيس وبدل في الملعب . واذا كان عندك محاضره عقب الرياضه المدرب راح يعطيك وقت تبدل وتروح ويمكن مايكون عندك محاضره لان الدعوه ماهي دراسة ثانويه ممكن يكون عندك محاضره ويمكن لا ...

وقت المحاضرات ماراح يفرق معك لانك في الصيف راح تلعب في الصالات المغلقه وفي الشتاء راح تلعب في الملعب الاخضر او الملاعب المكشوفه يعني عصر صبح ظهر ماراح تفرق معك ...

انواع اللعب كرة سله وتاخذ فيها كورس وكرة قدم وتاخذ فيها كورس وكرة طائره وراح تاخذ فيها كورس

اما من ناحية اللبس الرياضي لازم تجيب معك لبس رياضي اهم شي يكون ساتر للعورة وانه مايكون حركات شباب هاليومين مثل البرمودا ومن الخرابيط ذي ولا يشترط فيها لون موحد




ننتقل لاسئلة اخوي فيصل هشام

تغيير الدوام مااذكر احد غير جدوله بالتحضيريه الا اللي عنده ظروف يعني اللي اذكره انا غير جدوله هو واحد من الشباب يبي يدرس مع اخوه التوام في نفس الفصل لانهم يجون على سيارة وحده من بيتهم وغيروا له

وليس كل لطلاب في مكان واحد يعني بعضهم يدرس الصباح في مبنى اللغه الانقليزية الى لظهر وعقبها يروح للمبنى الثاني يدرس مواد ثانيه او يروح للصالات المغلقه يلعب رياضه وتكون الجداول موزعه بحيث مايكون زحمه داخل مبنى اللغه الانقليزية وفي نفس الوقت الملاعب تكون فاضيه يعني فيه ترتيب كويس ولا تخاف السنه التحضيريه ينتهي دوامهم ثلاث الا عشر العصر



ننتقل لاخوي ابو طيف


اخوي النسبة تختلف من ترم الى ااخر يعني انا يوم انقبلت كانت الثمانينات وانا كانت نسبتي في التسعينات يعني كنت من اول المقبولين وكل ترتفع اكثر من الترم اللي قبله

اما من ناحية اختبار القدرات مااقدر افتيك بشي لاني قابلت ناس واجد في السبعينات وناس في الستينات بس نسبهم بالثانوي مرتفعه ولقيت ناس نسبهم في الثانوي نازله يعني ب80 وحولها لكن القدرات 92 يعني على حسب كل درجه تشفع للثانيه القدرات يشفع للثانويه والثانويه تشفع للقدرات



اتمنى اني اكون افدتكم جميعا واذا فيه اي تقصير ياليت تقولون لي واللي عنده اسئله يسالني لان والله ماتدرون كيف انا فرحان وانا ارد عليكم


تقبلوا تحياتي ............حبيبكم

[عاطل بجداره]

السلام عليكم الله يعطيك العافيه

انا عندي سؤال ليه نجحت على الحافه في التربيه البدنيه وكيف تنحسب الدرجات فيها

والسؤال الثاني الي يدخل الكليه لازم يكون فاهم انقليزي والا يبدون من جديد :c8:

[ابـوخليـل]

يامال العافية ماقصرررت
الله يرزقك الجنة


اجابات شافية ووافية

[فصولي القحطاني]

الله يعطيك العافيه اخوي

بس حبيت اسوي لك تعدي:t1:ل
انا اسمي فيصل هاشم مو (فيصل هشام )


تحياتي لك يعطيك العافيه ع الاجابات المميزه